རྒྱ་ནང་གི་བུད་མེད་ཐོབ་ཐང་རྩོད་ལེན་པའི་རྟོགས་སད།

ཞོ་མེ་ལེས།

རྒྱ་ནག་གི་བུད་མེད་ཐོབ་ཐང་དོན་གཉེར་བ་ཞོ་མེ་ལེས་ (Xiao Meili) བརྗོད་དོན། ཉེ་ལམ་པེ་ཅིན་སྤྱི་སྤྱོད་རླངས་འཁོར་ས་ཚིགས་ཁག་ཏུ་ཡ་ང་བག་ཚ་མེད་པར་ཉམ་ཆུང་བུད་མེད་ཚོར་བཙན་གཡེམ་བརྙས་བཅོས་གཏོང་གི་ཡོད་པར་མི་དམངས་འདུ་འཛོམས་ཀྱིས་ངོ་རྒོལ་སྐད་འབོད་བྱེད་སྐབས། སྤྱི་བདེ་ཉེན་རྟོག་མི་སྣས་བུད་མེད་ཀྱི་ཁེ་དབང་དོན་གཉེར་བ་ལྔ་དང་གཞན་བུད་མེད་ཀྱི་རང་དབང་ལས་འགུལ་བ་མང་པོ་འཛིན་བཟུང་བཀག་བསྐྱིལ་བྱས་སོང་ལ། སྐབས་དེར་གུས་མོས་གནད་དོན་འདིའི་ཐད་ལ་མནོ་བསམ་གཏོང་རྒྱུ་མ་བྱུང་། གནས་ཚུལ་དེ་བཞིན་དུ་སྔོན་ཆད་ང་ཚོ་ཡང་དེ་ལྟར་འཛིན་བཟུང་བཀག་ཉར་བྱས་མོད། ཆུ་ཚོད་འགའི་རྗེས་སུ་ང་རང་ཀློད་གྲོལ་བཏང་བ་རེད། ཡིན་ན་ཡང་དགོང་མོ་དེ་ནས་བཟུང་ངའི་གྲོགས་མོ་ཚོ་ཕྱིར་ལོག་རྒྱུ་མ་བྱུང་བས། ཐེངས་འདིའི་འཇུ་བཟུང་བཀག་འགོག་ནི་དེ་སྔོན་དང་ཡེ་ནས་མི་འདྲ་བ་བདག་གིས་གསལ་བོར་རྟོགས་བྱུང་། དེ་བས། བདག་གིས་ཡང་བསྐྱར་བུད་མེད་ཀྱི་ཁེ་དབང་རྩོད་ལེན་ལས་འགུལ་ནང་མཉམ་ཞུགས་བྱེད་རྒྱུར་བསམ་བཀོད་འཐེན་པ་ཡིན་མོད། འོན་ཀྱང་། ང་ཡང་ཉེན་རྟོག་པས་འཛིན་བཟུང་དང་འདྲི་གཅོད་ཀྱིས། རྒྱ་ནང་གི་བུད་མེད་ཐོང་ཐང་བརྩོན་ལེན་མཁན་ (བདག་གི་གྲོགས་མོ་ཚོ) རེ་རེ་བཞིན་རྩིས་སྤྲོད་དགོས་པའི་བཀའ་རྒྱ་བསྒྲག་པར་སྐྲག་སྟེ། ང་རང་པེ་ཅིན་གྲོང་ཁྱེར་དང་ཁ་བྲལ་ནས་ས་གནས་གཞན་དུ་བསྐུངས་བསྡད་པ་ཡིན།

