ཁ་ཉིན་ཨ་རིའི་གཞུང་གིས་རྒྱ་ནག་གི་དྲ་ཐོག་གསང་ཉུལ་བས་ཨ་རིའི་སྲི་ཞུ་ལས་བྱེད་ས་ཡ་བཞི་ཙམ་གྱི་གསང་བ་རྐུ་འཁྱེར་བྱས་ཡོད་ཚུལ་ཕྱི་བསྒྲགས་བྱས་འདུག
ཟླ་འདིའི་ཚེས་ ༤ ཉིན་ཨ་རིའི་ལས་བྱེད་བདག་སྐྱོང་ལས་ཁུངས་ཀྱིས་རྒྱ་ནག་གཞུང་གི་དྲ་ཐོག་གསང་ཉུལ་བ་ཚོས། ལས་ཁུངས་ཀྱི་གློག་ཀླད་མ་ལག་འཕྲུལ་ཆས་ནང་ལྐོག་འཛུལ་བྱས་ཏེ། ༡༩༨༥ ལོ་ནས་ད་བར་གྱི་སྲི་ཞུ་ལས་བྱེད་ས་ཡ་ ༤ ལྷག་གི་གསང་གནས་ཡིག་ཆ་དང་ཉེན་སྲུང་ལག་ཁྱེར་གྱི་རྒྱབ་ལྗོངས་གནས་ཚུལ། ངོ་སྤྲོད་ལག་ཁྱེར་གྱི་ཨང་གྲངས་དང་། སྐྱེས་ཚེས་དང་ཁ་བྱང་། དངུལ་ཁང་གི་གནས་ཚུལ་སོགས་སྒེར་གྱི་ཡིག་ཚགས་མང་པོ་ཞིག་རྐུ་འཁྱེར་བྱས་ཡོད་ཚུལ་ཕྱི་ བསྒྲགས་བྱས་ཡོད་པ་དང་། དེ་ལ་རྒྱ་ནག་གཞུང་གི་མགྲིན་ཚབ་པའི་ངོས་ལེན་མེད་པའི་བསྒྲགས་གཏམ་སྤེལ་འདུག
ཨ་རིའི་འབྲེལ་ཡོད་ལས་བྱེད་ཅིག་གིས་རོའུ་ཊར་གསར་ལམ་ཐོག “ང་ཚོའི་ལས་བྱེད་ཀྱི་གསང་བ་རྐུ་འཁྱེར་བྱེད་མཁན་ནི་ཕྱིའི་རྒྱལ་ཁབ་ཡིན་པ་མ་ཟད། རྒྱ་ནག་གཞུང་དང་འབྲེལ་བ་ཡོད་པར་ངོས་འཛིན་བྱེད་བཞིན་ཡོད།”ཅེས་དང་། ཨ་རིའི་རྒྱལ་སྲུང་བདེ་འཇགས་ལྷན་ཁང་གིས། “ད་ལྟ་ཨ་རིའི་རྒྱལ་ཡོངས་ཞིབ་དཔྱོད་ལས་ཁུངས་ཀྱིས་གནས་ཚུལ་དེ་ག་དུས་དང་གང་འདྲ་བྱས་ནས་བྱུང་མིན་རྟོག་ཞིབ་བྱེད་བཞིན་ཡོད་སྟབས། ཉིན་ཤས་རྗེས་ཨ་རིའི་གསང་བ་རྐུ་འཁྱེར་སུས་བྱས་ཡོད་མེད་ཤེས་ཀྱི་རེད།”ཅེས་བརྗོད་ཡོད་སྟབས། ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧོང་ལེས། ཨ་རིས་ང་ཚོར་དོགས་པ་དང་ཁུངས་ལུང་མེད་པའི་སྐྱོན་འཛུགས་བྱེད་རྒྱུ་མཚམས་འཇོག་བྱས་ཏེ། དེ་ལས་ཕན་ཚུན་ཡིད་ཆེས་དང་མཉམ་ལས་གང་མང་བྱེད་ཐུབ་པ་བྱ་དགོས། འཛམ་གླིང་ནང་དྲ་ཐོག་ལྐོག་འཛུལ་བ་ཚོས་དངོས་མིང་མ་བཀོད་པར་གསང་བ་རྐུ་འཁྱེར་བྱེད་བཞིན་ཡོད་སྟབས། ཨ་རིས་ཚན་རིག་དང་མཐུན་པའི་བརྟག་དཔྱད་མ་བྱས་པར་ང་ཚོས་ཁྱེད་ཚོའི་དྲ་རྒྱར་ལྐོག་འཛུལ་བྱས་པ་རེད་བརྗོད་ན་ཡག་པོ་མ་རེད། ཉེ་ལམ་ང་ཚོའི་དྲ་ཚིགས་ཁག་ལའང་ལྐོག་འཛུལ་བྱེད་མཁན་འདུག