མཱ་ལེ་ཞི་ཡ་དང་ཧིན་རྡུ་ཉི་ཞེ་ཡ་གཞུང་གིས་ཨིན་ཌཱ་མིན་མཚོ་ཐོག་ཏུ་ལྷག་པའི་ཡུལ་གྱར་བ་ ༧༠༠༠ ཙམ་ལ་གནས་སྐབས་རིང་རོགས་སྐྱོབ་བྱ་རྒྱུ་ཁས་ལེན་བྱས་འདུག
ཟླ་འདིའི་ཕྱི་ཚེས་ ༢༠ ཉིན་མཱ་ལེ་ཞི་ཡའི་རྒྱལ་ས་ཅེ་ལོང་པའོ་རུ། ཐའེ་ལན་ཌི་དང་ཧིན་རྡུ་ཉི་ཞེ་ཡ། མཱ་ལེ་ཞི་ཡ་བཅས་ཀྱི་ཕྱི་འབྲེལ་བློན་ཆེན་ལྷན་འཛོམས་ཀྱི་ཛ་དྲག་ཚོགས་འདུ་ཞིག་བསྡུས་ཏེ། མཱ་ལེ་ཞི་ཡ་དང་ཧིན་རྡུ་ཉི་ཞེ་ཡ་གཉིས་ཀྱིས་མཚོ་ཐོག་ཏུ་དཀའ་ངལ་འཕྲད་བཞིན་པའི་འབར་མ་དང་བྷང་ལ་ཌེ་ཤི་ཡི་ཡུལ་གྱར་བ་ཚོར་གནས་སྐབས་རིང་རོགས་སྐྱོབ་བྱེད་པར་གྲོད་ཆོད་ཅིག་བཞག་ཡོད་འདུག ཡིན་ནའང་། ཐའེ་ལན་ཌི་གཞུང་གིས་ད་ལྟའི་བར་འབར་མའི་ཡུལ་གྱར་བ་ཁྲི་ལ་ཉེ་བ་རྒྱལ་ཁོངས་སུ་གནས་སྡོད་བྱེད་དུ་བཅུག་ཡོད་སྟབས། དེ་ལས་མང་བ་ལེན་ཐབས་མེད་སྐོར་བརྗོད་ནས་གྲོས་ཆོད་དེར་མོས་མཐུན་བྱས་མེད་པ་དང་། བདུན་ཕྲག་རྗེས་མའི་ནང་ཡང་བསྐྱར་གནད་དོན་དེའི་ཐོག་ཟབ་རྒྱས་ཀྱི་ཚོགས་འདུ་ཞིག་འཚོགས་འཆར་ཡོད་འདུག
ཛ་དྲག་ཚོགས་འདུ་དེ་གྲོལ་རྗེས། མཱ་ལེ་ཞི་ཡའི་ཕྱི་འབྲེལ་བློན་ཆེན་ཨི་ནི་ཧྥ་ཨི་མན་(Anifah Aman)གྱིས་གསལ་བཤད་ཅིག་བྱས་པའི་ནང་། ཧིན་རྡུ་ཉི་ཞེ་ཡ་དང་དང་མཱ་ལེ་ཞི་ཡས་མུ་མཐུད་མཚོ་ཐོག་ཏུ་ལྷག་པའི་ཡུལ་གྱར་བ་ ༧༠༠༠ ཙམ་ལ་གནས་སྐབས་རིང་རོགས་སྐྱོབ་བྱེད་པར་མོས་མཐུན་བྱུང་ཡོད་ཀྱང་། རྒྱལ་སྤྱིའི་སྤྱི་ཚོགས་ཀྱིས་ངེས་པར་དུ་ལོ་གཅིག་ནང་ཚུད་དུ་ཡུལ་གྱར་བ་དེ་ཚོའི་འཚོ་བ་ལ་བཀོད་སྒྲིག་བྱ་རྒྱུ་ལེགས་པར་འགྲུབ་དགོས། ཞེས་བརྗོད་འདུག
