སི་ཁྲོན་ཞིང་ཆེན་ལིན་ཧྲི་རྫོང་ཐོག་ཏུ་མི་གྲངས་ཁྲི་ ༣ ཡས་མས་ཀྱིས་ངོ་རྒོལ་ཁྲོམ་སྐོར་བྱས་ཏེ་ཉེན་རྟོག་པས་དྲག་གནོན་བྱས་ཡོད་འདུག
ཟླ་འདིའི་ཕྱི་ཚེས་ ༡༦ ཉིན་གྱི་སྔ་དྲོར། སི་ཁྲོན་ཞིང་ཆེན་ཀང་ཨན་གྲོང་ཁྱེར་ལིན་ཧྲི་རྫོང་གི་ཁྲོམ་གཞུང་དུ། མི་གྲངས་ཁྲི་ ༣ ཡས་མས་ཀྱིས་ང་ཚོའི་ལྕགས་ལམ་ཕྱིར་སྤྲོད་ཅེས་པ་སོགས་ཀྱི་འཕྲེད་དར་དང་འབོད་ཚིག་བསྒྲགས་ཏེ། ལིན་ཧྲི་རྫོང་བརྒྱུད་དེ་ཏཱ་ཀྲུའུ་གྲོང་ཁྱེར་ནས་ཁྲུང་ཆིན་བར་ལྕགས་ལམ་རྒྱག་པའི་ལས་གཞིར་འགྱུར་བ་བཏང་བར་ངོ་རྒོལ་ཁྲོམ་སྐོར་བྱས་ཡོད་པ་དང་། དེ་མ་ཐག་ཉེན་རྟོག་པ་ ༣༠༠༠ ཙམ་བསླེབས་ཏེ་དྲག་གནོན་བྱས་པར་བརྟེན། ཁྲོམ་སྐོར་བ་དང་ཉེན་རྟོག་པའི་བར་དུ་འཁྲུག་འཛིང་ཤོར་ཏེ། ཉེན་རྟོག་པའི་རླངས་འཁོར་མང་པོ་བཅོམ་སྲེག་དང་། མི་མང་པོར་ཤི་རྨས་བྱུང་ཡོད་པ་དང་། ཁ་སང་ཕྱི་ཚེས་ ༡༧ ཉིན་ཡང་སླར་མི་གྲངས་ཁྲི་ ༢ ལྷག་འདུ་འཛོམས་ཀྱིས་ཁྲོམ་སྐོར་བྱས་པར་ཉེན་རྟོག་པས་དྲག་གནོན་བྱས་ཡོད་འདུག
ད་ལྟའི་ཆར་ལིན་ཧྲི་རྫོང་གི་སྲང་ལམ་གང་སར་ཉེན་རྟོག་པ་དང་དམག་མི་མང་པོ་འགྲེམས་འཇོག་བྱས་ཡོད་པ་མ་ཟད། རྒྱ་ནག་ཉིན་རེའི་ཚགས་པར་ལྟ་བུའི་གཞུང་འབྲེལ་དྲ་བ་ཁག་ཅིག་ནས་ལིན་ཧྲི་རྫོང་དུ་མི་མང་ཉུང་ཤས་ཤིག་འདུ་ཚོགས་བྱས་སྐོར་བརྗོད་པ་ཙམ་ལས། བརྒྱུད་ལམ་གཞན་ཏུ་ཐོན་པའི་དེའི་སྐོར་གྱི་གནས་ཚུལ་ཚང་མ་སྲིད་གཞུང་གིས་ནག་གསུབ་གཏོང་བཞིན་ཡོད་སྟབས། མི་ག་ཚོད་འཛིན་བཟུང་དང་ཤི་རྨས་བྱུང་ཡོད་མེད་གསལ་བོ་ཤེས་རྟོགས་ཐུབ་ཀྱི་མེད་པ་རེད།
ལིན་ཧྲི་རྫོང་གི་ཡུལ་མི་ཞིག་གིས། ཏཱ་ཡཱས་ལྕགས་ལམ་དང་ཐོག་ཏཱ་ཀྲུའུ་གྲོང་ཁྱེར་ནས་ཏཱ་ཀྲོ་དང་། ཏཱ་ཀྲོ་ནས་ལིན་ཧྲི། ལིན་ཧྲི་ནས་ཁྲུང་ཆིན་གྲོང་ཁྱེར་དུ་བཟོ་རྒྱུའི་འཆར་གཞི་ཡོད་ཀྱང་། ཉེ་སྔོན་ལིན་ཧྲི་རྫོང་བརྒྱུད་ནས་ལྕགས་ལམ་བཟོ་འཆར་མེད་པའི་གནས་ཚུལ་གོ་ཐོས་བྱུང་སྟབས། ལི་ཧྲི་མི་མང་གིས་ས་གནས་ཀྱི་དཔལ་འབྱོར་འཕེལ་རྒྱས་དང་འགྲིམ་འགྲུལ་སྟབས་བདེའི་ཆེད་ངོ་རྒོལ་ཁྲོམ་སྐོར་བྱས་སྐོར་བརྗོད་འདུག་ལ། ཁྲོམ་སྐོར་ནང་ཞུགས་མཁན་ཚོས་སྤྱི་ཚོགས་གནས་འཕྲིན་ཁག་ཏུ། ངོ་རྒོལ་ཁྲོམ་སྐོར་གྱི་ཉིན་དང་པོར་མི་གྲངས་ ༨ རྐྱེན་འདས་སུ་བཏང་ཡོད་ལུགས་དང་། ཡང་བུད་མེད་ཅིག་དང་སློབ་ཕྲུག་བྱིས་པ་གཉིས་ཉེན་རྟོག་པས་གཅར་རྡུང་བཏང་སྟེ་བསད་པ་དངོས་སུ་མཐོང་ཚུལ་དང་། དེ་བཞིན། ཐེངས་འདིའི་ཁྲོམ་སྐོར་ནང་ཉུང་མཐར་མི་གྲངས་ ༢༠ ལྷག་ལ་རྨས་སྐྱོན་ཕོག་ཡོད་སྐོར་སོགས་བརྗོད་ཡོད་པ་རེད།