རྒྱ་ནག་རྒྱལ་ཡོངས་སུ་བུད་མེད་ཀྱི་ཁེ་དབང་དོན་གཉེར་བ་ཚོ་འཛིན་བཟུང་བཀག་བསྐྱིལ་གྱི་བྱ་འགུལ་གང་སར་ཁྱབ་པ་དང་བསྟུན་ཏེ། རྒྱ་ནང་གི་གཞོན་སྐྱེས་ཚོས་ (མང་ཆེ་བ་སློབ་ཆེན་སློབ་མ་ཡིན) མ་གྲོས་བསམ་པ་གཅིག་མཐུན་གྱིས་ངོ་རྒོལ་སྐད་འབོད་བྱེད་པ་དང་། ཁོང་མོ་ཚོ་མྱུར་དུ་ཀློད་གྲོལ་དགོས་པའི་སྙན་སེང་ཡང་ཕུལ་བ་རེད། སྐབས་དེར་ང་ཚོས་རྒྱལ་སྤྱིའི་འགྲོ་བ་མིའི་ཐོབ་ཐང་སོགས་ཀྱི་ཚོགས་སྡེ་ཁག་དང་ཧེ་ལི་རེ་ཁི་ལིན་ཊོན་ལྟ་བུའི་ནུབ་གླིང་གི་དབུ་ཁྲིད་ཚོས་ང་ཚོའི་ཡིད་སྐྱོ་བའི་གནས་སྟངས་ལ་གཟིགས་ཏེ་རྒྱ་ནག་སྲིད་གཞུང་ལ་སྐྱོན་བརྗོད་དང་འབོད་སྐུལ་ཞུ་བའི་རེ་ལྟོས་མ་བཅངས།

ཕྱིས་སུ་རང་རྒྱལ་དང་རྒྱལ་སྤྱིའི་ཚོགས་སྡེ་ཁག་གི་འབོད་སྐུལ་དང་དེའི་སྒུལ་ཤུགས་འོག ཟླ་གཅིག་ལྷག་འགོར་རྗེས་ངའི་གྲོགས་མོ་ཚོ་ཀློད་གྲོལ་བཏང་སོང་ལ། སྤྱི་བདེ་ཉེན་རྟོག་པས་ཁོང་ཚོ་འཛིན་བཟུང་བཀག་འགོག་བྱས་པའི་ཉེས་དོན་དང་དྲང་བོའི་གཟུ་དཔང་གང་ཡང་ཡོད་པ་མ་རེད།

བདག་གི་གྲོགས་མོ་ཚོ་བཙོན་གྲོལ་ཐོབ་རྗེས། ང་ཡང་ཕྱིར་པེ་ཅིང་གྲོང་ཁྱེར་དུ་ལོག་ཡོང་བ་ཡིན། འོན་ཀྱང་ཐེངས་འདིའི་དོན་རྐྱེན་གྱི་དབང་གིས། སྐབས་དེ་ནས་བཟུང་ངས་རང་ཉིད་ཀྱིས་བདམས་ཟིན་པའི་བགྲོད་ལམ་སྟེ། བུད་མེད་ཀྱི་ཁེ་དབང་རྩོད་ལེན་ལས་འགུལ་ནི་མེས་རྒྱལ་གྱི་སྒྲིག་ཁྲིམས་དང་འགལ་མིན་ཐད་ལ་མནོ་བསམ་ཡང་ཡང་གཏོང་དགོས་པ་ཆགས་སོང་།

ཕྱི་ལོ་ ༡༩༩༠ ལོར་ངེད་རང་སུ་ཁྲོན་ཞིང་དུ་འཚར་ལོང་བྱུང་བའི་སྔ་རྗེས་སུ། ངས་རང་རྒྱལ་གྱི་ལུགས་སྲོལ་དང་དེའི་བློ་ངོར་མི་ཤོང་བའི་བྱེད་སྒོ་གང་མང་ཞིག་མཐོང་བར་གྱུར་ཅིང་། མཐོང་ནས་ཀྱང་རང་ཁྱིམ་དུ་ངས་རྟག་པར་རང་གི་ཨ་མ་ལགས་ཀྱི་ཨ་ནེ་དང་ཨ་མྱེ་འམ། ཡང་ན་ཕྱི་རོལ་དུ་སྡོད་པའི་སྤོ་བོ་ལགས་སུ་བཀའ་འདྲི་ཞུ་དུས། ཁོང་ཚོས་ང་ལ་སྔོན་ཆད་ཁྱོད་རང་གི་ཨ་ཕ་ལགས་ཀྱི་སྤོ་བོ་དང་སྤོ་རྨོ་གཉི་གའང་འདི་ལས་ལྷག་པའི་དཀའ་སྡུག་གང་མང་ལ་འཕྲད་མྱོང་བ་རེད་ཟེར། དེར་མ་ཟད་སློབ་གླིང་དུ་བདག་གི་དགེ་རྒན་ཚོས་ནམ་རྒྱུན་སློབ་བུ་ཚོར་མཐོང་ཆེན་གནང་བ་དང་སློབ་ཕྲུག་བུ་མོ་ཚོར་མཐོང་ཆུང་བྱེད་ཀྱི་འདུག་ཅིང་། དེའི་རྒྱུ་མཚུན་ནི་འདི་ལྟ་སྟེ། ཁོང་ཚོའི་སེམས་རྒྱུད་ན་ཕོ་མཆོག་མོ་དམན་གྱི་འདུ་ཤེས་ཧ་ཅང་གཏིང་ཟབ་པས་ཡིན་འདུག

