དེ་རིང་རྒན་གྱའི་རིན་ཆེན་སྡེ་བའི་མང་ཚོགས་ཀྱིས་འཕྲེད་དར་སྣ་ཚོགས་བཟུང་སྟེ་རྫོང་སྲིད་གཞུང་གི་ཕྱོགས་སུ་བསྐྱོད་དེ་ཞུ་བའི་ངོ་རྒོལ་བྱེད་བཞིན་ཡོད་འདུག
ཁ་སང་མདོ་སྨད་བླ་བྲང་རྒན་གྱ་རིན་ཆེན་སྡེ་བའི་བསོད་ནམས་རྒྱ་མཚོ་དང་སངས་རྒྱས་མཁར་ཞུ་བ་གཉིས་རྒྱ་གཞུང་གིས་འཛིན་བཟུང་བྱས་ཡོད་པ་དང་། དེ་རིང་སྲིད་གཞུང་གིས་ལན་འབྱོར་བ་ལྟར་ན། སང་ཉིན་སླར་ཡང་སྡེ་མི་ ༤ རྫོང་སྲིད་གཞུང་ལ་ཡོང་དགོས་སྐོར་བརྗོད་ཡོད་སྟབས། མང་ཚོགས་ཚོས་ཁོང་ཅག་ཀྱང་འཛིན་བཟུང་བྱ་སྲིད་པར་སེམས་ཚབ་བྱེད་བཞིན་ཡོད་འདུག
དེ་ནི་ཉེ་ལམ་ཟླ་འདིའི་ཚེས་མགོ་ཙམ་ནས་ཀན་ལྷོ་ཁུལ་བསང་ཆུ་རྫོང་རྒན་གྱ་ཞིང་འོག་གི་རིན་ཆེན་སྡེ་བའི་རྩྭ་ཐང་ཐོག་གཞུང་ལམ་གསར་རྒྱག་བྱེད་ཀྱིན་ཡོད་པར། སྡེ་བ་དེའི་མང་ཚོགས་ཚོས་འབྲོག་པ་རྟེན་ས་ཕྱུགས་ཟོག་དང་། ཕྱུགས་ཟོག་རྟེན་ས་རྩྭ་ཐང་ཡིན་སྟབས། འབྲོག་པའི་རྩྭ་སའི་ཐོག་གཞུང་ལམ་བཟོས་ན་མང་ཚོགས་ཀྱི་འཚོ་རྟེན་ལ་གནོད་སྐྱོན་ཐེབས་ངེས་ཡིན་སྟབས། གལ་སྲིད་ལམ་ཁ་བཟོ་དགོས་ན་ངེས་པར་དུ་ས་གནས་མང་ཚོགས་ལ་རྩྭ་སའི་གུན་གསབ་སྤྲོད་དགོས་སྐོར་བརྗོད་དེ་ལམ་བཟོ་བར་འགོག་རྒོལ་བྱས་ཡོད་འདུག
དེ་རིང་རིན་ཆེན་སྡེ་བའི་མང་ཚོགས་རྒན་དར་གཞོན་གསུམ་ཚང་མ་ལམ་ལ་ཆས་ཏེ། སྲིད་གཞུང་གིས་ཁ་སང་འཛིན་བཟུང་བྱས་པའི་མི་སྣ་གཉིས་ཀློད་གྲོལ་བཏང་སྟེ། མང་ཚོགས་ཀྱི་དགོས་འདུན་དང་ལེན་མ་བྱས་བར། བསང་ཆུ་རྫོང་སྲིད་གཞུང་གི་སྒོ་རྭའི་ནང་དུ་ཉལ་རྒྱུ་ཡིན་སྐོར་བརྗོད་དེ་བསྐྱོད་སྐབས། རྒན་གྱ་ས་ཁུལ་གྱི་སྡེ་བ་གཞན་དག་གི་མི་སྣ་དང་། རྒན་གྱའི་བྲག་དཀར་དགོན་པ། བླ་བྲང་བཀྲ་ཤིས་འཁྱིལ་དོ་དམ་ལྷན་ཁང་གི་མི་སྣ་སོགས་ཕེབས་ཏེ། མང་ཚོགས་ལ་ཞུ་བ་བྱས་ཏེ། སྲིད་གཞུང་གིས་རིན་ཆེན་སྡེ་བའི་མང་ཚོགས་ཀྱི་དགོས་འདུན་དང་ལེན་ཡོང་རྒྱུར་བར་འདུམ་བྱེད་བཞིན་ཡོད་ཀྱང་། མང་ཚོགས་མུ་མཐུད་ལམ་ཁར་འཛོམས་ཏེ་བསྡད་ཡོད་འདུག
