ལབ་གླེང་དང་འགྲན་རྩོད་ཁྲོད་ནས་ཁ་སང་ཨ་རིའི་གཟའ་ཉི་མའི་ཉིན། ནེའུ་ཡོག་དང་ནེའུ་ཇིར་སི་ས་གནས་བོད་ཀྱི་གཞོན་ནུ་ལྷན་ཚོགས་སྐབས་བཅུ་གསུམ་པའི་རྒྱུན་ལས་རྣམས་གསར་འདེམས་གནང་ཡོད་འདུག
ཐེངས་འདིར་ས་གནས་ཁག་འདྲ་མིན་ནས་ཕེབས་པའི་མི་མང་ ༡༥༠༠ ཙམ་འདུ་འཛོམས་བྱུང་ཡོད་པ་ལས། ཁག་ཅིག་ལས་བྲེལ་གྱིས་སྔ་ཐོན་བྱེད་དགོས་པ་དང་ཁག་ཅིག་རྗེས་ལུས་ཐེབས་པ་བཅས་ལ་བརྟེན་ཏེ། མཐར་དངོས་སུ་འོས་འཕེན་པ་ ༡༠༠༨ བྱུང་ཡོད་འདུག
ཐེངས་འདི་ནི་བྱང་ཨ་རིའི་ལོ་རྒྱུས་ཐོག་གི་ས་གནས་གཞོན་ནུའི་འོས་བསྡུའི་ཆ་ཤས་ལེན་མཁན་མང་ཤོས་དེ་ཆགས་ཡོད་པ་དང་། དང་བླངས་འོས་མིར་ལངས་མཁན་ ༢༢ བྱུང་ཡོད་འདུག
འོས་འདེམས་ལེགས་འགྲུབ་བྱུང་རྗེས་ས་གནས་ཀྱི་གཞུང་འབྲེལ་མིན་པའི་ཚོགས་སྡེ་ཁག་དང་མི་མང་བཅས་ཀྱིས་རྒྱུན་ལས་གསར་པ་རྣམས་ལ་ཁ་བཏགས་སྒྲོན་འབུལ་ཞུས་ཡོད་འདུག
ཐེངས་འདིར་འོས་ཐོན་བྱུང་བའི་རྒྱུན་ལས་དག་གི་འོས་གྲངས་ནི། འཇམ་དཔལ་བསྟན་འཛིན་ལ་འོས་གྲངས་ ༥༦༠ དང་། ངག་དབང་དཔལ་ལྡན་ལ་འོས་གྲངས་ ༥༤༡། བསྟན་འཛིན་གྲགས་ལྡན་འོས་གྲངས་ ༥༣༥། ནོར་བུ་བསམ་གྲུབ་འོས་གྲངས་ ༥༣༤། བསོད་ནམས་ཆོས་འཛོམས་འོས་གྲངས་ ༥༣༡། བསྟན་འཛིན་པ་སངས་ལ་འོས་གྲངས་ ༤༩༤། བསོད་ནམས་ཚེ་རིང་འོས་གྲངས་ ༤༨༣། སངས་རྒྱས་བཀྲ་ཤིས་འོས་གྲངས་ ༤༥༥། ཀུན་དགའ་ནོར་བུ་འོས་གྲངས་ ༤༣༩། སྒོར་གོ་བསྟན་དབྱངས་འོས་གྲངས་ ༤༣༥། ཡེ་ཤེས་རྡོ་རྗེ་འོས་གྲངས་ ༤༣༡ བཅས་ཐོབ་ཡོད་འདུག
ཐེངས་འདིར་འོས་ཤོག་ཞིབ་བཤེར་གནང་མཁན་ཨ་རིའི་རླུང་འཕྲིན་ཁང་གི་རྣམ་རྒྱལ་ཤཱསྟི་དང་། གཞོན་ནུའི་ཚོགས་གཙོ་ཟུར་བ་སྒོ་དྲུག་སྐལ་བཟང་ཕུན་ཚོགས་སོགས་ཡིན་འདུག འོས་འདེམས་རྗེས་རྒྱུན་ལས་གསར་པ་ཚོ་ནང་ཁུལ་འཛོམས་ཏེ་དེ་སྔའི་ས་གནས་གཞོན་ནུའི་ཚོགས་གཙོ་ངག་དབང་དཔལ་ལྡན་ལགས་བསྐྱར་དུ་ཚོགས་གཙོར་བསྐོ་བཞག་གནང་ཡོད་འདུག