རང་རྒྱལ་གྱི་མཐོ་སློབ་ཏུ་འཛུལ་ཞུགས་བྱེད་སྐབས། གཙུག་ལག་སློབ་ཆེན་ཁག་ཅིག་གིས་རྒྱུན་པར་མངོན་སུམ་འཛེམ་མེད་ལ་མཚོ་ཐོག་བཟོ་སྐྲུན་ལས་རིགས་དང་ས་གཤིས་རིག་གནས་ཞིབ་འཇུག་སྡེ་ཁག་ནས་ཐོན་པའི་སློབ་ཕྲུག་བུ་མོ་མང་བོ་ཞིག་འཛུལ་ཞུགས་བྱེད་དུ་མི་འཇུག་པར། ཚབ་ཏུ་གསར་འགོད་ལས་རིགས་དང་ཕྱི་སྐད་སློབ་གཉེར་ (གནའ་དེང་གང་ཡིན་ཡང་ངེད་སྐྱེས་མ་ཚོ་ལས་རིགས་འདི་ལ་ཧ་ཅང་དགའ་མོས་ཡོད) བྱེད་མཁན་སློབ་བུ་མང་བོ་སློབ་འཇུག་བྱེད་ཀྱིན་འདུག་ལ། དཀའ་གནད་འདིའི་ཐད་ནས་བདག་གིས་རྟག་པར་འདི་ལྟར་མཐོང་ཡོང་། མཐོ་སློབ་ཁག་ནང་ཚུད་དང་མ་ཚུད་ཀྱི་སློབ་ཞུགས་བུད་མེད་སུ་ཞིག་ཡིན་རུང་། ཁོ་མོ་ཚོར་སྐྱེ་གཟིགས་རིང་ཞིང་བཞིན་རས་མཛེས་པོ་ཞིག་ཅི་ནས་ཀྱང་བདོག་དགོས་པ་ནི་སློབ་ཞུགས་ཀྱི་ཆ་རྐྱེན་མེད་རུང་བ་དེ་ཡིན་ཚོད་རེད།

དེ་ལྟར་ཡང་སྐྱེས་པ་མང་བོ་ཞིག་གིས་བུད་མེད་ཚོར་མཐོང་ཆུང་དང་ཁོ་མོ་ཚོ་སློབ་གསོའི་ལས་སྒོ་གང་ལའང་ཞུགས་དཀའ་ཞིང་བྱེད་སྡུག་ཏུ་གཏོང་གི་ཡོད་ཀྱང་། ད་དུང་དེ་ལ་སྣང་མེད་ཀྱིས་བཟོད་བསྲན་གུ་ཡངས་གནང་རུང་། བདག་གིས་དེ་ལྟར་ཁྱོན་ནས་བྱེད་མི་འདོད་དེ། སློབ་ཆེན་སློབ་མ་ཞིག་ཡིན་པའི་ཆ་ནས། དེ་ལས་ལྡོག་སྟེ་ང་རང་བུད་མེད་ཀྱི་རང་དབང་ཐོབ་ཐང་སྐོར་གྱི་རྒྱུན་ཤེས་སྦྱོང་བར་མོས་མཁན་ཞིག་ཏུ་གྱུར་ཅིང་། བདག་གིས་འཛམ་གླིང་གི་ཡུལ་གྲུ་གང་སའི་བུད་མེད་ཀྱི་ཁེ་དབང་རྩོད་ལེན་མཁན་གྲགས་ཅན་དང་ལྷག་དོན་ཧྥ་རན་སིའི་མཁས་མཛངས་གཉིས་ལྡན་གྱི་བུད་མེད་རྩོམ་པ་པོ་སེམ་བན་ཌི་བྷོ་བར་ (Simone de Beauvoir) ལགས་ཀྱི་བརྩམས་ཆོས་ <<མཚན་རྟགས་གཉིས་པ་>>< > ཞེས་པའི་བུད་མེད་ཀྱི་ཁེ་དབང་སྐོར་གྱི་དཔེ་དེབ་དེ་ཀློག་མགོ་བརྩམས་པ་ཡིན། མ་ཟད་ངས་ད་དུང་ནུབ་གླིང་གི་ཕོ་མོ་འདྲ་མཉམ་དང་བུད་མེད་ཀྱི་ཁེ་དབང་རྩོད་ལེན་སྐོར་གྱི་གློག་བརྙན་ལའང་ལྟ་བཞིན་ཡོད་ལ། མིག་ལོང་བ་ཞིག་དང་འདྲ་བར། ངས་ནམ་རྒྱུན་རྒྱང་མཐོང་ཤེལ་མིག་གྱོན་ནས་བལྟས་ཚེ། ཧ་ཅང་གསལ་བོར་མཐོང་ཡོང་གི་འདུག བུད་མེད་ཀྱི་ཁེ་དབང་ལས་དོན་ལ་བརྟེན་ནས། ང་རང་བྱིས་པ་ཡིན་དུས་མ་རྟོགས་པ་དང་མ་གོ་བའི་གནད་དོན་མང་པོ་ཞིག་རིམ་གྱིས་མཐོང་ཞིང་ངེས་པར་གྱུར།

