ཉིན་ཞིག་ཁྱེད་ཅག་གིས་མཛེས་སྡུག་ལྡན་པའི་ཕ་ཡུལ་བོད་མཐོང་ཐུབ་པར་ཡིད་ཆེས་ཡོད།

དེ་རིང་ཉིན་རྒྱབ་བོད་མིའི་སྐྱབས་མགོན་༧གོང་ས་མཆོག་དང་ཡེ་ཤུའི་ཆོས་དཔོན་ཀྲའུ་ཀྲའུ་རྣམ་གཉིས་དྷ་སྟེང་བོད་ཕྲུག་ཁྱིམ་སྡེར་ཕེབས་ཏེ། ༧གོང་ས་མཆོག་དགུང་གྲངས་ ༨༠ བཞེས་པའི་འཁྲུངས་སྐར་དགྱེས་སྟོན་དང་འབྲེལ་ཏེ། སློབ་ཕྲུག་ཚོ་ལྷན་དུ་འགྲོ་བ་མིའི་རིགས་ཀྱི་བཟང་སྤྱོད་དང་ལུས་སེམས་ཀྱི་བདེ་སྐྱིད་སྐོར་ལ་གསུང་བཤད་དང་དྲི་བ་དྲིས་ལན་གནང་སོང་།

དེ་རིང་ཕྱི་དྲོའི་ཆུ་ཚོད་ ༢།༣༠ ཐོག་དྷ་སྟེང་བོད་ཁྱིམ་ལག་རྩེད་སྤོ་ལོ་རྩེད་ཐང་དུ། ༧གོང་ས་མཆོག་དང་ལྷོ་ཨ་ཧྥི་རི་ཀའི་ཡེ་ཤུའི་ཆོས་དཔོན་ཌེ་སི་མོན་ཀྲའུ་ཀྲའུ་(Desmond Tutu)རྣམ་གཉིས་ཞབས་སོར་བཀོད་དེ། བོད་ཕྲུག་ཁྱིམ་སྡེའི་སློབ་ཕྲུག་ཚོར་བཀའ་སློབ་གནང་བ་དང་སློབ་མ་ཚོ་དང་དྲི་བ་དྲིས་ལན། ༧གོང་ས་མཆོག་ཕྱི་ལུགས་ལྟར་དགུང་གྲངས་ ༨༠ བཞེས་པའི་འཁྲུངས་སྐར་དགྱེས་སྟོན་བཅས་མཛད་སོང་།  

མཛད་སྒོ་དེའི་སྟེང་བོད་མིའི་སྒྲིག་འཛུགས་ཀྱི་ཆོས་རིག་དང་ནང་སྲིད། དཔལ་འབྱོར་ལས་ཁུངས་བཅས་ཀྱི་བཀའ་བློན་རྣམ་པ་དང་། བོད་མི་མང་སྤྱི་འཐུས་ཚོགས་གཙོ་ཚོགས་གཞོན། གཞན་སྤྱི་འཐུས་རྒྱུན་ལས་རྣམ་པ་དང་། བོད་མིའི་སྒྲིག་འཛུགས་ལས་ཁུངས་ཁག་གི་དྲུང་ཆེ་ཆུང་། དྷ་སྟེང་བོད་ཁྱིམ་གྱི་དགེ་ལས་སློབ་ཕྲུག་དང་དྷ་ས་ཁུལ་གྱི་སྐྱ་སེར་མི་མང་། གཞན་ཕྱི་རྒྱལ་བ་བཅས་ཁྱོན་མི་ ༣༥༠༠ ལྷག་འཛོམས་སོང་།

