གཟའ་འཁོར་འདིའི་ནང་ ༢༠༡༧ ལོའི་ཧོང་ཀོང་སྲིད་འཛིན་གྱི་སྔོན་འགྲོའི་འོས་བསྡུ་གནང་འཆར་ཡོད་པར། ཕྱི་ཚེས་ ༡༥ ཉིན་ནེའུ་ཡོག་དུས་བབ་གསར་ཁང་གི་གསར་འགོད་པ་མེ་ཆིད་ཧྥོར་སེ་ཐིས། ཧོང་ཀོང་དམངས་གཙོ་ཡར་སྐུལ་ཚོགས་པའི་ཚོགས་གཙོ་གཞོན་པ་ཧོ་ཌན་ཀྲའོ་ལ་བཅར་འདྲི་ཞུས་པ་བོད་བསྒྱུར་བྱས།
དྲི་བ། གལ་ཏེ་འོས་བསྡུ་ལ་འགོག་རྐྱེན་བཟོས་པ་ཡིན་ན། དོན་དག་ཅི་ཞིག་འབྱུང་སྲིད་དམ།
ལན། ཕྱི་ཟླ་ ༨ ནང་། ང་ཚོར་རྒྱལ་ཡོངས་མི་དམངས་འཐུས་མིའི་ཚོགས་ཆེན་ (N.P.C) གྱི་རྒྱུན་ལས་ལྷན་ཚོགས་ཀྱི་གྲོས་ཆོད་ཡོད་ཅིང་། དབུས་སྲིད་གཞུང་གི་དཔོན་རིགས་ཚོས་ཡང་ནས་བསྐྱར་དུ་གྲོས་ཆོད་དེ་ལ་གནས་སྐབས་ རིང་བསྒྱུར་བཅོས་གཏོང་གི་མིན་ལུགས་ནན་བཤད་བྱེད་ཀྱི་ཡོད། གལ་ཏེ་ཁྱོད་ཀྱིས་ད་རེབ་ཀྱི་འོས་བསྡུ་ལ་འགོག་རྐྱེན་བཟོས་པ་ཡིན་ན། ཕྱིས་ཀྱི་ལོ་ངོ་ ༥ ནས་ ༡༠ ནང་། ཁྱོད་ཀྱིས་ཡང་བསྐྱར་ཆབ་སྲིད་ལམ་ལུགས་ལེགས་བཅོས་གཏང་བ་དང་། སྐབས་དེར་ཁྱོད་ཀྱིས་ཆབ་སྲིད་ཀྱི་སྒྲོམ་གཞི་གཅིག་མཚུངས་ཤིག་ལ་གདོང་ལེན་བྱ་དགོས་པ་རེད། དེ་བས། ཁྱོད་ཀྱིས་རང་གི་དུས་ཚོད་ཆུད་ཟོས་སུ་བཏང་བ་མ་གཏོགས། དེ་སྔའི་ཆབ་སྲིད་ཀྱི་གནས་བབ་རང་དགར་ལྷག་བསྡད་ཡོད་པ་རེད།
དྲི་བ། རྒྱལ་ཡོངས་དམངས་གཙོ་ཚོགས་པ་ (pan-democrats) སྔོན་འགྲོའི་འོས་འདེམས་ནང་ཞུགས་དོན་ག་རེ་ཡིན་ནམ།
ལན། ང་རང་གི་ངོས་ནས་བཤད་ན། ད་རེབ་འོས་བསྡུའི་ཐོབ་ཐང་དང་དེབ་སྐྱེལ་ཟིན་པའི་མི་སེར་ས་ཡ་ ༥ ལྷག་དང་མཉམ་དུ། ང་ལའང་ཧོང་ཀོང་གི་སྲིད་འཛིན་འོས་འདེམས་བྱེད་པའི་གོ་སྐབས་ཡོད་པ་རེད། དེ་ཡང་ཁྱོད་ལ་འོས་ཤོག་གཅིག་གི་ཐོབ་དབང་ཡོད་པའི་ཆ་ནས། འོས་གཞིའི་སྲིད་འཛིན་དེས་མི་མང་གི་ཁ་ལ་ཉན་གྱི་རེད། མ་ཟད་དམངས་གཙོའི་ལམ་ལུགས་འོག་ཏུ། སྲིད་གཞུང་གི་དབུ་ཁྲིད་ཀྱིས་ཀྱང་མི་དམངས་ཀྱི་ངག་ལ་གསན་གྱི་རེད། ཁྱོད་ཀྱིས་ངའི་སྐད་ཆའི་ཕུགས་དོན་གོ་སོང་ངམ། དེ་འདྲ་ཡིན་པས། འདི་ནི་ང་ཚོའི་དམངས་གཙོའི་འགྲོ་ལུགས་ལེགས་པོ་ཞིག་ཡིན་པ་མ་ཟད། ང་ཚོའི་དམངས་གཙོ་ཡར་རྒྱས་ཀྱི་ཐོད་རྒལ་རང་བཞིན་ཞིག་ཀྱང་ཡིན་པ་རེད།