དེར་ང་ཚོས་ཞིབ་འཇུག་མ་བྱས་པར་ཨ་རིས་བྱས་པ་རེད་ཟེར་ན་འགྲིག་གི་རེད་དམ་ཞེས་ བརྗོད་འདུག
ཁ་ཉིན་ནེའུ་ཡོག་དུས་བབ་དང་ཝ་ཤིན་ཌོན་ཆ་འཕྲིན་སྟེང་མིང་སྨྲོས་མེད་པའི་ཨ་རིའི་འབྲེལ་ཡོད་ལས་བྱེད་ཅིག་གིས་ཨ་རིའི་གཞུང་གི་དྲ་ཐོག་ལ་ལྐོག་འཛུལ་བྱེད་མཁན་ནི་རྒྱ་ནག་གཞུང་གི་དྲ་ཐོག་གསང་ཉུལ་བ་ཚོ་ཡིན་སྐོར་འགྲེལ་བརྗོད་བྱས་ཡོད་པ་དང་། ཡང་ཨ་རིའི་གྲོས་ཚོགས་གོང་མའི་གསང་བའི་ལས་དོན་ཚོགས་ཆུང་གི་ཚོགས་མི་ལྕམ་སུ་སན་ཁཱོ་ལེན་ (Susan Collins) གྱིས་བྷི་བྷི་སི་གསར་ལམ་ཐོག ཨ་རིའི་གཞུང་ཞབས་པའི་དྲ་ཐོག་ནང་ལྐོག་འཛུལ་བྱས་ཏེ། མི་སྒེར་གྱི་གནས་ཚུལ་དང་རྒྱལ་ཁབ་ཀྱི་གསང་བ་རྐུ་འཁྱེར་བྱེད་མཁན་དག་ནི་རྒྱ་ནག་གཞུང་དང་འབྲེལ་བ་ཡོད་པ་མ་ཟད། ཁོ་ཚོ་རྒྱ་ནག་གི་གྲོང་ཁྱེར་ཁག་ནང་བསྡད་དེ་རྒྱལ་ཁབ་གཞན་གྱི་དྲ་ཐོག་ནང་ལྐོག་འཛུལ་བྱས་ནས་གསང་བ་རྐུ་བཞིན་ཡོད་སྐོར་བརྗོད་ཡོད་སྟབས། རྒྱ་ནག་གི་ཨ་རིའི་གཞུང་ཚབ་ཁང་གི་མགྲིན་ཚབ་པ་ཀྲུའུ་ (Zhu Haiquan) ཡིས་བརྟག་དཔྱད་ཞིབ་འཇུག་མ་བྱས་པར་ཕྱོགས་བསྡོམས་བརྒྱབ་ཚེ་ཕན་ལས་གནོད་ཆེ་བ་བསྐྱལ་རྒྱུ་ཡིན་སྟབས། ཨ་རིས་སྐྱོན་འཛུགས་མ་བྱས་སྔོན་ལ་བསམ་བློ་གཏོང་དགོས་ཞེས་བརྗོད་འདུག
༢༠༠༦ ནས་ ༢༠༡༤ ལོ་བར་རྒྱ་ནག་གྲོང་ཁྱེར་ཁྲིན་ཏུར་རྟེན་གཞི་བྱས་པའི་རྒྱ་ནག་བཅིངས་གྲོལ་དམག་མིའི་རུ་ཁག་ཨང་རྟགས་ ༦༡༣༩༨ ཀྱི་རུ་མི་ལྔས་ཨ་རིའི་དྲ་ཚིགས་ནང་ལྐོག་ཉན་ལྐོག་འཛུལ་བྱས་ཏེ། ཨ་རིའི་ཧྥན་སེལ་ཝེ་ནེ་ཡ་མངའ་སྡེའི་(Westinghouse Electric)རྡུལ་ཕྲན་གློག་ཆས་བཟོ་སྐྲུན་ཁང་དང་། ཧ་ཡང་བཟོ་གྲྭ(Alcoa