ད་ལོའི་རྒྱལ་ཡུམ་ཆེན་མོའི་དྲན་རྟན་གསེར་གྱི་གཟེངས་རྟགས་རྐང་སྤོལ་འགྲན་བསྡུར་ཟླ་འདིའི་ཚེས་ ༣༠ ཉིན་དྷ་སྟེང་བོད་ཁྱིམ་རྩེད་ཐང་དུ་མགོ་མགོ་འཛུགས་གནང་རྒྱུ་རེད།
དེ་རིང་ཉིན་རྒྱབ་ཀྱི་ཆུ་ཚོད་ ༢།༠༠ ཐོག དྷ་སྟེང་བོད་ཁྱིམ་བགྲོ་གླེང་ཚོགས་ཁང་དུ། བོད་རྒྱལ་ཡོངས་རྩེད་རིགས་ཚོགས་པའི་དྲུང་ཆེ་སྐལ་བཟང་དོན་གྲུབ་ལགས་དང་། ༢༠༡༥ ལོའི་རྐང་སྤོལ་གོ་སྒྲིག་ཚོགས་ཆུང་གི་ཚོགས་གཙོ་དྷ་ས་ས་གནས་མགོ་འཛིན་བསོད་ནམས་རྡོ་རྗེ་གཉིས་ཀྱིས། ད་ལོའི་རྒྱལ་ཡུམ་ཆེན་མོའི་དྲན་རྟེན་རྐང་རྩེད་སྤོ་ལོའི་འགྲན་བསྡུར་ཐེངས་ ༢༡ པ་དེ་ཟླ་འདིའི་ཚེས་ ༣༠ ཉིན་ནས་ཕྱི་ཟླ་ ༦ ཚེས་ ༡༠ བར་དྷ་སྟེང་བོད་ཁྱིམ་སློབ་གྲྭའི་རྩེད་ཐང་དུ་འཚོགས་རྒྱུ་ཡིན་སྐོར་གསར་འགོད་གསལ་བསྒྲགས་སྤེལ་སོང་།
ལོ་སྔོན་མའི་ཕྱི་ཟླ་ ༡༢ ཚེས་ ༣༡ ཉིན་ནས་ལོ་འདིའི་ཕྱི་ཟླ་ ༤ ཚེས་ ༡༥ བར་རྒྱ་བལ་གཉིས་དང་ཕྱི་རྒྱལ་བཅས་ནས་བོད་རྒྱལ་ཡོངས་རྩེད་རིགས་ཚོགས་པའི་ནང་དེབ་སྐྱེལ་བྱེད་མཁན་ཁྱོན་རུ་ཁག་ ༣༨ ཙམ་བྱུང་ཡོད་ཀྱང་། ས་གནས་རེར་རུ་ཁག་རེ་ལས་གོ་སྐབས་སྤྲོད་མ་ཐུབ་པའི་དབང་གིས་ས་གནས་གཅིག་ལ་རུ་ཁག་ཁ་ཤས་ཡོད་པ་ཚོས་ནང་ཁུལ་འགྲན་བསྡུར་བྱས་ཏེ་རྩེ་ཏོག་གིས་ད་ཆར། ཨ་རི་ནས་རུ་ཁག་ ༡ དང་ཁེ་ན་ཌ་ནས་རུ་ཁག་ ༡། ཡུ་རོབ་ནས་རུ་ཁག་ ༡། བལ་ཡུལ་ནས་རུ་ཁག་ ༣། རྒྱ་གར་ནས་རུ་ཁག་ ༢༡ ། ཁྱོན་སྡོམ་རུ་ཁག་ ༢༨ ལོ་འདིའི་འགྲན་བསྡུར་ནང་དངོས་སུ་ཞུགས་ཡོད་འདུག
སྐལ་བཟང་དོན་གྲུབ་ལགས་ཀྱིས་རྩེད་མོའི་རུ་ཁག་ཆ་བགོས་གནང་ཕྱོགས་སྐོར་གསུངས་དོན། ད་རེབ་རྩེད་འགྲན་ནང་རུ་ཁག་གཅིག་ལ་ཉུང་མཐར་ཐེངས་གཉིས་རེར་རྩེད་རྒྱུ་བྱས་ཏེ། རུ་ཁག་ ༢༨ དེ་སྡེ་ཚན་ ༧ ལ་བགོ་བཤའ་བརྒྱབ་ཡོད་པ་དང་། སྡེ་ཚན་རེ་རེར་རུ་ཁག་ ༤ རེ་བྱས་ཡོད་པ། རུ་ཁག་ ༤ དེ་ཐེངས་གཉིས་རེར་རྩེད་དེ་མཐའ་མའི་ཨང་དང་པོ་རྣམས་ཀྱིས་མཐའ་མའི་རྒྱལ་ཁའི་ཨང་དང་པོ་རྩོད་དགོས་ཀྱི་ཡོད་ཀྱང་དེའི་ནང་ནས་རུ་ཁག་གཅིག་ཚང་མེད་སྟབས། ཨང་གཉིས་པ་ཐོབ་མཁན་རུ་ཁག་བདུན་གྱི་ནང་ནས་རུ་ཁག་རྩེ་ཕུད་དེ་རུ་ཁག་དང་པོ་བརྒྱད་དང་མཉམ་དུ་འགྲོ་ལུགས་ཡོད་པ་ལྟར་དེ་ལྟར་བྱ་རྒྱུ་བྱས་ཡོད་པ་དང་། ད་ལོའི་རྩེད་འགྲན་ཟུར་དཔང་བ་དང་སྟངས་འཛིན་བྱེད་མཁན་རྣམས་རྒྱ་གར་བ་ཡིན་པ་དང་། སྨན་བཅོས་སྐོར་ལ་སྨན་པ་གཉིས་དང་སྨན་ཞབས་གཉིས་བཅས་གོ་སྒྲིག་བྱས་ཡོད་སྐོར་སོགས་བརྗོད་སོང་།
