བོད་ལྗོངས་ཀྱི་རྒྱབ་ཤ་དཀར་པོའི་དེབ་གླེང་པ།

ཁྲིན་ཕའོ་ཁུང་གིས་བརྩམས། པདྨ་མཚོས་བསྒྱུར།

འདི་ལོ་ཕྱི་ཟླ་ ༤ ཚེས་ ༡༥ ཉིན་ནི། རྒྱ་ནག་གི་མགོ་ཁྲིད་ཟུར་པ་ཧུའུ་ཡའོ་པང་སྐུ་གྲོངས་ནས་ལོ་ངོ་ ༢༦ འཁོར་བའི་རྗེས་དྲན་གྱི་ཉིན་མོ་ཡིན་ལ། རྒྱ་ནག་གཞུང་གིས་ཉིན་མོ་འདི་བདམས་ཏེ་༼༢༠༡༥ ལོའི་བོད་ལྗོངས་ཀྱི་རྒྱབ་ཤ་དཀར་པོའི་དེབ། བོད་ལྗོངས་འཕེལ་རྒྱས་བགྲོད་ལམ་གྱི་ལོ་རྒྱུས་གདམ་ག༽ཅེས་པ་འགྲེམས་སྤེལ་བྱས་ཡོད།

གུང་ཁྲན་ཏང་ནང་ཉུང་ངུ་ལས་མེད་པའི་གུ་ཡངས་རིང་ལུགས་པ་དང་གསར་བརྗེ་བ་ཧུའུ་ཡའོ་པང་གིས་བོད་ལ་གདུང་སེམས་མཉམ་སྐྱེད་གནང་སྟེ་སྙན་གྲགས་ཡོད་པ་རེད། ཕྱི་ལོ་ ༡༩༨༠ ལོར་ཧུའུ་ཡའོ་པང་གིས་བོད་ལྗོངས་སུ་ལྟ་ཞིབ་གནང་སྟེ། བོད་ལ་གོད་ཆག་ཚབས་ཆེན་ཐེབས་རྗེས་ཀྱི་ཡ་ང་བའི་གནས་སྟངས་དངོས་སུ་མཐོང་སྐབས་སེམས་ཚབས་ཆེན་པོ་བྱུང་བར་བརྟེན། བོད་རང་སྐྱོང་ལྗོངས་ཏང་ཨུ་དང་སྲིད་གཞུང་གི་ལས་བྱེད་ཚོགས་ཆེན་ཐོག ཁོང་གིས་ངེས་པར་དུ་བོད་ལྗོངས་ཀྱི་འཚོ་བའི་གནས་སྟངས་ཕྱི་ལོ་ ༡༩༥༩ ལོའི་ཡར་སྔོན་གྱི་ཚད་གཞིར་སླར་གསོ་བྱེད་དགོས་ཞེས་བསྒྲགས་གཏམ་སྤེལ་ཡོད་པ་རེད།

རྒྱ་ནག་གཞུང་གིས་ཕྱི་ལོ་ ༡༩༥༩ ལོའི་ཡར་སྔོན་གྱི་བོད་ལྗོངས་དེ་ཞིང་བྲན་ལམ་ལུགས་ཀྱི་མུན་ནག་གི་སྤྱི་ཚོགས་ཤིག་ཏུ་འབོད་ཀྱི་ཡོད་ཀྱང་། དོན་དངོས་ཐོག་ཕྱི་ལོ་ ༡༩༥༩ ལོའི་སྔོན་དུ་བོད་རང་སྐྱོང་གི་ངོ་བོའི་ཐོག་ནས་རང་མཁོ་རང་སྒྲུབ་ཀྱིས་མུ་གེ་གཏན་ནས་བྱུང་མྱོང་མེད། འོན་ཀྱང་། ཕྱི་ལོ་ ༡༩༥༩ ལོར་མའོ་ཙེ་ཏུང་གིས་བོད་ལྗོངས་སུ་དམངས་གཙོའི་བཅོས་བསྒྱུར་ཟེར་བའི་ལས་འགུལ་སྤེལ་ཏེ། བོད་རྒྱའི་བར་དུ་བཞག་པའི་གྲོས་མཐུན་དོན་ཚན་ ༡༧ ལ་མངོན་སུམ་འཛེམས་མེད་ཀྱིས་རྩིས་མེད་རྡོག་རོལ་བཏང་ཡོད་པ་རེད།

