དེ་རིང་བྷེ་བྷེ་སི་བརྒྱུད་ལམ་ནས་གནས་ཚུལ་བསྒྲགས་པ་ལྟར་ན། ཕྱི་ཚེ་ ༦ ཉིན་ནས་བཟུང་། འཇར་མན་རྒྱལ་ཁབ་ནང་འཚོགས་བཞིན་པའི་འཛམ་གླེང་གི་སྟོབས་ཆེན་རྒྱལ་ཁབ་བདུན་གྱི་ཆེས་མཐོའི་དཔོན་རིགས་ལྷན་ཚོགས་ (G7) ཀྱི་གྲོས་མོལ་ཚོགས་ཆེན་སྟེང་། དེང་གི་སའི་གོ་ལའི་དྲོད་ཚད་ཀྱི་འཇིག་ཉེན་དང་ཁ་ཆེ་འཇིགས་སྐུལ་རིང་ལུགས་ཀྱི་རྩོད་རྙོག་སོགས་ཞི་འཇགས་སུ་གཏོང་ཐབས་སྐོར་ལ་གྲོས་གླེང་བྱེད་ཀྱིན་ཡོད་འདུག
དེ་ཡང་ཧྥ་རན་སི་དང་འཇའ་མན། ཨ་རི། ཨིན་ཇི། ཁེ་ན་ཌ། ཨེ་ཊ་ལེ། ཉི་ཧོང་བཅས་ཀྱི་ཆེས་མཐོའི་དཔོན་རིགས་ལྷན་ཚོགས་ཤིག་ཡིན་ཞིང་། ཚོགས་ཆེན་སྟེང་དུ། འཇར་མན་དམངས་གཙོ་སྤྱི་མཐུན་རྒྱལ་ཁབ་གྱི་སྲིད་བློན་ཨན་གྷི་ལ་མིར་ཁིལ་ལགས་ཀྱིས་གསུངས་རྒྱུར། ཆེས་མཐོའི་དཔོན་རིགས་ལྷན་ཚོགས་ཀྱི་ངོས་ནས་སའི་གོ་ལའི་དྲོད་ཚད་མཐོ་རུ་འཕར་བཞིན་པའི་འཇིག་ཉེན་དང་། དེང་གི་གནམ་གཤིས་འགྱུར་ལྡོག་ལ་བརྟེན་ནས། དབུལ་ཕོངས་སུ་འགྱུར་བཞིན་པའི་ཤར་ནུབ་ཀྱི་རྒྱལ་ཁབ་ཁག་གི་དཀའ་སྡུག་ལ་རོགས་སྐྱོར་དང་ཐེབ་རྩ་གསར་འཛུགས་དགོས་པའི་རེ་སྐུལ་ཞུས་ཡོད་པ་མ་ཟད། ད་དུང་ཨི་རག་དང་ནེ་རྗེ་རེ་ཡ། ཊོ་ནེ་སེ་ཡ་གཙོས། ཁ་ཆེ་རྒྱལ་ཁབ་ཁག་ནང་གི་ཆོས་ལུགས་ལྟ་གྲུབ་རྩོད་གླེང་གི་འཇིགས་སྐུལ་ཐད་ལའང་བགྲོ་གླེང་གྲོས་མོལ་བྱེད་ཀྱི་ཡོད་འདུག
ཆེས་མཐོའི་དཔོན་རིགས་ལྷན་ཚོགས་ཀྱི་ཚོགས་ཆེན་དེ་འཇར་མན་ཤར་བྱང་གི་རི་བོ་བྷ་བ་རེ་ཡན་ཨལ་ཕི་སིའི་ (Bavarian