ཁོང་གིས་མུ་མཐུད་དུ་རྩེད་མོའི་འགྲོ་སོང་སྐོར་ལ་གསུངས་དོན། སྔོན་མ་དགའ་ལྡན་ཕོ་བྲང་གིས་རྒྱབ་སྐྱོར་གནང་ཡོད་པ་དང་། ༢༠༠༧ ལོར་དགའ་ལྡན་ཕོ་བྲང་ནས་རྒྱལ་ཡུམ་ཆེན་མོའི་གསེར་གྱི་གཟེངས་རྟགས་ཆེད་ཧིན་སྒོར་འབུམ་ ༢ དང་། རྩེད་རིགས་ཚོགས་པའི་མ་རྩ་ཡིན་ཞེས་ནས་འབུམ་ ༡༠ གནང་ཡོད་པ་དང་། དེ་བཞིན་དུ་རྩེད་རིགས་ཚོགས་པས་ ༢༠༡༣ ལོ་ནས་རྩེད་མོའི་འཛིན་བྱང་དང་། ཞལ་འདེབས་ཁག་རྩེད་མོའི་རུ་ཁག་གིས་དེབ་སྐྱེལ་བྱས་པའི་སྒོར་མོ་ ༧༥༠༠ བཅས་ལས་བྱུང་བའི་སྐོར་ལ་རྩིས་ཁྲ་ཞིག་བཟོས་ནས་དེ་དག་ལས་འགྲོ་སོང་མ་འདང་བ་རྣམས་དགའ་ལྡན་ཕོ་བྲང་གིས་གནང་བཞིན་ཡོད་པ་དང་། ད་ལོ་ཡང་དགའ་ལྡན་ཕོ་བྲང་གིས་གནང་རྒྱུ་ཡིན་པ་སོགས་བརྗོད་སོང་།
ཁོང་གིས་ད་ལོའི་རྐང་རྩེད་འགྲན་བསྡུར་གྱི་དབུ་འབྱེད་མཛད་སྒོའི་སྐབས་སུ་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ཕེབས་རྒྱུ་ཡིན་པ་དང་། མཇུག་བསྡོམས་མཛད་སྒོའི་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཕེབས་རྒྱུ་ཡིན་སྐོར་སོགས་བརྗོད་སོང་། དེ་བཞིན། ད་ལོ་དམིགས་བསལ་གྱིས་༧གོང་ས་མཆོག་དགུང་ལོ་ ༨༠ ཕེབས་པའི་འཁྲུངས་སྐར་གྱི་གཞས་ཚིག་གསར་བ་ཞིག་དང་རྒྱལ་ཡུམ་ཆེན་མོའི་གཟེངས་རྟགས་ཀྱི་ཆེད་དུ་གཞས་གསར་བ་ཞིག་བཅས་ཐང་སྟོང་གླུ་གར་ཚོགས་པས་གཏོང་རྒྱུ་གོ་སྒྲིག་བྱས་ཡོད། ཅེས་སོགས་བརྗོད་སོང་།
ད་ལོའི་གོ་སྒྲིག་ཚོགས་ཆུང་གི་ཚོགས་གཙོ་བསོད་ནམས་རྡོ་རྗེ་ཡིས། “ང་ཚོས་གསར་འགོད་པ་བརྒྱུད་ནས་བརྗོད་རྒྱུ་ཞིག་དེ་རྩེད་མོ་རྩེ་བའི་སྐབས་སུ་ཕན་ཚུན་བར་འཚེ་བའི་ལས་མ་ཡོང་པར། རྩེད་མོ་རྩེད་མཁན་ཆ་ཚང་ལ་འགན་ཆེན་པོ་ཆགས་ཡོད་སྟབས་ཚང་མས་ངེས་པར་དུ་འགན་འཁུར་དགོས་པ་རེད། དེ་བཞིན་དུ་འདས་པའི་ལོ་ཤས་ནང་རྩེད་མོ་ལྟ་མཁན་ནང་ལ་ཡང་རྙོག་གྲ་བཟོ་མཁན་ཡོང་བཞིན་ཡོད་སྟབས། རྩེད་མོ་རྩེད་མཁན་དང་ལྟ་མཁན་གཉིས་ཀྱིས་སོ་སོས་འགན་འཁུར་རྒྱུ་གལ་ཆེན་པོ་རེད་ཟེར་ནས་འབོད་སྐུལ་ཞུ་རྒྱུ་ཡིན་” ཞེས་བརྗོད་སོང་།
མཐའ་མའི་མཇུག་བསྡོམས་མཛད་སྒོའི་ཉིན་གྱི་འགྲན་བསྡུར་གྱི་རྩེད་མོ་དེ་ཧི་མ་ཅཱལ་ནང་ཡོད་པའི་སློབ་གྲྭའི་བུད་མེད་ཚོ་དང་ཁ་གཏད་དེ་རྒྱ་གར་བུད་མེད་རུ་ཁག་ཅིག་དང་མཉམ་དུ་རྩེད་རྒྱུ་བྱས་ཡོད་འདུག
གསར་འགོད་པ། འཇིགས་མེད་རྒྱ་མཚོ།
