ཁ་སང་རྒྱལ་སྤྱིའི་ཉེས་ཡང་ཚོགས་པས་སྙན་ཐོ་ཞིག་ཕྱི་བསྒྲགས་བྱས་པའི་ནང་ནེ་ཇི་རི་ཡའི་དམག་དཔུང་གིས་བྷོ་ཁཱོ་ཧ་རམ་ཤོག་ཁག་དང་དམག་འཐབ་ཁྲོད་ཡུལ་མི་ ༨༠༠༠ ལྷག་བསད་ཡོད་སྐོར་བཀོད་ཡོད་འདུག
ཁ་སང་རྒྱལ་སྤྱིའི་ཉེས་ཡང་ཚོགས་པས་འདས་པའི་ལོ་གཅིག་ཙམ་རིང་ནེ་ཇི་རི་ཡའི་བཙོན་ཟུར་དང་གཞུང་ཞབས། དམག་དཔོན་བཅས་ཁྱོན་ཡུལ་མི་ ༤༠༠ ལྷག་ལ་བཅར་འདྲི་བྱས་ཏེ་ཤོག་ལྷེ་ ༡༣༣ ཅན་གྱི་སྙན་ཐོ་༼ཁོ་ཚོའི་ཕྲག་པར་སྐར་རྟགས་དཔུང་རྒྱན་བཏགས་ཡོད་ཀྱང་ལག་པས་མི་གསོད་ཁྲག་སྦྱོར་བྱེད་ཀྱི་འདུག༽ཅེས་པ་ཞིག་བཏོན་ཏེ། ༢༠༡༡ ལོ་ནས་ད་བར་ནེ་ཇི་རི་ཡའི་དམག་མིས་བྷོ་ཁཱོ་ཧ་རམ་གྱེན་ལོག་ཤོག་ཁག་དང་དམག་འཐབ་བྱས་ཏེ། བྷོ་ཁཱོ་ཧ་རམ་གྱི་རྟེན་གཞིའི་ས་ཁུལ་གྱི་ཡུལ་མི་ ༡༠༠༠ དམར་གསོད་བཏང་བ་དང་། ཡུལ་མི་ ༧༠༠༠ ལྷག་བཙོན་ཁང་ནང་ལྟོགས་ཤི་ཐེབས་བཅུག་ཡོད་སྐོར་བཀོད་འདུག
རྒྱལ་སྤྱིའི་ཉེས་ཡངས་ཚོགས་པའི་སྙན་ཐོའི་ནང་། “ནེ་ཇི་རི་ཡའི་དམག་དཔུང་གིས་བྷོ་ཁཱོ་ཧ་རམ་གྱེན་ལོག་ཤོག་ཁག་དང་དམག་བརྒྱབ་སྟེ། བྷོ་ཁཱོ་ཧ་རམ་གྱི་རྟེན་གཞིའི་ས་ཁུལ་གྱི་ཡུལ་མི་སྐྱེས་པ་དང་ཕྲུ་གུ་བུ་ལོ་ ༩ ཡན་མང་པོ་འཇུ་བཟུང་བྱས་ཏེ། མི་ ༡༢༠༠ ལྷག་དམར་གསོད་བཏང་ཡོད་པ་མ་ཟད། མི་ ༧༠༠༠ ལྷག་བཙོན་ཁང་ནང་ཟ་མ་དང་སྨན་བཅོས་སོགས་ཀྱི་མཐུན་རྐྱེན་མ་སྦྱར་བར་མནར་གཅོད་བཏང་ནས་ལྟོགས་ཤི་ཐེབས་བཅུག་ཡོད་སྟབས། ང་ཚོས་རྒྱལ་སྤྱིའི་ནག་ཉེས་འདྲི་གཅོད་ཁྲིམས་ཁང་གིས་དོན་རྐྱེན་དེ་དང་འབྲེལ་བ་ཡོད་པའི་ནེ་ཇི་རི་ཡའི་དམག་སྤྱི་བཞི་དང་དམག་དཔོན་ལྔ་ཡོད་པ་དག་ལ་འདྲི་གཅོད་བྱས་ཏེ། ཁོ་ཚོའི་ནག་ཉེས་རྩད་ཞིབ་བྱས་ནས་ཁྲིམས་གཅོད་བྱེད་དགོས།”ཞེས་བཀོད་ཡོད་འདུག