ཐོག་མ་༧གོང་ས་མཆོག་དང་ཌེ་སི་མོན་ཀྲའུ་ཀྲའུ་མཆོག་དྷ་སྟེང་བོད་ཁྱིམ་དུ་ཞབས་སོར་བཀོད་སྐབས། སློབ་ཕྲུག་ཚོས་ཕེབས་བསུའི་གླུ་དབྱངས་བརྒྱད་བཅུའི་དབྱངས་སྙན་འབུལ་དཀྲོལ་དང་གྲོ་སོ་ཕྱེ་མར་འདེགས་འབུལ་ཞུས་རྗེས། སློབ་གྲྭ་ཆུང་བའི་དཔེ་མཛོད་ཁང་དུ་གདན་ཞུ་དང་། སློབ་ཕྲུག་ཚོས་བདེ་སྐྱིད་དང་དགའ་སྤྲོའི་བརྗོད་གཞིའི་ཐོག་བྲིས་པའི་རྩོམ་ཡིག་དང་རི་མོ་སོགས་ལ་གཟིགས་ཞིབ་གནང་སོང་།

དེའི་རྗེས་རྣམ་པ་གཉིས་སྤོ་ལོ་རྩེད་ཐང་གི་ཞབས་སྟེགས་སུ་འཁོད་མཚམས་སློབ་ཕྲུག་ཚོས་ང་ཚོ་ཚང་མ་སྐྱིད་པོ་ཡོད་ན། ཞེས་པའི་གླུ་དབྱངས་ཕུལ་རྗེས། ༧གོང་ས་མཆོག་གིས་ཆོས་དཔོན་ཀྲའུ་ཀྲའུ་མཆོག་གི་སྐོར་ལ་བཀའ་སློབ་བསྩལ་དོན། དེ་རིང་འདིར་ཕེབས་པའི་ཌེ་སི་མོན་ཀྲའུ་ཀྲའུ་མཆོག་ནི་མི་དང་མིའི་འབྲེལ་བའི་ཐད་ནས་འཛམ་གླིང་འདིའི་སྒང་གི་གྲོགས་པོ་ཉེ་ཤོས་ཤིག་ཡིན་ལ། མི་རིགས་ཀྱི་ཐོག་ནས་བཤད་ནའང་ཁོང་ནི་བོད་མི་རིགས་ཀྱི་བདེན་དོན་ཐད་ཐོག་མཐའ་བར་གསུམ་དུ་བདེན་པའི་བདེན་རྒྱབ་འགྱུར་བ་མེད་པ་དང་། རང་ཟོན་སྤངས་མཁན་ཞིག་ཁོང་གིས་གནང་བཞིན་ཡོད།

ངོས་རང་ནང་པ་ཞིག་ཡིན་པའི་ཐོག་ནས་འཛམ་གླིང་འདིའི་སྟེང་ཆོས་ལུགས་ཚང་མ་མཐུན་པོ་དང་། ང་ཚོ་ཐུན་མོང་གི་བསྒྲུབ་བྱ་འགྲོ་བ་མི་སྤྱི་ལ་ཕན་ཐོགས་བསྒྲུབ་ཐུབ་པ་ཞིག་བྱ་རྒྱུའི་ལས་འགན་ཡོད། དེ་ལྟར་ཡོང་བར་ང་ཚོ་ཆོས་པའི་ནང་ཕན་ཚུན་ང་ཚོ་དང་ཁྱོད་ཚོ་ཞེས་པའི་སྐད་ཆ་མེད་པར། སོ་སོར་ལྟ་གྲུབ་མི་འདྲ་ཡོད་ཀྱང་ཚང་མས་བྱམས་བརྩེའི་ཉམས་ལེན་གཅིག་མཐུན་བྱེད་བཞིན་ཡོད། དེར་བརྟེན་ཚང་མར་བྱམས་བརྩེ་གོང་འཕེལ་གཏོང་རྒྱུའི་ནུས་པ་དང་ཐབས་ཤེས་ཡོད། ང་ཚོ་ཆོས་བརྒྱུད་མི་འདྲ་བ་ཚང་མས་དམ་ཚིག་འོ་ཆུ་འདྲེས་པ་ལྟ་བུ་བྱུང་བ་ཡིན་ན་ནུས་པ་འཐོན་རྒྱུ་ཡིན་སྟབས། དེའི་ཆ་ནས་ཡིན་ནའང་ཁོང་གིས་རིས་སུ་མ་ཆད་པའི་ཆོས་ལུགས་ལ་གུས་བརྩི་གནང་མཁན་ཞིག་ཡིན། ངོས་རང་ཆ་བཞག་ནའང་ཁོང་ལ་རྗེས་སུ་ཡི་རངས་དང་ངོ་མཚར་སྐྱེ་ཡུལ་ཞིག་ཡིན་སྟབས། དེ་ལྟ་བུའི་མི་ཞིག་དེ་རིང་འདིར་ཕེབས་ཡོད་པ་རེད། ཅེས་གསུངས་སོང་།