སྒེར་གཅོད་པ་ཆེན་པོ་ཞིག་གིས་དམངས་གཙོའི་བཅོས་སྒྱུར་ལག་བསྟར་བྱས་པའི་བརྒྱུད་རིམ་དང་མཇུག་འབྲས་བསམ་པ་ཙམ་གྱིས་ཤེས་ཐུབ་པ་ཞིག་རེད། གཞི་རྒྱ་ཆེན་པོའི་ཐོག་ནས་བོད་མིའི་ཐོན་སྐྱེད་འཚོ་བར་གཏོར་སྐྱོན་དང་། བོད་ཀྱི་རིག་གནས་ཤུལ་བཞག་རྩ་མེད་གཏོང་བ། ཁྲག་དྲི་བྲོ་བའི་གྲལ་རིམ་འཐབ་རྩོད་ཀྱི་འཁྲབ་སྟོན་ཆེན་མོ་སྒོ་ཀུན་ནས་སྤེལ་བར་བརྟེན། བོད་ཀྱི་ལོ་རྒྱུས་ཁྲོད་ཆེས་ཐོར་མར་ཚབས་ཆེ་བའི་མུ་གེ་བྱུང་བ་རེད། སྐབས་དེར་༧པཎ་ཆེན་སྐུ་ཕྲེང་བཅུ་པས་སྲིད་བློན་ཀྲུའུ་ཨིན་ལི་ལ་བོད་མིའི་ཡ་ང་བའི་གནས་སྟངས་སྐོར་གྱི་འཕྲིན་ཡིག་ཅིག་གནང་སྟེ། བཟའ་བཏུང་ཆད་པའི་རྐྱེན་གྱིས་མི་མང་པོ་འདས་གྲོངས་སུ་ཕྱིན་པ་དང་། ཁྱིམ་ཚང་ཁ་ཤས་ཀྱི་ནང་མི་ཚང་མ་མུ་གེས་ཤི་སྟེ་ཁྱིམ་སྟོང་དུ་གྱུར་བ་གསུངས་ཡོད་པ་རེད།

ད་ལྟ་ཀྲུང་ནན་ཧེ་ཡིས་རྒྱབ་ཤ་དཀར་པོ་འགྲེམས་སྤེལ་བྱས་ཏེ་ཡ་ང་བའི་ལོ་རྒྱུས་ནག་གསུབ་གཏོང་ཐབས་བྱེད་ཀྱི་ཡོད་པ་མ་ཟད། བསམ་ངན་ཁོག་བཅང་གིས་ལོ་རྒྱུས་ལ་བཅད་གཏུབ་དང་དབྱེ་དགར། ཧམ་བཅོས་བཅས་བྱས་ཏེ། གདམ་ག་ཅན་དང་འཕར་མཆོང་ཅན། རང་འདོད་ཅན་གྱི་འགྲེལ་བཤད་སྣ་ཚོགས་བྱས་ཡོད་པ་དང་། ཇུས་ངན་འདིའི་དམིགས་ཡུལ་ནི་མུ་མཐུད་རྒྱ་ནག་མི་མང་མགོ་སྐོར་གཏོང་རྒྱུ་དེ་རེད། རྒྱབ་ཤ་དཀར་པོའི་དེབ་ཀྱི་གླེང་གཞི་ཆེ་ཆུང་ཁག་ལ་བལྟས་པ་ཙམ་གྱིས་ཀྲུང་ནན་ཧེ་ཡིས་རང་གཏམ་རང་ལ་བཤད་པ་དང་བདེན་རྫུན་གོ་ལྡོག་ཏུ་འགྲེལ་བ། རང་སྐྱོན་བཀབ་སྟེ་རང་མཚང་ཕྱིར་བསྟན་པ་ཞིག་དང་། ར་མགོ་ལུག་སྦྱོར་གྱི་དཔེ་ལས་མ་འདས་སོ།།

