རྒྱ་ནག་གཞུང་གིས་ཡུན་ནན་ཞིང་ཆེན་མི་དམངས་སྨན་ཁང་དང་པོའི་འགན་འཛིན་ཟུར་བ་ཝང་ཐན་ཁྲའོ་ཡིས་ལྐོག་ཟ་རུལ་སུངས་འབོར་ཆེན་བྱས་ཡོད་པ་ཁྱབ་བསྒྲགས་བྱས་པ་དང་བསྟུན་ཏེ། ཁོ་བོ་ནི་ཀྲུའུ་ཡོན་ཁཱང་བརྒྱུད་ནས་ཆོས་འཁོར་རྩ་རླུང་སྒོམ་སྒྲུབ་པར་མནར་གཅོད་སོགས་བཏང་བར་ཡང་འབྲེལ་བ་ཡོད་སྐོར་གླེང་གི་འདུག
ཟླ་འདིའི་ཚེས་ ༢༧ ཉིན། རྒྱ་ནག་གི་ཆེས་མཐོའི་མི་དམངས་ཞིབ་བཤེར་ཁང་གི་གསར་འགོད་གསལ་བསྒྲགས་སྤེལ་བ་ལྟར་ན། ཡུན་ནན་ཞིང་ཆེན་མི་དམངས་སྨན་ཁང་དང་པོའི་འགན་འཛིན་ཟུར་བ་ཝང་ཐན་ཁྲའོ་ (Wang Tianchao) ཡིས་དངུལ་འབོར་ཆེན་ལྐོག་ཟ་བྱས་ཡོད་པ་དང་། ལོ་སྔོན་མའི་ཕྱི་ཟླ་ ༩ བའི་ནང་གོ་གནས་བླངས་ཏེ་ཞིབ་བཤེར་བྱེད་མགོ་བཙུགས་ཡོད་ཅིང་། ༢༠༠༥ ལོ་ནས་ ༢༠༡༤ ལོའི་བར་ཁོས་ཡུན་ནན་མི་དམངས་སྨན་ཁང་དང་པོའི་འགན་འཛིན་གྱི་གོ་གནས་བེད་སྤྱོད་དེ། གཞན་གྱི་རྒྱུ་ནོར་ཚོད་མེད་དུ་བླངས་པའི་སྤྱི་སྡོམ་རྒྱ་སྒོར་ཁྲི་ ༣༥༠༠ ལ་གནས་ཡོད་པ་དང་། ཁང་པ་དང་རླངས་འཁོར་འཇོག་ས་ ༡༠༠ བཅས་ཁྱོན་རྒྱ་སྒོར་ཁྲི་ ༨༠༠༠ ལ་གནས་པ་ཞིག་གཞུང་བཞེས་བཏང་ཡོད་འདུག
དེ་རིང་རྒྱ་ནག་ཞིན་ཧྭ་དྲ་བའི་སྟེང་། ཝང་ཐན་ཁྲའོ་ཡིས་འདས་པའི་ལོ་བཅུའི་རིང་ཁང་པ་བརྒྱ་སྒེར་བདག་བྱས་པ་དེ་ནི་རྒྱ་ནག་མི་མང་གི་བློ་ངོར་མི་ཤོང་བ་ཞིག་ཡིན་ལ། ཁོས་ལོ་བཅུའི་ནང་རྒྱ་སྒོར་ཁྲི་ ༣༥༠༠ ལྐོག་ཟ་བྱས་པ་དེ་ཆ་སྙོམས་བྱས་ན་ཉིན་ཅིག་ལ་རྒྱ་སྒོར་ཁྲི་ ༡ རེ་ཟོས་ཡོད་པ་དང་། ལོ་བཅུའི་ནང་ཁང་པ་དང་རླངས་འཁོར་འཇོག་ས་བརྒྱ་སྐོར་བདག་བཟུང་བྱས་དེ་ཆ་སྙོམས་བྱས་ན་ཟླ་གཅིག་རེར་ཁང་པ་གཅིག་དང་རླངས་འཁོར་འཇོག་ས་གཅིག་རེ་རྔན་པར་བླངས་ཡོད་སྟབས། གལ་སྲིད་ཁང་པ་འདི་དག་པེ་ཅིན་ན་ཡོད་ཚེ་ཁོ་ལ་སྲོག་ཁྲིམས་ཐེངས་ ༦ ཙམ་འབབ་པ་དང་། ཝང་ཐན་ཁྲའོ་ནི་རྒྱ་ནག་གི་སྟག་རྒན་གྱི་གྲས་ཤིག་མིན་ཡང་ལྐོག་ཟ་རུལ་སུངས་ཀྱི་རྒྱལ་བོའི་གྲས་ཤིག་ཡིན་སྐོར་སོགས་བརྗོད།
དེ་རིང་ཞིན་ཐང་རིན་གྱིས་རྒྱ་ནག་སྐམ་ས་ཆེན་མོའི་སྐད་འཕྲིན་ “ཆབ་སྲིད་ར་བ།”〝政知圈〞ཞེས་པའི་གནས་ཚུལ་ལུང་འདྲེན་བྱས་པ་ལྟར་ན། ཝང་ཐན་ཁྲའོ་ཡུན་ནན་ཞིང་ཆེན་མི་དམངས་སྨན་ཁང་དང་པོ་ནས་ལོ་བཅུའི་རིང་ལས་ཀ་བྱས་སྐབས། ཡུན་ནན་ཞིང་ཆེན་གྱི་མགོ་གཙོ་ཟུར་བ་པད་ཨིན་ཕེ་ (Bai Enpei)དང་མཉམ་དུ་སྨན་བཅོས་བདེ་ཐང་སྲུང་སྐྱོབ་ཚོགས་ཆུང་ཞིག་བཙུགས་ཡོད་འདུག ཡུན་ནན་སྨན་བཅོས་ཚོགས་ཆུང་གི་མི་སྣ་ཞིག་གིས་སྨན་སློབ་གླིང་《医学界》དུས་དེབ་སྟེང་བརྗོད་པར། ཝང་ཐན་ཁྲའོ་སྔོན་ཆད་བདེ་ཐང་སྲུང་སྐྱོབ་ཚོགས་ཆུང་ནང་འཛུལ་ཞུགས་བྱས་ཡོད་པ་དང་། ཁོས་དཔོན་རིགས་ཚོ་དང་དཔོན་རིགས་ཀྱི་ནང་མི། མཐའ་ན་དཔོན་རིགས་དེ་དག་གི་ཕྲུ་གུ་གཉོར་མཁན་སོགས་ཀྱི་སར་སོང་ནས་ནད་ལ་བརྟག་དཔྱད་བྱས་ཏེ་དཀའ་ལས་མི་ཉུང་བ་ཞིག་བརྒྱབ་ཡོད་པ་རེད། ཅེས་སོགས་བརྗོད་འདུག
ཆབ་སྲིད་ར་བས་སྨན་པ་ཞིག་གི་སྐད་ཆ་ལུང་འདྲེན་བྱས་པ་ལྟར་ན། ཡུན་ནན་ཞིང་ཆེན་སྨན་ཁང་དང་པོ་དེ་ལོ་ ༡༠ ཡི་ནང་ལ་དར་རྒྱས་ཆེན་པོ་ཕྱིན་ཡོད་ཀྱང་། དཔོན་རིགས་དེ་དག་གིས་སྨན་ཁང་གི་ལས་བྱེད་དང་སྨན་པ་ཚོའི་ཕྱོགས་ལ་བསམ་བློ་གཅིག་ཀྱང་བཏང་མི་འདུག ཝང་ཐན་ཁྲའོ་གོ་གནས་ནས་ཕབ་པ་དེ་ནི་དཔལ་འབྱོར་གྱི་གནད་དོན་ཡིན་ཞིང་། དཔོན་རིགས་ཚོས་གོ་གནས་ཉོ་ཚོང་བྱེད་སྐབས་སྨན་པའི་ཚན་ཁག་གཅིག་གི་འགན་འཛིན་གྱི་གོ་གནས་ཉོ་བར་རྒྱ་སྒོར་ཁྲི་ ༣༠ ནས་ ༤༠ དགོས་པ་དང་། གཉིས་ནས་ཅ་དངོས་མཁོ་སྒྲུབ་བྱེད་པ་དང་སྨན་མཛོད་ཁང་སོགས་རྒྱག་པའི་རྨང་གཞིའི་འཛུགས་སྐྲུན་སོགས་ཀྱི་སྟེང་ནས་རུལ་སུངས་བྱས་ཡོད་པ་དང་། ཝང་ཐན་ཁྲའོ་ནི་སྨན་ཁང་དེའི་སྨན་ཚོང་ཁང་གི་ཁེ་ཕན་ཟ་མཁན་གཙོ་གྲས་ཤིག་ཡིན་སྐོར་སོགས་བཀོད་འདུག
དོ་སྣང་བྱ་འོས་པ་ཞིག་ནི། ཡུན་ནན་ཞིང་ཆེན་མི་དམངས་སྨན་ཁང་དང་པོ་དེ། ༢༠༡༣ ལོའི་རྒྱ་ནག་གི་འཕྲོད་བསྟེན་འཆར་འགོད་དྲ་རྒྱའི་ཐོག་སྨན་ཁང་ ༡༦༥ ཡིས་མིའི་དབང་བོ་སྤོ་འཛུགས་བྱེད་བཞིན་པའི་མིང་ཐོ་བཀོད་ཡོད་པའི་ནང་། ཡུན་ནན་ཞིང་ཆེན་མི་དམངས་སྨན་ཁང་དང་པོས་གློ་མཆིན་གཉིས་སྤོ་འཛུགས་བྱེད་བཞིན་ཡོད་པ་བཀོད་ཡོད་པ་དང་། ༢༠༠༥ ལོའི་ཟླ་ ༡༢ ཚེས་ ༡༥ ཉིན་ཡུན་ནན་གྱི་དྲ་ཚིགས་ཤིག་ཏུ། སློབ་ཆེན་བུ་མོ་ཞིག་གི་སྙིང་ལ་ཁ་གསབ་དང་གློ་བ་གསར་བརྗེ་བྱས་ཏེ་བུ་མོ་དེའི་ཚེ་སྲོག་སྐྱོབ་པ་དེས། ཞིང་ཆེན་མི་དམངས་སྨན་ཁང་དང་པོའི་དབང་བོ་སྤོ་འཛུགས་ཀྱི་ལག་རྩལ་རྒྱལ་ཡོངས་སྨན་ཁང་ཁག་གི་མདུན་གྲལ་དུ་ཐོན་ཡོད་སྐོར་བརྗོད་ཡོད། སྐབས་དེར་ཞིང་ཆེན་སྨན་ཁང་དང་པོའི་འགན་འཛིན་ཝང་ཐན་ཁྲའོ་ནི་དབང་བོ་སྤོ་འཛུགས་མགོ་ཁྲིད་ཚོགས་ཆུང་གི་ཚོགས་གཙོ་ཡིན་འདུག
༢༠༡༡ ལོའི་ཟླ་ ༡༡ ཚེས་ ༡༢ ཉིན། ཡུན་ནན་གསར་ལམ་སྟེང་གི་༼ང་ཚོའི་ཞིང་ཆེན་གྱིས་མཆིན་པ་བརྗེས་པོ་རྒྱབ་པའི་མི་ལོ་ ༡༢ ཡི་ནང་ལ་འཚོ་སྡོད་ཡག་པོ་བྱས་འདུག༽ཅེས་པའི་ནང་། ཡུན་ནན་ཞིང་ཆེན་གྱི་སྨན་ཁང་ཁག་ཅིག་གི་དབང་བོ་སྤོ་འཛུགས་ཐད་དོགས་གཞི་ཞིག་བྱུང་ཡོད་པ་ནི་དབང་བོ་དེ་དག་གི་ཡོང་ཁུངས་གང་རེད་དམ་ཞེས་པའི་དྲི་བ་དེ་ཡིན་འདུག