Alps) འགྲམ་རྒྱུད་དུ་རྟེན་གཞི་བྱས་པའི་འཇར་མན་གྲོང་སྡེ་སྤྱི་ཁབ་ལྷན་ཁང་ནང་སྐོང་འཚོགས་བྱས་ཡོད་ཅིང་། ཚོགས་ཆེན་སྟེང་དུ། ཨ་རིའི་སྲིད་འཛིན་ཨོ་བྷ་མ་དང་ཨིན་ཇིའི་སྲིན་བློན་ཁེ་མི་རོན། ཉི་ཧོང་གི་སྲིད་བློན་ཧྲན་ཙོ་ཨ་བྷུ། ཧྥ་རན་སིའི་སྲིད་འཛིན་ཧོ་ལན་ཌ། ཁེ་ན་ཌའི་སྲིད་བློན་ཧར་ཕིར། དེ་བཞིན། ཨེ་ཊ་ལེའི་སྲིད་བློན་རན་ཙེ་སོགས་མཉམ་ཞུགས་བྱས་ཡོད་པ་དང་། རེས་གཟའ་ཟླ་བའི་ཉིན་གྱི་གྲོས་གཞི་གཙོ་བོ། དེང་གི་སའི་གོ་ལའི་དྲོད་ཚད་དང་རང་བྱུང་གི་ནུས་ཤུགས་ཐོན་སྐྱེད་སྐོར་ཡིན་ཚུལ་བརྗོད་ཅིང་། དེ་ལ་འཇར་མན་གྱི་སྲིད་བློན་ཨན་གྷི་ལ་མིར་ཁིལ་གྱིས། ཆེས་མཐོའི་དཔོན་རིགས་ལྷན་ཚོགས་ཀྱི་ངོས་ནས། དེང་གི་བཟོ་ལས་ཐོན་སྐྱེད་ཀྱི་རྐྱེན་པས། སའི་གོ་ལའི་དྲོད་ཚད་ 2C ལ་འཕར་ཡོད་ལུགས་འགྲེལ་བརྗོད་དང་དེ་ངོས་ལེན་བྱེད་དགོས་སྐོར་བསྙད་ཅིང་། ཡང་ཁོང་མོས་ཕྱི་ཟླ་ ༡༢ ནང་ཧྥ་རན་སིའི་རྒྱལ་སར། ‘ཨ་རིའི་སའི་གོ་ལའི་དྲོད་ཚད་ཐད་ཀྱི་ཚོགས་ཆེན’མ་འཚོགས་སྔོན་ལ། དེར་བཞུགས་ལྷན་ཚོགས་ཀྱི་སྐུ་མགྲོན་རྣམ་པས། སའི་གོ་ལའི་དྲོད་ཚད་དམའ་རུ་གཏོང་ཐབས་སུ་འབོད་བརྩོན་བྱེད་དགོས་པའི་རེ་སྐུལ་ཡང་ཞུས་ཡོད་འདུག དེར་མ་ཟད། ཨི་རག་གི་སྲིད་བློན་ཨལ་ཨ་བྷ་ཌེ་དང་། ནེ་རྗེ་རེ་ཡའི་སྲིད་འཛིན་བྷོ་ཧ་རེ། ཊོ་ནེ་སེ་ཡའི་སྲིད་འཛིན་ཨེ་སི་བྷ་སེ་གསུམ་ཡང་། ད་རེབ་ཀྱི་འཛམ་གླིང་གི་སྟོབས་ཆེན་རྒྱལ་ཁབ་བདུན་གྱི་ཆེས་མཐོའི་དཔོན་རིགས་ལྷན་ཚོགས་ཀྱི་ཚོགས་ཆེན་སྟེང་མཉམ་ཞུགས་ཀྱིས། དེང་གི་བྷོ་ཁོ་ཧ་རམ་ (Boko Haram) དང་ཨཡེ་སེ་ (IS) ལྟ་བུའི་ཁ་ཆེ་ཆོས་ལུགས་ཤོག་ཁག་གི་རྩོད་གླེང་དང་འཇིགས་སྐུལ་ཐད་ལའང་ཞི་གྲོས་བྱ་རྩིས་ཡོད་ལུགས་བརྗོད་འདུག