༧གོང་ས་མཆོག་གིས་བོད་རིགས་གཞོན་སྐྱེས་དང་བོད་རིགས་ཚོས་བོད་པའི་ཆོས་རིག་སྐད་ཡིག་སོགས་ལ་དོ་སྣང་གནང་དགོས་སྐོར་གསུངས་དོན། བོད་མི་ན་གཞོན་སློབ་སྦྱོང་བྱེད་བཞིན་པ་ཁྱེད་ཅག་ལ་མཚོན་ན། སྤྱིར་སོ་སོའི་ཕ་མ་ཉེ་འབྲེལ་དང་། དེ་བཞིན་སོ་སོ་རང་ཉིད་ཡིན་ཡང་གང་ལ་གང་འཚམ་དཀའ་ངལ་འཕྲད་མྱོང་བ་ཞིག་གི་མི་རབས་ཆགས་ཡོད། ཁྱེད་རང་ཚོར་གཙོ་ཆེ་རྒྱ་གར་གཞུང་གིས་ཐོག་མཐའ་བར་གསུམ་དུ་རོགས་རམ་དང་རྒྱབ་སྐྱོར་ཧ་ཅང་ཤུགས་ཆེན་གནང་ཡོད་པ་དེ་དང་། དེས་མཚོན་པའི་འཛམ་གླིང་གི་ཚོགས་པ་མང་པོས་རོགས་རམ་གནང་གི་ཡོད་པ་རེད། དེ་ལྟ་བུའི་རོགས་རམ་གྱི་འོག་ནས་མདོར་ན་གཞན་ཕན་སྤྱན་གྱི་འོག་ནས་ང་ཚོའི་ཕྲུ་གུ་འདི་དག་འཚར་ལོངས་དང་སློབ་སྦྱོང་བྱེད་རྒྱུའི་གོ་སྐབས་རག་ཡོད་སྟབས། ཁྱེད་རང་ཚོས་ད་ཕན་ཧུར་ཐག་བྱས་ཡོད་ལ། ད་དུང་སོ་སོའི་སེམས་ནས་རིག་པ་བསྒྲིམས་ཏེ་ཧུར་ཐག་བྱེད་དགོས།