Inc)། དྭངས་ལྕགས་བཟོ་གྲྭ འཕྲུལ་རིག་ཚན་རྩལ་འཕེལ་རྒྱས་ཁེ་ལས་ (Allegheny Technologies)། ཉི་འོད་འཕྲུལ་རིགས་བཟོ་སྐྲུན་ཁང་ (SolarWorld)། དྭངས་ལྕགས་ལས་བཟོ་ཚོགས་པ་བཅས་ཀྱི་བཟོ་རིག་ལག་རྩལ་དང་ཁེ་ལས་ཀྱི་ཚོང་དོན་གསང་བ་མང་པོ་ཞིག་རྐུ་འཁྱེར་བྱས་ཡོད་པ་དང་། ༢༠༠༨ ལོའི་ཟླ་ ༥ ཚེས་ ༥ ཉིན་རྒྱ་གར་བདེ་སྲུང་ལས་ཁུངས་ཀྱིས་རྒྱ་ནག་གཞུང་གིས་འདས་པའི་ལོ་ཤས་ནས་བཟུང་རྒྱ་གར་གྱི་གཞུང་སྒེར་གཉིས་ཀྱི་དྲ་ཚིགས་ནང་དྲ་འབུ་བྷོ་ཌི་(BOTS) དང་དྲ་སྤྱོད་ཐོ་འགོད་བྱེད་སའི་སྒྲ་སྡུད་འཕྲུལ་ཆས་ (key loggers)། དྲ་འབྲེལ་གྱི་ཕྱོགས་སྟོན་མ་ལག་ (mapping of networks) སྟངས་འཛིན་བྱེད་ས་བཅས་ཀྱི་དྲ་ཐོག་མ་ལག་ཁག་བཀོལ་སྤྱོད་བཏང་སྟེ། རྒྱ་གར་གྱི་གསང་བ་བརྐུས་ཡོད་པ་ཕྱི་བསྒྲགས་བྱས་ཡོད།
༢༠༡༤ ལོའི་ཟླ་ ༤ ཚེས་ ༧ ཉིན་ཨ་རིའི་གཞུང་གིས་རྒྱ་ནག་གི་དྲ་ཐོག་གསང་ཉུལ་བས་ཨ་རིའི་དམག་དོན་དྲ་ཚིགས་ ཁག་ལ་ལྐོག་འཛུལ་བྱེད་ཀྱི་ཡོད་པ་གསལ་བསྒྲགས་དང་འབྲེལ། ཨོ་བྷ་མས་མ་འོངས་པར་རྒྱལ་ཁབ་དང་མི་སྒེར་སུས་ཨ་རིའི་གསང་བ་རྐུ་འཁྱེར་བྱས་ཏེ། རྒྱལ་ཁབ་ཀྱི་བདེ་འཇགས་དང་ཕྱི་སྲིད། དཔལ་འབྱོར་འཕེལ་རྒྱས་བཅས་ལ་གནོད་གཞིའི་བྱ་འགུལ་སྤེལ་ན་སྲིད་དོན་ཀྱི་ཆད་པ་གཅོད་རྒྱུ་ཞེས་བརྗོད་ཡོད་ཀྱང་། རྒྱ་ནག་གཞུང་གིས་དངོས་ཤུགས་གཉིས་ཐོག་ནས་ཨ་རིའི་དྲ་རྒྱར་ལྐོག་འཛུལ་བྱས་ཏེ། ཚོང་དོན་དང་དམག་དོན་གསང་བ་རྐུ་འཁྱེར་བྱེད་བཞིན་ཡོད་སྟབས། ༢༠༡༤ ལོའི་ཟླ་ ༡༡ ཚེས་ ༢༡ ཉིན་ཨ་རིའི་རྒྱལ་སྲུང་ལས་ཁུངས་ཀྱི་འགན་འཛིན་མེག་རོ་ཅར་ (Mike Rogers) གྱིས་ཨ་རིས་རྒྱ་ནག་གཞུང་གི་དྲ་ཐོག་ལྐོག་འཛུལ་བ་ཚོར་ཁ་གཏད་མ་གཅག་ཚེ། མི་རིང་བར་ཨ་རིའི་མཁའ་འགྲུལ་ཚན་པ་དང་ས་ཁང་ཁེ་ལས་མང་པོ་སྒོ་རྒྱག་དགོས་འཁེལ་རྒྱུ་ཡིན་པའི་ཉེན་བརྡ་བཏང་ཡོད།