༢༠༡༡ ལོའི་སྟོན་ཁར་ང་རང་དེ་སྔོན་སྤྱི་བདེ་ཉེན་རྟོག་པས་འཛིན་བཟུང་བཀག་བསྐྱིལ་བྱས་པའི་བུད་མེད་ཀྱི་ཁེ་དབང་དོན་གཉེར་བ་སྐུ་ཞབས་ལེ་ཐེན་ཐེན་ (Li Tingting) ལ་འཕྲད་ཅིང་། འདས་པའི་ལོ་ངོ་དུ་མའི་རིང་ལ་བུད་མེད་ཀྱི་ཁེ་དབང་དོན་གཉེར་བ་སྐུ་ཞབས་ལེ་ལགས་ཀྱིས་ང་རང་ཉིད་དང་ལས་དབང་གི་བསམ་ཕྱོགས་གཅིག་པའི་སྐྱེས་མ་ཁག་ཅིག་དང་ཁོང་མོ་ཚོའི་བུད་མེད་ཀྱི་ཁེ་དབང་རྩོད་ལེན་གནང་ཕྱོགས་ཀྱི་ལས་འཆར་ཁག་ངོ་སྤྲོད་མཚམས་སྦྱོར་གནང་བྱུང་།

བདག་གི་གྲོགས་མོ་ཚོ་ (མང་ཆེ་བ་ཕྱི་ལོ་ ༡༩༨༠ ནས་ ༡༩༩༠ བར་གྱི་མི་རབས་གསར་བ་ཡིན) དང་ངེད་ཚོ་ཚང་མར་ཤེས་ཡོན་སློབ་གསོ་ཐོབ་ཡོད་སྟབས། ང་ཚོར་ལས་བསླ་བོར་རང་ཉིད་ལ་མཚམས་པའི་ལས་གནས་རེ་ཐོབ་ཀྱང་། ང་ཚོའི་ཕ་མ་རྣམས་ཀྱིས་ནམ་རྒྱུན་ང་ཚོར་ཉེན་ཁའི་ལས་དོན་མི་སྒྲུབ་པར། ཞི་བདེ་ཞོད་འཇགས་ཀྱི་འཚོ་བ་རོལ་དགོས་པར་གདམས་ནའང་། ང་ཚོས་རང་བདེ་རང་སྐྱིད་ཀྱི་འཚོ་བ་སྟེ། གཉེན་སྒྲིག་ཁྱིམ་སྐྱོང་གི་ལས་སུ་མ་གཞོལ་བར། འདི་ལྟར་རང་ཉིད་དང་ལས་དབང་གཅིག་པའི་སྐྱེས་མ་ཚོའི་ཁེ་དབང་ལས་དོན་ཁུར་དུ་བླངས་པ་ཡིན།