ཕྱི་ཕྱོགས་ཀྱི་བརྒྱུད་ལམ་ཁག་ཏུ། ཝང་ཐན་ཁྲའོ་ཡིས་རོགས་སྐྱོར་བྱེད་ཡུལ་པད་ཨིན་ཕེ་ནི་རྒྱ་ནག་དབུས་སྲིད་ཁྲིམས་ལྷན་ཁང་གི་འགན་འཛིན་ཟུར་བ་ཀྲུའུ་ཡོན་ཁཱང་གི་མི་ཡིན་ཞིང་། ༢༠༡༡ ལོར་ཁོས་ཀྲུའུ་ཡོན་ཁཱང་དང་འགྲོགས་ནས་ས་ཆ་ཁ་ཤས་ལ་སྐོར་སྐྱོད་བྱས་ཡོད་པ་དང་། ༢༠༠༧ ལོར་ཀྲུའུ་ཡོན་ཁཱང་ཡུན་ནན་ལ་སྐོར་སྐྱོད་བྱེད་སྐབས་ཀྱང་པད་ཨིན་ཕེ་དང་སྐབས་དེའི་ཞིང་ཆེན་འགན་འཛིན་ཆིན་ཀན་རོན་ (Qing Guanrong)དཔུང་རོགས་གཡས་གཡོན་དུ་ཁྲིད་ཡོད་འདུག
ཆིན་ཀན་རོན་གྱི་གོ་གནས་ལྷུང་རྗེས་བརྒྱུད་ལམ་ཁག་ཏུ་མི་དམངས་རྩ་འཛུགས་ཚོགས་འདུའི་སྐབས་ཀྲུའུ་ཡོན་ཁཱང་དང་ཆིན་ཀན་རོན་གཉིས་གད་མོ་དགོད་བཞིན་པའི་པར་ཞིག་བཀྲམས་ཡོད་པ་དེས་ཁོ་གཉིས་ལ་འབྲེལ་བ་ཡག་པོ་ཡོད་པ་བསྟན་ཡོད་ཅིང་། པད་ཨིན་ཕེ་ཡང་དེ་སྔའི་རྒྱ་ནག་གི་སྲིད་འཛིན་ཅང་ཙེ་མིན་གྱི་རྗེས་སུ་ཁྱི་བཞིན་རྒྱུག་མཁན་ཞིག་ཡིན་འདུག ཀྲུའུ་ཡོན་ཁཱང་གིས་མཚོ་སྔོན་དང་ཡུན་ནན་གྱི་ཆོས་འཁོར་རྩ་རླུང་སྒོམ་སྒྲུབ་པ་ཚོར་དམ་དྲག་བྱས་སྐབས། “ཡུན་ནན་ཞིང་ཆེན་ཆོས་འཁོར་རྩ་རླུང་འགྱུར་བའི་རྟེན་གཞི” 〝云南省法轮功转化基地〞ནི་པད་ཨིན་ཕེ་ཡི་སྐབས་སུ་ལག་བསྟེར་བྱས་པ་ཞིག་ཡིན་འདུག
རྒྱ་ནག་གི་དམག་མིའི་སྨན་ཁང་ཚོས་དབང་བོ་སྤོ་འཛུགས་ལས་དོན་ཁྲོད་ཀྱི་དབང་པོ་མང་ཆེ་བ་སྲོག་ཆད་བཙོན་པ་དང་ཆོས་འཁོར་རྩ་རླུང་སྒོམ་སྒྲུབ་པ་ཚོའི་དབང་བོ་གསོན་བཀོག་བྱས་པ་ཞིག་ཡིན་པ་དང་། ད་རེབ་ཝང་ཐན་ཁྲའོ་ལ་ཞིབ་བཤེར་བྱས་པ་དེའང་ཆོས་འཁོར་རྩ་རླུང་སྒོམ་སྒྲུབ་པ་ཚོའི་གྱོད་དོན་དང་འབྲེལ་བ་ཡོད་པ་ཆགས་སྲིད་སྐོར་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