ནེ་ཇི་རི་ཡའི་སྲིད་འཛིན་བྷུ་ཧ་རེའི་ (Muhammadu Buhari) མགྲིན་ཚབ་པ་གྷར་བྷ་ཤི་ཧུ་(Garba Shehu) ཡིས་རྒྱ་གར་གྱི་བརྒྱུད་ལམ་ (DNA) ཐོག “གཞུང་གིས་སྙན་ཐོར་ཞིབ་འཇུག་བྱས་ཏེ་དམངས་གཙོའི་ཁྲིམས་ལུགས་དང་གཞི་རྩའི་འགྲོ་བ་མིའི་ཐོབ་ཐང་ལ་བརྩི་སྲུང་ཞུས་ཏེ། དམག་འཁྲུག་སྐབས་ནག་ཉེས་གསོག་མཁན་སུ་ཡིན་ཡང་ཐར་པར་མ་གཏང་བར་ཡུལ་ཁྲིམས་ལྟར་ཆད་པ་གཅོད་རྒྱུ་ཡིན།”ཞེས་བརྗོད་འདུག
༢༠༡༡ ལོ་ནས་བཟུང་ད་བར་བྷོ་ཁཱོ་ཧ་རམ་གྱེན་ལོག་ཤོག་ཁག་གིས་རྡོ་སྣུམ་གྱིས་ཕྱུག་པའི་ནེ་ཇི་རི་ཡ་ཁ་ཆེའི་ཆོས་ལྡན་རྒྱལ་ཁབ་ཅིག་ཏུ་འགྱུར་ཆེད། ནེ་ཇི་རི་ཡའི་ནུབ་བྱང་ས་ཁུལ་ནས་མགོ་བཙུགས་ཏེ། རྒྱལ་ཡོངས་ནང་དྲག་འཛིང་བྱ་འགུལ་སྤེལ་ནས་ཡུལ་མི་ ༡༣༠༠༠ ལྷག་བསད་པ་དང་། ཡུལ་མི་ས་ཡ་གཅིག་དང་ཕྱེད་ལྷག་ཡུལ་ལུང་གཞན་ནང་ཉེན་གཡོལ་འགྲོ་དགོས་བཟོས་ཡོད་པ་མ་ཟད། ནེ་ཇི་རི་ཡའི་ས་ཆ་གསུམ་ཆ་གཅིག་ལྷག་བཙན་བཟུང་བྱས་ཡོད། ༢༠༡༥ ལོའི་ལོ་མགོ་ནས་བཟུང་ནེ་ཇི་རི་ཡ་དང་ཅཱ་ཌི་ (Chad)། ཀེམ་རོན་བཅས་ཀྱི་དམག་མིས་བྷོ་ཁཱོ་ཧ་རམ་གྱེན་ལོག་དང་དམག་བརྒྱབ་སྟེ། དེ་སྔོན་གྱེན་ལོག་ཤོག་ཁག་གིས་བཙན་བཟུང་བྱས་པའི་ས་ཁུལ་མང་ཆེ་བ་ཚུར་ལེན་ཐུབ་ཡོད་ཀྱང་། འདི་ལོ་ནེ་ཇི་རི་ཡའི་དམག་དཔུང་གིས་བྷོ་ཁཱོ་ཧ་རམ་གྱི་རྟེན་གཞིའི་ས་ཁུལ་གྱི་མི་ ༡༠༠༠ ལྷག་དམར་གསོད་བཏང་བ་དང་། མི་ ༥༠༠༠ བཙོན་ཁང་ནང་ལྟོགས་ཤི་ཐེབས་བཅུག་ཡོད་སྟབས། ཁ་སང་རྒྱལ་སྤྱིའི་ཉེས་ཡང་ཚོགས་པས་དེའི་སྐོར་ལ་ཞིག་བཏོན་ཡོད་ཀྱང་། ནེ་ཇི་རི་ཡ་གཞུང་གིས་ངོས་ལེན་བྱས་མི་འདུག