ང་ཚོ་འདི་གར་མི་རིགས་སྐད་ཡིག་ཟུར་གསལ་ཡོད་པ། ཆོས་དང་རིག་གཞུང་ལྟ་གྲུབ་སོགས་ཕྱུག་པོ་ཡོད་པའི་མི་རིགས་ཤིག་ཆགས་ཡོད། དེ་འདྲའི་མི་རིགས་འདིར་དཀའ་ངལ་འཕྲད་པའི་སྐབས་སུ་ཁྱེད་རང་ཚོས་བོད་སྐད་ཡིག་དང་ནང་པ་སངས་རྒྱས་པའི་ལྟ་གྲུབ། དེ་བཞིན་གཞན་ཕན་བྱང་ཆུབ་ཀྱི་སེམས་ཞེས་པ་དང་། ཡང་དག་པའི་ལྟ་བ་ཞེས་པ་དེ་དག་གང་ལྟར་མི་ལ་ཕན་ཐོགས་ཡོད་པ་ཞིག་ཆགས་ཡོད་སྟབས། དེ་དག་ཁྱེད་ཚོས་དུས་རབས་རྙིང་པའི་བསམ་ཚུལ་རེད་ལྟ་བུ་བསམས་ནས་མ་བཞག་པར། ད་ཆ་དུས་རབས་ཉེར་གཅིག་པ་འདིའི་ནང་ལ་དགོས་མཁོ་དང་འབྲེལ་བ་ཡོད་པ་ཞིག་ཆགས་ཡོད། བར་སྐབས་ལོ་སུམ་ཅུ་སོ་གྲངས་ནང་ངོས་ཀྱིས་ནུབ་ཕྱོགས་པའི་ཚན་རིག་པ་དང་ཤེས་ཡོན་ཅན་མང་པོར་ཐུག་གི་ཡོད། ཐོག་མར་ཁོང་ཚོས་གནས་ཚུལ་དེ་དག་མ་ཤེས་པའི་སྐབས་སུ་བོད་པ་ཞེས་བརྗོད་སྐབས་རྗེས་ལུས་ཀྱི་བཟོ་ལྟ་བུ་དང་། བོད་པའི་ཆོས་ཞེས་བརྗོད་སྐབས་རྗེས་ལུས་ཀྱི་རྣམ་པ་ལྟ་བུར་མཐོང་མཁན་འདུག བར་སྐབས་ཁོང་རྣམ་པ་དང་བཤིབས་ཏེ་འགྲེལ་བརྗོད་བྱེད་སྐབས་ང་ཚོའི་བོད་ཡིག་ནང་ཡོད་པའི་གཙོ་བོ་ནང་སེམས་ཁམས་རིག་པའི་སྐོར་དེ་དག་གཞན་དང་མི་འདྲ་བར་ཕྱུག་པོ་ཡོད་པ་དང་། དེ་བཞིན་ཚད་མའི་གཞུང་དེ་དག་གཞན་དང་མི་འདྲ་བའི་ཕྱུག་པོ་ཡོད་པ་ཞིག་མཐོང་རྒྱུ་ཡོད་སྟབས། དམིགས་བསལ་ནང་པ་སངས་རྒྱས་པའི་ཆོས་དང་དེ་བཞིན་ཆོས་ལ་དོ་སྣང་མེད་མཁན་གྱི་མཁས་པ་དེ་འདྲས་ཀྱང་དོ་སྣང་བྱེད་བཞིན་འདུག

དེ་ལྟ་བུའི་སྐད་ཡིག་དེའི་ནང་རིག་གཞུང་ཕྱུག་པོ་ཡོད་སྟབས། དེ་ང་ཚོས་ཉིན་རེ་ཉིན་རེའི་བཟའ་འཐུང་དང་ཁྲོམ་གཞུང་ལ་ཕར་འགྲོ་སྐབས་སྐད་དེ་བེད་སྤྱོད་དང་ཕན་ཐོགས་མེད་པ་མ་ཟད། དེང་དུས་ཀྱི་ཤེས་ཡོན་དེ་འདྲའི་ནང་དུ་སྐད་དེ་ཕན་ཐོགས་དེ་ཙམ་མེད་ཀྱང་། བསམ་བློ་རྒྱ་ཆེ་ས་ནས་བཏང་ཡོང་སྐབས། དེ་རིང་ཁ་སང་གི་འཛམ་གླིང་འདིའི་སྟེང་སེམས་ཁམས་རིག་པའི་སྐོར་བཤད་མཁན་ཧ་ཅང་ཉུང་ཉུང་རེད། དེར་བརྟེན་འཛམ་གླིང་འདིའི་སྟེང་ཕྲན་བུ་དོ་སྣང་ཡོད་མཁན་དང་། བསམ་བློ་རྒྱ་ཆེན་པོ་གཏོང་མཁན། དཀའ་ངལ་མང་པོ་ཞིག་མིའི་སེམས་ཐོག་ནས་བཟོ་བཞིན་ཡོད་པ་མཐོང་མཁན་དེ་ཚོའི་གྲས་ཀྱིས་ང་ཚོའི་སྐད་ཡིག་ནང་ཡོད་པའི་སེམས་ཁམས་རིག་པའི་སྐོར་དེ་དག་ལ་ཆོས་དད་ཡོད་མེད་ལ་མ་ལྟོས་པར་དམིགས་བསལ་གྱིས་དོ་སྣང་བྱེད་བཞིན་འདུག དེར་བརྟེན་དེ་ལ་བདག་པོ་རྒྱག་མཁན་ནི་ཁྱེད་རང་ཚོ་ཡིན། སྐྱ་སེར་ཕོ་མོ་དབྱེར་མེད་ཚང་མས་དེ་ཚོའི་ཐོག་དོ་སྣང་བྱས་ཏེ་སློབ་སྦྱོང་ཤུགས་ཆེ་ཙམ་བྱེད་རྒྱུ་ཞིག་བྱུང་ན། དེ་ནི་ང་ཚོ་བོད་མི་རིགས་ཀྱི་རིག་གཞུང་མི་རབས་ནས་མི་རབས་ཉར་ཚགས་རྒྱུན་འཛིན་བྱེད་རྒྱུ་དེ་སློབ་སྦྱོང་བྱས་ནས་རྒྱུན་འཛིན་བྱེད་དགོས་པ་རེད་མ་གཏོགས་འགྲེམས་སྟོན་ནང་འཇོག་རྒྱུ་ཞིག་མ་རེད། ཅེས་སོགས་གསུངས་སོང་།

