ས་ཡོམ་ཁྲོད་བལ་ཡུལ་གྱི་བོད་མི་ ༡༣ རྐྱེན་འདས་སུ་སོང་འདུག

ཟླ་སྔོན་མའི་ཚེས་ ༢༥ ཉིན་བལ་ཡུལ་དུ་ས་ཡོམ་ཚད་རིམ་ ༧།༩ ཅན་ཞིག་བརྒྱབ་སྟེ་ད་བར་མི་ ༨༡༦༤ གྲོངས་པ་དང་མི་ ༡༦༤༧༢ ལ་རྨས་སྐྱོན་ཕོག་ཡོད་པ། མི་ས་ཡ་ ༢།༩ ལྷག་ས་ཆ་གཞན་ལ་གནས་སྤོ་བྱེད་དགོས་ཐུག་ཡོད་པ་དང་། གཞན། བལ་ཡུལ་གནས་སྡོད་བོད་མི་ ༡༣ དང་བོད་ནང་བོད་མི་ ༢༨ གྲོངས་ཡོད་པ་མ་ཟད། བོད་མི་ ༡༠༠ ལྷག་ལ་རྨས་སྐྱོན་དང་ཁང་པ་ ༦༣༢༠ དང་དགོན་སྡེ་ ༣༠ ལྷག་ལ་ཚད་མི་འདྲ་བའི་གཏོར་སྐྱོན་སོགས་ཐེབས་སྟེ་བོད་མི་ ༡༨༧༩༤༧ ལྷག་ལ་གནོད་འཚེ་ཕོག་ཡོད་འདུག

འདི་གའི་གསར་འགོད་པས་བོད་མིའི་སྒྲིག་འཛུགས་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་སུ། བལ་ཡུལ་དུ་བོད་མི་ག་ཚོད་གྲོངས་པ་དང་། དེ་དག་ཇི་ལྟར་གྲོངས་ཡོད་མེད་དྲིས་པར་ཁོང་གིས། བལ་ཡུལ་ལ་ས་ཡོམ་གོད་ཆག་ཁྲོད་བལ་ཡུལ་གྱི་འབྲེལ་མཐུད་པ་བརྒྱུད་ང་ཚོར་གནས་ཚུལ་འབྱོར་བར་གཞིགས་ན་བོད་མི་རྒན་པ་མི་ ༧ དང་ཕྲུ་གུ་ ༣ ། ཡུལ་མི་བོད་པའི་བཟའ་ཟླ་ཡིན་པ་གཉིས་དང་བཙུན་མ་གཅིག་བཅས་ཁྱོན་བོད་མི་ ༡༣ འདས་གྲོངས་ཕྱིན་འདུག ད་ལྟ་ང་ཚོས་དེ་ཚོའི་ཐོག་ལ་བལ་ཡུལ་གྱི་འབྲེལ་མཐུད་དང་ས་གནས་མགོ་འཛིན་ཁག དེ་བཞིན་བལ་ཡུལ་གནས་སྡོད་སྤྱི་འཐུས་བཅས་ལས་གྲུབ་པའི་ཚོགས་ཆུང་ཞིག་བསྐོ་བཞག་གིས་གོད་ཆག་བྱུང་བའི་བོད་མི་ཚོའི་གནས་སྟངས་ལ་ཞིབ་འཇུག་དང་རྨས་མ་ཚོར་རོགས་པ་ཞུ་བསྡད་ཡོད། ཁོ་ཚོ་ཁག་གཅིག་ཁང་པའི་རྩིག་པ་ལོག་ནས་འདས་གྲོངས་ཕྱིན་པ་དང་། ཁག་གཅིག་མཐའ་མཚམས་ཁུལ་དུ་ཁང་པ་ལོག་ནས་གྲོངས་པ་བྱུང་འདུག དེ་ཡང་བལ་ཡུལ་མཆོད་རྟེན་ཁུལ་གནས་སྡོད་བྱེད་མཁན་གྱི་ལོ་ན་ ༣༠ ལ་སོན་པའི་འཆི་མེད་ལགས་ཁང་པའི་རྩིག་པ་ལོག་ནས་གྲོངས་ཡོད་པ་དང་། བག་ཁང་སེང་བྲག་དགོན་པའི་བཙུན་མ་གཅིག་དགོན་པའི་རྩིག་པ་ལོག་ནས་གྲོངས་ཡོད་པ་མ་ཟད། བཙུན་མ་གཉིས་ལ་རྨས་སྐྱོན་ཕོག་འདུག