བལ་སྒོར་ས་ཡ་ ༣༠ ཡིས་ས་ཡོམ་གོད་ཆག་ལ་རོགས་རམ་བྱ་རྒྱུ་ཡིན།

བོད་མིའི་སྒྲིག་འཛུགས་བཀའ་ཤག་གིས་ཉེ་ལམ་བལ་ཡུལ་ནང་ས་ཡོམ་གོད་ཆག་བྱུང་བའི་ཁྲོད་ཀྱི་བོད་མི་ཚོར་བར་བརྒལ་ངལ་སེལ་རོགས་སྐྱོར་བལ་སྒོར་ས་ཡ་ ༣༠ གཏོང་རྒྱུ་ཡིན་པའི་གསལ་བསྒྲགས་གནང་སོང་།

དེ་རིང་སྔ་དྲོའི་ཆུ་ཚོད་ ༡།༠༠ སྟེང་གངས་སྐྱིད་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་ཤེས་རིག་བཀའ་བློན་དངོས་གྲུབ་ཚེ་རིང་མཆོག དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས། དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དངོས་གྲུབ་རྡོ་རྗེ་བཅས་ཀྱིས་བལ་ཡུལ་གྱི་ས་ཡོམ་སྐོར་ལ་གསར་འགོད་གསལ་བསྒྲགས་ཤིག་སྤེལ་སོང་།

སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་བ་ཡུལ་ནང་གི་ས་ཡོམ་གོད་ཆག་ཁྲོད་གནོད་འཚེ་ཕོག་མཁན་ཡོངས་ལ་སེམས་གསོ་དང་འབྲེལ་ཏེ། ས་ཡོམ་གྱི་གོད་ཆག་འོག་འཐོར་ཞིག་བྱུང་བ་ཁག་ལ་རྒུད་སྐྱོབ་ལས་འཆར་ཁག་གསུམ་སྤེལ་རྒྱུའི་གྲ་སྒྲིག་བྱེད་བཞིན་ཡོད། ཐོག་མར་བལ་སྒོར་འབུམ་ ༥༦ བགོ་འགྲེམས་ཀྱི་ཛ་དྲག་ངལ་སེལ་ལས་རིམ་སྤེལ་གྲུབ་པ་དང་། ནད་ཡམས་དང་དེ་མིན་དཀའ་ངལ་མང་དག་ཅིག་ཡོང་ངེས་ཚོད་དཔག་བྱེད་བཞིན་ཡོད་སྟབས། ཕུགས་འཁྱོལ་བསྐྱར་བཟོའི་ལས་འཆར་གྱི་སྔོན་ལ་བར་བརྒལ་ངལ་སེལ་གྱི་ལས་འཆར་དགོས་གལ་ཆེན་པོར་གཟིགས་ཏེ། བཀའ་ཤག་ནས་རོགས་དངུལ་ཐབས་འཚོལ་གནང་མུས་ཁོངས་ནས་བལ་སྒོར་ས་ཡ་ ༣༠ གཤམ་གསལ་བར་བརྒལ་ངལ་སེལ་ལས་འཆར་ཐོག་གཏོང་རྒྱུའི་ཐག་གཅོད་གནང་ཡོད་སྐོར་སོགས་གསུངས་སོང་།

༡། ཤི་སྐྱོན་བྱུང་བའི་རྗེས་ཤུལ་ཁྱིམ་ཚང་ལ་ཤི་པོ་རེར་བལ་སྒོར་འབུམ་ ༢ རེ་བརྩིས་པའི་བལ་སྒོར་ ༢༦,༠༠,༠༠༠།
༢། ཉམ་ཐག་ཐོ་གཞུང་ཁ་པའི་ཁོངས་འཚོ་སྣོན་ཐོབ་བཞིན་པ་མི་གྲངས་ ༡༣༩ ལ་ཟླ་རེར་འཚོ་སྣོན་འཕར་མ་སྒོར་ ༣༠༠༠ རེ་བརྩིས་པའི་ཟླ་དྲུག་འཚོ་སྣོན་འཕར་མ་ཁྱོན་བསྡོམས་བལ་སྒོར་ ༢༥,༠༢,༠༠༠།

