གསང་གནས་བརྗེ་ལེན་གྱི་གྲོས་མཐུན་ལ་ངོ་རྒོལ།

ཉེ་ལམ་པ་ཀི་སི་ཐན་དང་ཨབ་གྷན་གཞུང་བར་གསང་གནས་བརྗེ་ལེན་གྱི་གྲོས་མཐུན་ཞིག་བཞག་པ་དེར་ཨབ་གྷན་གྲོས་ཚོགས་འཐུས་མི་ཚོས་སྐྱོན་བརྗོད་བྱས་འདུག

བདུན་ཕྲག་སྔོན་མའི་རེས་གཟའ་མིག་དམར་ཉིན་པ་ཀི་སི་ཐན་སྲིད་བློན་མུ་ཤཱེ་རེབ་ཀྱིས་སྣེ་ཁྲིད་པའི་དམག་སྤྱི་ར་ཧེལ་ (Raheel Sharif) དང་གསང་བའི་ལས་ཁུངས་ཀྱི་འགན་འཛིན་རེ་ཛི་ཝན་ (Rizwan Akhtar) བཅས་ཀྱིས་ཨབ་གྷན་ནང་རྒྱལ་དོན་སྐོར་སྐྱོད་བྱས་སྐབས། རྒྱལ་ཁབ་གཉིས་ཀྱི་གསང་བའི་ལས་ཁུངས་བར་གསང་གནས་བརྗེ་རེས་བྱ་རྒྱུའི་གྲོས་མཐུན་ཞིག་བཞག་ཡོད་སྟབས། ཟླ་འདིའི་ཚེས་ ༡༨ ཉིན་ཨབ་གྷན་གྱི་གྲོས་ཚོགས་ནང་འཐུས་མི་ཁག་གཅིག་གིས་གྲོས་མཐུན་དེ་རྒྱལ་ཁབ་ཀྱི་གསང་བ་གཞན་ལ་སྤྲོད་པའི་རང་ཕམ་གཞན་རྒྱལ་གྱི་ལས་ཀ་ཞིག་ཡིན་པའི་སྐྱོན་བརྗོད་བྱས་འདུག

ཉེ་ལམ་རྒྱ་གར་དང་ཨ་རི། ཨབ་གྷན་བཅས་ཐབས་ཇུས་མཁས་པ་ཚོས་པ་ཀི་སི་ཐན་གྱི་གསང་བའི་ལས་ཁུངས་ནི་ཨབ་གྷན་དང་པ་ཀི་སི་ཐན་ནང་དྲག་སྤྱོད་བྱ་འགུལ་སྤེལ་མཁན་པ་ཀི་སི་ཐན་གྱི་འཇིགས་ཚོགས་ཨཱ་ཁཱ་ཎེ་ཚོ་ཁག་ (Haqqani Network) དང་འབྲེལ་བ་དམ་པོ་ཡོད་པ་དང་། རྒྱལ་སྤྱིའི་གནད་དོན་ཆེད་ལས་མཁས་པ་ཚོས་སི་རི་ཡ་དང་ཨི་རག་གི་མཉམ་འབྲེལ་དྲག་སྤྱོད་ཤོག་ཁག་ (ISIS) དང་འབྲེལ་བ་བྱས་ཏེ། ཨབ་གྷན་རྒྱལ་སར་དྲག་འཛིང་ལས་འགུལ་སྤེལ་ནས་མི་གསོད་ཁྲག་སྦྱོར་བྱེད་མཁན་གྲས་ཡིན་པའི་གྲུབ་དོན་སྙན་ཐོ་བཏོན་ཡོད་པ་མ་ཟད། ཨབ་གྷན་གྱི་ཐབས་ཇུས་མཁས་པ་ཚོས་ཀྱང་བསམ་ཚུལ་སྤེལ་ཡོད་སྟབས། ཨབ་གྷན་གྲོས་ཚོགས་འཐུས་མི་ཚོས་རྒྱལ་ཡོངས་བདེ་འཇགས་ལྷན་ཁང་གིས་ཕན་ཐོགས་མེད་པའི་གྲོས་མཐུན་དེ་འཇོག་དགོས་དོན་གང་ཡིན་གསལ་བཤད་བྱེད་དགོས་པའི་རེ་འདུན་བཏོན་འདུག

ཨབ་གྷན་གསར་འཕྲིན་ཌོ་ལོ་ (Tolo News) ཞེས་པས་གྲོས་ཚོགས་འཐུས་མི་ར་མན་ (Rahman Rahmani) གྱིས་གྲོས་ཚོགས་ནང་བཤད་པའི་སྐད་ཆ་ལུང་འདྲེན་བྱས་པའི་ནང་ཁོས། ང་ཚོའི་རྒྱལ་ཁབ་ནང་པ་ཀི་སི་ཐན་གྱི་སྲིད་བློན་སླེབ་སྐབས་ཁྱེད་ཀྱིས་ངོ་ཚ་ཞེ་ཁྲེལ་གྱི་གསང་གནས་སྤེལ་རེས་གྲོས་མཐུན་ཞིག་བཞག་པ་དེས། ཁྱེད་ཀྱིས་ཁྱེད་རང་ལོང་བ་དང་ལྐུགས་པ་བཟོས་པ་ཞིག་རེད་ཅེས་དང་། གྲོས་ཚོགས་འཐུས་མི་སཱ་མེ་ (Mohammad Faisal Sami) ཡིས་གཞུང་གིས་གྲོས་མཐུན་དེ་མ་བཞག་སྔོན་ལ་བསམ་བློ་རྒྱ་ཆེར་བཏང་སྟེ་པ་ཀི་སི་ཐན་ཕམ་ཉེས་གཏོང་ཐུབ་པ་ཞིག་བཟོ་མི་ཐུབ་པ་གང་ཡིན་ནམ་ཞེས་བརྗོད་ཡོད་སྟབས། པ་ཀི་སི་ཐན་རྒྱལ་ཡོངས་བདེ་འཇགས་ལྷན་ཚོགས་ཀྱི་མགྲིན་ཚབ་པ་ཧཱ་སེབ་སི་ཌི་ཁེའུ་ (Haseeb Sediqi) ཡིས་ང་ཚོས་པ་ཀི་སི་ཐན་དང་གསང་གནས་བརྗེ་ལེན་གྱི་གྲོས་མཐུན་བཞག་པ་དེ་ནི་རྒྱལ་ཁབ་ཀྱི་གསང་བ་ཕྱིར་སྤྲོད་བྱས་པ་ཞིག་མིན་པར། འཇིགས་སྐུལ་རིང་ལུགས་པར་ཁ་གཏད་གཅོག་ཐབས་བྱས་པ་ཞིག་ཡིན་སྟབས། ངས་གྲོས་མཐུན་དེས་ཨབ་གྷན་ལ་ཕན་ཐོགས་ཡོད་པར་ངོས་འཛིན་བྱེད་བཞིན་ཡོད་ཅེས་བརྗོད་འདུག

དེ་རིང་པ་ཀི་སི་ཐན་གྱི་སྐྱ་རེངས་ཐོག་མིང་བརྗོད་འདོད་མེད་པའི་མཐོ་རིམ་དཔོན་རིགས་ཤིག་གིས་བརྗོད་དོན། གསང་གནས་བརྗེ་ལེན་གྱི་གྲོས་མཐུན་དེ་ནི་ཨི་སེ་ལམ་མཱ་བྷ་ཋ་དང་ཀཱ་པུར་བར་ཡིད་ཆེད་སླེབ་ཆེད་ཀྱི་མཉམ་ལས་གྲོས་ཆོད་ཅིག་ཡིན་སྟབས། ཨབ་གྷན་གྱི་ཆབ་སྲིད་པ་ཚོས་སྐྱོན་བརྗོད་བྱས་ཚེ་ཕན་ལས་གནོད་པ་ཆེ་བ་བསྐྱལ་རྒྱུ་ཡིན་པར་བརྟེན། རང་ཕྱོགས་རྒྱལ་བ་དང་གཞན་ཕྱོགས་ཕམ་རྒྱུའི་ལྟ་ཕྱོགས་འཛིན་མི་རུང་ཅེས་དང་། པ་སི་ཐན་གྱི་དམག་སྤྱི་ཨ་སེམ་བྷ་ཇེ་ཝ་(Asim Bajwa) ཡིས་གསང་གནས་བརྗེ་ལེན་གྱི་གྲོས་མཐུན་དེ་ནི་རྒྱལ་ཁབ་གཉིས་ཀར་ཁེ་ཕན་ཡོད་པ་ཞིག་ལས་པ་ཀི་སི་ཐན་གཅིག་པུར་ཡོད་པ་ཞིག་མིན་སྟབས། གལ་སྲིད་ཨབ་གྷན་ཆབ་སྲིད་པས་མུ་མཐུད་འགོག་རྒོལ་བྱས་ན་མཉམ་ལས་དེ་ཡག་པོ་འབྱུང་ཡོང་དཀའ་མོ་ཡིན་པར་བརྟེན། རྒྱལ་ཁབ་གཉིས་ཀྱིས་བསམ་གཞིགས་བྱེད་དགོས་པ་ཆགས་ཡོད་ཅེས་བརྗོད་ཡོད་སྟབས། ཨབ་གྷན་སྲིད་འཛིན་གྲི་མགྲིན་ཚབ་པ་ཨ་ཇེ་མལ་ (Ajmal Abidy) གྱིས་མཉམ་ལས་གྲོས་མཐུན་དེ་ནི་ཕན་ཚུན་བསམ་ཞིབ་བྱས་ནས་བཞག་པ་ཞིག་ཡིན་སྟབས། ཨབ་གྷན་ཆབ་སྲིད་པ་ཚོས་ག་རེ་བརྗོད་ཀྱང་ཐག་གཅོད་ལ་འགྱུར་བ་གང་ཡང་མེད་ཅེས་ལན་བརྒྱབ་འདུག