དེའི་རྗེས་ཌེ་སི་མོན་ཀྲའུ་ཀྲའུ་མཆོག་གིས་ཉིན་གཅིག་བོད་མི་རྣམས་བོད་ལ་ཕྱིར་ལོག་ཐུབ་རྒྱུ་ཡིན་སྐོར་བཀའ་སློབ་བསྩལ་དོན། དེ་རིང་ང་ཚོ་འདིར་དྷ་རམ་ས་ལར་བཅར་ཐུབ་པ་མ་ཟད། གོ་སྐབས་འདི་འདྲ་ཞིག་བྱུང་བར་དགའ་སྤོབས་ཆེན་པོ་བྱུང་། ཁྱེད་ཚོར་འཛམ་གླིང་སྐྱེ་བོ་ཀུན་གྱིས་དགའ་མོས་བྱེད་བཞིན་ཡོད། ང་ཚོས་ཁྱེད་ཚོ་དང་ལྷག་པར་དུ་གཞོན་སྐྱེས་ཚོར་ཞུ་རྒྱུ་ཞིག་ལ། ད་ལྟའི་ཆར་བསྒྲུབ་མི་སྲིད་པ་ལྟ་བུར་སྣང་ཡང་། ཉིན་ཞིག་ཁྱེད་ཚོ་རང་དབང་ཡོད་པའི་བོད་ལ་ལོག་ཐུབ་ངེས་ཡིན། ང་ཚོ་ལྷོ་ཨ་ཧྥི་རི་ཁར་ཆ་མཚོན་ན། ལོ་མང་རིང་དྲག་གནོན་དང་དྲང་བདེན་མིན་པའི་ལམ་ལུགས་འོག་གནས་དགོས་བྱུང་བ་མ་ཟད། ང་ཚོའི་མགོ་ཁྲིད་དང་གཞོན་སྐྱེས་མང་པོ་ཞིག་སྐྱབས་བཅོལ་དུ་འགྲོ་དགོས་ཐུག་ཡོད། སྐབས་དེར་མནར་གཅོད་འོག་ནས་ང་ཚོ་ནམ་ཡང་གྲོལ་ཐུབ་ཀྱི་མ་རེད་བསམ་པའི་ཚོར་སྣང་བྱུང་བ་དང་། རོ་བྷེན་གླིང་ཕྲན་གྱི་བཙོན་ཁང་ནང་ཡོད་པའི་ང་ཚོའི་མགོ་ཁྲིད་དག་གསོན་པོར་ཕ་ཡུལ་དུ་ལོག་ཐུབ་རྒྱུ་མ་རེད་བསམ་ཡང་། ༡༩༩༠ ལོར་ང་ཚོའི་བརྩེ་བའི་དབུ་ཁྲིད་ནེལ་སན་མན་ཌ་ལཱ་མཆོག་གི་གཙོས་ཆབ་སྲིད་བཙོན་པ་མང་པོ་ཞིག་བཙོན་གྲོལ་ཐོབ་པ་དང་། སྐྱབས་བཅོལ་དུ་བསྡད་ཡོད་མཁན་རྣམས་ཀྱང་ཕ་ཡུལ་དུ་ཕྱིར་ལོག་ཐུབ་པ་བྱུང་ཡོད།