༣། ས་གནས་མགོ་འཛིན་ནས་ཕུལ་གསལ་གཞིས་ཁང་འཐོར་ཞིག་ཕྱིན་པ་གྲངས་ ༡༡༡ ལ་བལ་ཡུལ་གཞུང་ནས་བགོ་སྤྲོད་བྱེད་བཞིན་པའི་ལྕགས་ཤོག་གི་འཕྲལ་སེལ་སྡོད་ཁང་གསར་རྒྱག་ཆེད་བལ་སྒོར་ ༡༤,༨༠,༠༠༠།
༤། གཞིས་ཆགས་ཁག་ནང་གཞིས་ཁང་དང་དེ་བཞིན། ལས་ཁུངས། ལས་ཤག་སོགས་ལ་གས་སྐྱོན་ཤོར་བ་ཁག་བཟོ་བཅོས་ཆེད་བལ་སྒོར་ ༤༦,༠༠,༠༠༠།
༥། སྦ་ཁང་དང་། ཤར་ཁུམ་ཐུབ་བསྟན་ཆོས་གླིང་བཅས་བཙུན་དགོན་གཉིས་ལ་དམིགས་བསལ་རྒུད་སྐྱོབ་བལ་སྒོར་ ༣༠,༠༠,༠༠༠།
༦། རྣམ་རྒྱལ་མཐོ་སློབ་དང་། རྣམ་རྒྱལ་འབྲིང་སློབ། སྲོང་བཙན། ཨ་ཏི་ཤ། ལེགས་བཤད་ཚལ། ཀེ་ལ་ཤ། ཤར་ཁུམ་སློབ་གྲྭ་བཅས་བཟོ་བཅོས་དང་འཕྲལ་སེལ་འཛིན་ཁང་གོ་སྒྲིག་ཆེད་ཐོ་གཞུང་ཟུར་ཡོད་ལྟར་ཁྱོན་བསྡོམས་བལ་སྒོར་ ༨༧,༠༠,༠༠༠།
༧། སྨན་བཅོས་དང་འཕྲོད་བསྟེན་རོགས་སྐྱོར་ཆེད་བལ་སྒོར་ ༢༥,༥༠,༠༠༠།
༨། འཛིན་སྐྱོང་དང་། དེ་མིན་གོང་སྨོས་ནང་མ་ཚུད་པའི་ལས་འཆར་དང་ལས་དོན་གྱི་འགྲོ་གྲོན་དམིགས་སྒོར་བལ་སྒོར་ ༤༥,༦༨,༠༠༠།

བཀའ་ཤག་ནས་སྐུ་ཚབ་དོན་གཅོད་ཚོར་བཀོད་ཁྱབ་གནང་ཟིན་པ་ལྟར། ཟླ་འདིའི་མཇུག་ཙམ་ལ་རོགས་དངུལ་དེ་དག་བལ་ཡུལ་དུ་འབྱོར་རྒྱུར་རེ་བ་ཞུ་བཞིན་ཡོད་སྐོར་སོགས་བཀོད་འདུག

