བོད་ཀྱི་ཟློས་གར་ཚོགས་པའི་དབྱར་སྐྱིད་གླུ་གར་འགྲན་ཚོགས།

དེ་རིང་བོད་ཀྱི་ཟློས་གར་ཚོགས་པ་དབུ་བརྙེས་ནས་ལོ་ངོ་ ༥༦ འཁོར་བའི་དབྱར་སྐྱིད་དུས་སྟོན་ཐོག་གླུ་གར་འགྲན་སྡུར་རུ་ཁག་གཉིས་ཀ་ཨང་དང་པོ་ཆགས་སོང་།

དེ་རིང་ཉིན་རྒྱབ་ཆུ་ཚོད་ ༢ པ་ཐོག དྷ་ས་བོད་ཀྱི་ཟློས་གར་ཚོགས་ཁང་དུ། ༸གོང་ས་མཆོག་དགུང་གྲངས་ ༨༠ ཕེབས་པའི་གྱ་སྟོན་གྱི་རྟེན་འབྲེལ་དང་། ཟློས་གར་ཚོགས་པ་དབུ་བརྙེས་ནས་ལོ་ངོ་ ༥༦ འཁོར་བའི་གླུ་གར་འགྲན་སྡུར་གྱི་དབྱར་སྐྱིད་དུས་སྟོན་ཚོགས་སོང་བ་དང་། སྐབས་དེར་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་མཆོག་གི་དབུས་སྲིད་སྐྱོང་བློ་བཟང་སེང་གེ་མཆོག་དང་བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཙོ་གཞོན་གྱིས་དབུས་སྤྱི་འཐུས་རྣམ་པ་དང་། དེ་བཞིན་ལྷན་ཁང་ཁག་གི་དྲུང་ཆེ་ཆུང་རྣམ་པ། གཞན་ཡང་། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་འགན་འཛིན་དང་སྐུ་ཚབ། དྷ་ས་ཁུལ་གྱི་སེར་སྐྱ་ལྟད་མོ་བ་བཅས་མི་གྲངས་ ༤༠༠ ཡས་མས་འཛོམས་འདུག

ཐེངས་འདིའི་གླུ་གར་འགྲན་སྡུར་གྱི་དཔྱད་འདེམས་པ་བདེ་སྲུང་ལས་ཁུངས་ཀྱི་དྲུང་འཕར་ཀུན་དགའ་བཀྲ་ཤིས་ལགས་དང་བཀྲས་མཐོང་སྐལ་བཟང་ཆོས་སྐྱིད་ལགས། དྷ་སྟེང་བོད་ཁྱིམ་འབྲིང་རིམ་སློབ་གྲྭའི་འགན་འཛིན་རྒན་བསོད་ནམས་དབང་འདུས་ལགས་བཅས་ཀྱིས། ཟློས་གར་རྔོན་པ་རུ་ཁག་དང་རྒྱ་ལུ་རུ་ཁག་གཉིས་ཀྱི་གླུ་དང་གར་གྱི་འཁྲབ་སྟོན་རིམ་པར་དཔྱད་འདེམས་གནང་བ་བརྒྱུད། རུ་ཁག་གཉིས་ཀའི་མཐའ་མའི་ཕྱོགས་བསྡོམས་ཀྱི་གྲངས་འབོར་ ༢༥༥.༥༠ བཅས་གཅིག་པ་ཆགས་པར་བརྟེན། སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་ནས་འགྲན་སྡུར་གྱི་གྲུབ་འབྲས་གཅིག་མཚུངས་ཆགས་པར་བསྔགས་བརྗོད་དང་སྦྲགས་རུ་ཁག་གཉིས་ལ་ཨང་དང་པོའི་བྱ་དགའ་གནང་སོང་བ་དང་། གཞན་ཡང་། སྐུ་མགྲོན་གཙོ་མཆོག་ནས་ཞབས་ལོ་ ༢༠ འཁོར་བའི་ལས་བྱེད་ཚེ་རིང་གཡུ་སྒྲོན་ལགས་དང་། གཟུ་དཔང་བ་རྣམ་པར་ཐུགས་རྗེ་ཆེ་ཞུའི་གསོལ་རས་ཕྱག་རྟགས་བཅས་གནང་སོང་།

