ཟླ་འདིའི་ཕྱི་ཚེས་ ༣ ཉིན་རྒྱ་གཞུང་ཉེན་རྟོག་པས་མི་གསོད་དོན་རྐྱེན་ཞིག་དང་འབྲེལ་བ་ཡོད་པའི་དོགས་གཞིའི་འོག མགོ་ལོག་དར་ལག་རྫོང་ཁོངས་ནས་མི་ཞིག་ལ་མེ་མདས་བརྒྱབ་སྟེ་དམར་གསོད་བཏང་ཡོད་འདུག
རྒྱ་ནག་གསར་འགྱུར་དྲ་བའི་ཐོག་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༣ ཉིན་གྱི་ཞོགས་པ་བོད་ནང་གི་ཆུ་ཚོད་ ༤ པ་ཙམ་ལ། མཚོ་སྔོན་ཉེན་རྟོག་པས་མགོ་ལོག་ཁུལ་དར་ལག་རྫོང་ཁོངས་ནས་བྱུང་བའི་མི་གསོད་དོན་རྐྱེན་ཞིག་དང་འབྲེལ་བ་ཡོད་པའི་དོགས་གཞིའི་འོག མིང་ལ་བློ་ག་གེ་མོ་ཟེར་བ་ཞིག་དམར་གསོད་བཏང་ཡོད་པ་དང་། ཁོ་བོ་སྡོད་སར་སྔོག་བཤེར་བྱས་པ་བརྒྱུད་མེ་མདའ་རིང་ཐུང་ ༣ དང་མདེའུ་ ༥༡༢། གྲི་སོགས་ཡོད་པ་ལག་སོན་བྱུང་ཡོད་སྟབས། ད་ལྟའི་ཆར་ཉེན་རྟོག་ཕྱོགས་ནས་ཁོ་བོའི་མཚོན་ཆ་དེ་དག་གི་ཡོངས་ཁུངས་སོགས་ལ་ཞིབ་བཤེར་བྱེད་བཞིན་ཡོད་འདུག
ཉེན་རྟོག་ཕྱོགས་ནས་དོགས་ཡོད་ཉེས་ཅན་དེ་བོད་རིགས་ཡིན་མིན་གསལ་བོ་བརྗོད་མེད་ཀྱང་། ཁོ་བོ་མགོ་ལོག་ཁུལ་དར་ལག་རྫོང་འབོ་སྤ་གྲོང་ཚོ་ནས་ཡིན་པ་དང་། ཁོ་བོ་དང་དར་ལག་རྫོང་གསང་རུ་མ་གྲོང་ཚོའི་ཕྱུག་ལས་ཨུ་ཡོན་ལྷན་ཚོགས་ཀྱི་ཚོགས་མི་ཟུར་པ་མིང་ལ་སྐར་ག་གེ་མོ་ཟེར་བ་ཞིག་གི་བར་རྩོད་གཞི་ཡོད་སྟབས། ཕྱི་ལོ་ ༢༠༠༩ ཟླ ༥ ཚེས་ ༢༠ ཉིན་བློ་མིང་ཅན་དེ་དང་ཁོ་བོའི་ལག་རོགས་གསུམ་གྱིས་སྐར་མིང་ཅན་དེར་མེ་མདས་བརྒྱབ་སྟེ་བསད་པ་མ་ཟད། ཁོ་བོའི་བཟའ་ཟླ་ལའང་རྨས་སྐྱོན་བཟོས་ཡོད་སྟབས། དེ་ནས་བཟུང་བློ་མིང་ཅན་དེས་དགྲ་བོས་འཁོན་ལན་སློག་པར་དོགས་ཟོན་བྱས་ཏེ་རྒྱུན་དུ་མེ་མདའ་ཉར་བ་མ་ཟད། གྲོང་ཚོའི་ནང་དང་འབྲོག་ས་རུ་མི་མང་ལ་དོན་མེད་བརྙས་བཅོས་བྱས་ཏེ། མང་ཚོགས་ནང་འཁོན་སེམས་ཆེན་པོ་བསླངས་ཡོད་འདུག མི་གསོད་དོན་རྐྱེན་དེ་བྱུང་རྗེས། ཉེན་རྟོག་པས་ཁོ་བོའི་ལག་རོགས་ ༣ འཛིན་བཟུང་བྱས་ཡོད་ཀྱང་། ཁོ་བོ་བྲོས་བྱོལ་དུ་ཕྱིན་ནས་འཛིན་བཟུང་བྱེད་ཐུབ་མེད་སྐོར་བསྒྲགས་འདུག
ཡང་ཉེན་རྟོག་པས་ཟླ་འདིའི་ཕྱི་ཚེས་ ༢ ཉིན་དོགས་ཡོད་ཉེས་ཅན་དེ་མགོ་ལོག་དར་ལག་རྫོང་འབོ་སྤ་གྲོང་ཚོའི་ནང་གབ་སྡོད་བྱས་ཡོད་པ་ཤེས་རྟོགས་བྱུང་སྟབས། འཕྲལ་དུ་འཛིན་བཟུང་རུ་ཁག་བཙུགས་ཏེ་ཡུལ་དངོས་སུ་ཕྱིན་སྐབས། དོགས་ཡོད་ཉེས་ཅན་གྱིས་མེ་མདའ་བཟུང་སྟེ་སྦག་སྦག་ཅིག་བཞོན་ནས་རི་ལ་བྲོས་པ་མ་ཟད། ཉེན་རྟོག་པར་འཐབ་འཛིང་བྱས་ཏེ་ཉེན་རྟོག་རླངས་འཁོར་ལ་མདེའུ་མང་པོ་ཕོག་ཡོད་པ་མ་ཟད། ཉེན་རྟོག་པ་ཞིག་གི་རྐང་པར་རྨས་སྐྱོན་བཟོས་ཡོད་ལུགས་སོགས་བརྗོད་འདུག
གསར་འགོད་པ། པདྨ་མཚོ།
ཤར་མདའ། རྒྱ་ནག་དམར་གཞུས་གིས་གནས་ཚུལ་ཅི་འདྲ་ཡིན་རུང་དྲན་བདེན་འདྲ་མཉམ་ཞིག་བྱེད་ཀྱི་མེད་ཙང་འདི་ཡང་དོན་གནད་ཅི་ཞིག་ཡིན་སུ་ཞིག་གིས་བརྗོད་ཐུབ་པ་ཞིག་མ་རེད་གང་ཡིན་ཟེར་ན་ད་བར་བོད་མདོ་དབུས་ཁམས་གསུམ་ན་མེ་མདའ་འཛིན་མཁན་བོད་མི་ཞིག་ཡིན་པ་ཡིན་ན་རྒྱ་སྒོར་ཁྲི་ཚོ་མང་པོས་ཉེས་ཆད་གཅོད་པ་མ་ཟད་བཙོན་ཁང་དུ་བཅུགས་ཀྱི་ཡོད་པ་ཤེས་གསལ་རེད་དེ་འདྲ་ཡིན་དུས་འདི་འདྲ་མ་མདའ་གསུམ་ཡོད་ཚུལ་བཤད་ན་དེ་བདེན་གཏམ་ཞིག་ཏུ་ངོས་འཛིན་བྱེད་ཐུབ་པ་ཞིག་མ་རེད། འདི་ཚོས་བཤད་ནོ་ཡིད་ཆེས་བྱེད་འོས་པ་ཞིག་མ་རེད།