ཁ་སང་བོད་མིའི་སྒྲིག་འཛུགས་བཀའ་ཤག་གི་སྐུ་ཚབ་ཤེས་རིག་བཀའ་བློན་དངོས་གྲུབ་ཚེ་རིང་མཆོག་བལ་ཡུལ་དུ་འབྱོར་ཏེ་ས་ཡོམ་གནོད་ཐེབས་ཁུལ་དུ་གཟིགས་སྐོར་དང་མང་ཚོགས་ལ་འཚམས་འདྲི་གནང་ཡོད་འདུག
འདི་གར་གནས་ཚུལ་འབྱོར་བ་ལྟར་ན། ཁ་སང་ཚེས་ ༡༩ ཉིན་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་དངོས་གྲུབ་ཚེ་རིང་མཆོག་བལ་ཡུལ་ནང་ཕེབས་འབྱོར་བྱུང་ཡོད་འདུག ཉིན་དེར་བལ་ཡུལ་གྱི་བོད་མི་ཚོར་ས་སྐྱ་གོང་མ་རིན་པོ་ཆེ་མཆོག་གིས་ས་ཡོམ་གྱི་འཇིགས་པ་ལས་གྲོལ་ཆེད་ལམ་སྟོན་ཕེབས་པ་ལྟར། བལ་ཡུལ་ཐར་ལམ་ས་བཟང་རྣམ་རྒྱལ་གླིང་དུ། སྒྲོལ་མ་འབུམ་ཚོགས་དང་། སྒྲོལ་མ་གཡུ་མདོས་ཀྱི་ཞབས་རིམ་སོགས་དགེ་འདུན་པ་བཞི་བརྒྱ་ཉེ་བས་ཉིན་གྲངས་ལྔ་པ་འཚོགས་བཞིན་པའི་སྐབས་ཡིན་འདུག
སྐབས་དེར་བལ་ཡུལ་ས་སྐྱ་རྒྱལ་ཡོངས་གསུང་རབ་སློབ་གཉེར་ཁང་ < International Buddhist Academy > གི་ངེས་སྟོན་པ་ཌོཀ་ཊར་མཁན་པོ་ངག་དབང་འབྱོར་ལྡན་དང་། བལ་ཡུལ་འབྲེལ་མཐུད་སྐུ་ཚབ་དོན་གཅོད་རྟ་མགྲིན་རྡོ་རྗེ་དང་དཔལ་འབྱོར་དྲུང་ཆེ། ལོ་ཙཱ་བ་རྒན་བྱམས་པ་བློ་གསལ་བཅས་མཉམ་འཛོམས་བྱུང་ཐོག མཁན་པོ་འབྱོར་ལྡན་ལགས་ཀྱིས། ད་ལམ་༧གོང་མ་རིན་པོ་ཆེ་མཆོག་གི་བཀའ་དགོངས་གཞིར་བཟུང་། ས་སྐྱའི་ངོས་ནས་ཐོག་མར་ས་ཡོམ་གྱི་རོགས་ཚོགས་ཇི་ལྟར་བཙུགས་པའི་བརྒྱུད་རིམ་དང་། བལ་ཡུལ་གྱི་གནོད་ཐེབས་མང་ཚོགས་སྤྱི་ལ་ས་སྐྱ་ << ས་ཡོམ་རོགས་ཚོགས་ >> ཀྱི་ངོས་ནས་བཟའ་འབྲུ་དང་། རོགས་དངུལ་ཕུལ་བའི་སྐོར་སོགས་ངོ་སྤྲོད་གནང་ཡོད་འདུག
དེའི་རྗེས་ཤེས་རིག་བཀའ་བློན་མཆོག་གིས། ཐེངས་འདིའི་ས་ཡོམ་ཁྲོད་རང་གཞུང་གིས་མང་ཚོགས་ལ་ཐུགས་ཁུར་གནང་ཕྱོགས་དང་། ཁྱད་པར་བལ་ཡུལ་གནས་སྡོད་བོད་མི་ལྷག་བསམ་ཅན་སྤྱི་དང་། དམིགས་བསལ་ཆོས་བརྒྱུད་རིས་མེད་ཀྱི་སྐྱབས་གནས་དགེ་འདུན་པའི་སྡེས་ཐུགས་སྤོབས་ཆེན་པོས་༧གོང་ས་མཆོག་གི་དུས་རྒྱུན་གསུངས་དང་གསུང་བཞིན་པའི་གཞན་ཕན་དང་། འཚེ་མེད་ཀྱི་བླ་ན་མེད་པའི་བཀའ་དགོངས་སྙིང་ལ་བཅངས་ཏེ། རྒྱལ་སྤྱིའི་སྤྱི་ཚོགས་ཀྱི་མིག་སྔར་བོད་བརྒྱུད་ནང་བསྟན་གྱི་དགེ་འདུན་པའི་ཚབ་མཚོན་ནུས་པའི་རླབས་ཆེན་ཕྱག་ལས་གནང་བ་དེར་རང་གཞུང་གིས་བསྔགས་བརྗོད་ཡོད་སྐོར་སོགས་གསུངས་ཡོད་འདུག