དེང་སང་རྒྱ་ནང་གི་ལས་སྒོ་ཁག་ཏུ་ཕོ་མཆོག་མོ་དམན་གྱི་འདུ་ཤེས་ཁྱབ་ཆེ་ཞིང་། ཐ་ན་ཉོ་འཚོང་ལས་རིགས་ཁག་ཏུའང་བུད་མེད་ལ་ལས་གནས་འཐོབ་ཁག་པོ་འདུག འདི་ལྟར་མཚན་རྟགས་དབྱེ་འབྱེད་ཀྱིས་བུད་མེད་ཚོར་མཐོང་ཆུང་དང་བརྡབ་གསིག་གཏོང་བ་ནི་རྒྱ་ནང་གི་ཆེས་སྤྱིར་བཏང་གི་སྣང་ཚུལ་ཞིག་ཏུ་ཆགས་ཡོད་ལ། དེར་བརྟེན་ནང་ཁུལ་སྡེ་གཟར་གྱི་རླུང་འཚུབ་ཕྱོགས་གང་སར་མཆེད་ཡོང་གི་འདུག

འཛམ་གླིང་མཉམ་འབྲེལ་རྒྱལ་ཚོགས་ཀྱིས་༢༠༡༣ ལོར་རྒྱལ་དོན་དབྱེ་ཞིབ་བྱས་པ་ལྟར་ན། རྒྱ་ནང་གི་སྐྱེས་པ་ ༥༠% ཙམ་གྱིས་རང་གི་བཟའ་ཚང་དང་དགའ་རོགས་ལ་གཅར་རྡུང་དང་བཙན་གཡེམ་བྱེད་ཀྱིན་ཡོད་ཚོད་རེད།

གྲོགས་པོ་རེ་འགས་ང་ཚོར་ཁྱོད་རང་ཚོ་གསང་བའི་ངང་སྲིད་གཞུང་གི་ལས་མི་ཆགས་ཐབས་སུ་འབད་པ་དང་དེ་ནས་སྲིད་གཞུང་གི་སྒྲིག་འཛུགས་ལ་འཕོ་འགྱུར་གཏོང་ཐབས་སུ་བརྩོན་དགོས་པ་ཞེས་རེ་འདུན་བཏོན་རུང་། བསམ་བློའི་རང་དབང་ལ་དམ་དྲག་ཆེ་བའི་རྒྱལ་ཁབ་ཅིག་ཏུ། ནང་སྲིད་ལེགས་བཅོས་ཀྱི་འབོད་སྐུལ་གཏོང་བའི་བློ་སྤོབས་ཤིག་སུ་ལའང་ཡོད་པ་མ་རེད།

མི་རབས་སྔོན་མའི་ཁྲོད་ཀྱི་བུད་མེད་མང་པོ་ཞིག་སྲིད་གཞུང་གིས་མེས་རྒྱལ་གྱི་ངོ་ལོག་པའི་གྲས་སུ་དེད་ཀྱང་། དེང་སང་དཀའ་གནད་དེ་ལ་འགྱུར་ལྡོག་ཅུང་ཙམ་ཕྱིན་འདུག དེ་བས་རྒྱལ་སྤྱིའི་སྤྱི་ཚོགས་བྱིངས་ཀྱི་ངོས་ནས་རྒྱ་ནག་སྲིད་གཞུང་ལ་གནོན་ཤུགས་འཕར་མ་ཞིག་མ་སྤྲད་ཚེ། ང་ཚོ་སྐྱེས་མ་རེ་འགའ་ཞིག་གིས་གསང་བའི་ངང་བུད་མེད་ཀྱི་ཁེ་དབང་རྩོད་ལེན་གནང་རྒྱུ་ཁག་པོ་རེད།

ཉེ་ལམ་མི་དམངས་ཀྱི་ངོ་རྒོལ་སྐད་འབོད་ལ་དམ་དྲག་ཤུགས་ཆེར་བྱས་པ་ནས་བཟུང་། ང་ཚོས་བྱེད་ཐབས་གཞན་ལ་བརྟེན་ནས་སྤྱི་ཚོགས་འཚོ་གནས་ཀྱི་ཁེ་དབང་བརྩོན་ལེན་བྱེད་དགོས་པ་ཞིག་ཆགས་ཡོད། དེ་བས་ང་ཚོས་སྲང་ལམ་དང་ས་འོག་བགྲོད་ལམ་གང་སར་བུད་མེད་བདེ་སྲུང་གི་བརྡ་ཁྱབ་བཀྲམ་པ་དང་སྤྱི་ཚོགས་ཁོར་ཡུག་གང་སར་བུད་མེད་ཀྱི་བདེ་དོན་འགན་སྲུང་བྱེད་ཐབས་སུ་འབད་ཀྱིན་ཡོད།