སྲིད་གཞུང་གིས་ཐོག་མ་ལམ་ཁ་དེ་བཟོ་རྒྱུའི་འཆར་འགོད་བྱས་ཏེ། ས་གནས་མང་ཚོགས་ལ་བསམ་འཆར་བསྡུ་སྐབས། རིན་ཆེན་སྡེ་བའི་མི་གཅིག་གིས་ཀྱང་མོས་མཐུན་ས་རྟགས་བརྒྱབ་མེད་ཀྱང་། ཟླ་སྔོན་མའི་ནང་སྲིད་གཞུང་གིས་མང་ཚོགས་མོས་མཐུན་ཡོད་མེད་ལ་མ་ལྟོས་པར། ལམ་བཟོའི་འདྲུད་འཐེན་འཁོར་ལོ་རིགས་སྣ་ཚོགས་བཏང་སྟེ། རིན་ཆེན་སྡེ་བའི་རྩྭ་ཐང་བརྒྱུད་དེ་གཞུང་ལམ་བཟོ་མགོ་བརྩམས་སྐབས། རིན་ཆེན་སྡེ་བའི་རྒན་གཞོན་མང་པོ་ལམ་བཟོའི་འཕྲུལ་ཆས་ཀྱི་སོ་ཁར་ཉལ་ནས་ངོ་རྒོལ་བྱས་ཡོད་འདུག
ཟླ་འདིའི་ཚེས་ ༡༢ ཉིན་རིན་ཆེན་སྡེ་བའི་མང་ཚོགས་ཐུན་མོང་ནས་གལ་སྲིད་ད་རེབ་གཞུང་ལམ་དེ་བཟོ་རྒྱུ་ཡིན་ཚེ། ས་གནས་མང་ཚོགས་ལ་འཚོ་སྣོན་གུན་གསབ་སྤྲོད་དགོས་པའི་རེ་འདུན་དོན་ཚན་ ༧ ཅན་ཞིག་རྒྱ་ཡིག་ཐོག་འཁོད་ཏེ་སྲིད་གཞུང་ལ་སྤྲད་ཡོད་འདུག
དགོས་འདུན་ཡི་གེ་དེའི་ནང་། ༡། ས་གནས་དེའི་མང་ཚོགས་ ༦༨༩ ལ་འཚོ་སྣོན་རོགས་དངུལ་སྤྲོད་དགོས་པ་དང་། ༢། གསར་དུ་རྒྱག་འཆར་ཡོད་པའི་རིང་ཚད་རྨུ་ ༢༠༠ ཅན་གྱི་གཞུང་ལམ་དེས་རྩྭ་སར་གནོད་པ་ཆེན་པོ་མི་འབྱུང་ཐབས་སུ་ཀ་བ་བཙུགས་ཏེ་ཟམ་པ་ལྟར་བསྐྲུན་དགོས་པ། ༣། སྡེ་བའི་ཁྱིམ་ཚང་ཡོང་ལ་རང་འབབ་ཆུའི་མཐུན་རྐྱེན་བསྐྲུན་དགོས་པ། ༤། ལམ་བཟོའི་གནོད་སྐྱོན་ཐེབས་ཡུལ་ཁྱིམ་ཚང་ ༥༠ ལ་སྡོད་ཁང་བསྐྱར་གསོ་དང་ཡང་ན་སྡོད་ཁང་བསྐྱར་གསོའི་རོགས་དངུལ་སྤྲོད་དགོས་པ། ༥། སྡེ་བའི་མ་ཎི་ཚོགས་ཁང་བསྐྱར་བཞེངས་བྱེད་དགོས་པ། ༦། སྡེ་བའི་ཁྱིམ་ཚང་ཡོངས་ལ་ཟོག་ལུག་འཇུག་སའི་ཕྱུགས་རྭ་བསྐྲུན་དགོས་པ། ༧། གཞུང་ལམ་སྤུས་ཚད་ལྡན་པ་ཞིག་བཟོ་དགོས་པ་དང་གཞུང་ལམ་སྟེང་འགྲིམ་འགྲུལ་མགྱོགས་ཚད་ཚོད་འཛིན་གྱི་བྱེད་ཐབས་སྤྱོད་དགོས་པ་སོགས་བཀོད་འདུག
