གཙུག་ལག་སློབ་ཆེན་གྱི་སློབ་དཔོན་ཆེན་མོ་ཚུད་པའི་རྒྱ་རིགས་ཁག་ཅིག་གིས་ཨ་རིའི་གསང་བའི་ཚོང་དོན་ལ་ལྐོག་ཉན་བྱས་ཡོད་སྐོར་ཨ་རིའི་གཞུང་གིས་སྐྱོན་བརྗོད་བྱས་འདུག
དེ་རིང་བྷེ་བྷེ་སི་ (B.B.C) གསར་ལམ་དུ་གནས་ཚུལ་བཀོད་པ་ལྟར་ན། རྒྱ་མི་དྲུག་གིས་ལག་འཁྱེར་ཁ་པར་ནང་ཨ་རིའི་གསང་བའི་ཚོང་དོན་ལ་ལྐོག་ཉན་བྱས་པའི་དོགས་གཞིའི་འོག ཁ་སང་ཨ་རི་གཞུང་གིས་སྐྱོན་བརྗོད་བྱས་ཡོད་པའི་ནང་། རྒྱ་རིགས་དེ་ཚོས་ (རྒྱ་མི་གསུམ་གཙུག་ལག་སློབ་ཆེན་གྱི་དགེ་རྒན་ཡིན་འདུག) རྒྱ་ནག་གི་གཙུག་ལག་སློབ་ཆེན་ཁག་དང་ཚོང་གཉེར་ལྟེ་གནས་ཁང་འགའ་ཞིག་གི་ཁེ་བཟང་ལ་དམིགས་ཏེ། ཁྲིམས་འགལ་གྱིས་ (FBAR)ཉན་ཆས་རྫུན་བཟོ་དང་གསང་གནས་ལ་ལྐོག་ཉན་བྱས་འདུག ཅེས་སོགས་བཀོད་འདུག
བྷེ་བྷེ་སི་གསར་ལམ་དུ་མུ་མཐུད་བརྗོད་དོན། གོང་སྨོས་རྒྱ་མི་དྲུག་ལས་གཅིག་ཐེན་ཅིན་གཙུག་ལག་སློབ་ཆེན་ (Tianjin University) གྱི་དགེ་རྒན་ཡིན་ཞིང་། མིང་ལ་ཧོ་ཀྲུང་ (Hao Zhang) ཟེར་བ་དེ་འཇུ་བཟུང་བྱས་ཡོད་ཀྱང་། ཁོང་གི་ལས་རོགས་གཞན་རྣམས་རྒྱ་ནག་ནང་དུ་ཡོད་པར་ཚོད་དཔག་བྱེད་ཀྱི་ཡོད་འདུག
ཨ་རིའི་རྒྱལ་ས་ཝ་ཤིན་ཊོན་ (Washington) ནང་དེ་སྔ་དུས་ཡུན་རིང་པོར་རྒྱ་ནག་གི་ཁེ་ལས་གསང་ཉུལ་བ་ཚོས་སེམས་ཁྲལ་བསླངས་ཡོད་སྐོར་དང་། ཨ་རིའི་ཁྲིམས་ཞིབ་ལས་ཁུངས་ནས་སྐྱོན་བརྗོད་ལྟར་ན། རྒྱ་ནག་གི་ཁེ་ལས་གསང་ཉུལ་གྱི་ལས་གཞི་དེ་འདས་པའི་ལོ་ངོ་བཅུའི་སྔོན་ནས་ལག་བསྟར་བྱས་ཡོད་ཚུལ་བསྒྲགས་འདུག
ཁྲིམས་ཞིབ་པ་ཚོས་བརྗོད་དོན། སྐུ་ཞབས་ཀྲུང་ལགས་དང་ཐེན་ཅིན་གཙུག་ལག་སློབ་ཆེན་གྱི་དགེ་རྒན་ཝེ་པིང་ (Wei Pang) ཟེར་བ་གཉིས་ངན་འབྲེལ་བྱས་ཏེ། ཨ་རིའི་ལས་མི་ཚོའི་ (FBAR)ཉན་ཆས་ལ་ལྐོག་ཉན་བྱས་ཡོད་པ་དང་། ཉན་ཆས་དེ་ནི་ལག་འཁྱེར་ཁ་པར་དང་གློག་ཆས་ཡོ་བྱད་གཞན་དག་ལའང་རང་འགུལ་གྱིས་བརྡ་གཏོང་འབྲེལ་མཐུད་བྱེད་ཐུབ་པ་ཞིག་ཡིན་ཞིང་། དེ་བས། གོང་སྨོས་དགེ་རྒན་དེ་གཉིས་དང་ལས་རོགས་གཞན་པ་ཚོས་ཐེན་ཅིན་གྲོང་ཁྱེར་ནང་ (FBAR)ཉན་ཆས་ཚོང་གཉེར་ལྟེ་གནས་ཁང་བཙུགས་ཏེ། ཡོད་བྱད་རྫུན་བཟོ་དང་གསང་གནས་ལ་ལྐོག་ཉན་བྱེད་ཀྱི་ཡོད་འདུག
