ང་ཚོར་རང་ཉིད་ཀྱི་ཨང་སིན་སུའུ་ཀེ་དགོས་པ་རེད།

ཟླ་འདིའི་ཕྱི་ཚེས་ ༡༡ ཉིན་ལྕམ་ཨང་སིན་སུའུ་ཀེ་ལགས་ཀྱིས་རྒྱ་ནག་གི་སྲིད་འཛིན་ཞི་ཅིན་ཕིན་ལ་ཐུག་འཕྲད་གནང་ཡོད་ཀྱང་འགྲོ་བ་མིའི་ཐོབ་ཐང་སྐོར་གླེང་སློང་བྱས་མི་འདུག

འབར་མ་རྒྱལ་ཡོངས་དམངས་གཙོ་མཉམ་འབྲེལ་ཚོགས་པའི་ཚོགས་གཙོ་ལྕམ་ཨང་སིན་སུའུ་ཀེ་ལགས་ཀྱིས། རྒྱ་ནག་ནང་གཟིགས་སྐོར་གནང་སྐབས་འགྲོ་བ་མིའི་ཐོབ་ཐང་སྐོར་གླེང་སློང་ཐུབ་པའི་རེ་བ་བརྒྱབ་ཡོད་ཀྱང་། ཟླ་འདིའི་ཕྱི་ཚེས་ ༡༡ ཉིན་རྒྱ་ནག་པེ་ཅིན་མི་མང་ཚོགས་ཁང་ཆེན་མོའི་ནང་། ཁོང་མོས་རྒྱ་ནག་གི་སྲིད་འཛིན་ཞི་ཅིན་ཕིན་ལ་ཐུག་འཕྲད་གནང་སྟེ། ཕྱོགས་གཉིས་ཀྱི་འབྲེལ་བ་སྔར་ལས་གོང་འཕེལ་དུ་གཏོང་དགོས་པའི་ཐད་གླེང་མོལ་གནང་ཡོད་ཀྱང་། རྒྱ་ནག་ནང་གི་འགྲོ་བ་མིའི་ཐོབ་ཐང་དང་ནོ་སྤེལ་ཞི་བདེའི་གཟེངས་རྟགས་ཐོབ་མཁན་ལུའུ་ཞོ་པའོ་ཡི་སྐོར་ལ་གླེང་སློང་བྱས་པའི་གནས་ཚུལ་ཐོན་མེད་སྟབས། རྒྱ་ནག་གི་གནད་དོན་དཔྱད་ཞིབ་པ་ཚོས། ཁོང་མོ་དམངས་གཙོའི་འཐབ་མོ་བ་ཞིག་ཡིན་ནའང་། འབར་མའི་ཁེ་ཕན་གྱི་ཆེད་དུ་རྒྱ་ནག་ལ་ཡོང་བ་ལས་རྒྱ་ནག་གི་ཁེ་ཕན་ཆེད་དུ་ཡོང་བ་མིན་པས། འགྲོ་བ་མིའི་ཐོབ་ཐང་གླེང་སློང་མ་བྱས་པ་དེ་བསམ་ཡུལ་ལས་འདས་པ་གང་ཡང་མིན་སྐོར་བརྗོད་འདུག

རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། ཐུག་འཕྲད་སྐབས་ཞི་ཅིན་ཕིན་གྱིས་རྒྱ་ནག་གུང་ཁྲན་ཏང་དང་འབར་མའི་རྒྱལ་ཡོངས་དམངས་གཙོ་མཉམ་འབྲེལ་ཚོགས་པ་གཉིས་བར་འབྲེལ་འདྲིས་བྱུང་བ་ནས་བཟུང་། ཕྱོགས་གཉིས་ཀྱི་འབྲེལ་བར་མགྱོགས་མྱུར་གྱི་འཕེལ་རྒྱས་དང་འབྲེལ་འདྲིས་མཉམ་ལས་གཏིང་ཟབ་ཏུ་ཕྱིན་ཡོད་པ་དང་། ཐེངས་འདིའི་ལྕམ་ཨང་སིན་སུའུ་ཀེ་ལགས་ཀྱི་གཟིགས་སྐོར་བརྒྱུད་སྔར་ལས་རྒྱ་ནག་གུང་ཁྲན་ཏང་ལ་རྒྱུས་ལོན་དང་། ཏང་ཁག་གཉིས་ཀྱི་འབྲེལ་བར་རྒྱུས་ལོན་དང་ཡིད་ཆེས་ཇེ་ཟབ་ཏུ་འགྲོ་བར་ཕན་ཐོགས་ཡོང་བའི་རེ་བ་ཡོད་ལ། ལྕམ་ཨང་སིན་སུའུ་ཀེ་དང་ཁོང་མོའི་ཚོགས་པ་ཡིས་འབར་མའི་མི་མང་ལ་སྣེ་འཁྲིད་པར་ཧུར་བརྩོན་དང་། དྲང་བདེན་གྱི་ཐོག་ནས་རྒྱ་ནག་དང་ཏང་ཁག་གཉིས་ཀྱི་མཉམ་འབྲེལ་ལ་གདོང་གཏད་དེ། རྒྱལ་ཁབ་གཉིས་ཀྱི་འབྲེལ་བ་སྔར་ལས་གོང་འཕེལ་དུ་གཏོང་ཐབས་སྐོར་བརྗོད་འདུག

ལྕམ་ཨང་སིན་སུའུ་ཀེ་ལགས་ཀྱིས་ཀྱང་འབར་མ་དང་རྒྱ་ནག་གཉིས་ནི་ཁྱིམ་མཚེས་རྒྱལ་ཁབ་ཡིན་ལ། ཁྱིམ་མཚེས་ནི་གདམ་ག་བྱེད་ཆོག་པ་ཞིག་མིན་པས་རྒྱལ་ཁབ་གཉིས་ཀྱི་མཛའ་བརྩེའི་འབྲེལ་བ་འཕེལ་རྒྱས་ནས་གལ་གནད་ཅན་དུ་འགྱུར་བར་ནུས་པ་འདོན་དགོས་ལ། འབར་མ་རྒྱལ་ཡོངས་དམངས་གཙོ་མཉམ་འབྲེལ་ཚོགས་པས་རྒྱལ་ཁབ་གཉིས་བར་གྱི་མཛའ་བརྩེའི་འབྲེལ་བར་མཐོང་ཆེན་བྱེད་ཀྱི་ཡོད་སྐོར་དང་། གུང་ཁྲན་ཏང་གིས་སྣེ་འཁྲིད་པའི་རྒྱ་ནག་གི་འཕེལ་རྒྱས་ཀྱི་གྲུབ་འབྲས་ཆེན་པོར་བརྩི་བཀུར་དང་ཡིད་སྨོན་བྱེད་ཀྱི་ཡོད་ལ། གཟིགས་སྐོར་འདི་བརྒྱུད་ཏང་ཁག་གཉིས་ཀྱི་འབྲེལ་བ་སྔར་ལས་ཇེ་ཟབ་ཏུ་སོང་སྟེ། རྒྱལ་ཁབ་གཉིས་ཀྱི་མི་མང་གི་མཛའ་བརྩེའི་འབྲེལ་བ་གོང་འཕེལ་དུ་གཏོང་ཐུབ་པའི་རེ་བ་ཡོད་ལུགས་བརྗོད་འདུག