ནང་ཁུལ་སྡེ་གཟར་གྱི་ཟིང་ཆར་བརྟེན་ནས་ངེད་རང་དུས་ཐོག་མར་སྤྱི་དམངས་འདུ་ཚོགས་ལས་འགུལ་ནང་མཉམ་ཞུགས་བྱས་པ་དང་། རེབ་དེར་ང་ཚོས་གྱོན་ཆས་ཐོག་ཏུ་ཁྲག་མདོག་གི་ཁ་ཏོག་བྱུགས་པ་དང་ལག་ཏུ་༼ སྡེ་གཟར་ལ་ཁ་གཡར་ནས་སྐྱེས་མའི་བརྩེ་བ་རྡོག་རོལ་མ་གཏོང་༽ ཞེས་པའི་ངོ་རྒོལ་འཕྲེད་དར་འཕྱར་ཏེ། པེ་ཅིན་གྲོང་ཁྱེར་གྱི་འདུ་འཛི་ཆེ་བའི་ཁྲོམ་སྲང་དུ་གོམ་བགྲོད་བྱས་ཏེ། ཡུལ་མི་ཚོར་རང་རྒྱལ་གྱིས་རང་རེའི་སྐྱེས་མ་ཚོའི་ཁེ་དབང་འཕྲོག་གི་ཡོད་པར་ཕྱིར་རྟོག་དང་ཕྱིར་རྒོལ་གནང་དགོས་པའི་འབོད་བརྡ་བཏང་བ་ཡིན། རེབ་དེར་ང་ཚོས་སྐྱེས་པ་ཚོས་བདག་བཟུང་བྱས་པའི་སྤྱི་སྤྱོད་གསང་སྤྱོད་བརྒྱུད་དུས། ང་ཚོས་སྔར་བས་ཀྱང་སྐྱེས་མ་ཚོའི་འཚོ་གནས་ཀྱི་དཀའ་ཁག་མང་པོ་ཞིག་ངང་གིས་མཐོང་ཡོང་། སྤྱི་ཚོགས་ཁོར་ཡུག་གང་སར་ཐ་ན་ཕོ་མོ་ཕན་ཚུན་བར་འབྱུང་བཞིན་པའི་གསང་སྤྱོད་རྩོད་གླེང་གི་དཀའ་རྙོག་དེའང་བཙན་ཤེད་ལུགས་ལྡོག་འབའ་ཞིག་ཡིན་གྱི། དྲང་བདེན་ལུགས་མཐུན་ཞིག་ཁྱོན་ནས་མིན་སྟབས། མི་དམངས་འདུ་ཚོགས་ལས་འགུལ་ཐེངས་གཉིས་པའི་སྐབས་སུ། ང་ཚོས་རང་གི་མགོ་སྐྲ་བཞར་ནས་མཐོ་སློབ་ཁག་ཏུ་བུད་མེད་ལ་ལོག་གཡེམ་དང་བརྙས་སྨོད་གཏོང་གི་ཡོད་པར་ངོ་རྒོལ་སྐད་འབོད་བྱས་པ་ཡིན།

ན་ནངས་ངེད་རང་གྲོང་དང་གྲོང་ཁྱེར་ ༥༥ དང་ལམ་ཐག་སྤྱི་ལེ་ ༡༢༠༠ བསྐྱོད་དེ། རྒྱ་ནང་གི་སློབ་གྲྭ་ཁག་ཏུ་སློབ་ཕྲུག་བུ་མོ་ཚོར་བཙན་གཡེམ་དང་མནར་གཅོད་ཚབས་ཆེན་གཏོང་བཞིན་པ་དག་ལ་རྒྱུས་ལོན་བྱས་པ་ལྟར་ན། ཡ་ང་བའི་འབྱུང་རྐྱེན་འདི་རིགས་ལ་སྲིད་གཞུང་གིས་སྡུག་སྦྱོང་མྱོང་མཁན་ཚོར་ལེ་ལན་བསྙད་པ་ཙམ་ལས། སྒྲིག་ཁྲིམས་ལེགས་བཅོས་དང་ཉེས་ཅན་པར་ཆད་གཅོད་མི་གཏོང་བར་འདུག