གླེང་གཞི་ཆེ་བའི་དང་པོ་ལམ་ལུགས་རྙིང་པ་ངེས་པར་དུ་བོད་ཀྱི་ལོ་རྒྱུས་ཀྱི་གར་སྟེགས་ཐོག་ནས་ཕྱིར་འཐེན་དགོས་ཟེར་བ་དེ་རེད། སྐད་ཆ་འདི་ཉི་ཧོང་གིས་རྒྱ་ནག་ལ་བཙན་འཛུལ་བྱེད་སྐབས། ལམ་ལུགས་རྙིང་པ་ངེས་པར་དུ་རྒྱ་ནག་གི་ལོ་རྒྱུས་ཀྱི་གར་སྟེགས་ཐོག་ནས་ཕྱིར་འཐེན་དགོས་པར་ཁ་གཡར་བ་དང་གཅིག་མཚུངས་ཡིན་སྟབས། མི་རྣམས་ལ་ངུ་ཡང་མ་ཤེས་ལ་དགོད་ཀྱང་མ་ཤེས་པའི་ཚོར་བ་ཞིག་སྤྲད་སོང་། ཉིན་ཞིག་རྒྱ་ནག་གཞུང་གིས་རང་ཉིད་ཀྱིས་ལག་བསྟར་བྱེད་བཞིན་པའི་སྒེར་གཅོད་དང་རུལ་སུངས། འགྲོ་བ་མིའི་རིགས་ལ་རྒོལ་བའི་ལམ་ལུགས་རྙིང་པ་དེ་རྒྱ་གཞུང་གི་ལོ་རྒྱུས་ཀྱི་གར་སྟེགས་ཐོག་ནས་ཕྱིར་འཐེན་དགོས་པ་ཤེས་ཚོར་ཐུབ་ངེས་ཡིན་པས། གླེང་གཞི་འདི་རྒྱ་ནག་གཞུང་གིས་རང་ཉིད་ལ་ཚིག་རྒྱག་བྱས་པ་ཞིག་ཆགས་འདུག

གླེང་གཞི་ཆེ་བ་གཉིས་པ་བོད་གསར་པ་ཡང་དག་པའི་འཕེལ་རྒྱས་ཀྱི་ལམ་བུའི་ཐོག་སྐྱོད་པ་ཞེས་པ་དེ་ཡིན་པ་དང་། གླེང་གཞི་དེའི་ནང་དུ། དུས་རབས་ཕྱེད་ལྷག་གི་རིང་བོད་རིགས་མི་མང་དང་རྒྱ་ནག་མི་མང་མཐུན་མོང་གིས་མྱངས་བའི་གནོད་སྐྱོན་དང་དཀའ་སྡུག་སྟེ། ཁྲག་དྲི་བྲོ་བའི་ས་ཞིང་གསར་བརྗེ་དང་སྤྱི་ཁང་ཅན། གཡོན་ཐལ་ལས་འགུལ་ཆེན་མོ། བཀྲེས་ལྟོགས་ཆེན་མོ། རིག་གནས་གསར་བརྗེ་ཆེན་མོ། དེ་བཞིན་བཅོས་སྒྱུར་སྒོ་འབྱེད་རྗེས་ཀྱི་སྲིད་གཞུང་གི་རུལ་སུངས་དང་དབུལ་ཕྱུག་དབྱེ་འབྱེད། བོད་མི་མཐར་སྐྲོད་ཅན་བཅས་གླེང་མེད་པས། བརྗོད་གཞི་འདི་རང་སྐྱོན་འགེབ་ཐབས་བྱས་ཏེ་རང་མཚང་ཕྱིར་མངོན་པ་ཞིག་རེད།

