སངས་རྒྱས་མཚོའི་ཁྱོ་ག་དང་གྲྭ་བ་འགའ་འཇུས་འདུག

སངས་རྒྱས་མཚོས་བོད་དོན་ལ་རང་ལུས་མེར་བསྲེགས་གནང་རྗེས་རྒྱ་གཞུང་གིས་ཁོ་མོའི་ཁྱོ་ག་དང་ཆས་བུ་གཤིས་བཀྲ་ཤིས་ཆོས་འཁོར་གླིང་དགོན་པའི་གྲྭ་བ་མང་པོ་སྔ་རྗེས་སུ་འཛིན་བཟུང་བྱེད་བཞིན་ཡོད་འདུག

ཟླ་སྔོན་མའི་ཚེས་ ༢༧ ཉིན་གྱི་དགོང་མོར། ཀན་སུའུ་ཞིང་ཆེན་ཀན་ལྷོ་ཁུལ་ཅོ་ནེ་རྫོང་ཁོངས། ཆས་བུ་གཤིས་སམ་ཆོས་དཔལ་ཞིང་བཀྲ་ཤིས་ཆོས་འཁོར་གླིང་དགོན་པའི་ཉེ་འདབས་སུ་ཡོད་པའི་རྒྱ་གཞུང་སྤྱི་བདེ་ཉེན་རྟོག་རུ་ཁག་གི་སྒོ་ཁར། བོད་རིགས་བུ་མོ་སངས་རྒྱས་མཚོ་ཞུ་བས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་འདས་གྲོངས་སུ་ཕྱིན་རྗེས། རྒྱ་ནག་གཞུང་གིས་གཤིས་ཚང་དགོན་པའི་གྲྭ་བ་ཚོར་དམ་དྲག་ཆེན་པོ་བྱེད་ཀྱི་ཡོད་པ་མ་ཟད། སངས་རྒྱས་མཚོའི་ཁྱོ་ག་རྟ་མགྲིན་དབང་རྒྱལ་ལགས་རྒྱ་གཞུང་ཉེན་རྟོག་པས་འཛིན་བཟུང་བྱས་ཡོད་པ་མ་ཟད། ཁོང་ཚང་དང་འབྲེལ་བ་ཡོད་པའི་ཆས་བུ་གཤིས་དགོན་པའི་གྲྭ་བ་མང་པོ་ཞིག་ཀྱང་སྔ་རྗེས་སུ་འཛིན་བཟུང་བཀག་བསྐྱིལ་བྱེད་བཞིན་ཡོད་འདུག

ཕྱི་ཟླ་ ༥ ཚེས་ ༢༨ ཉིན་སངས་རྒྱས་མཚོ་ལགས་ཀྱི་སྤུན་ཉེ་གྲྭ་བསྟན་འཛིན་བཟོད་པ་ལགས་རྒྱ་གཞུང་གིས་འཛིན་བཟུང་བཀག་བསྐྱིལ་བྱས་ཡོད་པ་དང་། ཟླ་འདིའི་ཚེས་ ༤ ཉིན་གྲྭ་བསམ་གཏན་རྒྱ་མཚོ་འཛིན་བཟུང་བྱས་ཡོད་འདུག ཚེས་ ༥ ཉིན་གྲྭ་བློ་བཟང་བསྟན་འཛིན་གར་སོང་ཆ་མེད་ཆགས་ཡོད་འདུག ཚེས་ ༡༠ ཉིན་སངས་རྒྱས་མཆོའི་ཁྱོ་ག་རྟ་མགྲིན་དབང་རྒྱལ་འཛིན་བཟུང་བྱས་ཡོད་པ་དང་། ཉིན་དེར་གྲྭ་འཕྲིན་ལས་རྒྱ་མཚོ་ཞུ་བ་ཞིག་ཀྱང་འཛིན་བཟུང་བྱས་ཡོད་འདུག ཁོང་ཅག་འཛིན་བཟུང་བྱེད་དགོས་པའི་རྒྱུ་རྐྱེན་གསལ་བོ་མེད་ཀྱང་། འདས་པོ་སངས་རྒྱས་མཚོའི་གཉེན་ཉེ་གྲྭ་བསྟན་འཛིན་བཟོད་པ་ལགས་སུ་སངས་རྒྱས་མཚོའི་གནས་ཚུལ་ཡར་མར་བརྒྱུད་སྐུར་བྱས་པའི་ཉེས་འཛུགས་བྱས་ཡོད་འདུག གྲྭ་བ་གཞན་ཁ་ཤས་ལའང་རྒྱ་གཞུང་གིས་འདྲི་བརྩད་བྱས་ཡོད་འདུག

གནས་ཚུལ་གཞན་ཞིག་ནི། སངས་རྒྱས་མཚོ་ལགས་ཀྱིས་རང་ལུས་མེར་བསྲེགས་མ་གནང་བའི་ཟླ་ཤས་གོང་ལ། མོ་རང་གིས་སོ་སོའི་ལུས་ཀྱི་རྒྱན་ཆ་བཞོ་ལུང་དང་བསྐེག་བཅང་(ཨ་མདོའི་ཕྱོགས་ཀྱི་བུད་མེད་ཚོས་སྐེད་པར་འདོག་པའི་དབྱུ་བྱུར་གྱི་ཁྲ་རྒྱན་བཏབས་པའི་དངུལ་གྱི་རྒྱན་ཆས་རིགས་ཤིག)སོགས་རང་ཁྱིམ་དུ་བསྐུར་ཏེ། འདི་དག་བཙོངས་ཏེ་བྱིས་པ་རྣམས་སློབ་གྲྭར་གཏོང་སྤྱད་བྱོས་ཞེས་ལབ་ཡོད་པ་དང་། སངས་རྒྱས་མཚོས་རང་ལུས་མེར་བསྲེགས་བཏང་རྗེས་གནས་ཚུལ་དེའི་སྐོར་རྒྱ་ནག་གཞུང་གིས་ཤེས་ཏེ། ཉེན་རྟོག་པ་སོགས་ཡོང་སྟེ་མོ་རང་གི་རྒྱན་ཆ་དེ་དག་ལ་པར་བརྒྱབ་ནས་འཁྱེར་ཡོད་འདུག

འབྲེལ་ཡོད་གནས་ཚུལ།

༡། ༼ བོད་ནང་རང་ལུས་མེར་བསྲེག་གནང་འདུག ༽

༢། ༼ པཎ་ཆེན་རིན་པོ་ཆེ་གང་དུ་ཡོད། ༽