ད་ལྟ་བོད་ཀྱི་འགྲེམས་སྟོན་ཁང་ནང་གསོག་འཇོག་བྱས་པའི་པར་རིས་ ༤༠༠༠༠ ལྷག་ཡོད་པ་དང་། མ་འོངས་པར་འགྲེམས་སྟོན་ཁང་འདི་བོད་ཀྱི་ལོ་རྒྱུས་དང་འབྲེལ་བའི་འདྲ་པར་གྱི་རྟེན་གནས་ཤིག་བཟོ་འཆར་ཡོད་འདུག
བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་གི་རྒྱལ་སྒོའི་ནང་ལོགས་ཀྱི་གཡོན་གྲུ་རུ་བཞེངས་བསྐྲུན་བྱས་ཡོད་པའི་བོད་ཀྱི་འགྲེམས་སྟོན་ཁང་དེ་ནི། ༡༩༩༨ ལོར་བོད་མིའི་སྒྲིག་འཛུགས་ཀྱིས་ཕྱི་དྲིལ་ལས་ཁུངས་ཀྱི་ཁྱབ་ཁོངས་འོག་གསར་འཛུགས་གནང་སྟེ། ༢༠༠༠ ལོའི་ཟླ་ ༤ ཚེས་ ༣༠ ཉིན་༧གོང་ས་མཆོག་གིས་དབུ་འབྱེད་མཛད་ཡོད་འདུག འདིའི་ནང་ཚན་པ་ཁག་གསུམ་ཡོད་པ་ནི་གཏན་འཇགས་འགྲེམས་སྟོན་དང་། སྐོར་སྐྱོད་འགྲེམས་སྟོན། འདྲ་པར་གསོག་འཇོག་ཁང་བཅས་ཡིན་ཞིང་། ཚན་པ་འདི་དག་གི་ལས་འགན་གཙོ་བོ་ནི་བོད་ཀྱི་དངོས་ཡོད་གནས་ཚུལ་ཕྱི་བསྒྲགས་དང་ངོ་སྤྲོད་བྱ་རྒྱུ་དང་། བོད་དོན་དང་འབྲེལ་བའི་པར་རིས་དང་ཡིག་ཚགས་བཅས་གསོག་འཇོག་བྱ་རྒྱུ་ཡིན་འདུག ཉེ་ལམ་ལོ་ཤས་གོང་ནས་བཟུང་འགྲེམས་སྟོན་ཁང་གིས་བོད་དོན་ངོ་སྤྲོད་བྱ་ཆེད་དུ་འགྱུར་བཅོས་བཏང་སྟེ། ཉིན་རེར་བོད་དོན་དང་འབྲེལ་བའི་དངོས་བྱུང་གློག་བརྙན་གཉིས་རེ་དང་། བདུན་ཕྲག་གཉིས་རེའི་ནང་བོད་དོན་ཆེད་མཁས་པ་གདན་དྲངས་ནས་གཏམ་བཤད་གནང་བཅུག་པ་སོགས་ཀྱི་ལས་འགུལ་སྤེལ་བཞིན་ཡོད་པ་མ་ཟད། ཟླ་སྔོན་མའི་ནང་འགྲེམས་སྟོན་ཁང་བཙུགས་ནས་ལོ་ ༡༥ འཁོར་བའི་དུས་དྲན་ཞིག་ཀྱང་སྲུང་བརྩི་ཞུས་ཡོད།
དེ་རིང་གསར་འགོད་པས་ཕྱི་དྲིལ་འགྲེམས་སྟོན་ཚན་པའི་འགན་འཛིན་བཀྲ་ཤིས་ཕུན་ཚོགས་ལགས་སུ་རྒྱལ་ཁབ་གཞན་གྱི་འགྲེམས་སྟོན་ཁང་ཡིན་ན་རྒྱལ་ཁབ་སོ་སོའི་རྩ་ཆེའི་ཁྱད་ནོར་དང་ལོ་རྒྱུས་ཀྱི་ཡིག་ཚགས་སོགས་འཇོག་གི་ཡོད་པས། བོད་ཀྱི་འགྲེམས་སྟོན་ཁང་ནང་བོད་ཀྱི་ལོ་རྒྱུས་ལ་མཁོ་བའི་རྒྱུ་ཆ་གལ་ཆེན་གང་དག་ཡོད་དྲིས་པར་ཁོང་གིས། བཙན་བྱོལ་ནང་ནོར་བུ་གླིང་ཁ་དང་བོད་ཀྱི་དཔེ་མཛོད་ཁང་སོགས་ནང་བོད་ཀྱི་རིག་གཞུང་དང་འབྲེལ་བའི་འགྲེམས་སྟོན་ཁང་ཡོད་པ་མ་ཟད། དེ་སྔ་དབྱིན་ཇིའི་མིས་བོད་ཀྱི་ཆོས་དང་རིག་གཞུང་ངོ་སྤྲོད་བྱ་ཆེད་ཨ་རི་དང་སུད་སི། ཀོ་རི་ཡ་སོགས་ནང་བོད་ཀྱི་འགྲེམས་སྟོན་ཁང་གི་མིང་བཏགས་ནས་བཙུགས་བཞག་པ་དེ་འདྲ་འདུག