གླེང་གཞི་གསུམ་པ་དབུ་མའི་ལམ་གྱི་ངོ་བོ་ནི་རྒྱ་ནག་ཁ་བྲལ་གཏོང་ཐབས་རེད་ཅེས་པ་དེ་ཡིན་ཡང་། ཏཱ་ལའི་བླ་མས་བཏོན་པའི་དབུ་མའི་ལམ་གྱི་དགོངས་དོན་ནི། བོད་རྒྱ་ནག་གི་མངའ་ཁོངས་སུ་བསྡད་དེ་ཡང་དག་པའི་རང་སྐྱོང་ཞིག་ལག་བསྟར་གནང་རྒྱུ་དེ་ཡིན་སྟབས། ཀྲུང་ནན་ཧེ་ཁ་བྲལ་ལ་སྐྲག་པ་མིན་པར་རང་སྐྱོང་ལ་སྐྲག་པ་རེད། གང་ཡིན་ཟེར་ན། རང་སྐྱོང་ག་འདྲ་ཞིག་ཡིན་ནའང་རུལ་སུངས་ཀྱི་རྒྱ་ནག་གཞུང་གི་ཁེ་ཕན་ལ་ཉེན་ཁ་བཟོ་ཡི་ཡོད་པ་རེད། ཐ་ན་ཧོང་ཀོང་གི་རང་སྐྱོང་སྟེ་རྒྱལ་ཁབ་གཅིག་ལ་ལམ་ལུགས་གཉིས་ཀྱིས་ཀྱང་། རྒྱ་ནག་གཞུང་གི་མགོ་ཁྲིད་ཚོས་ཧོང་ཀོང་ཁོ་རང་ཚོའི་ལྐོག་དངུལ་གྱི་ལྟེ་བ་ཞིག་ཏུ་བསྒྱུར་བའི་ཇུས་ངན་དེར་འགོག་རྐྱེན་བཟོ་ཡི་ཡོད་པ་རེད།

ཀྲུང་ནན་ཧེ་ཡིས་ཧོང་ཀོང་ནང་ལག་བསྟར་བྱེད་བཞིན་པའི་རྒྱབ་འགལ་གྱི་སྲིད་བྱུས་དེས་ཐད་ཀར་ཧོང་ཀོང་མི་མང་ལ་རང་བཙན་གྱི་འདུ་ཤེས་སྐྱེད་སྲིང་བྱས་པའི་རྐྱེན་གྱིས། རྒྱ་ནག་ཁ་བྲལ་གཏོང་བའི་མགོ་ཁུངས་དེ་ཐོག་མཐའ་བར་གསུམ་དུ་གུང་ཁྲན་ཏང་ཡིན་པ་གསལ་བོར་མངོན་ཡོད། གུང་ཁྲན་ཏང་གིས་བསམ་བློ་ཁ་བྲལ་གཏོང་བའི་སྦྱོར་བ་སྤེལ་གྱི་ཡོད་ལ། བསམ་བློའི་ཁ་བྲལ་ནི་མངའ་ཁོངས་ཁ་བྲལ་གྱི་སྔོན་འགྲོའམ་དེ་གཉིས་ནམ་ཡང་ཐ་དད་དུ་མ་མཆིས། དབུ་མའི་ལམ་གྱི་ཐོག་ནས་ཏཱ་ལའི་བླ་མས་རྒྱ་ནག་ལ་བཟུང་བའི་ཀུན་སློང་ཆེས་ལེགས་པོ་ཞིག་མཚོན་གྱི་ཡོད་པ་རེད། ཀྲུང་ནན་ཧེ་ཡིས་ཏཱ་ལའི་བླ་མའི་དབུ་མའི་ལམ་ལ་དང་ལེན་མ་བྱས་པ་དེ། བོད་མིའི་ཁྲོད་ཀྱི་ཞི་འཇམ་ཕྱོགས་ཁག་དང་ལེན་མ་བྱས་པར་དྲག་སྤྱོད་ཕྱོགས་ཁག་སྟེ། ཁ་ཚ་དགོས་གཏུག་གིས་བོད་རང་བཙན་རྩོད་མཁན་གྱི་མི་སྒེར་དང་ཚོགས་པ་ལ་རྒྱབ་སྐྱོར་བྱས་པ་ཞིག་ཆགས་ཡོད། ཀྲུང་ནན་ཧེ་ཡི་སྨྱོ་ཧམ་དང་མིག་རྒྱང་ཐུང་ཐུང་གིས་མ་འོངས་པའི་བོད་རྒྱའི་བར་གྱི་རྩོད་རྙོག་དང་ཁ་བྲལ་གྱི་བྱ་སྤྱོད་ལ་དུས་བཅད་ཀྱི་འབར་རྫས་བཞག་ཡོད་པས། གླེང་གཞི་འདི་ཁུ་ཚུར་གཞན་ལ་གཞུས་ནས་ངུ་འབོད་རང་གིས་བྱས་པ་ཞིག་རེད།

