བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༦༥ སྟེང་གི་རྩོམ་སྒྲིག་པའི་གཏམ།
ཕྱི་ཟླ་ ༦ ཚེས་ ༨ ཉིན་ནི་དྷ་ས་ནས་ལྷ་སར་གོམ་བགྲོད་གནང་མཁན་གླིང་ཚ་ཚེ་བརྟན་རྡོ་རྗེ་བོར་བརླག་ཕྱིན་ཏེ་ལོ་ངོ་གཉིས་འཁོར་བའི་ཉིན་མོ་རེད། བོད་པའི་གསར་ལམ་ཁག་ཏུ་ཁོའི་སྐོར་གྱི་གནས་ཚུལ་རྙིང་པ་རྣམས་བསྐྱར་དུ་སྒྲོག་སྤེལ་བྱེད་ཀྱིན་འདུག་ལ། སྤྱི་ཚོགས་བརྒྱུད་ལམ་ཁག་ཏུའང་ཁོའི་སྐོར་ལ་རྩོམ་ཡིག་དང་སྙན་ངག་གསར་པ་འབྲི་བ་དང་། པར་དང་བརྙན་སོགས་ཕན་ཚུན་ལ་བརྒྱུད་བསྐུར་བྱས་ཏེ། གླིང་ཚ་ཚེ་བརྟན་རྡོ་རྗེ་ལ་བསྐྱར་དུ་གདེང་འཇོག་དང་དྲན་གསོ་བྱེད་ཀྱིན་འདུག
དྷ་རམ་ས་ལའི་གཞུང་འབྲེལ་མིན་པའི་ཚོགས་པ་ཁག་ལ་གྲགས་འགུལ་གང་ཡང་མི་འདུག་ལ། བོད་མིའི་སྒྲིག་འཛུགས་དེ་བས་ཀྱང་ཧ་ཅང་ཁ་ཁུ་སིམ་པོ་རེད། དྷ་སའི་རི་སྒང་ན་སྐད་ངན་ཤོར་གྱིན་ཡོད་པ་ཨ་མ་སྡོམ་པོ་སྐྱིད་དང་གླིང་ཚ་ལྷ་མོ་སྐྱིད་མ་སྨད་གཉིས་རེད་ལ། ཨི་ཛ་རལ་ལུང་པའི་ནང་གི་གླིང་ཚའི་བཟའ་ཟླ་བུ་ཕྲུག་ཚོས་ཀྱང་བོད་པ་ཞིག་གང་ནས་མཐོང་ན་དེ་རུ་རྒྱུག་ནས་ངའི་ཨ་ཕ་གང་དུ་ཡོད། ང་ལ་ཨ་ཕ་དགོས་ཞེས་ཚ་འདྲི་གཏོང་གི་ཡོད་རབས་ཐོས།
བོད་པའི་ཉེ་རབས་འཐབ་རྩོད་ལོ་རྒྱུས་ཁྲོད་དུ། གླིང་ཚ་ལྟ་བུའི་མི་རེ་ཟུང་ལས་བྱུང་མེད་ལ། དེ་དག་ཁྲོད་ནས་ཀྱང་གླིང་ཚ་ནི་ཧ་ཅང་ཁྱད་དུ་འཕགས་པའི་འཐབ་རྩོད་པ་དེ་ཡིན། དྷ་རམ་ས་ལ་ནས་རྒྱ་གར་དང་བལ་ཡུལ་ས་མཚམས་བར་རྐང་བགྲོད་བྱས་ཏེ་བལ་ཡུལ་བཙོན་དུ་ཚུད་པ་དང་། དྷ་རམ་ས་ལ་ནས་རྒྱ་གར་དང་བོད་ཀྱི་ས་མཚམས་བར་རྐང་བགྲོད་བྱས་རྗེས་ད་བར་གར་སོང་ཆ་མེད་ཆགས་ཡོད། གླིང་ཚའི་སྐོར་གྱི་གསར་འགྱུར་དེ་དག་བམ་ཀློག་ཙམ་མིན་པར། ཉི་མ་རེ་རེར་དཀའ་སྡུག་ཅི་མྱོང་རང་ཐོག་ཏུ་བླངས་ཏེ་བསམ་གཞིག་གནོང་དང་ད་གཟོད་གཞི་ནས་གླིང་ཚའི་ཁོག་པའི་ལ་རྒྱ་དང་སྙིང་གྱི་རུས་པའི་ཟུར་རེ་མཐོང་ཐུབ།
ཁོ་ད་ལྟ་ཤི་གསོན་གང་ཡིན་དང་། གསོན་ངོགས་ན་ཡོད་ན་དཀའ་སྡུག་ག་འདྲ་མྱོང་གི་ཡོད་མེད་མི་གླེང་། སྔོན་ཆད་གོམ་བགྲོད་སྔ་ཕྱི་ཐེངས་གཉིས་བྱས་པ་སྡོམ་ན། རྒྱ་གར་ཚ་བའི་ལུང་པ་ནས་ལམ་ཐག་སྤྱི་ལེ་བཞི་སྟོང་ལྷག་བརྒལ་བ་དང་། བལ་ཡུལ་བཙོན་དུ་བསྡད་དེ་ལུས་སེམས་གཉིས་ཀས་དཀའ་སྡུག་ཅི་ཙམ་མྱངས་པ་དེ་དག་མི་སྤྱིར་བཏང་བ་ཞིག་གི་ནུས་པའི་ལྕོགས་ཐུབ་མེད་ལ། བཙན་བྱོལ་སྤྱི་ཚོགས་ནང་གི་ཆབ་སྲིད་པ་མགོ་བདེ་དྲན་འཁྲུལ་དག་གི་སེམས་ནང་དྲན་པའི་ནུས་སྟོབས་དང་ཤོང་པའི་རྒྱ་ཁྱོན་ཡང་མེད་དོ།
གླིང་ཚའི་ཨ་མ་སྡོམ་པོ་སྐྱིད་ཀྱིས་གཞུང་ཚོགས་སྒེར་གསུམ་ལ་འབོད་སྐུལ་དོན་ཚན་གསུམ་ཞུས་ཡོད་པ་དག་ནི། ཁོང་ཚང་ལ་གླིང་ཚ་ཚེ་བརྟན་རྡོ་རྗེ་འཚོལ་རོགས་བྱེད་རྒྱུ་དང་། བོད་པར་ལས་ཀྱིས་འབྲེལ་བའི་གླིང་ཚའི་བཟའ་ཟླ་དང་བོད་པར་ཁྲག་རུས་འདྲེས་པའི་གླིང་ཚའི་བུ་ཕྲུག་ཚོར་རོགས་རམ་རེ་གནང་རྒྱུ། དེ་བཞིན་གླིང་ཚའི་ཞི་བའི་འཐབ་རྩོད་ཀྱི་རྗེས་འབྲེལ་ལས་འགུལ་རེ་སྤེལ་རྒྱུ་དང་ཁོའི་ཤུལ་བཞག་བརྩམས་ཆོས་དག་ལ་བདག་པོ་རྒྱག་རྒྱུ་སོགས་རེད། འདི་ནི་ཨ་མ་སྡོམ་པོ་སྐྱིད་ཀྱིས་མིག་ཆུར་བསྡོངས་པའི་རེ་འབོད་རེད་ལ། གླིང་ཚ་ཚེ་བརྟན་རྡོ་རྗེ་ཤི་ཚར་ན་རྣམ་ཤེས་འཁོར་ཡུལ་དང་། གསོན་ཡོད་ན་རེ་འདུན་འཆང་ཡུལ་ཡང་འདི་དག་ཡིན་ངེས།།