བལ་ཡུལ་སྐུ་ཚབ་དོན་གཅོད་རྟ་མགྲིན་རྡོ་རྗེ་མཆོག་གིས་ས་ཡོམ་གྱི་གོད་ཆག་བྱུང་བ་ནས་བཟུང་། ཆོས་བརྒྱུད་རིས་མེད་ཀྱི་དགེ་འདུན་པ་ཚོས་མང་ཚོགས་ཀྱི་བདེ་སྡུག་ཁོ་ན་ཐུགས་ལ་བཏགས་ཏེ་གནོད་ཐེབས་ས་ཁུལ་སོ་སོར་དཀའ་བ་ཁྱད་བསད་ཀྱིས་ཕེབས་པ་དེས། ལོ་རྒྱུས་ཡུན་རིང་ལྡན་པའི་བལ་བོད་མི་མང་གི་བརྩེ་སེམས་སྔར་བས་ཀྱང་ཇེ་ཉེར་གྱུར་ཡོད་པར་མ་ཟད། ༧གོང་ས་མཆོག་གི་ཐུགས་དགོངས་རྫོགས་པ་བྱུང་ཡོད་ངེས་ཡིན་སྐོར་སོགས་གསུངས་ཡོད་འདུག
ཐེངས་འདིར་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་བལ་ཡུལ་ནང་ཕེབས་པ་དེ་ནི། བཀའ་ཤག་གིས་བལ་ཡུལ་ནང་གི་བོད་མི་འདུས་སྡོད་ཀྱི་ས་གནས་ཁག་དང་། བོད་མི་ཚོས་ཛ་དྲག་གི་རོགས་སྐྱོར་ཉིན་མང་པོར་བྱས་འབྲེལ་ཡོད་ལས་ཀྱི་སྣེ་མོ་བ་དང་། ས་ཡོམ་ཁྲོད་གོད་ཆག་ཤོར་བའི་བོད་མི་ཚོར་དམིགས་བསལ་འཚམས་གཟིགས་གནང་བར་ཕེབས་པ་ཞིག་ཡིན་འདུག ཅེས་ཨ་འདུས་སྐལ་བཟང་རྒྱ་མཚོ་ལགས་ཀྱིས་བལ་ཡུལ་ནས་བཏང་འབྱོར་བྱུང་།
གང་ལྟར་དབུས་བོད་མིའི་སྒྲིག་འཛུགས་ཀྱིས་རོགས་སྐྱོར་སྔོན་ནས་འབྱོར་བ་གསལ་ལམ་ལ་ཐོན་འདུག་དེ་ནས་རྒྱུན་འདུག་རང་གཞུང་གི་ལས་བྱེད་ཁག་བཞུགས་ཡོད་པ་སོང་ཙང་འགྲིགས་འདུག་བསམ་བྱུང་མ་ཟད་གནས་སྟངས་འདི་འདྲའི་སྐབས་ཕེབས་ཐུབ་པ་ཧ་ལས་པ་ཡག་པོ་བྱུང་ང་ཚོ་དགའ་ནས་ཡོད་བཀྲིན་ཆེ།
ས་ཡོམ་བརྒྱབ་སྟེ་ཟླ་གཅིག་འགྲོ་བཞིན་པའི་སྐབས་སུ་གཞི་ནས་བོད་གཞུང་གི་མི་སླེབས་པ་འདི་ཡ་མཚན་རེད།
ཁ་ཉིན་ངོ་དེབ་སོགས་སུ་གྲ་བ་ཞིག་གིས་རྒྱ་ནག་གི་རས་གུར་མང་པོ་ཡོད་པའི་བརྙན་ཞིག་བསྟན་ཏེ། རྒྱ་ནག་གཞུང་གི་རོགས་སྐྱོར་བ་ཚོས་བལ་ཡུལ་གཞུང་མང་གཉིས་ཀྱི་སེམས་འགུག་ཐབས་བྱེད་ཀྱིན་འདུག རྡ་རམ་ས་ལའི་བོད་གཞུང་གིས་སྐྱག་པ་ཟ་བཞིན་ཡོད་རེད་དམ། བལ་ཡུལ་ནང་གི་གནོད་འཚེ་ཕོགས་མཁན་ཚོར་རོགས་པ་བྱེད་མཁན་ཞིག་ཕར་ཞོགས། བལ་ཡུལ་ནང་གི་བོད་མི་ས་ཡོམ་གྱིས་ཤི་རྨས་ཐེབས་བཞིན་པ་ཚོར་ཡང་རོགས་བྱེད་མཁན་གཅིག་ཀྱང་མཐོང་རྒྱུ་མི་འདུག་ཅེས་ལབ་ཡོད་པ་ཞིག་དྲ་ལམ་ཁག་ཏུ་འགྲོ་བཞིན་འདུག
དུས་ཚོད་ཛ་དྲག་སྐབས་ད་དུང་མི་ངན་རེ་གཟུང་སྨྱོ་གཏམ་བཤད་པ་ཡིད་རེ་སྐྱོ། གཞུང་གི་སྐུ་ཚབ་སུ་ཕེབས་མན་ཁྱད་པར་གང་ཡང་མེད། གང་ལྟར་གཞུང་ཕྱོགས་ནས་ཐུགས་བསམ་བཞེས་པ་དགའ་བསུ་ཞུ།
ནང་སྲིད་ལས་ཁུངས་ནས་ཕེབས་དགོས་སར། ཤེས་རིག་ལས་ཁུངས་ནས་ཕེབས་དགོས་དོན་ཅང་མཐོང་མ་སོང་ང་ོ།།