ཉིན་གཅིག་ཁྱེད་ཅག་གིས་ཀྱང་མཛེས་སྡུག་ལྡན་པའི་ཕ་ཡུལ་བོད་མཐོང་ཐུབ་རྒྱུ་མ་ཟད། དྲག་གནོན་སྲིད་ཇུས་ལག་བསྟར་བྱས་ནས་ཁྱེད་ཅག་འདིར་ཕྱིར་འཕུད་གཏོང་མཁན་དག་གི་སྙི་ལས་ཐར་ནས་རང་དབང་འཐོབ་ངེས་ཡིན། རྒྱ་ནག་གཞུང་གིས་དྲག་གནོན་ནི་རང་དབང་ལས་རིན་གོང་ཆུང་བ་ཤེས་རྟོགས་ཐུབ་ཀྱི་རེད།  

ངས་༧གོང་ས་མཆོག་དང་གྲོགས་པ་འགྲིགས་ཐུབ་པ་ནི་གཟི་བརྗིད་ཆེན་པོ་ཞིག་ལ་བརྩི་བཞིན་ཡོད། ང་དང་༧གོང་ས་མཆོག་མཉམ་དུ་ཚོགས་འདུ་ཁག་ཅིག་ལ་བཅར་རྒྱུའི་གོ་སྐབས་བྱུང་། ཐེངས་གཅིག་འདུ་འཛོམས་ཆེན་པོ་ཞིག་ཐོག་འཚུབ་ཆ་ཅན་གྱི་༧གོང་ས་མཆོག་གིས་ངའི་མགོ་ཐོག་གི་ཞྭ་བླངས་ཏེ་ཁོང་གིས་དབུ་ཐོག་ཏུ་བཞེས་སོང་། འཛམ་གླིང་ཡོངས་ཀྱིས་ཁྱེད་ཚོར་རྒྱབ་སྐྱོར་བྱེད་བཞིན་ཡོད་པ་མ་ཟད། ༧གོང་ས་མཆོག་ལའང་དགའ་མོས་ཤུགས་ཆེན་བྱེད་ཀྱིན་ཡོད། ལྷག་པར་དུ་༧གོང་ས་མཆོག་ག་པར་ཆིབས་སྒྱུར་བསྐྱངས་ཀྱང་མི་ཚོགས་ཀྱིས་ཁེངས་ཏེ་ཁོང་གི་གསུང་བཤད་ཐོས་རྒྱུ་དང་ཞལ་མཇལ་རྒྱུ་བྱུང་ན་བསམ་ནས་རེ་སྒུག་བྱེད་ཀྱི་ཡོད། ད་རེབ་ངས་གོ་སྐབས་འདི་བཟུང་སྟེ་རྒྱ་གར་གཞུང་གིས་ཁྱེད་ཚོར་རོགས་སྐྱོར་གནང་བ་མ་ཟད། འཛམ་གླིང་གི་ནོར་བུ་ལྟ་བུའི་རླབས་ཆེན་གྱི་དབུ་ཁྲིད་འདི་འདྲ་ཞིག་ལ་གཅེས་སྐྱོང་གིས་དགྲ་ལག་ཏུ་མ་ཤོར་བར་སྲུང་སྐྱོབ་གནང་བར་ཐུགས་རྗེ་ཞུ་རྒྱུ་ཡིན། ཁྱེད་ཚོ་བོད་ལ་ཕྱིར་ལོག་ཐུབ་ནས་བོད་ཀྱི་གཞུང་ལམ་ཐོག་གླུ་གཞས་གཏོང་ཐུབ་ཀྱི་རེད། ཅེས་སོགས་གསུངས་སོང་།