ང་ཚོ་བོད་ཀྱི་འགྲེམས་སྟོན་ཁང་ནི་བོད་ཀྱི་ལོ་རྒྱུས་དང་རིག་གཞུང་མི་ཉམས་རྒྱུན་འཛིན་དང་། རྒྱའི་བཙན་འོག་ཏུ་རྐྱེན་འདས་སུ་གྱུར་བའི་བོད་མི་རྣམས་ཀྱི་བྱས་རྗེས་ལ་དྲན་གསོ་ཞུ་རྒྱུ། ད་ལྟའི་བོད་ནང་གི་ཛ་དྲག་གནས་སྟངས་ཕྱི་ནང་ཡུལ་གྲུ་ཁག་ལ་ཁྱབ་སྤེལ་གཏོང་རྒྱུ། དེ་བཞིན། བོད་པའི་མི་རབས་གསར་པར་བོད་མིའི་སྲོལ་རྒྱུན་གྱི་གོམས་གཤིས་བཟང་པོ་བརྒྱུད་སྤྲོད་བྱ་རྒྱུ་བཅས་དམིགས་ཡུལ་བཞི་བཟུང་ནས་ཆེད་བཙུགས་ཞུས་པ་ཞིག་ཡིན་སྟབས། ད་ལྟ་འགྲེམས་སྟོན་ཁང་འདི་འཛམ་གླིང་ཐོག་བོད་ཀྱི་དངོས་ཡོད་གནས་ཚུལ་དག་ཁྲ་ལམ་ལམ་གསལ་སྟོན་བྱེད་མཁན་གཙོ་བོ་དེ་ཆགས་ཡོད། འདིའི་ནང་ང་ཚོ་རང་བཙན་ཡོད་སྐབས་ཀྱི་ཌམ་ཀ་དང་དངུལ་ལོར། སྦྲགས་ཐམ། དེ་བཞིན་རྒྱལ་སྤྱིའི་ཚགས་ཤོག་ཁག་ཏུ་ཐོན་པའི་༧གོང་ས་མཆོག་དང་བོད་ཀྱི་གནས་ཚུལ། ཞྭ་སྒབ་པའི་ཐོངས་མཆན་ལག་འཁྱེར་སོགས་དང་། ༡༩༨༧ དང་༡༩༨༨། ༡༩༨༩ བཅས་ལོ་རང་བཀག་སོ་སོའི་ནང་ལྷ་སར་ཞི་རྒོལ་ཆེན་མོ་བྱུང་རྗེས། བོད་མི་མང་པོ་ཞིག་བཙན་ཁྲིད་བཙོན་འཇུག་བྱས་ཡོད་སྟབས། རྒྱ་མིས་བཙོན་ཁང་ནང་བོད་ཀྱི་ཆབ་སྲིད་བཙོན་པ་ཚོར་མནར་གཅོད་གཏོང་སྐབས་ཀྱི་ལག་ ཆ་བཅས་ཡོད་པ་རེད། ཅེས་བརྗོད་བྱུང་།
ཁོང་ལ་གསར་འགོད་པས་བོད་རང་བཙན་མ་ཤོར་གོང་བོད་ནང་འགྲེམས་སྟོན་ཁང་དེ་འདྲ་ཡོད་མེད་དྲིས་པར་ཁོང་གིས། བོད་རང་བཙན་ཡོད་སྐབས་དགོན་པའི་ནང་སྐུ་འདྲ་དང་ཆོས་བརྒྱུད་ཁག་གི་ཕྱག་དཔེ་འདྲ་མིན་ཡོད་པ་མ་ཟད། བླ་མ་ཚོའི་སྐུ་འདྲ་དང་སྐུ་པར་སོགས་མཇལ་རྒྱུ་མང་པོ་ཡོད་ཀྱང་། ངས་ད་ལྟའི་བོད་ཀྱི་འགྲེམས་སྟོན་ཁང་ལྟར་ཆབ་སྲིད་ཀྱི་གོ་རྟོགས་སྤེལ་རྒྱུར་དམིགས་ནས་གསར་འཛུགས་གནང་བའི་འགྲེམས་སྟོན་ཁང་དེ་འདྲ་ཡོད་པ་གོ་མ་སོང་། ཕྱིས་སུ་རྒྱ་མིས་བོད་བཙན་བཟུང་བྱས་རྗེས་བོད་ཀྱི་ལོ་རྒྱུས་དང་གནས་སྟངས་འཁྱོག་བཤད་བྱ་རྒྱུར་དམིགས་ནས་འགྲེམས་སྟོན་ཁང་དེ་འདྲ་བཙུགས་པ་མང་པོ་བྱུང་ཡོད་ས་རེད། དཔེར་ན། ལྷ་སར་བོད་ཀྱི་འགྲེམས་སྟོན་ཁང་དང་དེ་སྔ་དགེ་འདུན་ཆོས་འཕེལ་གྱི་འགྲེམས་སྟོན་ཁང་སོགས་མང་པོ་ཞིག་ཡོད་པ་རེད། དེ་ཚོ་བཙུགས་དགོས་དོན་ནི་བོད་ནང་ཕྱི་རྒྱལ་ཡུལ་སྐོར་བ་ཕེབས་མཁན་དང་། བོད་ནང་གི་མི་རབས་གསར་པ་ཚོར་བོད་ཀྱི་ལོ་རྒྱུས་ལ་གོ་བ་ལོག་པ་དང་འཁྱོག་བཤད་བྱ་རྒྱུ་སོགས་རྒྱ་ནག་གཞུང་གི་མངོན་འདོད་གྲུབ་ཆེད་བཙུགས་པ་ཞིག་ཆགས་ཡོད། ཅེས་བརྗོད་བྱུང་།
མཇུག་ཏུ་བཀྲ་ཤིས་ཕུན་ཚོགས་ལགས་སུ་མ་འོངས་པར་འགྲེམས་སྟོན་ཁང་ངོས་ནས་ལས་དོན་གསར་པ་དེ་འདྲ་གང་སྤེལ་འཆར་ཡོད་མེད་དྲིས་པར་ཁོང་གིས། བོད་པའི་གནས་སྟངས་ཁྱོན་ནས་རྒྱུས་མངའ་མེད་སའི་རྒྱ་གར་ལྷོ་ཕྱོགས་ས་ཁུལ་ཁག་ཏུ་བསྐྱོད་ནས་བོད་དོན་གནས་ཚུལ་ངོ་སྤྲོད་དང་། བོད་དོན་གནས་ཚུལ་ཁྱབ་རྒྱ་ཆེ་རུ་གཏོང་ཆེད་ཕྱི་རྒྱལ་ཁག་ཏུ་བཅར་རྒྱུའི་གོ་སྐབས་དང་ཐབས་འཚོལ་ཞུ་བཞིན་ཡོད། དེ་བཞིན་འདྲ་པར་གསོག་འཇོག་ཁང་ལྟ་བུ་ཡིན་ན་འདྲ་པར་རྙིང་པ་ཚང་མ་གློག་ཀླད་ནང་བཅུག་སྟེ། རྗེས་སུ་རེའུ་མིག་བང་མཛོད་ཅིག་བཟོས་ནས་འཛམ་གླིང་ས་ཕྱོགས་གང་ས་ནས་ལྟ་ཐུབ་པ་དང་མངག་ཉོ་གནང་ཐུབ་རྒྱུའི་ལས་གཞི་ཞིག་སྤེལ་བཞིན་ཡོད་པ་མ་ཟད། ང་ཚོས་ལོ་གཅིག་གོང་ནས་བོད་པའི་གནད་ཡོད་མི་སྣ་དང་རྒན་རབས་པ་ཚོའི་སར་བཅར་ཏེ། ད་ཡོད་གསོག་འཇོག་བྱས་པའི་འདྲ་པར་ ༤༠༠༠༠ ལྷག་ཡོད་པའི་སྒང་ལ་འདྲ་པར་ ༤༠༠༠ ལྷག་མཁོ་སྒྲུབ་བྱས་ཏེ། མ་འོངས་པར་བོད་ཀྱི་འགྲེམས་སྟོན་ཁང་འདི་བོད་ཀྱི་ལོ་རྒྱུས་དང་འབྲེལ་བའི་འདྲ་པར་གྱི་ལྟེ་གནས་ཤིག་བཟོ་རྒྱུར་འབད་བརྩོན་བྱ་རྒྱུ་ཡིན། དེ་བཞིན་ང་ཚོས་འགྲེམས་སྟོན་ཁང་གི་ལས་དོན་རྒྱ་སྐྱེད་ཡོང་ཆེད་རྒྱལ་སྤྱིའི་འགྲེམས་སྟོན་ཉིན་མོ་སྲུང་གཙི་དང་། དྲ་རྒྱ་དང་སྤྱི་ཚོགས་དྲ་རྒྱ་བརྒྱུད་ནས་བོད་དོན་གནས་ཚུལ་གང་མང་ཁྱབ་སྤེལ་གཏོང་རྒྱུ་ཡིན། ཞེས་བརྗོད་བྱུང་།
གསར་འགོད་པ། དོན་གྲུབ།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