ཟླ་འདིའི་ཚེས་ ༡༨ ཉིན་ཧིན་རྡུ་སི་ཐན་དུས་བབ་དང་སྐྱ་རེངས་ཐོག་གནས་ཚུལ་སྤེལ་དོན་ལྟར་ན། འདི་ལོའི་ཨབ་གྷན་རྒྱལ་ཡོངས་སྲིད་འཛིན་འོས་བསྡུའི་ཁྲོད་རྒྱལ་ཡོངས་ཆིག་སྒྲིལ་ཚོགས་པར་རྒྱལ་ཁ་ཐོབ་ཡོད་སྟབས། ཨབ་གྷན་སྲིད་འཛིན་ཨ་ཤཱ་རེབ་གྷ་ནེ་ (Ashraf Ghani) པ་ཀི་སི་ཐན་ནང་བསྐྱོད་ནས་དམག་དོན་བཀོད་དོམ་ཁང་ལ་རྟོག་ཞིབ་དང་། རྒྱལ་ཁབ་གཉིས་ཀྱི་མཐའ་སྲུང་དམག་མིའི་བར་མཉམ་འབྲེལ་དམག་སྦྱོང་བྱ་རྒྱུ་བྱས་ ཡོད་པ་མ་ཟད། ཨབ་གྷན་གྱི་དམག་མི་པ་ཀི་སི་ཐན་གྱི་དམག་སྦྱོང་ལྟེ་གནས་ཁང་ནང་སྦྱོང་བརྡར་གཏོང་རྒྱུ་ཐག་གཅོད་སོགས་བྱས་ཏེ། ཁ་ཆེའི་རྒྱལ་ཁབ་གཉིས་ཀྱི་འབྲེལ་ལམ་ཡག་ཏུ་ཕྱིན་ཡོད་ཅེས་སོགས་བཀོད་འདུག

ཡང་པ་ཀི་སི་ཐན་གྱི་ཉིན་རེའི་ལྟ་སྤྱོད་ཅེས་པའི་ཐོག་རྩོམ་པ་པོ་ཨ་ལི་གྷེག་ཛ་ར་མན་གྱིས་ ༼ཏ་ལི་བྷན་གྱི་གཡུལ་ས་གཉིས་ཀྱི་འཐབ་རྩོད༽ཅེས་པའི་རྩོམ་ཡིག་ཅིག་བྲིས་ཏེ། ཁོས་ད་ལྟ་རྒྱལ་ཁབ་གཉིས་ནང་ཏ་ལི་བྷན་དང་དྲག་སྤྱོད་ཤོག་ཁག་གིས་འཇབ་རྒོལ་དང་མི་གསོད་ལས་འགུལ་རྩོམ་བཞིན་ཡོད་སྟབས། འཕྱར་གྲུ་མཉམ་འདེགས་བྱས་ནས་དྲག་སྤྱོད་པར་ཁ་གཏད་གཅོག་དགོས་ཀྱང་། ཨབ་གྷན་ཆབ་སྲིད་པས་འགོག་རྒོལ་བྱེད་བཞིན་ཡོད་པར་བརྟེན་བློ་སེམས་གཅིག་མཐུན་གྱི་མཉམ་ལས་ཡོང་རྒྱུ་ཁག་པོ་ཡིན་པ་མ་ཟད། འཇིགས་སྐུལ་རིང་ལུགས་པར་གོ་སྐབས་གསར་པ་དེ་འདྲ་བསྐྲུན་སྲིད་པ་ཞིག་ཀྱང་རེད་ཅེས་བྲིས་འདུག

གསར་འགོད་པ། དོན་གྲུབ།