ཡིན་ན་ཡང་ང་ཚོས་རྒྱ་ནང་གི་བརྒྱུད་ལམ་དང་སྲང་ལམ་ཁག་ཏུ་བུད་མེད་ཀྱི་ཁེ་དབང་རྩོད་ལེན་བྱས་པར་བྱེད་ནུས་ཆེན་པོ་ཐོན་གྱི་ཡོད་པ་སྨྲས་ཅི། ཉེ་བའི་ལོ་ངོ་འདི་དག་གི་རིང་ལ་རྒྱལ་ནང་གི་གཙུག་ལག་སློབ་ཆེན་ཁག་ཏུ་ད་དུང་ཡང་སློབ་ཕྲུག་བུ་མོ་ཚོར་གསང་སྤྱོད་མི་རེག་པའི་དཀའ་རྙོག་འབྱུང་བཞིན་ཡོད་ཀྱང་། གཙུག་ལག་སློབ་ཆེན་འགའ་ཞིག་ནང་དེ་སྔའི་བཙན་ཤེད་ལུགས་ལྡོག་གི་སྒྲིག་ཁྲིམས་གུ་ཡངས་སུ་བཏང་བ་དང་། པེ་ཅིན་གྲོང་ཁྱེར་གྱིས་སྐྱེས་མར་གསང་སྤྱོད་གསར་བསྐྲུན་བྱས་པ། རང་རྒྱལ་གྱི་ཆེས་མཐོའི་ཁྲིམས་ཞིབ་ཁང་གིས་རྒྱལ་ནང་སྡེ་གཟར་གྱི་རྒྱུ་རྐྱེན་ལ་ཐུགས་ཁུར་གནང་བ་བཅས་བྱེད།

ང་ཚོའི་བུད་མེད་ཀྱི་ཁེ་དབང་རྩོད་ལེན་ལས་འགུལ་གྱིས། རྒྱ་ནང་གི་རྒྱལ་ཞེན་པ་རེ་འགའ་བྱ་དཀའ་བྱེད་གཏད་དུ་གྱུར་བས། གསར་གནས་བརྒྱུད་ལམ་ཁག་ཏུ་ཁོང་ཚོས་ང་ཚོར་བཙན་གཏམ་ལུགས་ལྡོག་གིས་འཇིགས་སྐུལ་ དང་ཁ་རྡུང་བཏང་བ་དང་། སྤྱི་བདེ་མི་སྣས་ང་ཚོའི་ལག་འཁྱེར་ཁ་པར་དང་གློག་འཕྲིན་བརྒྱུད་ལམ་ནས་རང་རྒྱལ་ནུབ་ཁུལ་དུ་གྱོད་སྣ་བྱུར་འདྲེན་གྱི་སྦྱོར་བ་སྤེལ་མི་ཆོག་པའི་ཉེན་བརྡ་བཏང་ཡོང་།

ཉེ་ལམ་རྒྱལ་སྤྱིའི་མ་ཡམ་དུས་ཆེན་གྱི་སྔོན་ཏག་ཏག་ལ་བདག་གི་གྲོགས་མོ་ལྔ་འཇུ་བཟུང་བྱས་པའི་རྒྱུ་མཚན་ཡང་། དེང་གི་ང་ཚོ་གཞོན་ནུ་མ་ཚོར་རྒྱལ་སྤྱིའི་གསར་ལམ་ཁག་ཏུ་གནས་ཚུལ་བརྒྱུད་སྒྲོག་བྱེད་པའི་བློ་ནུས་ལྡན་པས། རྒྱ་ནག་སྲིད་གཞུང་ང་ཚོར་རེ་དོགས་དང་ཞེད་སྣང་སྐྱེས་པ་རེད། ང་ཚོའི་དེ་སྔའི་བུད་མེད་ཀྱི་ཁེ་དབང་བརྩོན་ལེན་ལས་འགུལ་གྱི་རྩོད་རྙོག་དང་དེའི་ལས་འཆར་སོགས་ཞི་འགྲིག་ངང་ཐག་གཅོད་བྱས་ཡོད་ནའང་། ད་རེབ་ང་ཚོས་རང་རྒྱལ་གྱི་ཞི་བདེ་བརྟན་ལྷིང་ལ་གཏོར་བརླག་བྱས་སོང་བར་ཁ་གཡར་ནས། ང་དང་ངའི་གྲོགས་མོ་ཚོ་འཛིན་བཟུང་ཁྲ་མུན་དུ་བཅུག་པ་དང་། ཉེན་རྟོག་མི་སྣས་ང་དང་ངའི་གྲོགས་མོ་ཚོར་ད་དུང་སྤྱི་ཚོགས་ཆབ་སྲིད་ལས་འགུལ་བ་གཞན་སུ་དང་གང་ཡོད་རྩིས་སྤྲོད་དགོས་པའི་འཇིགས་སྐུལ་མནར་གཅོད་བཏང་བྱུང་།