དེ་རིང་ནེ་ཇི་རི་ཡའི་སྲིད་འཛིན་བྷུ་ཧ་རེའི་ (Muhammadu Buhari) གྱིས་ཅཱ་ཌི་ (Chad) དང་ཀེམ་རོན་གཞུང་དང་གྲོས་མོལ་བྱས་ཏེ། བྷོ་ཁཱོ་ཧ་རམ་གྱེན་ལོག་ཤོག་ཁག་ལ་ཁ་གཏད་གཅོག་རྒྱུའི་དམག་ཇུས་གསར་པ་ཞིག་གཏིང་རྒྱུ་ཐག་གཅོད་བྱས་ཡོད་ཚུལ་བསྒྲགས་ཡོད་པ་མ་ཟད། ནེ་ཇི་རི་ཡའི་དམག་སྤྱི་ཁེར་སི་ཨོ་ལུ་ཁོ་ལཱ་ཌི་ (Chris Olukolade) ཡིས། ཉེས་ཡང་ཚོགས་པས་ཕྱོགས་ཞེན་ཅན་གྱི་སྙན་ཐོ་ཞིག་བཏོན་ནས་ནེ་ཇི་རི་ཡའི་དམག་དཔུང་དང་དམག་སྤྱིར་ཉེས་མེད་ཉེས་འགེལ་གྱི་སྐྱོན་འཛུགས་བྱས་ཡོད་ཀྱང་། ད་བར་ང་ཚོས་འགྲོ་བ་མིའི་ཐོབ་ཐང་ལ་རྡོག་རོལ་བཏང་མེད་པ་མ་ཟད། ནག་ཉེས་གསོག་མཁན་ཚོར་ཉེས་པ་མ་བཏང་བར་བཞག་མེད་སྟབས། རྒྱལ་སྤྱིའི་ཁྲིམས་ཁང་ལ་གཏུག་དགོས་དོན་གང་ཡང་མེད་ཅེས་བརྗོད་འདུག
ནེ་ཇི་རི་ཡའི་རྒྱལ་སར་རྟེན་གཞི་བྱས་པའི་དབྱིན་ཡུལ་གྱི་གཞུང་ཚབ་ཁང་གིས་ནེའུ་ཡོག་དུས་བབ་དང་དབྱིན་ཡུལ་གྱི་གྷར་ཌིན་ཐོག་བརྗོད་དོན། ང་ཚོས་ནེ་ཇི་རི་ཡ་གཞུང་ལ་གཞུང་དམག་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་སྟབས། དམག་དཔུང་གི་སྒྲིག་ཁྲིམས་ལ་བཅོས་སྒྱུར་བཏང་སྟེ་ཉེས་གསོག་དམག་མི་དང་དམག་ སྤྱིར་ཆད་པ་གཅོད་དགོས་པའི་ལམ་སྟོན་བྱས་པ་ཡིན་ཞེས་དང་། ཨ་རིའི་ཕྱི་སྲིད་ལྷན་ཁང་གིས། ནེ་ཇི་རི་ཡ་གཞུང་གིས་ཉེས་ཡང་ཚོགས་པའི་སྙན་ཐོར་ཞིབ་འཇུག་བྱས་ཏེ་བདེན་པ་ར་འཕྲོད་བྱེད་དགོས། ང་ཚོས་དྲག་སྤྱོད་ཤོག་ཁག་དང་དམག་རྒྱག་སྐབས་དམག་མིས་ཆེད་ལས་ཀྱི་སྤྱོད་ལམ་ལ་ཚོད་འཛིན་བྱ་རྒྱུར་དཀའ་ངལ་འཕྲད་བཞིན་ཡོད་སྟབས། ཨ་རིས་ནེ་ཇི་རི་ཡ་གཞུང་ལ་གནད་དོན་དེའི་ཐོག་རོགས་རམ་གང་ཐུབ་བྱ་རྒྱུ་ཡིན་ཞེས་ བརྗོད་འདུག
