རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་མགོ་གཙོ་གཞོན་པ་ཁྲིན་ཝིན་ཆིན་གྱིས་མུ་མཐུད་ལས་འཁུར་ཞུ་རྒྱུ་མིན་པའི་ཐད་སྲིད་གཞུང་གིས་བཀའ་ཁྲོལ་ཐོབ་ཡོད་ཟེར།
གཟའ་ཟླ་བའི་ཉིན། རྒྱ་གཞུང་དབུས་སྒྲིག་ཁྲིམས་ཞིབ་བཤེར་དྲ་བའི་སྟེང་བསྐྱར་དུ་ཁྲིན་ཝིན་ཆིན་ (Chen Wenqing) གྱི་གནས་ཚུལ་ཁ་སྐོང་བྱས་པའི་ནང་། ༢༠༡༥ ལོའི་ཟླ་ ༤ པ་ནས་སྲིད་གཞུང་གིས་བློ་མཐུན་ཁྲིན་ཝིན་ཆིན་གྱིས་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་རྒྱུན་ལས་ཨུ་ཡོན་དང་མགོ་གཙོ་གཞོན་པའི་གོ་གནས་མུ་མཐུད་འཁུར་རྒྱུ་མིན་པའི་བཀའ་ཁྲོལ་ཐོབ་ཡོད། ཆེས་ཁྱབ་བསྒྲགས་བྱས་ཡོད་འདུག
གནས་ཚུལ་དེ་ཐོན་པ་མ་ཐག་དྲ་ལམ་ཁག་ཏུ་ཁྲིན་ཝིན་ཆེན་བསྐྱར་དུ་གླེང་མགོ་བརྩམས་ཡོད་ཅིང་། ཁྲིན་ཝིན་ཆིན་གྱིས་གོ་གནས་ནས་དགོངས་པ་ཞུས་ཡོད་པ་གསལ་བསྒྲགས་སྤེལ་བ་ཙམ་ལས། ཁོ་ལ་གོ་གནས་གསར་པ་གང་ཞིབ་སྤྲད་ཡོད་མེད་འཁོད་མེད་པ་དེ་རྒྱུན་ལྡན་ཞིག་མིན་སྐོར་དང་། ཁྲིན་ཝིན་ཆིན་གྱི་མིང་ཐོ་ད་དུང་རྒྱ་ནག་གི་སྐབས་བཅོ་བརྒྱད་པའི་དབུས་སྒྲིག་ཁྲིམས་ཨུ་ཡོན་གྱི་མིང་ཐོའི་ཁྲོད་ལྷག་ཡོད་པ་དེ་གང་ཡིན་ནམ་ཟེར་བ་སོགས་ཀྱི་གླེང་སློང་བྱུང་ཡོད།
གནས་ཚུལ་དེའི་ནང་དབྱེ་ཞིབ་བྱས་པར། ཉེ་བའི་ལོ་གཉིས་ནང་དབུས་བདེ་འཇགས་ལྷན་ཁང་དུ་དོན་རྐྱེན་མུ་མཐུད་བྱུང་ཡོད་པ་དང་། བདེ་འཇགས་ལྷན་ཁང་གི་འགན་འཛིན་གཞོན་པ་ལའུ་ཀྲོན་ཝེ་ (Lu Zhongwei) ཡི་དྲུང་ཡིག་གིས་ཨ་རིའི་གསང་བའི་ལས་ཁུངས་ལ་ལྐོག་རྔན་སྤྲད་པ་དང་། པེ་ཅིན་གྲོང་ཁྱེར་བདེ་འཇགས་ལྷན་ཁང་གི་འགན་འཛིན་ལེང་ཁེ་ (Liang Ke) ཡིས་ཀྲུའུ་ཡོན་ཁཱང་གི་ཆེད་དུ་རྒྱ་གཞུང་མཐོ་རིམ་དཔོན་རིགས་ཚོའི་ནང་མོལ་ལ་ལྐོག་ཉན་བྱས་པ། རྒྱ་ནག་བདེ་འཇགས་ལྷན་ཁང་གི་འགན་འཛིན་གཞོན་པ་མཱ་ཅན་གྱིས་དབང་ཚད་བེད་སྤྱད་དེ་ཚོང་འབྲེལ་གྱི་ཁེ་ཕན་བླངས་པ་སོགས་ཀྱི་གནས་ཚུལ་དེ་དག་ཕྱི་གྱར་བྱུང་སྟབས། ཞི་ཅིན་ཕིན་གྱིས་བཟོད་སྒོམ་མ་ཐུབ་པར་ཐོག་མར་རྒྱལ་ཡོངས་བདེ་འཇགས་གཙང་སེལ་བྱ་རྒྱུའི་ཐག་གཅོད་བྱས་པ་རེད། ཡིན་ན་ཡང་སི་ཁྲོན་བདེ་འཇགས་ལྷན་ཁང་དུ་ལོ་ ༨ ལྷག་ལ་ལས་ཀ་བྱས་པའི་ཁྲིན་ཝིན་ཆིན་ཕལ་ཆེར་ཕྱིར་རྒྱ་ནག་རྒྱལ་ཡོངས་བདེ་འཇགས་ལྷན་ཁང་གི་འགན་འཛིན་གོ་གནས་ཁུར་སྲིད། ཅེས་སོགས་འཁོད་འདུག
ད་ལྟའི་རྒྱལ་ཡོངས་བདེ་འཇགས་ལྷན་ཁང་གི་འགན་འཛིན་གེན་ཧའུ་ཁྲུང་ (Geng HuiChang) ལོ་རྗེས་མའི་ཕྱི་ཟླ་ ༡༡ བའི་ནང་ལོ་ ༦༥ ཟིན་གྱི་ཡོད་སྟབས་རྒན་ཡོལ་ཞུ་དགོས་ཀྱི་ཡོད་ཀྱང་། ཁོ་དང་ཀྲུའུ་ཡོན་ཁཱང་གཉིས་ལ་ལྐོག་གྱུར་གྱི་འབྲེལ་བ་མང་པོ་ཡོད་པ་དང་། ཀྲུའུ་ཡོན་ཁཱང་ལ་གནད་དོན་མ་བྱུང་སྔོན་ལ་གེན་ཧའུ་ཁྲུང་དང་མཉམ་དུ་རྒྱལ་ཁབ་མང་པོར་སྐོར་སྐྱོད་བྱས་ཡོད་པ་སོགས་ཀྱི་གནས་ཚུལ་གླེང་སློང་བྱུང་བར་བརྟེན་ཏེ། ཁོས་རྒན་ཡོལ་དུས་ཚོད་མ་བསླེབས་སྔོན་ལ་རང་འགུལ་གྱིས་དགོངས་ཞུ་བྱས་ཏེ། ཟླ་འདིའི་ཚེས་ ༡༩ ཉིན་པེ་ཅིན་དུ་རྒྱ་ཡོངས་བདེ་འཇགས་ལྷན་ཁང་གིས་ལས་དོན་མཇུག་སྡོམ་ཚོགས་འདུ་ཞིག་བསྐོངས་སྐབས། གེན་ཧའུ་ཁྲུང་འགན་འཛིན་ཡིན་ཡང་ཚོགས་ཞུགས་བྱས་མེད་སྟབས། རྒྱ་ནག་གཞུང་འབྲེལ་བརྒྱུད་ལམ་ཞིན་ཧྭ་ཧྲི་དང་ཀྲུང་དབྱངས་བརྙན་འཕྲིན་སོགས་ཀྱིས་བདེ་འཇགས་འགན་འཛིན་གྱི་མིང་ཡང་གླེང་མེད་པ་དང་། དེ་ལས་ལྡོག་སྟེ་སྤྱི་བདེ་ལས་ཁང་གི་འགན་འཛིན་ཀོའུ་ཧྲིན་ཁོན་ཚོགས་བཞུགས་བྱས་ཡོད་པའི་གནས་ཚུལ་སྤེལ་ཡོད་འདུག
ཁ་སང་ཞཱིན་ཐང་རིན་དྲ་བས་གནས་ཚུལ་སྤེལ་བ་ལྟར་ན། ཕྱི་ལོགས་སུ་ཁྲིན་ཝིན་ཆིན་ནི་རྒྱལ་ཡོངས་བདེ་འཇགས་ལྷན་ཁང་གི་འགན་འཛིན་གོ་གནས་ལ་བཞུགས་རྒྱུ་དེ་ཧ་ཅང་འོས་འཚམས་ཡིན། རྒྱ་ནག་སྐབས་ ༡༨ པའི་ནང་ཁྲིན་ཝིན་ཆིན་གྱིས་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་མགོ་གཙོ་གཞོན་པའི་འགན་ཁུར་ཡོད་པ་དང་། ཀྲུའུ་ཡོན་ཁཱང་གི་གྱོད་དོན་ཚོགས་ཆུང་གི་མི་སྣ་ཞིག་ཡིན་པ་མ་ཟད། ཁོ་རང་གིས་དངོས་སུ་ཀྲུའུ་ཡོན་ཁཱང་གི་གྱོད་དོན་ལ་ཞིབ་བཤེར་བྱས་ཡོད། ཆེས་བརྗོད་ཡོད་ཀྱང་། མི་ཁ་ཤས་ཀྱིས་ཁྲིན་ཝིན་ཆིན་གྱིས་སི་ཁྲོན་ནས་ལས་ཀ་བྱས་སྐབས། ཀྲུའུ་ཡོན་ཁཱང་གིས་སི་ཁྲོན་ཞིང་ཆེན་ཨུ་ཡོན་མགོ་གཙོ་ཡིན་པས་ཁོ་གཉིས་ལ་འབྲེལ་བ་ཡོད་སྟབས། ཁྲིན་ཝིན་ཆིན་གོ་གནས་དགོངས་པ་ཞུས་པ་དེ། ཝང་ཆི་ཧྲན་གྱིས་ཁྲིན་ཝིན་ཆིན་ཁོའི་ཕྱག་རོགས་བྱ་རྒྱུར་ཡིད་ཆེས་མེད་པ་དང་། དབུས་སྒྲིག་ཁྲིམས་ཞིབ་བཤེར་ཁང་དུ་ཀྲུའུ་ཡོན་ཁཱང་གི་བག་ཆགས་གཙང་སེལ་བྱས་པ་ཡིན་པའི་ཚོད་དཔག་བྱེད་བཞིན་ཡོད་འདུག
ཡང་དབྱེ་ཞིབ་པ་ཚོས་ཕྱོགས་གཉིས་ནས་གླེང་སློང་བྱེད་པའི་གནས་ཚུལ་འདིས། ཁྲིན་ཝིན་ཆིན་ནི་རྒྱ་ནག་གུང་ཁྲན་ཏང་ནང་གི་རྩོད་གཞི་ཆེ་བའི་མི་སྣ་ཞིག་ཡིན་པ་དང་། ཉེ་ཆར་ཁྲིན་ཝིན་ཆིན་རྒྱལ་ཡོངས་བདེ་འཇགས་ལྷན་ཁང་དུ་ལས་ཀ་བྱེད་བཞིན་པའི་གནས་ཚུལ་ཙམ་ཐོན་ཡོད་ཀྱང་། རྒྱ་ནག་གཞུང་གིས་ཁོའི་ལས་གནས་ད་དུང་ཡོངས་ཁྱབ་གསལ་བསྒྲགས་བྱས་མེད་པ་འདི་ནི་ཧ་ཅང་ལྐོག་གྱུར་དང་ཚོད་དཔག་བྱེད་དཀའ་བའི་གནས་ཚུལ་ཞིག་ཆགས་འདུག ཅེས་སོགས་བརྗོད་འདུག
ཁྲིན་ཝིན་ཆིན་ནི་སི་ཁྲོན་རིན་ཧྲའོ་ནས་ཡིན་པ་དང་ད་ལྟ་ལོ་ ༥༥ ཡིན་འདུག ལྷོ་ནུབ་ཆབ་སྲིད་སློབ་ཆེན་ནས་མཐར་ཕྱིན་ཞིང་། སི་ཁྲོན་སྤྱི་བདེ་ལས་ཁུངས་སོགས་སུ་ལོ་ ༡༠ རིང་ལས་ཀ་བྱས་ཡོད་པ་དང་། ༡༩༩༤ ལོ་ནས་སི་ཁྲོན་ཞིང་ཆེན་རྒྱལ་ཡོངས་བདེ་འཇགས་ལྷན་ཁང་དུ་ལོ་ ༨ རིང་འགན་འཛིན་གཞོན་པ་དང་འགན་འཛིན་བྱས་ཡོད་འདུག ༢༠༠༢ ལོར་སི་ཁྲོན་ཞིང་ཆེན་ཞིབ་དཔྱོད་ཁང་གི་འགན་འཛིན་དུ་སྤོ་ཡོད་པ་དང་། ༢༠༠༦ ལོར་ཧྥོ་ཅན་ཞིང་ཆེན་སྒྲིག་ཁྲིམས་ཞིབ་བཤེར་ཁང་གི་མགོ་གཙོ། ༢༠༡༢ ལོའི་ཟླ་ ༡༡ ནང་ལ་པེ་ཅིན་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་མགོ་གཙོ་གཞོན་པའི་གོ་གནས་འཁུར་ཡོད་འདུག
གསར་འགོད་པ། འཇིགས་མེད་རྒྱ་མཚོ།