ཨ་རིའི་བདེ་སྲུང་ལས་ཁུངས་ཀྱི་ལས་མི་ཇོན་ཁར་ལེན་ (John Carlin) ཟེར་བ་ཞིག་གིས་ “རྒྱ་རིགས་དེ་ཚོས་རང་ཉིད་ལ་ཁེ་ལས་རེག་པའི་ཆེད་དུ། ཁྲིམས་འགལ་གྱིས་ཨ་རིའི་ཉན་ཆས་ཡོ་བྱད་སྤྱད་ནས་ཨ་རིའི་གསང་བའི་ཚོང་དོན་སྐོར་རྒྱ་ནག་གཞུང་ལ་སྙན་སེང་ཞུས་ཡོད་པ་རེད”ཅེས་དང་། ཡང“རྒྱ་ནག་གི་ཁེ་ལས་གསང་ཉུལ་ལས་གཞིས་ཨ་རིའི་ཚོང་དོན་ལ་ཚབས་ཆེ་བའི་གྱོང་ཁེལ་དང་འཛམ་གླིང་ཁྲོམ་རར་ཉམ་ཉེས། འཛམ་གླིང་ཡུལ་གྲུ་གང་སའི་ཨ་རིའི་ཁེ་གཉེར་ལས་རིགས་ལ་གནོན་སྐྱོན་བཟོ་བཞིན་ཡོད།”ཟེར།
སྤྱིར་ཁྲིམས་མེད་ལུགས་མེད་ཀྱི་རྒྱ་རིགས་དེ་ཚོར་ཁྲིམས་ཆད་ཕོག་ན་འགྲིག་མོད་ཀྱང་། བྷེ་བྷེ་སི་གསར་ཁང་གི་གསར་འགོད་པ་བྷ་བྷི་ར་ཕི་ལེ་ཊིས་ (Barbara Plett) གནས་ཚུལ་མཁོ་སྤྲོད་ལ་གཞིགས་ན། གོང་སྨོས་རྒྱ་རིགས་དེ་ཚོས་ཇི་ལྟར་ཁེ་ལས་གསང་ཉུལ་ལས་གཞི་ལག་བསྟར་བྱེད་ཀྱི་ཡོད་པ་གསལ་བོ་ཞིག་རྟོགས་དཀའ་བར་འདུག་ཅེས་སོགས་བརྗོད་འདུག
བོད་ཀྱི་དུས་བབ་ལས་གསར་ཁང་གིས་དངོས་གནས་གསར་འགྱུར་ཡག་པོ་་་དོན་དག་ཡོད་པ་་་ཕན་ཐོགས་ཡོད་པ་རྐྱང་གཏོང་གནང་གིན་འདུག ཐུགས་རྗེ་ཆེ།
གསར་འགྱུར་འདི་དང་འབྲེལ་ནས་རེ་སྐུལ་གཅིག་ཞུ་རྒྱུ་ཡོད། བཙན་བྱོལ་དུ་སླེབས་པ་ནས་བོད་ཡིག་ཤེས་མཁན་གང་འཚམས་བྱུང་ཡོད་ཀྱང་། ཡིག་རྩ་ཡག་པོ་མེད་པར་སྔོན་གྱི་ཐ་སྙད་ཀྱི་གོ་དོན་ཧ་མ་གོ་བར་སྡུད་ཚིག་བཀོལ་རྐྱང་གནང་བའི་ནང་དུ་༼གསང་གནས་༽ལྟ་བུའི་ཚིག་འདིའི་རིགས་གཞུང་ཡིག་ཚུན་དུ་ཐོན་གྱི་ཡོད། བོད་ཡིག་གི་ཕྱག་དཔེའམ་ལྷག་པར་དུ་སྨན་གཞུང་སོགས་སུ་༼ གསང་གནས་༽ ནི་ཕོ་མོའི་མཚན་མ་ལ་གོ་གི་ཡོད། ཕྱིས་ཀྱི་དག་ཡིག་རེ་འགར་གསང་གནས་ལ་གསང་བའི་ས་གནས་ཞེས་འགྲེལ་བ་ཡོད་ཀྱང་དེ་ཡང་མི་དག དེར་བརྟེན་ཐ་སྙད་འདིའི་རིགས་ལ་ཐུགས་གཟབ་གནང་རྒྱུའི་རེ་སྐུལ་ཞུས་པ་ཡིན།