ཕྱི་ཚེས་ ༡༧ ཉིན་སི་ཁྲོན་ལྕགས་ལམ་འཛུགས་སྐྲུན་ཁང་གིས་དོན་ཚན་གསུམ་ཅན་གྱི་ཡོངས་ཁྱབ་བརྡ་ཐོ་ཞིག་སྤེལ་བའི་ནང་། ཏཱ་ཡཱས་ལྕགས་ལམ་གྱི་ལས་གཞི་དེ་ད་ལྟ་སྔོན་འགྲོའི་ཞིབ་འཇུག་གི་དུས་སྐབས་ཡིན་ཞིང་། ལས་གཞི་དེར་དུས་ཡུན་གང་འཚམ་རིང་པོ་འགོར་རྒྱུ་ཡིན་པ་མ་ཟད། ཞིང་ཆེན་དང་རྒྱལ་ཁབ་རིམ་པའི་གཏན་འབེབས་ལས་འཆར་ནང་ད་དུང་ཚུད་མེད་ལ། མ་འོངས་པར་གཏན་འབེབས་ལས་འཆར་ནང་ཚུད་དེ་རྒྱལ་ཁབ་ཀྱི་ཆོག་མཆན་འཐོབ་པ་ཡིན་ན། གཞི་ནས་ལས་འཆར་དེ་མགོ་ག་དུས་འཛུགས་དང་མགོ་ཇི་ལྟར་འཛུགས། ཐིག་ལམ་ཁ་ཕྱོགས་སོགས་ཀྱི་ཐོག་གྲོས་སྡུར་བྱ་དགོས་པ་མ་ཟད། སི་ཁྲོན་ཞིང་ཆེན་སྲིད་གཞུང་དང་མི་མང་ནང་བསམ་ཚུལ་ཅི་ཡོད་ཞིབ་འཇུག་དགོས་སྟབས། མི་མང་གིས་ཁྲིམས་ལྟར་རེ་སྐུལ་བྱས་ཏེ་སྤྱི་ཚོགས་ཀྱི་ཞི་བདེ་བརྟན་བརླིང་སྲུང་སྐྱོབ་བྱས་ན། ད་གཟོད་ལས་གཞི་དེ་གང་མགྱོགས་ཀྱིས་ལག་བསྟར་བྱེད་ཐུབ་པས། ལྕགས་ལམ་འཛུགས་སྐྲུན་བྱེད་པར་སྤྱི་ཚོགས་ཀྱི་ཁོར་ཡུག་གང་ལེགས་སྐྲུན་དགོས་སྐོར་བརྗོད་འདུག
བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ལིན་ཧྲི་རྫོང་ནི་ཁྲུང་ཆིན་གྲོང་ཁྱེར་ནས་སྤྱི་ལེ་ ༦༠ ལྷག་གི་སར་ཡོད་པའི་སི་ཁྲོན་ཤར་ཕྱོགས་ཀྱི་ཆེས་མཐའ་འཁོབ་ཀྱི་རྫོང་ཞིག་ཡིན་ལ། རྫོང་དེར་མི་གྲངས་ས་ཡ་ ༢ ལྷག་ཡོད་པ་དང་། ཁྲུང་ཆིན་དང་ཞི་ཨན་བར་གྱི་འགྲུལ་བ་སྐྱེལ་འདྲེན་གྱི་ལྟེ་གནས་གལ་ཆེན་ཞིག་ཆགས་ཡོད་འདུག ཡིན་ནའང་། ཏཱ་ཡཱས་ལྕགས་ལམ་གྱི་ལས་གཞི་དེ་ཏུན་ཞོ་ཕིན་གྱི་ཕ་ཡུལ་ཀང་ཨན་གྲོང་ཁྱེར་དུ་ཁ་བསྒྱུར་བ་ཡིན་ན། སྤྱི་ལེ་ ༡༠༠ ཙམ་གྱིས་ལམ་ཐག་རིང་དུ་འགྲོ་རྒྱུ་ཡིན་པ་དང་། ཀང་ཨན་གྲོང་ཁྱེར་ལྟ་བུར་མཚོན་ན། ཕྱི་ལོ་ ༢༠༡༤ ལོར་གསར་དུ་བཟོས་པའི་ཁྲིན་ཏུའུ་ལྕགས་ལམ་ཡང་ཡོད་སྟབས། སྲིད་གཞུང་གི་བྱ་སྤྱོད་དེར་མི་མང་གིས་ངོ་རྒོལ་ཤུགས་ཆེན་བྱེད་ཀྱི་ཡོད་པ་མ་ཟད། ད་རེས་ཀྱི་ལས་འགུལ་དེ་ཉེ་བའི་ལོ་ཤས་ནང་རྒྱ་ནག་ནང་ལོགས་ཀྱི་ངོ་རྒོལ་ཁྲོམ་སྐོར་གཞི་རྒྱ་ཆེ་ཤོས་ཤིག་ཆགས་ཡོད་འདུག
གསར་འགོད་པ། པདྨ་མཚོ།