གཅིག་བྱས་ན། ཁྱོད་ཀྱིས་རྒྱལ་ཡོངས་མི་དམངས་འཐུས་མིའི་ཚོགས་ཆེན་གྱིས་གཏན་འཁེལ་བའི་གྲོས་ཆོད་ལ་མོས་མཐུན་མི་བྱེད་པར། དེ་ནི་སྟངས་འཛིན་བྱེད་སྟངས་ཤིག་ཡིན་ལུགས་བརྗོད་སྲིད་ཀྱང་། དྲང་མོར་བཤད་ན། ཡོངས་ཁྱབ་འོས་བསྡུའི་ཐོབ་ཐང་སྤྱད་དེ། ཁྱོད་ཀྱིས་དམངས་གཙོའི་འོས་ཤོག་ལྡུག་དུས། འབྱུང་འགྱུར་གྱི་སྲིད་འཛིན་འོས་གཞིར་ལངས་པའི་འོས་མི་རེ་རེའི་ངོས་ནས་ཀྱང་། བརྒྱུད་ལམ་ཁག་དང་སྤྱི་དམངས་ལྟར། དོགས་གནད་གཅིག་མཚུངས་ཤིག་ལ་གདོང་ལེན་བྱ་དགོས་པ་རེད་སྙམ། འོས་བསྡུ་ལྷན་ཚོགས་སམ་འོས་བསྡུའི་སྒྲིག་རིམ་ཁྲོད་དུ། ཁྱོད་རང་གི་བློ་ཁ་འགྱུར་བའམ། ལེགས་བཅོས་ཡོ་བསྲིང་ག་རེ་གཏོང་གི་ཡིན་ནམ། རྒྱུ་མཚན། ཡོངས་ཁྱབ་འོས་བསྡུའི་ཐོབ་ཐང་ཁྲོད་དུ། ཁྱོད་ཀྱིས་རང་གི་བསམ་ཕྱོགས་འཛིན་རྒྱུ་འབའ་ཞིག་མ་ཡིན་པར། ཁྱོད་ཀྱིས་ད་དུང་ཤོག་ཁག་གང་དུའང་མི་གཏོགས་པར་དབུ་མའི་ལམ་གྱི་མི་མང་གི་རྒྱབ་སྐྱོར་ཡང་འཐོབ་དགོས་ཤིང་། འོས་འདེམས་ལས་རྒྱལ་ཆེད། ཐ་ན་ཁྱོད་ལ་དམངས་གཙོ་ཚོགས་པའི་རྒྱབ་སྐྱོར་ཡང་འཐོབ་དགོས་པ་རེད། གལ་ཏེ་ཁྱོད་ལ་རྒྱལ་ཁ་ཐོབ་པ་ཡིན་ན། ཁྱོད་ཀྱིས་རང་གི་དེ་སྔའི་བསམ་ཕྱོགས་ལ་འགྱུར་བ་གཏང་དགོས་ཡོད། འདི་ནི་ཆེས་སྤྱིར་བཏང་གི་དོན་དག་ཅིག་ཡིན་སྟབས། ད་རེབ་ཀྱི་སྔོན་འགྲོའི་འོས་བསྡུ་ནི་ང་ཚོའི་མ་འོངས་མདུན་བསྐྱོད་ཀྱི་གོམ་ སྟབས་ལེགས་པོ་ཞིག་ཏུ་ཁོ་བོས་འདོད་ཡོད།
གལ་སྲིད་རྒྱལ་ཡོངས་དམངས་གཙོ་ཚོགས་པས “མིན་མིན། པེ་ཅིན་གཞུང་གིས་ང་ཚོར་ས་སོའི་འོས་མི་འདེམས་བཅུག་མ་སོང་། དེ་བས། ང་ཚོས་ད་རེབ་ཀྱི་སྲིད་འཛིན་འོས་འདེམས་ལ་འགོག་རྒོལ་བྱ་ངེས་ཡིན” ཞེས་ངོས་ལེན་ མ་བྱས་ན་ནི། འབྱུང་འགྱུར་གྱི་དམངས་གཙོའི་ལམ་ལུགས་འཕེལ་རྒྱས་སུ་འགྲོ་མི་སྲིད་སྟབས། བདག་གིས་དེ་ལ་རྩ་བ་ནས་མོས་མཐུན་བྱེད་ཀྱི་མེད།
