ཚན་རིག་ཟབ་སྦྱོང་ཚོཊ་བཞིན་པ།

དགའ་ལྡན་ཤར་རྩེ་ཚན་རིག་སྡེ་ཚན་གྱི་འཛིན་ཁང་སོགས་དབུ་འབྱེད་དང་འབྲེལ་ཟླ་གཅིག་ལྷག་ལ་ཚན་རིག་སྐོར་གྱི་ཟབ་སྦྱོང་ཞིག་ཚོགས་བཞིན་ཡོད་འདུག

དགའ་ལྡན་ཤར་རྩེ་གྲྭ་ཚང་གི་ཚན་རིག་དགེ་རྒན་གྲྭ་བློ་བཟང་རྣམ་རྒྱལ་ལགས་ཀྱིས་འདི་གར་གནས་ཚུལ་མཁོ་གཏོང་གནང་བ་ལྟར་ན། ཁ་སང་ཕྱི་ཚེས་ ༡༨ ཉིན་གྱི་སྔ་དྲོའི་ཆུ་ཚོད་ ༩ པ་ཐོག རྒྱ་གར་ལྷོ་ཕྱོགས་དགའ་ལྡན་ཤར་རྩེ་གྲྭ་ཚང་གི་ཚན་རིག་སྡེ་ཚན་གྱི་འཛིན་ཁང་དང་བརྟག་དཔྱད་ཁང་། དཔེ་མཛོད། ཡིག་ཚང་སོགས་མ་ལག་དང་བཅས་པ་ལེགས་འགྲུབ་བྱུང་བའི་དབུ་འབྱེད་མཛད་སྒོ་ཚོགས་ཡོད་པ་དང་། སྐབས་དེར་སྐུ་མགྲོན་གཙོ་བོ་ཤར་བྱང་གྲྭ་ཚང་གཉིས་ཀྱི་མཁན་རིན་པོ་ཆེ་རྣམ་གཉིས་ཀྱི་དབུས་དགའ་ལྡན་ཚོགས་ཆེན་གྱི་ཞལ་ངོ་རྣམ་པ་གཉིས་དང་། ཤར་རྩེ་གྲྭ་ཚང་གི་དབུ་མཛད་ཆེན་མོ། བོད་མིའི་སྒྲིག་འཛུགས་ཀྱི་སྐུ་ཚབ་མོན་གྷོ་ས་གནས་གྱི་དབུ་འཛིན་ལགས་དང་། ཨ་རིའི་ཨེ་མོ་རི་མཐོ་སློབ་ནས་ཕེབས་པའི་དགེ་རྒན་གཉིས། དེ་བཞིན། གྲྭ་ཚང་གཉིས་ཀྱི་ཕྱག་མཛོད་དང་སྡེ་ཚན་ཁག་གི་འགན་འཛིན་རྣམ་པ་དང་། གྲྭ་ཚང་གཉིས་ཀྱི་ཚན་རིག་སྡེ་ཚན་གྱི་འགན་འཛིན་དང་ལས་བྱེད། སློབ་ཕྲུག་སོགས་ཁྱོན་མི་གྲངས་ ༡༧༠ ལྷག་འཛོམས་ཡོད་འདུག

མཛད་སྒོའི་ཐོག་མར་སྐུ་མགྲོན་གཙོ་བོ་མཁན་རིན་པོ་ཆེ་རྣམ་གཉིས་ཀྱིས་ཤིས་བརྗོད་མེ་ཏོག་གཏོར་བཞིན་འཛིན་ཁང་སོགས་དབུ་འབྱེད་གནང་བ་དང་འབྲེལ། ༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེའི་མདུན་དུ་མཇལ་དར་ཕུལ་བ་དང་སྣང་གསལ་སྒྲོན་མེ་ཞལ་འབྱེད་སོགས་གནང་གྲུབ་རྗེས། ཚན་རིག་སྡེ་ཚན་གྱི་འགན་འཛིན་དགེ་བཤེས་རྒྱལ་མཚན་དབང་འདུས་ལགས་ཀྱིས་ཚན་རིག་སྡེ་ཚན་གྱི་ལས་རིམ་ངོ་སྤྲོད་དང་། ཨེ་མོ་རིའི་དགེ་རྒན་རྣམ་གཉིས་ནས་ནུབ་ཕྱོགས་པའི་ལྟ་གྲུབ་དང་ནང་པའི་ལྟ་གྲུབ་བར་ལ་འབྲེལ་ལམ་ཡག་པོ་བྱུང་ན་དགེ་མཚན་ཆེ་སྐོར་གྱི་གསུང་བཤད་གནང་ཡོད་པ་དང་། དེ་བཞིན། མོན་གྷོ་ས་གནས་དབུ་འཛིན་ལགས་ཀྱིས་༧གོང་ས་མཆོག་གི་དགོངས་གཞི་དང་ལམ་སྟོན་ལྟར། ནང་ཆོས་དང་ཚན་རིག་ཟུང་དུ་འབྲེལ་བའི་རིག་གཞུང་འཛམ་གླིང་ཡོངས་ལ་དར་ཁྱབ་ཆེན་པོ་བྱུང་ན་འཛམ་གླིང་སྤྱི་ཡི་ཞི་བདེ་ལ་ཕན་ཐོགས་ཆེན་པོ་ཡོད་པའི་སྐོར་གསུང་བཤད་གནང་ཡོད་པ་དང་། མཇུག་ཏུ་དགའ་ལྡན་ཤར་བྱང་གཉིས་ཀྱི་མཁན་རིན་པོ་ཆེ་རྣམ་གཉིས་ནས་འཛམ་གླིང་སྤྱིའི་རིག་གཞུང་འཕེལ་ཕྱོགས་ལ་ལྟོས་ནས་དུས་རབས་དང་མཐུན་པའི་བསྟན་པ་འཛིན་སྐྱོང་སྤེལ་གསུམ་བྱེད་པ་ལ་ཚན་རིག་གལ་ཆེན་པོ་ཡིན་སྐོར་གྱི་བཀའ་སློབ་ལམ་སྟོན་གནང་ཡོད་འདུག

ཚན་རིག་སློབ་གཉེར་གྱི་མ་ལག་དབུ་འབྱེད་དང་འབྲེལ། ཨ་རིའི་ཨེ་མོ་རི་མཐོ་སློབ་ཁང་གི་དགེ་རྒན་ ༡༤ ཆེད་ཕེབས་ཀྱིས་དེ་རིང་ཕྱི་ཚེས་ ༡༩ ཉིན་ནས་ཕྱི་ཟླ་ ༦ ཚེས་ ༢༢ བར་ནུབ་ཕྱོགས་ཀྱི་ལྟ་གྲུབ་སྐོར་དང་དབང་རྩའི་ཚན་རིག སྐྱེས་དངོས། དངོས་ཁམས་བཅས་བརྗོད་གཞི་མི་འདྲ་བ་བཞིའི་ཐོག་ཟབ་སྦྱོང་སྤྲོད་བཞིན་ཡོད་པ་དང་། ཐེངས་འདིའི་ཟབ་སྦྱོང་ནང་དགའ་ལྡན་ཤར་བྱང་གཉིས་ཀྱི་ཚན་རིག་དོན་གཉེར་བ་སློབ་ཕྲུག་ ༡༥༠ མཉམ་ཞུགས་གནང་ཡོད་འདུག

གསར་འགོད་པ། པདྨ་མཚོ།