ཧིན་རྡུ་ཉི་ཞེ་ཡ་གཞུང་གིས་ཟླ་འདིའི་ཕྱི་ཚེས་ ༡༡ ཉིན་ཡུལ་དེའི་བྱང་ཕྱོགས་སུ་ཡོད་པའི་ལྷོ་སོ་ཁོན་ཟེར་བའི་ཞིང་ཆེན་ནང་དུ། འབར་མའི་ཡུལ་གྱར་བ་ ༦༠༠ ཡས་མས་བསྡད་པའི་ཤིང་གྲུ་ཆེན་པོ་གཉིས་འབྱོར་ཡོད་པ་དང་། ཡང་ཕྱི་ཚེས་ ༢༠ ཉིན་ཧིན་རྡུ་ཉི་ཞེ་ཡའི་ཉ་བ་ཚོས་ཡུལ་གྱར་བ་ ༤༣༠ ལྷག་སྲོག་ཉེན་ལས་བསྐྱབས་ཡོད་སྐོར་བརྗོད་འདུག
འདས་པའི་ཉིན་ ༡༠ ནང་མཱ་ལེ་ཞི་ཡ་དང་ཧིན་རྡུ་ཉི་ཞེ་ཡའི་མཚོ་ཁུལ་དུ་ཡུལ་གྱར་བ་ ༣༠༠༠ ལྷག་འབྱོར་ཡོད་ཀྱང་། རྒྱལ་ཁབ་དེ་གཉིས་དང་ཐའེ་ལན་ཌིས་བཟའ་ཆས་སོགས་ཀྱི་རོགས་རམ་བྱས་རྗེས་མཚོ་ཁོངས་ནས་མཐར་སྐྲོད་བཏང་ཡོད་པ་དང་། ཡུལ་གྱར་བ་དེ་ཚོ་མང་ཆེ་བ་འབར་མ་དང་བྷང་ལ་ཌེ་ཞི་ནས་སྐྱབས་བཅོལ་དུ་ཡོང་བའི་རོ་ཧན་ཡཱའི་མི་རིགས་ཡིན་འདུག དེ་རིང་འབར་མ་གཞུང་གིས་སྤེལ་བའི་གནས་ཚུལ་ལྟར་ན། ཁ་སང་ཕྱི་ཚེས་ ༢༡ ཉིན་སྲིད་གཞུང་གིས་མཚོ་དམག་ཆེད་གཏོང་གིས་མཚོ་ཐོག་ཏུ་ལྷག་པའི་ཡུལ་གྱར་བ་ཚོར་རོགས་སྐྱོབ་ཐེངས་དང་པོ་བྱས་ཡོད་པ་དང་། མྱུར་སྐྱོབ་ཁྲོད་མི་གྲངས་ ༢༠༨ ཉེན་ཁ་ལས་བསྐྱབས་ཡོད་པ་དང་། ཡང་འབར་མ་གཞུང་གི་མཐོ་རིམ་དཔོན་རིགས་ཤིག་གིས། སྲིད་གཞུང་གི་མཚོ་ཐོག་འཚོལ་ཞིབ་ཁྲོད་ཡུལ་གྱར་བའི་གྲུ་གཟེངས་གཉིས་རྙེད་ཡོད་པ་དང་། གྲུ་གཟེངས་གཅིག་གི་ནང་བྷང་ལ་ཌི་ཤིའི་ཡུལ་གྱར་བ་ ༢༠༠ ཙམ་ཡོད་ལུགས་བརྗོད་ཡོད་པ་རེད།