འདས་ལོའི་ཟླ་ ༡༡ ནང་ཨ་རིའི་རྒྱལ་སྲུང་བདེ་འཇགས་ལྷན་ཁང་གི་ལས་བྱེད་ཞིག་གིས་རྒྱ་ནག་གཞུང་གི་དྲ་ཐོག་གསང་ཉུལ་བ་ཚོས་ཨ་རིའི་ལས་བྱེད་ ༢༥༠༠༠ ལྷག་དང་། འདི་ལོའི་ལོ་མགོར་དྲ་ཐོག་གསང་ཉུལ་བས་ཨ་རིའི་འཕྲོད་བསྟེན་ཉེན་སྲུང་ཁེ་ལས་ (Anthem Inc.) དང་ (Premera Blue Cross) གཉིས་ཀྱི་དྲ་ཚིགས་ནང་སིམ་འཛུལ་བྱས་ཏེ། མི་ས་ཡ་ ༨ ཙམ་གྱི་གནས་ཚུལ་ལ་ལྐོག་ལྟ་བྱས་ཡོད་པ་དང་། ཟླ་འདིའི་ཚེས་ ༣ ཉིན་དྲ་ཐོག་གསང་ཉུལ་བས་ཨ་རིའི་ཡུལ་མི་དཔྱ་ཁྲལ་རྒྱག་མཁན་ ༡༠༠༠༠༠ ལྷག་གི་གསང་བ་སྔོག་འདོན་དང་། ཚེས་ ༤ ཉིན་སྲི་ཞུ་ལས་བྱེད་བ་ས་ཡ་ ༤ ལྷག་གི་དྲ་ཚིགས་ལ་ལྐོག་འཛུལ་བྱས་ཚུལ་བརྗོད་ཡོད་སྟབས། ཨ་རིའི་གྲོས་ཚོགས་འཐུས་མི་དང་རྒྱལ་ཁབ་བདེ་འཇགས་ལས་ཁུངས་ཀྱིས་དེ་ནི་རྒྱ་ནག་གཞུང་གིས་བྱས་པ་ཡིན་སྐོར་སྐྱོན་འཛུགས་བྱས་ཡོད་ཀྱང་། རྒྱ་ནག་གཞུང་གིས་ངོས་ལེན་གང་ཡང་བྱས་མེད།
ཁ་སང་ཨ་རིའི་ཕོ་བྲང་དཀར་པོའི་མགྲིན་ཚབ་པ་ཇོ་ཤེ་ཨར་ནེ་སི་ཌི་ (Josh Earnest) ཡིས། ད་ལྟ་གསང་བའི་ལས་ཁུངས་ཀྱིས་རྒྱལ་ཁབ་ཀྱི་དྲ་ཚིགས་ལ་ལྐོག་འཛུལ་བྱེད་མཁན་སུ་ཡིན་མིན་རྩད་ཞིབ་བྱེད་བཞིན་ཡོད་སྟབས། ང་ཚོས་ཤེས་རྟོགས་ཐུབ་རྗེས་གསལ་བསྒྲགས་བྱ་རྒྱུ་ཡིན། ད་ཐེངས་ངས་གྲོས་ཚོགས་འཐུས་མི་ཚོས་ནག་ཁུང་ནས་འདོན་ཏེ། ལྐོག་འཛུལ་བ་ཚོས་ཨ་རིའི་དྲ་ཚིགས་ལ་སིམ་འཛུལ་བྱེད་མི་ཐུབ་པའི་འགོག་སྲུང་མ་ལག་གསར་བཟོའི་གྲོས་ཆོད་ཅིག་འཇོག་རྒྱུར་ཡིད་ཆེས་བྱེད་བཞིན་ཡོད་ཅེས་དང་། ཨ་རིའི་དྲ་ཐོག་བདེ་འཇགས་ཁེ་ལས་ (Xceedium) ཀྱི་འགན་འཛིན་ཀིན་ཨ་མོན་ (Ken Ammon) གྱིས། ང་ཚོའི་དྲ་ཐོག་ལ་ལྐོག་འཛུལ་བྱས་པ་དེ་ནི་རྒྱལ་ཁབ་ལ་ཁ་གཏད་བཅག་པ་ཞིག་ཡིན་ སྟབས། གཞུང་གིས་བརྟག་དཔྱད་བྱས་ནས་འཁོན་ལན་སློག་དགོས་ཞེས་བརྗོད་འདུག
གསར་འགོད་པ། དོན་གྲུབ།