རྒན་གྱའི་རིན་ཆེན་སྡེ་བ་ནི་ཀན་ལྷོའི་བླ་བྲང་ནས་མཚོ་སྔོན་རེབ་གོང་དུ་སྐྱོད་པའི་ལམ་ཁར་ཆགས་ཡོད་པ་དང་། རུ་ཁག་ཡོངས་སུ་ཁྱིམ་ཚང་ ༡༣༢ དང་མི་མང་ ༦༨༩ ཙམ་ཡོད་ཅིང་འཚོ་རྟེན་གཙོ་བོ་འབྲོག་ལས་ཡིན་འདུག དེ་སྔོན་རིན་ཆེན་སྡེ་བའི་མདུན་ནས་མཚོ་སྔོན་ཕྱོགས་སུ་གཞུང་ལམ་ཞིག་ཡོད་ནའང་། ཐེངས་འདིར་སྲིད་གཞུང་གིས་ལམ་ཁ་རྙིང་པ་དེ་ཟུར་དུ་བཞག་སྟེ། རིན་ཆེན་སྡེ་བའི་རྩྭ་ཐང་བརྒྱུད་དེ་བྱང་ཚད་ཆེ་ཞིང་ཚད་གཞི་མཐོ་བའི་གཞུང་ལམ་གསར་པ་ཞིག་བཟོ་བསྐྲུན་བྱེད་བཞིན་ཡོད་པ་དང་། དེའི་རིང་ཚད་ལ་སྤྱི་ལེ་ ༢ ཙམ་ཡོད་ཅིང་འབྲོག་པའི་རྩྭ་ས་རྨུ་གྲུ་བཞི་མ་ ༤༠ ཙམ་ལ་གཏོར་སྐྱོན་ཐེབས་བཞིན་ཡོད་འདུག
བོད་ནང་གི་བླ་མ་དང་དགོན་པ་ཁག་གིས་མི་མང་གི་རྒྱབ་རྩར་མི་ལངས་པར་ཞི་རྒོལ་མཚསམ་འཇོག་བྱེད་དུ་བཅུག་པ་སོགས་ནི་འོས་འཚམས་ཤིག་ཏུ་མ་མཐོང་། བར་འདུམ་བྱེད་དགོས་པ་ཡིན་ན་དང་པོ་གཞུང་ཕྱོགས་ཀྱི་ཆ་རྐྱེན་ངེས་ཅན་ཞིག་ཁས་ལེན་བྱ་ཐུབ་མིན་ཐད་མང་ཚོགས་ཀྱི་ཕྱོགས་ནས་སྐད་ཆ་བཤད་རོགས་དང་སྟོབས་ཤུགས་འདོན་རོགས་བྱེད་དགོས་པ་ལས། བླ་དགོན་དག་གཞུང་གི་ལག་ཆར་བེད་སྤྱོད་གཏོང་བཞིན་པ་ནི་ཡག་པོ་རྩ་བ་རང་ནས་མི་འདུག
བོད་གཞིས་བྱེས་ལག་གདང་གཅིག་ཏུ་བསྒྲིལ།། རྒྱ་དམར་པོའི་བྱུས་ངན་མཐའ་རུ་བགྲོད།། བོད་ཁ་བའི་བདེ་སྡུག་མཐོ་རུ་སྒྲོག། ས་འཛམ་བུ་གླིང་གི་སྙན་དུ་སྒྲོན།།
གསར་འགྱུར་ཁ་གསལ་གོ་བདེ་དུས་ཚོད་ཏག་ཏག་ཐོག་ཁྱབ་བསྒྲགས་གནང་བ་ཐུགས་རྗེ་ཆེ། བོད་ནས་ནས་མེ་འབར་ན་བོད་ཕྱི་ནས་དུ་བ་འཐོན་དགོས་པའི་དཔེ་ལྟར། བོད་ཕྱི་ནང་རྡོག་རྩ་ཆིག་བསྒྲིལ་ཐོག་གནས་ཚུལ་ཁྱབ་བསྒྲགས་དང་། རྒྱལ་སྤྱིའི་ཐོག་ཞུ་གཏུག་བྱས་ཏེ་རྒྱ་ནག་གཞུང་ལ་གནོན་ཤུགས་ཡོང་ཐབས་བྱས་ཏེ་བོད་ནང་གི་བོད་མི་ཚོའི་དཀའ་ངལ་སེལ་ཐབས་གནང་དགོས།