དེ་བཞིན་འཕགས་ཤིང་ནས་ལོ་ན་ ༢༩ སོན་པ་སངས་རྒྱས་ཕུར་བུ་དང་། བལ་བོད་ས་མཚམས་འགྲམ་ནང་ཚོང་ལས་གཉེར་བཞིན་ཡོད་པའི་ལོ་ན་ ༤༥ སོན་པ་རྡོ་རྗེ་བཅས་ཡིན་པ་མ་ཟད། དེ་འཕྲོས་བོད་མི་རྣམས་གླང་ཐང་རྫོང་དུ་གངས་རུད་འོག་ཚུད་ནས་གྲོངས་འདུག ཅེས་གསུངས་བྱུང་།

ཁོང་ལ་རྒྱ་ནག་གི་གཞུང་འབྲེལ་བརྒྱུད་ལམ་ཁག་གིས་ད་བར་ས་ཡོམ་གོད་ཆག་རྐྱེན་པས་བོད་ནང་བོད་མི་ ༢༨ ཙམ་གྲོངས་ཡོད་སྐོར་རྗོད་བཞིན་ཡོད་ཀྱང་། བོད་ནང་གི་བརྙན་པར་སོགས་ལ་ལྟ་སྐབས་མི་དེ་ལས་མང་བ་གྲོངས་མིན་འགྲོ་བསམ་པ་ཞིག་འདུག དེའི་ཐད་བོད་མིའི་སྒྲིག་འཛུགས་ཀྱིས་ངོས་འཛིན་གང་འདྲ་གནང་གི་ཡོད་དྲིས་པར་ཁོང་གིས། རྒྱ་ནག་གཞུང་གིས་བརྙན་འཕྲིན་བརྒྱུད་ལམ་ཁག་ལྟར་ན། བལ་ཡུལ་གྱི་ས་མཚམས་ཁུལ་དུ་ཡོད་པའི་གཉའ་ལམ་དང་འགྲམ། སྐྱིད་གྲོང་དང་ས་དགའ། དིང་རི་དང་སྤུ་ཧྲེང་གཙོས། ལྷ་ས་དང་ཀོང་པོ་ཉིང་ཁྲི་ཁུལ་དུའང་ས་ཡོམ་གྱི་ཤུགས་སྐྱོན་ཐེབས་ཡོད་པ་མ་ཟད། བོད་ནང་མི་ ༢༨ རྐྱེན་འདས་དང་སྐྱིད་གྲོང་ཁུལ་གྱི་ཁང་པ་བརྒྱ་ཆ་ ༩༨ ཙམ་ལ་སྐྱོན་ཤོར་ཡོད་པ་དང་། གཞིས་ཀ་རྩེ་ནས་འགྲམ་བར་གྱི་གཞུང་ལམ་འགག་ནས་དུས་ཚོད་ཏག་ཏག་ལ་འབྱོར་ཐུབ་ཀྱི་མེད་པ། བོད་ཀྱི་ལུང་ཁུག་ཁག་ལ་རྒྱ་མིའི་དམག་མིས་མྱུར་སྐྱོབ་བྱེད་བཞིན་པ་སོགས་སྟོན་གྱི་ཡོད་སྟབས། མི་ ༢༨ ཟེར་བ་དེ་ཉུང་མཐར་ལབ་ཀྱི་ཡོད་པ་རེད་མ་གཏོགས་དངོས་ཡོད་ཐོག་དེ་ལས་མང་བ་ཡིན་པ་ཁོ་ཚོའི་བརྒྱུད་ལམ་ཁག་ལ་བལྟས་ན་གསལ་པོ་ཆགས་ཀྱི་འདུག ལྷག་པར་དུ་ལྷ་ས་གཙོ་བྱས་བོད་ཀྱི་ས་ཁུལ་མང་པོ་ཞིག་ནས་ས་ཡོམ་གོད་ཆག་དེ་ཞེ་དྲགས་ཚབས་ཆེན་པོ་དང་། དེ་ལ་མི་མང་གིས་རོགས་རམ་དང་བློ་འཚབ་བྱེད་སྟངས། མྱུར་སྐྱོབ་ཀྱི་ལས་འགུལ་སྤེལ་སྟངས་བཅས་ལ་བལྟས་པ་ཡིན་ན། མི་མང་པོ་ཞིག་འདས་གྲོངས་ཕྱིན་ཡོད་པ་མ་ཟད། གནས་སྟངས་ཧ་ཅང་ཚབས་ཆེན་པོ་ཆགས་ཡོད་པ་ཞིག་ལ་ངོས་འཛིན་བྱེད་བཞིན་ཡོད། ཅེས་གསུངས་བྱུང་།

