ཤི་ལོག་སྒྲོལ་མས་གསེར་གྱི་རྟགས་མ་བླངས།

བོད་ཀྱི་ལུས་རྩལ་མ་ཤི་ལོག་སྒྲོལ་མ་ལགས་ཀྱིས་སླར་ཡང་ཁ་ཐར་གྱི་རྒྱལ་སར་ཚོགས་པའི་བུད་མེད་གྱད་རྩལ་འགྲན་བསྡུར་ཁྲོད་ཨང་དང་པོ་གསེར་གྱི་རྟགས་མ་བླངས་འདུག

ཁ་སང་བོད་ལྗོངས་རྒྱ་ཡིག་དྲ་བས་གནས་ཚུལ་སྤེལ་བ་ལྟར་ན། ཟླ་འདིའི་ཚེས་ ༦ ནས་ཚེས་ ༡༠ ཉིན་བར་ཨཱ་རབ་ཀྱི་རྒྱལ་ཁབ་ཁ་ཐར་(Qater)གྱི་རྒྱལ་ས་(Doha)ཌོལ་ཧཱ་ནས་ཨེ་ཤ་ཡའི་བུད་མེད་རང་དབང་གྱད་རྩལ་འཇུ་རེས་འགྲན་བསྡུར་ཚོགས་པའི་སྟེང་། བོད་ཀྱི་བུད་མེད་ལུས་རྩལ་པ་ཤི་ལོག་སྒྲོལ་མ་ལགས་ཀྱིས་སྤྱི་རྒྱ་ ༦༣ ཅན་གྱི་གྱད་རྩལ་འགྲན་བསྡུར་ལས་ཨང་དང་པོ་གསེར་གྱི་རྟགས་མ་བླངས་ཡོད་པའི་གནས་ཚུལ་བཀོད་འདུག

ཤི་ལོག་སྒྲོལ་མ་ལགས་བོད་རང་སྐྱོང་ལྗོངས་ཉིང་ཁྲི་ས་ཁུལ་ཉིང་ཁྲི་རྫོང་བུ་སྐྱིད་གྲོང་བརྡལ་གྱི་ཞིང་བའི་ཁྱིམ་ཚང་དཀྱུས་མ་ཞིག་ནས་སྐྱེས་ཤིང་། རང་ལོ་ ༡༥ ཙམ་ནས་བཟུང་གྱད་རྩལ་འཇུ་རེས་ཀྱི་སྦྱོང་བརྡར་བྱེད་མགོ་བརྩམས་ཤིང་། ༢༠༠༥ ལོར་བོད་རང་སྐྱོང་ལྗོངས་ལུས་རྩལ་རུ་ཁག་ནང་ཞུགས་ཏེ་པེ་ཅིན་ལུས་རྩལ་སློབ་ཆེན་དུ་སློབ་སྦྱོང་དང་ལུས་རྩལ་སྦྱོང་བརྡར་བྱས། ༢༠༡༠ ལོར་རྒྱལ་ཁབ་གྱད་རྩལ་འཇུ་རེས་ཀྱི་ལུས་རྩལ་བའི་གྲས་སུ་བདམས་ཐོན་བྱུང་ཡོད་འདུག

༢༠༡༡ ལོའི་ཟླ་༩ ཚེས་ ༡༦ ཉིན། ཁོང་མོས་ཊར་ཀེ་ (Turkey) ནང་ཚོགས་པའི་འཛམ་གླིང་ལུས་རྩལ་འགྲན་ཚོགས་སྟེང་སྤྱི་རྒྱ་ ༦༧ ཅན་གྱི་བུད་མེད་ཀྱི་གྱད་རྩལ་འཇུ་རེས་འགྲན་བསྡུར་ཁྲོད་ཨང་དང་པོ་གསེར་གྱི་རྟགས་མ་བླངས།

༢༠༡༣ ལོའི་ཟླ་ ༩ ཚེས་ ༨ ཉིན། རྒྱ་ནག་རྒྱལ་ཡོངས་སྐབས་བཅུ་གཉིས་པའི་ལུས་རྩལ་འགྲན་ཚོགས་ཐོག་སྤྱི་རྒྱ་ ༦༣ ཡོད་པའི་གྱད་རྩལ་འཇུ་རེས་འགྲན་བསྡུར་ཁྲོད་སླར་ཡང་ཨང་དང་པོ་གསེར་གྱི་རྟགས་མ་བླངས།

༢༠༡༣ ལོའི་ཟླ་ ༤ ཚེས་ ༢༡ ཉིན། རྒྱ་གར་དུ་ཚོགས་པའི་གླང་ཆེན་ཨེ་ཤ་ཡའི་རང་དབང་གི་གྱད་རྩལ་འཇུ་རེས་གཟེངས་ཐོན་རྩལ་འགྲན་སྟེང་སྤྱི་རྒྱ་ ༦༣ ཡོད་པའི་བུད་མེད་འགྲན་བསྡུར་ལས་ཨང་དང་པོ་གསེར་གྱི་རྟགས་མ་བླངས།

༢༠༡༤ ལོའི་ཟླ་ ༣ ཚེས་ ༡༦ ཉིན། ཉི་ཧོང་རྒྱལ་ས་ཏུང་ཅིན་དུ་ཚོགས་པའི་འཛམ་གླིང་བུམ་པའི་སྐྱེས་མའི་རང་དབང་གྱད་རྩལ་འཇུ་རེས་འགྲན་བསྡུར་ཁྲོད་སྤྱི་རྒྱ་ ༦༣ ཡོད་པའི་བུད་མེད་འགྲན་བསྡུར་ལས་ཨང་གསུམ་པ་ཟངས་ཀྱི་རྟགས་མ་བཅས་བླངས་ཡོད་འདུག

༢༠༡༤ ཟླ་ ༩ ཚེས་ ༡༩ ཉིན། ལྷོ་ཀོ་རི་ཡའི་གྲོང་ཁྱེར་ཨིན་ཆེན་(Incheon)ནང་ཚོགས་པའི་ཨེ་ཤ་ཡའི་ལུས་རྩལ་འགྲན་ཚོགས་(Incheon Asian Games 4014 )ཞེས་པའི་སྟེང་། སྤྱི་རྒྱ་ ༦༣ ཡོད་པའི་གྱད་རྩལ་འཇུ་རེས་འགྲན་བསྡུར་ཁྲོད་ཨང་གཉིས་པ་དངུལ་གྱི་རྟགས་མ་བླངས་ཡོད་འདུག

གཞན། ཤི་ལོག་སྒྲོལ་མ་ལགས་ཀྱིས་རྒྱ་ནག་དང་རྒྱལ་ཁབ་གཞན་གྱི་ས་ཁུལ་རིམ་པ་དང་གྲོང་ཁྱེར་རིམ་པའི་འཇུ་རེས་འགྲན་བསྡུར་ཁྲོད་ཨང་དང་པོ་དང་གཉིས་པའི་བྱ་དགའ་མང་པོ་བླངས་ཡོད་པ་མ་ཟད། ༢༠༡༢ ལོར་རྒྱ་ནག་གི་ལུས་རྩལ་གྱི་སྐྱེས་མཆོག་མ་ཞེས་པའི་མཚན་སྙན་ཡང་ཐོབ་ཡོད་འདུག

གསར་འགོད་པ། འཇིགས་མེད་རྒྱ་མཚོ།