ཁ་སང་འབར་མའི་རྒྱལ་ས་ནེ་ཧྥི་ཌོ་(Naypyidaw)རུ། འབར་མའི་སྲིད་འཛིན་ཐིན་སིན་(Thein Sein)་དང་ཨ་རིའི་རྒྱལ་དོན་ལྷན་ཁང་གི་དྲུང་ཆེ་གཞོན་པ་བྷ་ལིན་ཁེན་(Antony J. Blinken )གཉིས་ཐུག་འཕྲད་གནང་སྐབས། བྷ་ལིན་ཁེན་གྱིས་འབར་མའི་གཞུང་འཛིན་པས་རོ་ཧན་ཡཱའི་གནས་སྟངས་ལ་ལེགས་བཅོས་བྱས་ཏེ། མི་མང་ལ་ཡང་བསྐྱར་ཚེ་སྲོག་གི་ཉེན་ཁར་མི་འཛེམས་པར་རང་ཡུལ་ནས་ཁ་བྲལ་དགོས་པའི་ཐབས་ཟད་ཀྱི་མྱོང་ཚོར་མི་ཡོང་བ་ཞིག་བཟོ་དགོས་པའི་འབོད་སྐུལ་གནང་ཡོད་པ་ལྟར། འབར་མའི་སྲིད་འཛིན་ཐིན་སིན་གྱི་མགྲིན་ཚབ་པ་ཞིག་གིས། སྲིད་འཛིན་ཐིན་གྱིས་འབར་མ་གཞུང་གིས་ཡུལ་གྱར་བ་དེ་ཚོའི་རྒྱལ་ཁོངས་ངོས་འཛིན་བྱ་རྒྱུ་ཡིན་པ་མ་ཟད། མ་འོངས་པར་འབར་མའི་མི་སེར་ལ་སྲུང་སྐྱོབ་དང་རོགས་རམ་བྱ་རྒྱུ་ཡིན་པ་མ་ཟད། ས་གནས་སྲིད་གཞུང་ཁག་ནས་ཤེས་རྟོགས་བྱུང་བའི་འབར་མའི་ནང་གི་ཕྱི་རྒྱལ་བ་ཚོ་ལའང་རོགས་རམ་དང་ཕྱིར་ལོག་བྱེད་པར་བཀོད་སྒྲིག་བྱ་རྒྱུ་ཡིན་སྐོར་བསྒྲགས་འདུག
འབར་མའི་ཕྱི་འབྲེལ་ལྷན་ཁང་ནས་མཚོ་ཐོག་ཏུ་དཀའ་ངལ་འཕྲད་བཞིན་པའི་ཡུལ་གྱར་བ་ཚོར་རོགས་རམ་བྱེད་པའི་གྲ་སྒྲིག་ལེགས་པོ་ཡོད་ལ། འབར་མའི་ནང་ཡོད་པའི་གསར་འགྱུར་བརྒྱུད་ལམ་ཁག་གིས་གནས་ཚུལ་དེ་བརྒྱུད་བསྒྲགས་དགོས་པའི་རེ་སྐུལ་བྱས་ཡོད་འདུག ཡིན་ནའང་། གནད་དོན་དབྱེ་ཞིབ་པ་ཚོས། འབར་མ་གཞུང་གིས་རོ་ཧན་ཡཱ་གྲངས་ཉུང་མི་རིགས་ལ་མི་སེར་གྱི་ཐོབ་ཐང་མ་སྤྲད་པར་ལོ་ངོ་ ༣༣ ལྷག་འགྲོ་བཞིན་ཡོད་པ་མ་ཟད། མི་རིགས་དང་ཆོས་ལུགས་དབྱེ་འབྱེད་ཀྱི་གདུག་རྩུབ་སྲིད་བྱུས་ལག་བསྟར་བྱེད་བཞིན་པར་འགྱུར་བ་ཐེབས་རྒྱུ་ཡིན་མིན་བརྗོད་དཀའ་བས་རིམ་གྱིས་བལྟ་དགོས་སྐོར་རྗོད་ཀྱི་འདུག
གསར་འགོད་པ། པདྨ་མཚོ།