མཇུག་ཏུ་གསར་འགོད་པས་སྲིད་སྐྱོང་མཆོག་ལ་རོགས་དངུལ་བགོ་འགྲེམས་མིང་ཐོའི་ནང་དུ་བལ་ཡུལ་ཁུལ་དུ་གཏན་སྡོད་བྱེད་མཁན་ལྟ་བུ་ཁོ་ནར་དམིགས་པ་འདྲ་པོ་ཞིག་འདུག་པས། གཏན་འཇགས་ཀྱི་སྡོད་གནས་མེད་མཁན་ཚོ་དེའི་ནང་ཚུད་ཀྱི་ཡོད་མེད་དང་། ཁོ་ཚོའི་ཁྲོད་ནས་དཀའ་ངལ་ཡོད་རིགས་ཚོར་རོགས་སྐྱོར་གང་གནང་འཆར་ཡོད་མེད་སྐོར་དྲིས་པར་ཁོང་གིས། ང་ཚོས་གཞི་རྩའི་རོགས་རམ་བྱེད་ས་དེ་གཏན་སྡོད་བྱེད་མཁན་གཞིས་ཆགས་ཁག་དང་། བལ་ཡུལ་རྒྱལ་སར་སྡོད་མཁན་ཁ་འཐོར་མི་མང་རེད། བལ་ཡུལ་གྱི་ས་གནས་མགོ་འཛིན་དང་། ཛ་དྲག་ཚོགས་ཆུང་ནས་སྤྲོད་པའི་དཀའ་ངལ་ཡོད་པའི་ཁྱིམ་ཚང་གི་ཐོ་གཞུང་གཞིར་བཟུང་ནས་རོགས་དངུལ་གནང་གཏན་ཁེལ་རེད། ཉམས་ཐག་ཁོངས་གཏོགས་ཀྱི་ཁྱིམ་ཚང་ ༡༣༩ ཡོད་པའི་ནང་གཞིས་ཆགས་སུ་སྡོད་མཁན་དང་རྒྱལ་སར་སྡོད་མཁན་གཉིས་ཀ་ཡོད་པ་རེད།  སྤྱི་ཡོངས་ནས་ཛ་དྲག་ཚོགས་ཆུང་གིས་བལ་ཡུལ་དུ་ཡོད་པའི་བོད་མིའི་མི་འབོར་ཚོད་དཔག་བྱས་ན་སྟོང་ཕྲག་ ༡༨ དང་། དཔྱ་ཁྲལ་ལག་དེབ་བགོ་འགྲེམས་གཞིར་བཟུང་བྱས་ན་ང་ཚོས་ཤོད་བཞིན་པ་སྟོང་ཕྲག་ ༡༣ ཡོད་ཟེར་གྱི་ཡོད། ད་ལྟ་བལ་ཡུལ་ལ་བཞུགས་མ་ཐུབ་པར་དྷ་རམ་ས་ལ་དང་ལྡེ་ར་རྡུན་གཙོས་པའི་རྡོར་རྗེ་གླིང་སོགས་སུ་ཕེབས་བསྡད་མཁན་དེ་འདྲ་ཡོད་པ་རེད། ཁོ་རང་ཚོར་འཕྲལ་དུ་ལས་ཀ་སྤྲོད་ཐུབ་རྒྱུ་ཁག་པོ་རེད་བསམ་གྱི་འདུག ཡིན་ཡང་ཁོ་ཚོར་དཔལ་འབྱོར་གྱི་དཀའ་ངལ་འཕྲད་ནས་ཕྲུ་གུ་སློབ་གྲྭར་གཏོང་མ་ཐུབ་པ་སོགས་ཀྱི་གནས་སྟངས་བྱུང་གི་ཡོད་ན། ང་ཚོས་ཁོ་ཚོར་ཤེས་རིག་ལས་ཁུངས་ལ་འབྲེལ་བ་ཞུས་ནས་བུ་ཕྲུག་སློབ་གྲྭར་འཇུག་རྒྱུར་མཐུན་རྐྱེན་སྦྱོར་རྒྱུ་ཡིན། དཔེར་ན། ས་མཚམས་ཁུལ་གྱི་བོད་མིའི་ནང་མི་ཞིག་གི་ཕ་མ་གཉིས་ཀ་གྲོངས་ཏེ། བུ་མོ་གཅིག་ལས་ལྷག་མེད་སྟབས། ད་ལྟ་ང་ཚོས་ཁོ་མོ་བོད་ཁྱིམ་སློབ་གྲྭར་འཇུག་རྒྱུའི་ལས་ཀ་འགྲོ་བཞིན་པ་རེད། ཅེས་གསུངས་བྱུང་།