གླེང་གཞི་བཞི་པ་ཞི་བདེ་དང་འཚེ་མེད་ཞི་བའི་ལྟར་སྣང་ཞེས་པ་དེའི་ནང་། ཕྱི་ལོ་ ༡༩༥༩ ལོར་ཀྲུང་ནན་ཧེ་ཡིས་སྤེལ་བའི་བོད་ཁུལ་གྱི་དམག་འཁྲུག་དང་། ཕྱི་ལོ་ ༡༩༨༩ དང་ ༢༠༠༨ ལོར་རྒྱ་ནག་གཞུང་གིས་བསླངས་བའི་ཁྲག་དྲི་བྲོ་བའི་ཟིང་འཁྲུག དེ་བཞིན་ཉེ་བའི་ལོ་ཤས་ནང་རྒྱ་གཞུང་གི་གདུག་རྩུབ་དབང་བསྒྱུར་གྱིས་བསླངས་བའི་བོད་མིའི་རང་ལུས་མེར་བསྲེགས་བཅས་ཀྱི་ནག་ཉེས་ཏཱ་ལའི་བླ་མར་གཡོགས་ཡོད་པ་རེད། ཡིན་ནའང་། དེ་ནི་ཀྲུང་ནན་ཧེ་ཡིས་རང་སྣང་ཡན་གར་བྱས་པ་ཙམ་རེད། བོད་མིའི་རང་ལུས་མེར་བསྲེགས་རྒྱ་ནག་གཞུང་གི་དབང་སྒྱུར་འོག་བོད་ནང་དུ་བྱུང་བ་ལས་བོད་ཕྱི་རུ་བྱུང་བ་མིན་སྟབས། ཏཱ་ལའི་བླ་མའི་ལམ་སྟོན་ལ་གནད་དོན་ཡོད་པ་རེད་དམ། ཡང་ན་རྒྱ་ནག་གཞུང་གི་དབང་སྒྱུར་ལ་གནད་དོན་ཡོད་པ་རེད། བོད་མི་ ༡༣༠ ལྷག་གིས་རང་ལུས་མེར་བསྲེགས་བཏང་བ་དེ་འགྲོ་བ་མིའི་རིགས་ཀྱི་ལོ་རྒྱུས་ནང་བྱུང་མ་མྱོང་བའི་ཆག་སྒོ་ཞིག་ཡིན་པས། ཀྲུང་ནན་ཧེ་ཡིས་འདི་འདྲའི་ཡིད་སྐྱོ་བའི་འཐབ་རྩོད་དེར་གདོང་གཏད་ནས་ཅིའི་ཕྱིར་རང་སྐྱོན་ལ་བརྟག་ཞིབ་མི་བྱེད་པ་རེད། གླེང་གཞི་འདི་ཀྲུང་ནན་ཧེ་ཡིས་རང་མཚང་རང་གིས་བསྟན་པ་ཞིག་ཆགས་འདུག