ཁ་སང་རེས་གཟའ་ཉི་མའི་ཉིན། ཨིན་ཇིའི་སྲིད་བློན་ཁེ་མི་རོན་གྱིས། ཉེ་ལམ་ཨིན་ཇི་གཞུང་གིས་ཨི་རག་རྒྱལ་ནང་དུ་རམ་འདེགས་དྲག་ཆས་དམག་ ༡༢༠ ཆེད་གཏོང་གིས། ཡུལ་དེའི་ཨཡེ་སེ་ཁ་ཆེ་ཆོས་ལུགས་ཤོག་ཁག་ལ་རྒོལ་འཛིང་བྱས་པ་དེ། ཆེས་མཐོའི་དཔོན་རིགས་ལྷན་ཚོགས་ཀྱི་ངོས་ནས། དེ་ནི་ཚབས་ཆེ་བའི་འཇིགས་སྐུལ་དང་དྲག་པོའི་དཔུང་འཇུག་བྱས་པ་ཡིན་ཚུལ་གླེང་སློང་བྱེད་སྲིད་པར་འགྲེལ་བརྗོད་བྱས་ཡོད་པ་དང་། ཨཡེ་སེ་ཞེས་པའི་ཁ་ཆེ་ཆོས་ལུགས་ཤོག་ཁག་དེས། ཨི་རག་ནང་གི་ཨ་རིའི་རམ་འདེགས་མཁའ་དམག་དམིགས་འབེན་དུ་བཟུང་སྟེ། ཊིར་ཀེ་དང་ཨི་རག་གི་མཐའ་ཁུལ་ཁག་ལ་འཇིགས་སྐུལ་དང་དམ་དྲགས་བྱེད་མུས་ཡིན་པ་མ་ཟད། ནེ་རྗེ་རེ་ཡ་རྒྱལ་ནང་དུ་ཡང་། ཡུལ་དེ་གའི་བྷོ་ཁོ་ཧ་རམ་ཞེས་པའི་འཇིགས་སྐུལ་ཤོག་ཁག་ལ་རྒོལ་འཛིང་གྱིས། ཁ་ཆེ་ཆོས་ལུགས་ཀྱི་ཟིང་ཆ་ལངས་ཡོད་པ་རེད། བྷོ་ཁོ་ཧ་རམ་ཞེས་པའི་ཤོག་ཁག་འདི་ནི་ཕྱི་ལོ་ ༢༠༠༩ ལོ་ནས་ཁ་ཆེ་ཆོས་ལུགས་ཤོག་ཁག་ཅིག་ཏུ་གསར་འཛུགས་བྱེད་ཆེད། ཊིར་ཀེའི་རྒྱལ་ནང་དུ་ཟིང་ཆ་སློང་གི་ཡོད་པ་ཞིག་ཡིན་སྐོར་བརྗོད་འདུག
ཡང་ཕྱི་ཚེ་ ༧ ཉིན་གྱི་རྒྱ་ནག་དབུས་བརྙན་འཕྲིན་ (CCTV) ལས་ཁུངས་ཀྱི་གསར་གནས་སྤེལ་བ་ལྟར་ན། གོང་སྨོས་ཆེས་མཐོའི་དཔོན་རིགས་ལྷན་ཚོགས་ཀྱི་ཚོགས་ཆེན་འཚོགས་སའི་ཁྲོམ་སྲང་ཁག་ཏུ། མི་མང་སྟོང་ཕྲག་མང་པོ་འདུ་འཛོམས་ཀྱིས། ཆེས་མཐོའི་དཔོན་རིགས་ཚོགས་ཆེན་ལ་ངོ་རྒོལ་དང་སྐད་འབོད་བྱས་ཏེ། ཁོང་ཚོས་སའི་གོ་ལའི་དྲོད་ཚད་དམའ་རུ་གཏོང་བ་དང་དབུལ་སྐྱོབ་ཐེབ་རྩ་གསར་དུ་འཛུགས་རྒྱུ་སོགས་ཀྱི་སྟོང་གཏམ་ལ་སྐྱོན་བརྗོད་དང་། དེ་བཞིན། ཨ་རི་དང་ཡུ་རོབ་མཐུན་ཚོགས་ཀྱི་དཔལ་འབྱོར་ཁྲོམ་ར་མཉམ་ལས་ཀྱིས། ཚོང་ཟོག་ཐོན་སྐྱེད་བྱས་པ་དེས། ཁོར་ཡུག་དང་སྤྱི་ཚོགས་ཁེ་དབང་ཙམ་དུ་མ་ཟད། ད་དུང་འཛད་སྤྱོད་པའི་བདེ་ཐང་ལའང་གནོད་འཚེ་གཏོང་གི་ཡོད་ཚུལ་བཤད་ཅིང་། སྐབས་དེར་ངོ་རྒོལ་ལས་འགུལ་བ་དང་སྤྱི་བདེ་ཉེན་རྟོག་པའི་བར་ལ་འཁྲུག་འཛིང་ཤོར་ཏེ། ལས་འགུལ་བ་མང་པོ་འཇུ་བཟུང་དང་བཀག་བསྐྱིལ་བྱས་ཡོད་པ་མ་ཟད། འཇར་མན་གྱི་སྤྱི་བདེ་མི་སྣ་སྟོང་ཕྲག་ ༡༧ ལྷག་གིས་ཆེས་མཐོའི་དཔོན་རིགས་ལྷན་ཚོགས་འཚོགས་སའི་མགྲོན་ཁང་སྐོར་སྲུང་བྱས་ཡོད་འདུག་ལ། ཨོ་སི་ཁྲུ་རེ་ཡན་གྱི་ཉེན་རྟོག་མི་སྣ་ ༢༠༠༠ ལྷག་གིས་འཇར་མན་དང་ཨོ་སི་ཁྲུ་རེ་ཡན་གྱི་མཐའ་མཚམས་སྲུང་སྟེ། ཆེས་མཐོའི་དཔོན་རིགས་ལྷན་ཚོགས་ཀྱི་བདེ་འཇགས་ལ་འགན་སྲུང་བྱས་ཡོད་སྐོར་བརྗོད་འདུག
ཛམ་གླིང་གི་བཟོ་ལས་ཡར་ཐོན་ཅན་གྱི་འབྱོར་ལྡན་རྒྱལ་ཁབ་བདུན་གྱི་ཆེས་མཐོའི་དབུ་ཁྲིད་རྣམས་པ་ ཇར་མཱི་ནཱིར་ལྷན་འཛོམས་གནང་སྟེ་ རྒྱལ་སྤྱིའི་གནད་དོན་རྒྱ་ཆེའི་ཐད་གྲོས་མོལ་གནང་གི་ཡོད་ཅིང་ གཟའ་ཉི་མའི་ཉིན་དབུ་འཛུགས་གནང་བའི་ཉིན་གཉིས་ཀྱི་ལྷན་ཚོགས་དེའི་ཐོག་ ཉི་ཧོང་གི་སྲིད་བློན་སྐུ་ཞབས་ཤིན་ཛཱོ་ཨཱ་བྷེ་ཡིས་ གཙོ་བོ་རྒྱ་ནག་དང་ ར་ཤི་ཡེའི་སྐོར་གླེང་སློང་གནང་སྟེ་ ཡུལ་གྲུ་དེ་གཉིས་ཀྱིས་དྲག་ཤུགས་ལ་བརྟེན་ནས་ ལྷོ་དང་ཤར་རྒྱ་ནག་རྒྱ་མཚོ་དང་ ཡུ་ཀེ་རན་གྱི་ད་ལྟའི་གནས་སྟངས་ལ་འགྱུར་བ་གཏོང་རྩིས་བྱེད་ཀྱི་ཡོད་པ་དེ་དག་ལ་ ཚོགས་ཞུགས་ཚང་མས་མཐའ་གཅིག་ཏུ་ངོ་རྒོལ་བྱེད་དགོས་པའི་ཞུ་བསྐུལ་ནན་པོ་གནང་རྒྱུའི་འཆར་གཞི་ཡོད་འདུག