མགོ་ཁྲིད་གཉིས་ཀྱི་ཐུག་འཕྲད་སྐབས་ནོ་སྤེལ་ཞི་བདེའི་གཟེངས་རྟགས་ཐོབ་མཁན་ལུའུ་ཞོ་པའོ་དང་རྒྱ་ནག་ནང་གི་འགྲོ་བ་མིའི་ཐོབ་ཐང་། དམངས་གཙོ་བཅས་གླེང་སློང་བྱས་མེད་པའི་ཐད་བསམ་འཆར་འདོན་མཁན་མང་པོ་ཡོད་པ་དང་། རྒྱ་ནག་ནན་ཅིན་གྱི་རང་དབང་རྩོམ་པ་པོ་ཅང་ཁྲིན་ལགས་ཀྱིས། རྒྱ་ནག་གུང་ཁྲན་ཏང་གིས་ཁོང་མོ་མགྲོན་འབོད་བྱས་པ་ཡིན་ལ། སྔ་ས་ནས་ཁོང་ཚོས་ག་རེ་གླེང་ཆོག་དང་མི་ཆོག་གི་སྒྲིག་གཞི་གཏན་འབེབས་བྱས་ཚར་ཡོད་སྟབས། འགྲོ་བ་མིའི་ཐོབ་ཐང་སྲུང་སྐྱོབ་པ་ཁ་ཤས་ཀྱིས་ལྕམ་ཨང་སིན་སུའུ་ཀེ་ལགས་ཀྱིས་ལུའུ་ཞོ་པའོ་དང་ཐ་ན་ཏཱ་ལའི་བླ་མ་མཆོག་གི་སྐོར་གླེང་སློང་ཐུབ་པའི་རེ་བ་བྱས་ཡོད་ཀྱང་དེ་ནི་ཡོང་ཐབས་མེད་པ་ཞིག་རེད། ཅེས་བརྗོད་འདུག

ཡང་རྒྱ་ནག་ནང་གི་ལས་འགུལ་བ་ཝུའུ་པེན་ཟེར་བས་འགྲོ་བ་མིའི་ཐོབ་ཐང་ལ་རྒྱལ་མཚམས་མེད་ཀྱང་། ཆབ་སྲིད་པར་རྒྱལ་ཁོངས་ཡོད་པ་རེད། ལྕམ་ཨང་སིན་སུའུ་ཀེ་ལགས་ཁོང་མོའི་རྒྱལ་ཁབ་ཀྱི་ཁེ་ཕན་ཆེད་རྒྱ་ནག་ལ་ཡོང་བ་ལས་རྒྱ་ནག་གི་ཁེ་ཕན་ཆེད་དུ་ཡོང་བ་མིན་ལ། ཁོང་མོ་གཞུང་གི་ཁ་གཏད་པ་ཞིག་དང་དམངས་གཙོའི་འཐབ་མོ་བ་ཞིག་ཡིན་ནའང་། ད་ལྟ་ཁོང་མོ་ཆབ་སྲིད་ཀྱི་མགྲོན་པོ་ཞིག་སྟེ་འབར་མའི་སྲིད་འཛིན་གྱི་འོས་མི་ཞིག་ཡིན་པས། རྒྱ་ནག་མི་མང་གིས་ཁོང་མོའི་གཟིགས་སྐོར་ལ་རེ་སྒུག་དང་སྟོང་བསམ་མང་དྲགས་པ་རེད། ཁོང་མོས་གཟིགས་སྐོར་སྐབས་རྒྱ་ནག་གི་བཅོས་བསྒྱུར་སྒོ་འབྱེད་དང་འཕེལ་རྒྱས་ལ་བསྟོད་བསྔགས་བྱས་པ་ལས་འགྲོ་བ་མིའི་ཐོབ་ཐང་སྐོར་ལ་ཚིག་གཅིག་གླེང་མེད་པ་རེད། དེ་ནི་ཁོང་མོའི་རྒྱལ་ཁབ་དང་མི་མང་གི་ཁེ་ཕན་ཆེད་རེད། ང་ཚོས་དམངས་གཙོ་དང་འགྲོ་བ་མིའི་ཐོབ་ཐང་བརྩོན་ལེན་བྱེད་འདོད་ན་རྒྱ་ནག་མི་མང་རང་ཉིད་ལ་བརྟེན་དགོས། ང་ཚོར་ང་རང་ཚོའི་ཨང་སིན་སུའུ་ཀེ་དགོས་པ་རེད། ལྕམ་ལུའུ་ཕིན་ལགས་དམངས་གཙོའི་འཐབ་མོ་བ་ཞིག་ཡིན་ཡང་ཁོང་མོ་ད་ལྟ་བཙོན་ཁང་དུ་ཡོད་པ་རེད། ཅེས་བརྗོད་འདུག

གསར་འགོད་པ། པདྨ་མཚོ།