སྲིད་སྐྱོང་མཆོག་ལ་མ་འོངས་པར་ས་ཡོམ་བྱུང་སྐབས་རི་སྙིལ་བ་དང་ཁང་པ་ཞིག་རལ་འགྱུར་བ། ས་རུད་ཐེབས་པ། ནད་ཡམས་སོགས་བྱུང་སྲིད་པ་ཞིག་ཡིན་སྟབས། བོད་མིའི་སྒྲིག་འཛུགས་ངོས་ནས་དེར་སྔོན་འགོག་བྱ་རྒྱུའི་ཐབས་ལམ་གང་འདྲ་ལག་བསྟར་གནང་རྩིས་ཡོད་མེད་དྲིས་པར་ཁོང་གིས། ང་ཚོས་འཕྲོད་བསྟེན་གྱི་ཡན་ལག་སྨན་ཁང་ཆེད་དུ་བལ་སྒོར་འབུམ་ ༢༥ དང་ཁྲི་ལྔ་བཞག་ཡོད་པ་རེད། དེ་ནི་མ་འོངས་པར་ས་ཡོམ་རྐྱེན་པས་ནད་ཡམས་དེ་འདྲ་བྱུང་སྲིད་པ་ཞིག་ཡིན་པ་མ་ཟད། ཡོང་གི་རེད་ཟེར་གྱི་ཡོད་སྟབས། གཞི་རྩའི་སྨན་ཁང་ཁག་གིས་འགྲོ་སོང་གཏོང་ཆེད་འགྲོ་གྲོན་དེ་འཕུལ་ཡོད་པ་རེད། ཁང་པ་རྦད་དེ་རྩ་མེད་འགྲོ་མཁན་ཚོར་ནང་མི་རེར་བལ་སྒོར་ ༡༥༠༠༠ རེ་དང་ཁང་པ་སྐྱོན་ཤོར་བ་བཟོ་བཅོས་རྒྱག་དགོས་པ་དག་ལ་ནང་མི་རེར་བལ་སྒོར་ ༡༠༠༠༠ སྤྲོད་རྒྱུ་བྱས་ཡོད་པ་རེད།

ང་ཚོའི་ལས་གཞི་གསུམ་པ་དེ་ཁང་པ་དང་སློབ་གྲྭ་དེ་འདྲ་གསར་རྒྱག་བྱེད་དགོས་པ་དང་བལ་ཡུལ་ནང་གི་འཚོ་གནས་ཆེད་ལས་གཞི་སྤེལ་རྒྱུ་སོགས་རེད། དཔེར་ན་ཨ་རིའི་གཞུང་གི་ (PRM) ནས་ང་ཚོར་འདི་ལོ་རོགས་དངུལ་སྤྲོད་རྒྱུའི་བཀའ་འཁྲོལ་ཐོབ་པ་དེ་ཨ་སྒོར་ ༢༨༤༠༠༠༠ རེད། རྒྱ་གར་དང་བལ་ཡུལ་གཉིས་ཀྱི་བོད་མིའི་མི་འབོར་གྱི་བརྒྱ་ཆ་ ༡༣ ཙམ་བལ་ཡུལ་ནང་ཡོད་པ་རེད། ཡིན་ཡང་ན་ནིང་ང་ཚོས་དམིགས་བསལ་བྱས་ནས་རོགས་དངུལ་བརྒྱ་ཆ་ ༡༥ གནང་ཡོད་པ་རེད། ད་ལོ་བལ་ཡུལ་ནང་ས་ཡོམ་མ་བྱུང་སྔོན་ལ་བརྒྱ་ཆ་ ༢༠ གནང་རྒྱུ་ཐག་གཅོད་ཡོད་པ་དེ་ཨ་སྒོར་ ༦༠༠༠༠༠ མ་ཟིན་ཙམ་ཆགས་ཀྱི་ཡོད་པ་དང་། དེ་བལ་སྒོར་ལ་རྩིས་ན་ས་ཡ་ ༦༠༠ ཙམ་རེད། དེ་ཕྱི་ཟླ་ ༩ ནས་ ༡༠ བར་ལ་འཐོན་གྱི་རེད། དེའི་ནང་ནས་གཞིས་ཆགས་ཁག་དང་འཚོ་བ་སྐྱེལ་ཆེད་ལས་འཆར་ག་རེ་བསྒྲིག་རྒྱུའི་ཐད་འཆར་གཞི་གཅིག་ཡོད་པ་རེད། དེ་བཞིན་ང་ཚོའི་རེ་བར་ཕལ་ཆེར་རོགས་ཚོགས་གཞན་ཞིག་ནས་བལ་ཡུལ་གྱི་བོད་མིའི་ཆེད་བལ་སྒོར་འབུམ་ ༡༠༠ ནས་ ༢༠༠ བར་གནང་རྒྱུའི་རེ་བ་ཡོད། ཡིན་ནའང་གཙོ་བོ་དེ་རོགས་ཚོགས་ཁག་གི་རོགས་དངུལ་ག་ཚོད་གནང་མིན་ལ་རག་ལས་ཡོད་པ་རེད། ཅེས་གསུངས་བྱུང་།

 གསར་འགོད་པ། དོན་གྲུབ།