ཁ་སང་ཕྱི་དྲོ་ཨབ་གྷན་རྒྱལ་སར་ཏ་ལི་བྷན་དྲག་སྤྱོད་པ་ཞིག་གིས་སྤྱི་སྤྱོད་རླངས་འཁོར་ཞིག་ལ་འབར་རྫས་གས་གཏོར་བྱས་ཏེ། ཨབ་གྷན་སྤྱི་ཁྱབ་ཁྲིམས་དོན་ཁང་གི་ལས་བྱེད་པ་ ༣ བསད་པ་མ་ཟད་གཞན་མི་ ༡༨ ལ་རྨས་སྐྱོན་བཏང་ཡོད་འདུག
ཨབ་གྷན་ནང་སྲིད་བློན་ཆེན་སི་ཌེ་ཁཱེ་ (Sediq Sediqqi) ཡིས་དྷིན་རྡུ་སི་ཐན་དུས་བབ་ཐོག “ལས་མི་དང་ཡུལ་མི་རྣམས་ཉིན་རེའི་ལས་ཀ་ཚར་ནས་སྤྱི་སྤྱོད་རླངས་འཁོར་ནང་བསྡད་དེ་ནང་ལ་ལོག་ཡོང་སྐབས། ལུས་ཐོག་ཏུ་འབར་རྫས་བཏགས་ཡོད་པའི་དྲག་སྤྱོད་པ་ཞིག་གིས་རླངས་འཁོར་ནང་ལག་འབོམ་གཡུགས་ཏེ། གཞུང་གི་ལས་བྱེད་དང་མང་ཚོགས་ཁག་གཅིག་བསད་འདུག”ཅེས་དང་། ཨབ་གྷན་རྒྱལ་ཡོངས་བདེ་འཇགས་ལྷན་ཚོགས་ཀྱི་མགྲིན་ཚབ་པ་ཧཱ་སེབ་སི་ཌེ་ཁཱེ་ (Hasib Sediqi) ཡིས། “ཏ་ལི་བྷན་དྲག་སྤྱོད་ཤོག་ཁག་གིས་ཨབ་གྷན་སྤྱི་ཁྱབ་ཁྲིམས་དོན་ཁང་གི་ཉེ་འཁོར་དུ་འབར་རྫས་དོན་རྐྱེན་བཟོས་ཡོད་པ་མ་ཟད། བྷ་ཌེ་གྷེ་སི་(Badghis) མངའ་སྡེའི་ཇཱ་ཝན་ཌི་རྫོང་ས་གནས་སྲིད་གཞུང་ལ་གཏོར་རྒོལ་བཏང་སྟེ་ལས་བྱེད་པ་ཁག་གཅིག་ལ་རྨས་སྐྱོན་བཏང་ཡོད་སྟབས། གཞུང་གིས་དྲག་སྤྱོད་པར་ཁ་གཏད་གཅག་ནས་རྒྱལ་ཡོངས་ནང་བདེ་འཇགས་ཡོང་བ་བྱ་རྒྱུ་ཡིན།”ཞེས་བརྗོད་འདུག
ནེའུ་ཡོག་དུས་བབ་དང་ཡཱ་ཧོ་གསར་ལམ་ཐོག་གནས་ཚུལ་སྤེལ་དོན་ལྟར་ན། ཟླ་ ༥ ཚེས་ ༤ ཉིན་གྱི་སྔ་དྲོ་ཏ་ལི་བྷན་དྲག་སྤྱོད་ཤོག་ཁག་གིས་ཨབ་གྷན་སྤྱི་ཁྱབ་ཁྲིམས་དོན་ཁང་གི་ཉེ་འཁྲིས་སུ་སྤྱི་སྤྱོད་རླངས་འཁོར་ཞིག་ལ་གཏོར་རྒོལ་བྱས་ཏེ། མི་གཅིག་བསད་ཡོད་པ་དང་། ཁ་སང་གྲོང་ཁྱེར་ཀན་ཌ་ཧར་ (Kandahar) གྱི་གསང་བའི་ལས་ཁུངས་ནང་འཇབ་རྒོལ་བྱས་ཏེ་ལས་བྱེད་པ་བཞི་བསད་ཡོད། དེ་བཞིན་ཏ་ལི་བྷན་དྲག་སྤྱོད་ཤོག་ཁག་གིས་འདས་པའི་བཅུ་ཕྲག་གཅིག་ལྷག་རིང་དྲག་སྤྱོད་ཀྱི་བྱ་འགུལ་སྣ་ཚོགས་བརྩམས་ཏེ། ཨབ་གྷན་སྲིད་གཞུང་མགོ་རྟིང་སློག་རྩིས་བྱས་ཡོད་པ་མ་ཟད། ལྷག་པར་དུ་ ༢༠༡༥ ལོའི་ཟླ་ ༤ ཚེས་ ༢༤ ནས་བཟུང་ཨབ་གྷན་གྱི་བྱང་ཤར་གྲོང་ཁྱེར་ཁཱན་ཌ་སེ་ (Kunduz)ནང་དྲག་འཛིང་ལས་འགུལ་ཤུགས་ཆེན་སྤེལ་ཏེ། ད་བར་ཡུལ་མི་འབུམ་གཅིག་ཙམ་ས་ཆ་གཞན་ལ་ཉེན་གཡོལ་འགྲོ་དགོས་ཐུག་ཡོད། ཟླ་འདིའི་ཚེས་ ༨ ཉིན་ཁཱན་ཌ་སེ་མངའ་སྡེའི་སྲིད་སྐྱོང་སཱ་ཧྥེ་(Mohammad Omer Safi) ཡིས་ད་ལྟ་ཨབ་གྷན་གྱི་བརྟན་བརླིང་ལ་དཀའ་ངལ་ཆེན་པོ་འཕྲད་བཞིན་པ་དེ་ནི། སི་རི་ཡ་དང་ཨི་རག་མཉམ་འབྲེལ་དྲག་སྤྱོད་ཤོག་ཁག་ (ISIS) གིས་ཏ་ལི་བྷན་ལ་དཔུང་རོགས་བྱས་པར་བརྟེན་ནས་བྱུང་བ་ཞིག་ཡིན་ཞེས་བརྗོད་འདུག་ཅེས་སོགས་བཀོད་འདུག
དེ་རིང་པ་ཀི་སི་ཐན་གྱི་སྐྱ་རེངས་ (Dawn) ཐོག་རྩོམ་པ་པོ་ཨབ་ཌོལ་གྷེ་ཧཱ་ཎེ་ཡིས་༼ཏ་ལི་བྷན་དང་ཨབ་གྷན་གྱི་ལས་དབང་།༽ཞེས་པའི་ཆེད་རྩོམ་ཞིག་སྤེལ་བའི་ནང་ཁོང་གིས། ཏ་ལི་བྷན་དྲག་སྤྱོད་ཤོག་ཁག་ནི་འཛམ་གླིང་གི་གྲང་དམག་སྐབས་ཨ་རིས་དམག་སྦྱོང་སྤྲད་ནས་ཨུ་རུ་སུ་དམར་ཤོག་རྒྱལ་ཁབ་ལ་ཁ་གཏད་གཅོག་ཆེད་བཙུགས་པ་ཞིག་ཡིན་སྟབས། ཇི་སྲིད་ཨ་རིས་ཨབ་གྷན་གཞུང་དང་པ་ཀི་སི་ཐན་ལ་རྒྱབ་སྐྱོར་བྱས་ཏེ། ཁོ་ཚོར་འཁོན་ལན་བསློག་རྒྱུ་དང་རྩ་མེད་བཟོ་རྒྱུ་མཚམས་འཇོག་བྱས་ནས་དཀའ་རྙོག་སེལ་ཐབས་མ་བྱས་ཚེ། མ་འོངས་པར་ཏ་ལི་བྷན་གྱི་དྲག་སྤྱོད་ལས་འགུལ་དེ་ཨི་བྷོ་ལ་ནད་ཡམས་ཇི་བཞིན་ས་ཕྱོགས་གང་སར་ཁྱབ་རྒྱུ་རེད་ཅེས་བྲིས་འདུག