གླེང་གཞི་ལྔ་པ་རྒྱ་ནག་དབུས་གཞུང་གིས་ཏཱ་ལའི་སྐྱེ་ཕྲེང་བཅུ་བཞི་པར་འཛིན་པའི་སྲིད་ཇུས་ཞེས་པའི་ནང་། ཀྲུང་ནན་ཧེ་ཡིས་ཧམ་བཤད་དང་ལོ་རྒྱུས་འཁྱོག་བརྗོད། རྡོ་ཆག་བཙན་སྒྲིག ཡར་མགོ་མར་འདོགས་ཀྱི་གནས་ཚུལ་རིམ་པར་སྤེལ་འདུག རྒྱ་གཞུང་གིས་ཏཱ་ལའི་བླ་མའི་ལོ་རྒྱུས་ཀྱི་ཁྲིམས་མཐུན་རང་བཞིན་འབྱུང་ཁུངས་ནི་ཀྲུང་དབྱང་སྲིད་གཞུང་ཡིན་ལུགས་སྒྲོག་གི་ཡོད་ཀྱང་། དོན་དངོས་སུ་ཏཱ་ལའི་བླ་མའི་མཚན་གནས་དེ་ཕྱི་ལོ་ ༡༥༧༨ ལོར་སོག་པོའི་རྒྱལ་པོས་ཕུལ་བ་དང་། སྐབས་དེར་རྒྱ་ནག་དབུས་གཞུང་ནི་མིང་རྒྱལ་རབས་ཆེན་མོས་དབང་སྒྱུར་བའི་དུས་སྐབས་ཡིན་ལ། རྒྱ་ནག་མི་མང་གིས་ལོ་ངོ་ ༢༠༠ ཡི་ཡར་སྔོན་ཏེ། ཕྱི་ལོ་ ༡༣༦༨ ལོར་སོག་པོའི་མི་སེར་སྤེལ་ཡུལ་གྱི་དབང་སྒྱུར་མགོ་གཏིང་སློག་སྟེ་རྒྱལ་ཁབ་སླར་གསོ་བྱས་ཟིན་པ་རེད།

ཡང་ཀྲུང་ནན་ཧེ་ཡིས་ཏཱ་ལའི་བླ་མ་སྐུ་ཕྲེང་ལྔ་བ་དང་ཆིང་རྒྱལ་རབས་བར་གྱི་ འབྲེལ་བ་གླེང་ཡོད་ཀྱང་ངེས་པར་དུ་ཤེས་དགོས་པ་ཞིག་ལ། ཏཱ་ལའི་སྐུ་ཕྲེང་ལྔ་པ་དང་ཆིང་གོང་མ་བར་མཆོད་ཡོན་གྱི་འབྲེལ་བ་ཕྱི་ལོ་ ༡༦༣༩ ལོར་བྱུང་བ་དང་། སྐབས་དེར་རྒྱ་ནག་དབུས་གཞུང་ད་དུང་མིང་རྒྱལ་རབས་ཆེན་མོའི་དུས་སྐབས་ཡིན་ལ། ཕྱི་ལོ་ ༡༦༤༤ ལོར་གཞི་ནས་མིང་གི་སྲིད་དབང་འཇིག་སྟེ་མན་ཇུའི་ཆིང་རྒྱལ་རབས་ཀྱིས་དབང་བསྒྱུར་མགོ་བརྩམས་པ་རེད།

རྒྱ་ནག་གཞུང་གིས་མིང་རྒྱལ་རབས་ཆེན་མོ་རྒྱ་ནག་གི་དབུས་གཞུང་ཡིན་པ་ངོས་ལེན་བྱེད་ཀྱི་མེད་པའི་ཁར། རྒྱང་རིང་མཐའ་འཁོབ་ན་གནས་བཅས་པའི་མན་ཇུའི་(ཅིན་རྗེས་མ།)སྲིད་དབང་དེ་རྒྱ་ནག་དབུས་གཞུང་ཡིན་པའི་ལོག་འགྲེལ་རྒྱག་བཞིན་པ་ནི་ནོར་འཁྲུལ་ཁོ་ན་རེད། ཀྲུང་ནན་ཧེ་ཡིས་བོད་དེ་གནའ་སྔ་མོ་ནས་རྒྱ་ནག་གི་ཆ་ཤས་ཤིག་ཡིན་པ་སྒྲུབ་ཐབས་བྱེད་ཀྱི་ཡོད་ཀྱང་། དེ་ལས་ལྡོག་སྟེ་བོད་གནའ་སྔ་མོ་ནས་རྒྱ་ནག་གི་ཆ་ཤས་མིན་པ་བདེན་དཔང་བྱས་འདུག

མ་ཡིག  http://www.taiwanus.net/news/news/2015/201505200356071029.htm