དེ་རིང་རྒྱ་གར་གྱི་དཔལ་འབྱོར་གསར་ལམ་ཐོག་ཏུ་གནས་ཚུལ་སྤེལ་བ་ལྟར་ན། དེང་སྐབས་རྒྱ་ནག་གི་ཕྱིར་འདྲེན་ཚོང་ཟོག་ལས་ནང་འདྲེན་ཚོང་ཟོག་གི་ཁེ་སྤོགས་ལྡབ་འགྱུར་གྱིས་མར་ཆགས་སྲིད་པ་དེས། པེ་ཅིན་གཞུང་ལ་རྒྱ་ནག་ནང་གི་དཔལ་འབྱོར་འདུ་འགོད་ཀྱི་འགྲོས་ཤིན་ཏུ་དལ་བའི་དཀའ་རྙོག་ལས་ཀྱང་གཡོ་འགུལ་འཕར་མ་ཞིག་ཐེབས་སྲིད་པར་ཚོད་དཔག་བྱེད་ཀྱི་ཡོད་འདུག
བདུན་ཕྲག་སྔོན་མའི་གཟའ་ཟླ་བའི་ཉིན། རྒྱ་ནག་དབུས་རྒྱལ་ཕྱིའི་གནས་བབ་རྟོག་ཞིབ་དང་འཆར་འགོད་ལྷན་ཁང་ (GAC)ཞེས་པས་དཔྱད་འབྲས་ཤིག་ཁྱབ་བསྒྲགས་བྱས་པ་ལྟར་ན། དེང་སྐབས་རྒྱ་ནག་ནང་གི་ཚོང་ཟོག་ཕྱི་འདྲེན་ཁེ་ལས་པ་ཚོས། ཕྱིའི་རྒྱལ་ཁབ་ཁག་ནང་དངོས་ཟོག་མཁོ་འདོན་དང་དངུལ་ལོའི་འཛའ་ཐང་། ངལ་རྩོལ་བཟོ་བའི་གྲངས་འབོར། དེ་བཞིན། རྒྱ་ནག་ནི་འཛམ་གླིང་སྟེང་གི་དཔལ་འབྱོར་འཕེལ་རྒྱས་ཅན་གྱི་རྒྱལ་ཁབ་ཨང་གཉིས་ཡིན་པའི་གནོན་ཤུགས་སོགས་ལ་གདོང་ལེན་བྱེད་མུས་ཡིན་པ་དང་། ད་ལོའི་ཕྱི་ཟླ་ ༥ པའི་ནང་རྒྱ་ནག་ནང་གི་ཕྱིར་འདྲེན་ཚོང་ཟོག་གི་ཡོང་འབབ་རྒྱ་ཆ་ ༢.༥ དང་། ནང་འདྲེན་ཚོང་ཟོག་གི་ཁེ་སྤོགས་རྒྱ་ཆ་ ༡༧.༦ མར་ཆག་པ་དེས། ཕྱི་ཟླ་ ༥ ནང་རྒྱ་ནག་གི་ཉོ་འཚོང་ལས་རིགས་ཐད་ལ། ཨ་སྒོར་ཁྲག་ཁྲིག་ ༥༩.༤༩ ལྷག་གི་འཕར་ཆག་བྱུང་ཡོད་སྐོར་བརྗོད་འདུག
ཁ་སང་རྒྱ་གར་གྱི་དཔལ་འབྱོར་གསར་ཁང་གིས། རྒྱལ་སྤྱིའི་དཔལ་འབྱོར་དབྱེ་ཞིབ་པ་ཚོའི་བསམ་ཚུལ་བསྡུས་པ་ལྟར་ན། ད་ལོའི་ཕྱི་ཟླ་ ༤ པའི་ནང་རྒྱ་ནག་གི་ཕྱིར་གཏོང་ཚོང་ཟོག་རྒྱ་ཆ་ ༦.༤ དང་ནང་འདྲེན་ཚོང་ཟོག་བརྒྱ་ཆ་ ༡༦.༢ ཡིན་པ་དང་། ཕྱི་ཟླ་ ༥ ནང་ཕྱི་རགཏོང་དངོས་ཟོག་རྒྱ་ཆ་ ༥.༠ དང་ནང་འདྲེན་དངོས་ཟོག་བརྒྱ་ཆ་ ༡༠.༧ ལྷག་མར་ཆག་པར་ཚོད་དཔག་བྱེད་ཀྱི་ཡོད་འདུག
ཡང་སི་ཁྲོན་ཞིང་ཆེན་དུ་རྟེན་གཞི་བྱས་པའི་རྒྱ་ནག་གི་ཁེ་ལས་བདེ་འཇགས་ལྷན་ཁང་གི་ཆེད་མཁས་པ་ལུ་ཡ་ཞིན་ (Liu Ya Xin) ཟེར་བ་ཞིག་གིས “རྒྱ་ནག་ནང་གི་ཕྱི་འདྲེན་ཚོང་ཟོག་ཐད་ནས་ཡར་རྒྱས་ཕྲན་བུ་ཕྱིན་པའི་གནས་བབ་དེ་ནི། རྒྱ་ནག་ནང་གི་ཕྱིར་གཏོང་ཁེ་ལས་ཡར་རྒྱས་སུ་སོང་བའི་རྟགས་མཚན་གང་ཡང་མ་ཡིན་ཞིང་། རྒྱ་ནག་གི་དངུལ་ལོའི་འཛའ་ཐང་གི་རྐྱེན་པས། རྒྱལ་ནང་གི་ཚོང་གཉེར་ཁང་ཡོད་ཚད་ད་དུང་རྒྱལ་སྤྱིའི་ཁྲོམ་ར་འཕར་ཆག་གི་སྟོབས་ཤུགས་ཀྱི་རྗེས་སུ་ལུས་ཡོད་པ་རེད། སྤྱིའི་ཆ་ནས་གོང་སྨོས་རྒྱ་ནག་དབུས་རྒྱལ་ཕྱིའི་གནས་བབ་རྟོག་ཞིབ་དང་འཆར་འགོད་ལྷན་ཁང་གིས་དཔྱད་འབྲས་ཕྱིར་བསྒྲགས་བྱས་པའི་ནང་། རྒྱ་ནག་གི་དཔལ་འབྱོར་གྱིས་ད་དུང་རྟེན་གཞི་ཞིག་འཚོལ་བཞིན་ཡོད་ཚུལ་བསྟན་འདུག་པ་ལྟར། ང་ཚོས་ཕྱིས་འབྱུང་གི་ཟླ་ ༤ ནས་ ༥ བར། རྒྱ་ནག་གཞུང་གིས་རྒྱལ་ནང་གི་དཔལ་འབྱོར་བརྟན་འཇགས་སྲིད་ཇུས་རྒྱུན་འཁྱོངས་བྱེད་པ་དང་འབྲེལ། རྒྱ་ནག་གི་ཉོ་འཚོང་ཁེ་ལས་སྔར་བཞིན་ནུས་མེད་སྒྱིད་སྙོམ་ཅན་དུ་འགྱུར་སྲིད་པར་ཚོད་དཔག་བྱེད་ཀྱི་ཡོད” ཟེར།
ཉེ་བའི་ཟླ་བ་འདི་དག་གི་རིང་ལ། རྒྱ་སྒོར་གྱི་འཛའ་ཐང་ཨ་སྒོར་གྱི་འཛའ་ཐང་ལས་ལྡབ་འགྱུར་གྱིས་བརྒལ་ཏེ། རྒྱ་ནག་གི་ཉོ་འཚོང་འདུ་འགོད་ཀྱི་རྨང་གཞི་འཕེལ་རྒྱས་སུ་འགྲོ་བཞིན་ཡོད་ནའང་། སྲིད་བློན་ལེ་ཁི་ཆེང་གིས་རྒྱ་སྒོར་གྱི་འཛའ་ཆག་སྔོན་འགོག་བྱས་ཡོད་པ་རེད།
ཧ་ལམ་ ༢༠༡༤ ལོའི་ལོ་ཕྱེད་རིང་། རྒྱ་ནག་གཞུང་གི་དཔལ་འབྱོར་འཕེལ་རྒྱས་ཀྱི་དམིགས་ཚད་བརྒྱ་ཆ་ ༧.༥ ཟིན་པ་ལས། རྒྱ་ནག་གི་ཉོ་འཚོང་དཔལ་འབྱོར་བརྒྱ་ཆ་ ༣.༤ ཙམ་ཡར་རྒྱས་སུ་ཕྱིན་ཡོད་འདུག་ལ། དེར་བརྟེན། ཕྱི་ལོ་ ༢༠༡༥ ལོར་རྒྱ་ནག་གཞུང་གིས་རང་རྒྱལ་གྱི་དཔལ་འབྱོར་འཕེལ་རྒྱས་ཀྱི་དམིགས་ཚད་དམའ་རུ་བཏང་སྟེ། ཚོང་ཟོག་ཕྱིར་གཏོང་ནང་འདྲེན་གྱི་ཁེ་འབབ་བརྒྱ་ཆ་ ༦.༠ ཟིན་པར་ཚོད་དཔག་བྱེད་ཀྱི་ཡོད་འདུག
འདི་ཟླའི་རེས་གཟའ་མིག་དམར་ཉིན། རྒྱ་ནག་གཞུང་གིས་བཟོ་ལས་དང་མ་འཛུགས། སིལ་ཚོང་ཁེ་ལས་སོགས་ཀྱི་ཐོན་འབབ་དཔྱད་ཞིབ་གནད་བསྡུས་ཤིག་ཕྱི་བསྒྲགས་བྱས་པའི་ཐད་ལ། རྒྱལ་སྤྱིའི་དཔལ་འབྱོར་དབྱེ་ཞིབ་པ་ཚོས། སྤྱིར་རྒྱ་ནག་གི་དཔལ་འབྱོར་འཕེལ་ཚད་བརྒྱ་ཆ་ ༧.༠ ལས་བཞི་ཆའི་གཉིས་ལྷག་གིས་འཕེལ་རྒྱས་སུ་འགྲོ་སྲིད་ནའང་། འཛའ་ཆག་གི་དཀའ་ཉེན་ལ་བརྟེན་ནས། རྒྱ་ནག་གི་དཔའ་འབྱོར་ཡར་རྒྱས་ཀྱི་དམིགས་ཚད་བརྒྱ་ཆ་ ༧.༠ ཟིན་རྒྱུ་མིན་སྐོར་བརྗོད་འདུག
་་་་་་་་་་ ཕྱིའི་རྒྱལ་ཁབ་ཁག་ནང་དངོས་ཟོག་མཁོ་འདོན་དང་དངུལ་ལོའི་འཛའ་ཐང་། ་་་་་་་་་
འདི།
ཕྱིའི་རྒྱལ་ཁབ་ཁག་ནང་དངོས་ཟོག་མཁོ་འདོན་དང་དངུལ་ལོའི་༼ལོར་༽འཛའ་ཐང་།