དེའི་རྗེས་༧གོང་ས་མཆོག་དང་ཌེ་སི་མོན་ཀྲའུ་ཀྲའུ་མཆོག་གིས་སློབ་མ་ཚོའི་དྲི་བ་ཁག་ཅིག་ལ་ལན་འདེབས་གནང་སྐབས། འཛིན་རིན་བཅུ་གཉིས་ཀྱི་སློབ་མ་བློ་བཟང་ཆོས་སྒྲོན་གྱིས་ཌེ་སི་མོན་ཀྲའུ་ཀྲའུ་མཆོག་ལ་ད་ལྟ་ང་ཚོ་བག་མེད་ལོངས་སྤྱོད་ཀྱི་དུས་རབས་ཤིག་ནང་འཚོ་སྡོད་བྱེད་ཀྱིན་ཡོད་སྟབས། མི་ཚོས་ཕྱི་དངོས་པའི་ལོངས་སྤྱོད་ལ་བརྟེན་ནས་བདེ་བ་འཚོལ་ཐབས་བྱེད་བཞིན་ཡོད་པའི་ཐོག་ཁྱེད་ཀྱིས་གཞོན་སྐྱེས་ཚོར་བཀའ་སློབ་གང་གནང་རྒྱུ་ཡོད་དམ་ཞེས་དྲིས་པའི་ལན་དུ། ཀྲའུ་ཀྲའུ་མཆོག་གིས། ཕྱི་དངོས་པོའི་ལོངས་སྤྱོད་ཁོ་ནས་མི་མང་པོ་ཞིག་ལ་ནང་སེམས་ཀྱི་བདེ་བ་སྤྲོད་ཐུབ་ཀྱི་མེད་སྟབས། འབྱོར་ལྡན་ཁྱིམ་ཚང་གི་བུ་ཕྲུག་དག་ཕྱི་ཕྱོགས་སུ་ཕྱིན་ནས་གཞན་ལ་ཕན་སེམས་བཅང་ནས་ལས་ཀ་བྱེད་བཞིན་ཡོད། དེར་བརྟེན། སེམས་ནང་བདེ་བ་མེད་ན་ཕྱི་དངོས་པོའི་དཔལ་ཡོན་ག་ཚོད་ཡོད་ཀྱང་ཕན་པ་མེད་སྟབས། ང་ཡེ་ཤུའི་ཆོས་པ་ཞིག་ཡིན་པའི་ཆ་ནས་ངས་མང་ཚོགས་ལ་སྐད་ཆ་བཤད་སྐབས། ང་ཚོ་དཀོན་མཆོག་ཅིག་གིས་བཟོས་པ་ལྟ་བུ་ཡིན་པ་མ་ཟད། དཀོན་མཆོག་གི་ཆེད་དུ་གཞན་དོན་བྱེད་དགོས་པའི་སྐོར་རྗོད་ཀྱི་ཡོད། ཅེས་ལན་འདེབས་གནང་སོང་། 