ཟློས་གར་སྤྱི་ཁྱབ་འགན་འཛིན་དཔེ་ཟུར་དབང་འདུས་ཚེ་རིང་ལགས་ནས་དུས་དྲན་ངོ་སྤྲོད་གནང་སྐབས། བོད་ཀྱི་ཐུན་མོང་མ་ཡིན་པའི་རིག་གཞུང་རྒྱུན་འཛིན་ཆེད་༸གོང་ས་མཆོག་གིས་མ་འོངས་སྔོན་གཟིགས་ཀྱིས། ཕྱི་ལོ་ ༡༩༥༩ ཟླ་ ༨ ཚེས་ ༡༡ ཉིན་བོད་ཀྱི་ཟློས་གར་ཚོགས་པ་གསར་དུ་ཕྱག་བཏབ་ཏེ་ད་ལྟའི་བར་ལོ་ངོ་ ༥༦ འཁོར་གྱི་ཡོད་པ་དང་། ལོ་ངོ་དེ་དག་གི་ནང་བོད་ཀྱི་ཟློས་གར་ཚོགས་པའི་ངོས་ནས་བོད་རིགས་གཞོན་སྐྱེས་ ༥༠༠ ལྷག་ལ་བོད་ཀྱི་ཐུན་མོང་མ་ཡིན་པའི་རིག་གཞུང་ཐོག་བསླབ་པ་མཐར་སོན་དུ་བཅུག་ཡོད་པ་དང་། བསླབ་པ་མཐར་སོན་པ་ཚོས་ཀྱང་བོད་པའི་སྤྱི་ཚོགས་ནང་ཞབས་ཞུ་ཞུ་བཞིན་ཡོད་པ་དཔེར་ན། བོད་པའི་སློབ་གྲྭ་ཁག་གི་ཟློས་གར་དགེ་རྒན་ཕལ་ཆེར་བ་བོད་ཀྱི་ཟློས་གར་ཚོགས་པ་ནས་བསླབ་པ་མཐར་སོན་པ་ཤ་སྟག་ཆགས་ཡོད་ལ། དེ་རིང་གི་ཁྱད་དུ་འཕགས་པའི་དུས་བཟང་འདི་ནི་ང་ཚོའི་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོའི་ཐོག བོད་ཀྱི་ཟློས་གར་ཚོགས་པའི་བྲོ་བ་ཚང་མས་སོ་སོའི་རྣམ་དཔྱོད་རྩལ་དུ་བཏོན་པའི་དུས་བཟང་ཞིག་ཆགས་བསྡད་ཡོད་པ་རེད། ཅེས་བརྗོད་སོང་།

ཁོས་མུ་མཐུད་དུ། བཀའ་ཤག་ནས་ཟློས་གར་གྱི་ཚོགས་ཁང་ཉམས་གསོའི་ཆེད་ཧིན་སྒོར་འབུམ་ ༧༥ གནང་བ་དང་། འདི་ལོའི་ཞོ་སྟོན་སྐབས་ཆོས་རིག་ལས་ཁུངས་བརྒྱུད་བཀའ་ཤག་གིས་ལྷ་མོའི་ཚོགས་པ་རེ་རེར་ཧིན་སྒོར་འབུམ་ ༤ རེ་གནང་ཡོད་པ་དང་། དེ་བཞིན་ཨ་རིའི་རོགས་དངུལ་གྱི་ཐོག་ནས་ཀྱང་མཐུན་འགྱུར་གནང་འཆར་ཡོད་པ་བཀའ་དྲིན་ཆེན་པོ་ཆགས་ཡོད་སྐོར་དང་། གཞན་ཡང་། རྒྱ་གར་ཕྱི་སྲིད་ལས་ཁུངས་ནས་ལོ་རེར་ཟློས་གར་ལ་རྒྱུན་གྲོན་དུ་ཧིན་སྒོར་འབུམ་ ༣༥ རེ་གནང་གི་ཡོད་པ་དེས་ཕན་ཐོགས་ཆེན་པོ་ཡོང་གིན་ཡོད་སྐོར་སོགས་བརྗོད་སོང་།

མཇུག་ཏུ་སྲིད་སྐྱོང་བློ་བཟང་སེང་གེ་མཆོག་ནས་དུས་སྟོན་དང་འབྲེལ་བའི་གསུང་བཤད་གནང་དོན། བོད་ནང་རྒྱ་ནག་གཞུང་གི་འཕྲལ་ཕུགས་རྒྱང་གསུམ་གྱི་དམིགས་ཡུལ་དེ་གང་རེད་ཟེར་ན། བོད་ལུང་པ་རྒྱའི་ལུང་པར་བསྒྱུར་རྒྱུ་དང་། བོད་རིགས་རྒྱ་རིགས་ལ་བསྒྱུར་རྒྱུ། བོད་པའི་རིག་གཞུང་འདི་རྒྱའི་རིག་གཞུང་དུ་བསྒྱུར་བར་ཉིན་རེ་བཞིན་སྲིད་བྱུས་གནག་པོ་ཡོད་པའི་ཐོག་ནས་འབད་བརྩོན་བྱེད་མུས་ཡིན་སྟབས། དེ་ལ་གདོང་ལེན་ཆེད་དྷ་རམ་ས་ལར་བོད་ཀྱི་ཟློས་གར་ཚོགས་པ་བཙུགས་ཏེ། བོད་སྲོལ་རྒྱུན་གྱི་ལམ་ལུགས་དང་གཞས་སྣ་འཁྲབ་སྟངས། འཁྲབ་ཆས་བཅས་སྔར་ལྟར་སྲུང་སྐྱོབ་བྱེད་ཐུབ་པ་དེ་རླབས་ཆེན་གྱི་བྱས་རྗེས་ཤིག་ཡིན་པས། བོད་ཀྱི་ཟློས་གར་ཚོགས་པའི་ད་ལྟའི་འཁྲབ་སྟོན་གནང་མཁན་དང་ཟུར་པ་ཚང་མར་ངས་བཀའ་ཤག་གི་ཚབ་ཞུས་ཏེ། སྙིང་ཐག་པ་ནས་འཚམས་འདྲི་དང་བསྔགས་བརྗོད་ཞུ་རྒྱུ་ཡིན། ཞེས་དང་། བོད་ཀྱི་ཆོས་དང་སྐད་ཡིག་རིག་གཞུང་བཅས་ཉིན་རེའི་འཚོ་བའི་ཁྲོད་སྲུང་སྐྱོབ་བྱེད་དགོས་པ་ཤིན་ཏུ་གལ་ཆེན་ཡིན་སྐོར་གསུངས་སོང་།