གསར་འགོད་པས་ཁོང་ལ་བོད་མིའི་སྒྲིག་འཛུགས་ཀྱིས་བལ་ཡུལ་གྱི་ས་ཡོམ་ཁྲོད་གོད་ཆག་བྱུང་བ་དག་ལ་ངལ་སེལ་རོགས་དངུལ་བལ་སྒོར་འབུམ་ ༦༠ དང་། ༧གོང་ས་མཆོག་གཙོས་ཆོས་བརྒྱུད་ཁག་གི་བླ་ཆེན་དང་དགོན་སྡེ་ཁག གཞུང་འབྲེལ་མིན་པའི་ཚོགས་པ་ཁག་བཅས་ཀྱིས་ཀྱང་ཞལ་འདེབས་གནང་ཡོད་སྟབས། དེ་ཚོ་གང་འདྲ་བྱས་ནས་བགོ་བཤའ་རྒྱག་གི་ཡོད་མེད་དྲིས་པར་ཁོང་གིས། ང་ཚོས་འཛམ་བུ་གླིང་ཐོག་འབྱུང་བའི་གོད་ཆག་གང་འདྲ་ཞིག་བྱུང་བ་ཡིན་ཡང་དེར་བློ་འཚབ་དང་སྨོན་ལམ་འདོན་རྒྱུ། རོགས་པ་བྱ་རྒྱུ་སོགས་ནམ་རྒྱུན་བྱེད་བསྡད་ཀྱི་ཡོད་པ་རེད། བལ་ཡུལ་ནི་རྒྱལ་རབས་ལོ་རྒྱུས་ཐོག་ནས་ང་ཚོའི་ཁྱིམ་མཚེས་རྒྱལ་ཁབ་ཅིག་ཡིན་པ་མ་ཟད་འབྲེལ་བ་ཆེན་པོ་ཡོད་པ་ཞིག་ཀྱང་ཆགས་ཡོད། ལྷག་པར་དུ་བལ་ཡུལ་ནང་བོད་མི་བཙན་བྱོལ་བ་མང་པོ་ཞིག་གནས་སྡོད་བྱེད་བཞིན་ཡོད་སྟབས། བོད་མིའི་སྒྲིག་འཛུགས་ངོས་ནས་བལ་སྒོར་འབུམ་ ༦༠ ཞལ་འདེབས་ཕུལ་ཡོད་པ་མ་ཟད། ༧གོང་ས་མཆོག་གི་ཐེབས་རྩ་དང་རྒྱལ་དབང་ཀརྨ་པ་གཙོས་པའི་བླ་ཆེན་ཁག་གིས་བལ་ཡུལ་གྱི་ས་ཡོམ་གོད་ཆག་ཆེད་ངལ་སེལ་རོགས་དངུལ་འབུལ་རྒྱུ་ཡིན་གསུངས་ཡོད་པ་རེད། ༧གོང་ས་མཆོག་གི་ཐེབས་རྩ་དང་བོད་མིའི་སྒྲིག་འཛུགས་ཀྱི་རོགས་དངུལ་དག་བལ་ཡུལ་སྐུ་ཚབ་དོན་གཅོད་བརྒྱུད་ནས་བལ་ཡུལ་སྲིད་བློན་གྱི་ངལ་སེལ་ཐེབས་རྩར་འབུལ་རྒྱུའི་དགོངས་བཞེས་གནང་གི་ཡོད་སྟབས། གཞུང་བརྒྱུད་ནས་ས་ཡོམ་གྱི་དཀའ་ངལ་འཕྲད་པ་དག་ལ་ཆ་བགོས་བྱ་རྒྱུ་ཆགས་བསྡད་ཡོད་པ་རེད། དེ་བཞིན་ཕྱི་རྒྱལ་གྱི་གཞུང་དང་གཞུང་འབྲེལ་མིན་པའི་ཚོགས་པ་ཁག་གིས་ཞལ་འདེབས་འབུལ་རྒྱུ་དེ་ཡང་སྲིད་བློན་གྱི་ངལ་སེལ་ཐེབས་རྩ་བརྒྱུད་ནས་འབུལ་གྱིན་ཡོད་པ་རེད། དེ་མིན་གཞུང་འབྲེལ་མིན་པའི་ཚོགས་པ་ཁག་གཅིག་གིས་ས་གནས་ས་ཐོག་ལ་ཕེབས་ནས་གུར་སྤྲད་པ་དང་ཕུབ་པ། སྨན་བཅོས་ཀྱི་རོགས་རམ་བཅས་གནང་ནས་མྱུར་སྐྱོབ་ལས་འགུལ་སྤེལ་གྱིན་ཡོད་པ་རེད། ཅེས་གསུངས་བྱུང་།

ཁོང་ལ་ད་ལྟ་བལ་ཡུལ་གཞུང་ལ་རྒྱ་ནག་གཞུང་གི་གནོན་ཤུགས་ཆེན་པོ་བསླེབས་ཡོད་པ་མ་ཟད། ཉེ་ཆར་ཐའེ་ཝན་གཞུང་གིས་བལ་ཡུལ་ལ་ས་ཡོམ་གྱི་གོད་ཆག་ལས་མྱུར་སྐྱོབ་བྱེད་མཁན་གྱི་མི་སྣ་ཁག་གཅིག་གཏོང་གི་ཡིན་སྐོར་བརྗོད་ཡོད་ཀྱང་། བལ་ཡུལ་གཞུང་གིས་ཁས་ལེན་མ་བྱས་པའི་གནས་ཚུལ་བྱུང་ཡོད་སྟབས། བོད་མིའི་སྒྲིག་འཛུགས་ཀྱིས་རོགས་དངུལ་དག་བལ་ཡུལ་གཞུང་གིས་ངོས་བཞེས་གནང་གི་རེད་བསམ་གྱི་འདུག་གམ་ཞེས་དྲིས་པར་ཁོང་གིས། ཐའེ་ཝན་གཞུང་གིས་བལ་ཡུལ་གཞུང་ལ་ས་ཡོམ་ཁྲོད་ཁང་པ་ལོག་ནས་ཁང་པའི་ནང་ལུས་པ་དག་ཉེན་སྐྱོབ་བྱ་ཆེད་རོགས་སྐྱོར་བྱེད་མཁན་གཏོང་གི་ཡིན་གསུངས་ཡོད་ཀྱང་། དེ་ལ་བལ་ཡུལ་གཞུང་གིས་ངོས་ལེན་གནང་ཡོད་པ་མ་རེད། ཡིན་ཡང་ད་ལྟ་འཛམ་གླིང་ས་ཕྱོགས་གང་ས་ནས་བལ་ཡུལ་གཞུང་ལ་རོགས་དངུལ་འབུལ་གྱིན་ཡོད་སྟབས། བོད་མིའི་སྒྲིག་འཛུགས་ཀྱི་རོགས་དངུལ་དེ་མ་བཞེས་པ་གནང་གི་མ་རེད་བསམ་གྱི་འདུག ཅེས་གསུངས་བྱུང་།

ཁོང་ལ་གསར་འགོད་པས་བལ་ཡུལ་གྱི་ས་ཡོམ་རྐྱེན་པས་བོད་ནང་གི་བོད་མི་མང་པོ་ཞིག་ལ་དཀའ་ངལ་འཕྲད་བཞིན་ཡོད་སྟབས། བོད་མིའི་སྒྲིག་འཛུགས་ངོས་ནས་རོགས་རམ་དང་ཞལ་འདེབས་བསྡུ་བ་སོགས་ཀྱི་ལས་འཆར་ དེ་འདྲ་སྤེལ་འཆར་ཡོད་མེད་དྲིས་པར་ཁོང་གིས། སྔོན་མ་བོད་ནང་གི་སྐྱེ་དགུ་མདོར་ས་ཡོམ་དང་། དེ་མིན་མདོ་སྨད་ཀྱི་ས་ཁུལ་གཅིག་ལ་ཆུ་ལོག་བྱུང་སྐབས་བོད་མིའི་སྒྲིག་འཛུགས་ངོས་ནས་བོད་མི་ཚང་མར་འབོད་སྐུལ་ཞུས་ཏེ། ས་ཡོམ་དང་ཆུ་ལོག་གི་གོད་ཆག་བྱུང་བ་དག་ལ་རོགས་སྐྱོར་གནང་ཡོད་པ་རེད། ད་ལྟ་རྒྱ་ནག་གཞུང་གིས་ང་ཚོས་ས་ཡོམ་གོད་ཆག་ཆེད་རོགས་པ་བྱ་རྒྱུར་ངོས་ལེན་བྱས་ཚེ། གདུང་སེམས་མཉམ་སྐྱེད་ཞུས་ནས་ཞལ་འདེབས་བསྡུ་སློང་བྱ་རྒྱུ་ཡིན། ཞེས་གསུངས་བྱུང་།

མཇུག་ཏུ་ཁོང་ལ་རྒྱ་ནག་གཞུང་འབྲེལ་བརྒྱུད་ལམ་ཁག་གིས་རྒྱ་ནག་གི་བལ་ཡུལ་གཞུང་ཚབ་བརྒྱུད་ས་ཡོམ་ཁྲོད་གནོད་འཚེ་ཕོག་མཁན་བལ་སྡོད་བོད་མི་རྣམས་ལ་བལ་སྒོར་ཁྲི་ ༡༠༠ ཡི་རོགས་དངུལ་སྤྲད་ཡོད་པ་ཕྱིར་བསྒྲགས་བྱེད་བཞིན་ཡོད་པའི་ཐད། བོད་མིའི་སྒྲིག་འཛུགས་ལ་གཟིགས་ཚུལ་གང་འདྲ་ཡོད་དམ། ཞེས་དྲིས་པར་ཁོང་གིས། འཛམ་གླིང་ནང་འབྱུང་བའི་གོད་ཆག་དང་དམག་འཁྲུག་གི་དཀའ་ངལ་བྱུང་སྐབས། ང་ཚོ་ཚང་མ་འགྲོ་བ་མི་ཞིག་ཡིན་པའི་ཆ་ནས་གཅིག་གཅིག་ལ་བརྩེ་གདུང་བཅང་རྒྱུ་དང་། རོགས་རམ་བྱ་རྒྱུ་དེ་ལས་འགན་རེད་བསམ་གྱི་ཡོད། ཕྱི་རྒྱལ་ཡུལ་གྲུ་ཁག་ཏུ་སྡོད་མཁན་རྣམས་ཀྱིས་སོ་སོའི་རང་དབང་དང་ཐོབ་ཐང་། སྨྲ་བརྗོད་རང་དབང་དཔྱད་དེ། བོད་ནང་དཀའ་ངལ་ཡོད་པ་དག་ལ་གདུང་སེམས་མཉམ་སྐྱེད་ཡོད་ཞུས་ནས་ལས་འགུལ་སྤེལ་བ་དང་། ༧གོང་ས་མཆོག་གི་འཁྲུངས་སྐར་སྲུང་བརྩི་ཞུ་བ་སོགས་བྱེད་ཀྱི་ཡོད་ཀྱང་། ད་ལྟ་བལ་ཡུལ་གཞུང་གིས་རྒྱ་གཞུང་གི་གནོན་ཤུགས་འོག་བོད་མི་ཚོར་དམ་དྲག་བྱེད་བཞིན་ཡོད་པ་སོགས་ཀྱི་དཀའ་ངལ་ཞིག་འཕྲད་བཞིན་ཡོད་སྟབས། ད་ཐེངས་རྒྱ་ནག་གཞུང་གིས་ཆབ་སྲིད་མ་འཁྲབ་པའི་ཐོག་ནས་གཙོ་ཆེ་བལ་ཡུལ་གྱི་ས་ཡོམ་ཁྲོད་གོད་ཆག་བྱུང་བ་དག་ལ་རོགས་སྐྱོར་དང་། ལྷག་པར་དུ་བོད་རིགས་ཚོར་དོ་སྣང་བྱས་ནས་རོགས་རམ་བྱེད་ཀྱི་ཡོད་ཚེ། ང་ཚོས་དེ་ནི་འོས་ཤིག་འཚམ་པ་ཞིག་དང་འགྲོ་བ་མིའི་རིགས་ཀྱི་ལས་འགན་བསྒྲུབ་པ་ཞིག་ལ་ངོས་འཛིན་ཞུ་བཞིན་ཡོད། ཅེས་གསུངས་བྱུང་།

གསར་འགོད་པ། དོན་གྲུབ།