འབྱུང་འགྱུར་ཡང་ང་ཚོ་སུན་བཙིར་དང་སྒེར་གཅོད་ཀྱི་སྤྱི་ཚོགས་ཁོར་ཡུག་འདིར་ག་ཙམ་རིང་འཚོ་ཞིང་སྡོད་པ་དེ་སྲིད་དུ། ང་ཚོས་ད་དུང་བུད་མེད་ཀྱི་ཁེ་དབང་རྩོད་ལེན་བྱེད་ངེས་ཡིན་ལ། དེ་བཞིན་རྒྱལ་སྤྱིའི་ཚོགས་སྡེ་ཁག་གིས་ཀྱང་མུ་མཐུད་ང་ཚོར་རོགས་རམ་དང་འབོད་སྐུལ་གནང་བར་ང་ཚོས་རེ་ལྟོས་བྱེད་ཀྱིན་ཡོད།

སྤྱིར་བུད་མེད་ཀྱི་ཁེ་དབང་རྩོད་ལེན་གནང་བ་ནི་རྒྱལ་ཁབ་གང་གི་རྒྱལ་ཁྲིམས་དང་འགལ་བའི་སྦྱོར་བ་ཞིག་གཏན་ནས་མ་ཡིན་ཞིང་། ང་ཚོས་རང་རྒྱལ་གྱི་སྐྱེས་མ་ཚོར་ཁེ་དབང་འདྲ་མཉམ་དགོས་པའི་རེ་འབོད་ཞུས་པ་ཡིན་སྟབས། ང་ཚོའི་འབོད་སྐུལ་ཡོད་ཚད་སྲིད་གཞུང་གང་གི་མ་འོངས་བརྟན་ལྷིང་དང་འབྲེལ་དམ་ཟབ་ཡོད་པ་སྨོས་མ་འཚལ་མོད། འོན་ཀྱང་ཉེ་ལམ་སྲིད་གཞུང་གི་བརྒྱུད་ལམ་དུ“བུད་མེད་ཀྱི་ཁེ་དབང་རྩོད་མཁན་ལྔ”འཛིན་བཟུང་བྱས་པའི་གནས་ཚུལ་བསྒྲགས་ལུགས་ལ་བལྟས་ན། ཕར་ཆེར་ཡོད་ཚད་ཀྱི་ཡོད་ཚད་དཀར་ནག་གོ་ལྡོག་གི་སྣང་ཚུལ་ཞིག་ཏུ་བསྒྱུར་ཅིང་། བསམ་ཡུལ་ལས་འདས་པ་ཞིག་ལ། བར་ལམ་ཞིག་ནས་རྒྱ་ནང་དུ་སྤྱི་བདེ་མི་སྣས་རང་རྒྱལ་ནང་བུད་མེད་ཀྱི་ཁེ་དབང་དང་ཐོབ་ཐང་གི་གོ་རྟོགས་སྤེལ་བར་གཞོགས་འདེགས་གནང་གིན་འདུག་གོ།

བསྒྱུར་མཆན། བུད་མེད་ཀྱི་ཁེ་དབང་དོན་གཉེར་བ་ཞོ་མེ་ལེས་ (Xiao Meili) བརྩམས། ཟླ་ ༥ ཚེས་ ༡༤ ཉིན་ཨ་རིའི་ནེའུ་ཡོག་དུས་བབ་ཐོག་སྤེལ་ཡོད་པ་འདིར་བོད་བསྒྱུར་ཞུས།