དེའི་རྗེས་སློབ་མ་གྲགས་པ་རྣམ་རྒྱལ་གྱིས་༧གོང་ས་མཆོག་ལ། ༧གོང་ས་མཆོག་གིས་གང་འདྲ་གནང་ནས་ཉིན་རེའི་འཚོ་བའི་ཁྲོད་ཀྱི་སྐུ་རླུང་གཞིལ་ཐབས་གནང་གི་ཡོད་དམ་ཞེས་བཀའ་དྲི་ཞུས་པའི་ལན་དུ། ༧གོང་ས་མཆོག་གིས། ངོས་ཀྱིས་༡༩༥༦ དང་ ༡༩༥༧། ༡༩༥༨ ལོ་བཅས་གང་ཡིན་ཞིག་ལ་༧གོང་ས་སྐུ་ཕྲེང་བཅུ་གསུམ་པ་ཆེན་མོ་མཆོག་གི་རླངས་འཁོར་རྙིང་པ་དེ་བེད་སྤྱོད་བཏང་བ་ཡིན། སྐབས་རེར་རླངས་འཁོར་དེ་སྐྱོན་ཆག་ཤོར་གྱི་ཡོད། ཉིན་ཞིག་རླངས་འཁོར་དེ་སྐྱོན་ཆག་ཤོར་སྐབས་ཀ་བློན་སྤུག་ནས་ཡིན་པའི་ཁ་ལོ་བ་དེས་བཟོ་བཅོས་རྒྱག་སྐབས། ཁོའི་མགོ་བོ་རླངས་འཁོར་གྱི་ལྕགས་ཤིག་ཐོག་བརྡབ་ཡོད་སྟབས། ཁོ་ཁོང་ཁྲོ་ལངས་ནས་མགོ་ལྕགས་དེའི་ཐོག་ཐེངས་ཁ་ཤས་ཤིག་བརྡབ་སོང་། དེ་ནི་གླེན་རྟགས་བསྟན་པ་ཞིག་རང་རེད། ཡིན་ཡང་སྐབས་རེར་ང་ཚོས་རྒྱུ་རྐྱེན་མང་པོ་ཞིག་གི་དབང་གིས་སྐྱིད་པོ་འབྱུང་གི་མེད་སྟབས་དེ་འདྲ་བྱེད་ཀྱིན་ཡོད། དེར་བརྟེན། ང་ཚོས་ཁོང་ཁྲོའི་རྐྱེན་གང་ལ་ཐུག་ཡོད་པ་དང་། ཁོང་ཁྲོའི་མཇུག་འབྲས་ལ་བསམ་བློ་གཏོང་དགོས། ཁོང་ཁྲོ་བྱ་རྒྱུ་མང་དྲགས་ན་སོ་སོའི་ལུས་ཟུང་གི་འགོག་སྲུང་མ་ལག་ལ་གཏོར་སྐྱོན་གཏོང་གི་ཡོད་སྟབས། ལུས་བདེ་ཐང་ཡོང་བར་སེམས་ལ་བདེ་བ་དགོས་པར་བརྟེན། ཁོང་ཁྲོའི་རྒྱུ་རྐྱེན་དང་མཇུག་འབྲས་གང་ཡིན་ལ་རྟག་དཔྱད་གཏོང་དགོས་པ་ཆགས་ཡོད། ཅེས་སོགས་བཀའ་ལན་བསྩལ་སོང་།

དེའི་རྗེས་ཌེ་སི་མོན་ཀྲའུ་ཀྲའུ་མཆོག་གིས་༧གོང་ས་མཆོག་ཕྱི་ལུགས་ལྟར་དགུང་གྲངས་ ༨༠ ལ་ཕེབས་པའི་རྟེན་འབྲེལ་མཚོན་ཆེད་སྐྱེས་སྐར་གྱི་ཞལ་ཟས་ (birthday cake) ཞེས་པ་ཞིག་འདེགས་འབུལ་དང་འབྲེལ་ཏེ། ཀྲའུ་ཀྲའུ་མཆོག་དང་སློབ་ཕྲུག་ཡོངས་ཀྱིས་མགྲིན་གཅིག་ཏུ་༼ཁྱེད་ཀྱི་འཁྲུངས་སྐར་ལ་རྟེན་འབྲེལ་ཞུ།༽ཞེས་པའི་གླུ་དབྱངས་འབུལ་ལམ་ཞུས་པར། ༧གོང་ས་མཆོག་ཀྱང་ཐུགས་ཧ་ཅང་དགྱེས་ཚོར་ཆེན་པོས་ཞལ་ཟས་ཀྱི་ཕུད་བླ་ཆེན་མཆོག་ལ་ཕུལ་སོང་།

གསར་འགོད་པ། དོན་གྲུབ།