ད་ལོའི་གསུམ་བཅུའི་དུས་དྲན་ཉིན་ཨ་རིའི་ནེའུ་ཡོག་གི་མི་མང་གི་སྐད་འབོད་སྐབས་རྙོག་གླེང་ཞིག་བྱུང་བར་བརྟེན་ཏེ། ཟླ་སྔོན་མའི་ཚེས་ ༣༠ ཉིན་དབུས་བོད་ཀྱི་གཞོན་ནུ་ལྷན་ཚོགས་ཀྱིས་ནེའུ་ཡོག་དང་ནེའུ་ཇིར་ས་ས་གནས་གཞོན་ནུ་ལས་དོན་ཐོག་ནོར་འཛོལ་ཤོར་ཡོད་སྟབས། ས་གནས་གཞོན་ནུའི་ཚོགས་གཙོ་ངག་དབང་དཔལ་ལྡན་ལགས་ཀྱིས་ལས་གནས་ནས་དགོངས་པ་ཞུ་དགོས་པ་མ་ཟད་གཞོན་ནུའི་ཚོགས་མིའི་ཁོངས་ནས་ཀྱང་འཐོན་དགོས་པའི་གསལ་བསྒྲགས་སྤེལ་ཡོད།
ཕྱི་ཚེས་ ༣༡ ཉིན་ནེའུ་ཡོག་དང་ནེའུ་ཇིར་སི་ས་གནས་གཞོན་ནུའི་རྒྱུན་ལས་ཀྱིས་དབུས་ལ་ཡི་གེ་ཞིག་བཏང་སྟེ་དབུས་ཀྱི་བཀོལ་ཁྱབ་གཞོན་ནུའི་སྒྲིག་གཞི་དང་འགལ་ཡོད་སྐོར་བརྗོད་ཡོད་འདུག་ཀྱང་། ཕྱི་ཟླ་ ༤ ཚེས་ ༡༤ ཉིན་མི་ནེ་སོ་ཊ་དང་ཝ་ཤིན་ཊོན། སིན་ཧྥ་རན་སེ་སི་ཁོ། པོར་ཊི་ལན་ཌི། སི་ཨ་ཊྲལ། ཊོ་རོན་ཊོ་སོགས་ས་གནས་ཁག་ ༧ གྱིས་དབུས་གཞོན་ནུའི་ཐག་གཅོད་དེར་རྒྱབ་སྐྱོར་ཡོད་པའི་ཡི་གེ་ཞིག་ཀྱང་བཏང་ཡོད་འདུག
ད་ལོའི་གསུམ་བཅུའི་དུས་དྲན་ཉིན་གྱི་ཉེའུ་ཡོག་ཏུ་སྐད་འབོད་གནང་ཕྱོགས་ཀྱི་རྙོག་གླེང་ཐད། ཟླ་འདིའི་ཚེས་ ༣ ཉིན་ཨ་རིའི་སྐུ་ཚབ་དོན་གཅོད་མཆོག་དང་བྱང་ཨ་རིའི་སྤྱི་འཐུས་རྣམ་གཉིས། དེ་བཞིན། བོད་རིགས་སྤྱི་མཐུན་ཚོགས་པ་དང་ས་གནས་གཞོན་ནུ་དང་བུད་མེད། ཆུ་བཞི་སྒང་དྲུག བོད་རང་བཙན་སློབ་ཕྲུག་ཚོགས་པ། ཨ་རིའི་བོད་ཀྱི་མཐུན་གྲོགས་ཚོགས་པ་བཅས་ཀྱི་སྐུ་ཚབ་ཚོགས་བསྡུ་བསྐོངས་ཏེ། མ་འོངས་པར་གསུམ་བཅུའི་དུས་དྲན་དེ་ས་གནས་བོད་རིགས་སྤྱི་མཐུན་ཚོགས་པའི་གོ་སྒྲིག་གནང་སྟེ་གཞུང་འབྲེལ་གྱིས་སྲུང་གཙི་དང་སྐད་འབོད་དང་གཏམ་བཤད་སོགས་ཀྱང་བོད་མིའི་འཐབ་རྩོད་དང་ཆིག་བསྒྲིལ་མཚོན་པ་གནང་རྒྱུར་སྤྱི་མོས་གྲོས་ཆོད་བཞག་ཡོད་འདུག
སྒོ་དྲུག་སྐལ་བཟང་གིས་སྔོན་གཏམ་བཤད་ཅིག་ཏུ་ཁོས་ཐོག་དངཔོ་དབུས་གཙང་རང་བཙན་གཙང་མ་བླངས་རྗེས་རིམ་གྱིས་མདོ་སྟོད་སྨད་ལེན་གི་ཡིན་ལབ་པ་རེད།ཧཧཧ་རང་བཙན་གཙང་མ་ལེན་རྒྱུ་ཡིན་ལབ་མཁན་ཚང་མ་ཨ་རི་ལ་སླེབས་འདུག་ག