དྲི་བ། ཧོང་ཀོང་གྲོང་ཁྱེར་གྱི་པེ་ཅིན་ལྷན་ཚོགས (pro-Beijing) ཞེས་པ་དེའི་ལས་དོན་ག་རེ་རེད།
ལན། ང་རང་གིས་དེ་རྒྱལ་ཞེན་ལྷན་ཚོགས་ཤིག་ཏུ་མཐོང་གི་ཡོད། ངས་དེ་རྒྱལ་ཞེན་ལྷན་ཚོགས་ཤིག་རེད་ཟེར་དོན། དེང་སྐབས་རྒྱ་ནག་གཞུང་རྒྱལ་ཁབ་གཞན་དག་དང་འདྲ་གི་མ་རེད། རྒྱ་ནག་ཁོ་རང་གི་ལམ་ཕྱོགས་སུ་འགྲོ་གི་ཡོད། དེ་འདྲ་མ་རེད་དམ། དེ་བདེན་པ་རེད། དེ་དོན་དངོས་རེད། ཁྱོད་ཀྱིས་བལྟས་ན་དེ་འདྲ་ཨེ་རེད། རྒྱ་ནག་ཁོ་རང་ལ་ཐུན་མོང་མ་ཡིན་པའི་ཁྱད་ཆོས་ཤིག་ཡོད་ཅིང་། དེའི་རྒྱུ་མཚན་གནས་ལུགས་ཀྱང་རྒྱ་ནག་ཁོ་རང་གི་བགྲོད་ལམ་དུ་ཡོད་པ་རེད། དོན་དངོས་ལ་གཞིག་ན། ཕྱི་ལོ་ ༡༩༧༩ ལོར་དཔལ་འབྱོར་བཅོས་བསྒྱུར་བྱས་པ་ནས་བཟུང་། རྒྱ་ནག་གི་སྲིད་ཇུས་གུ་ཡངས་སུ་བཏང་སྟེ། འདས་པའི་མི་ལོ་ ༣༠ རིང་ལ་འཕོ་འགྱུར་ཆེན་པོ་བྱུང་ཡོད་པ་རེད།
འཛམ་གླིང་སྟེང་གི་རྒྱལ་ཁབ་ཚང་མར་རང་རང་གི་བྱུང་རབས་ལོ་རྒྱུས་རེ་དང་རང་རང་གི་ཐུན་མོང་མ་ཡིན་པའི་ཁྱད་ཆོས་རེ་ཅི་ནས་ཀྱང་ཡོད་པ་རེད། གལ་ཏེ་མི་ཚོས་བདག་ལ། ཁྱོད་རྒྱ་ནག་ལ་ལྟ་སྟངས་ཅི་འདྲ་ཡོད་ཅེས་དྲིས་ན། ངས་རྒྱ་ནག་རྒྱ་ནག་ཁོ་རང་གི་ལམ་ཕྱོགས་སུ་འགྲོ་གི་ཡོད་པ་དང་། ལམ་ཕྱོགས་དེ་ནི་དེང་གི་རྒྱ་ནག་ཁོ་རང་ལ་ཧ་ཅང་འོས་ཤིང་འཚམ་པར་འདོད། དེར་མ་ཟད་ང་རང་རྒྱ་ནག་རྒྱལ་ཁབ་ཀྱི་འགལ་ཟླར་ལང་རྩིས་མེད།
གཅིག་བྱས་ན། ཁྱོད་ཀྱིས་ང་ཚོའི་མེས་རྒྱལ་གྱི་སྲིད་ཇུས་རེ་འགར་མོས་མཐུན་བྱེད་མི་སྲིད་ནའང་། ངས་ནི་མཐའ་གཅིག་ཏུ་འུ་ཚུགས་མཐར་བསྐྱལ་གྱིས་པེ་ཅིན་གཞུང་ལ་རྒྱབ་འགལ་གྱི་ལངས་ཕྱོགས་འཛིན་དགོས་དོན་ཡོད་པ་མ་རེད།
ངས་རྒྱལ་ཡོངས་དམངས་གཙོ་ཚོགས་པར་གཞན་དང་མི་མཚུངས་པའི་བསམ་ཕྱོགས་གཅིག་ཡོད་ཟེར་དོན་ག་རེ་ཡིན་ཞེ་ན། ཐོག་མར། ཁོ་ཚོས་པེ་ཅིན་གཞུང་གི་ཡིད་རྟོན་བརླགས་སོང་བ་རེད། མ་གཞི་ནས་ལེགས་ཉེས་ཀྱི་བྱ་བཞག་ཡོད་ཚད་པེ་ཅིན་གཞུང་གིས་ཐག་གཅོད་ཀྱི་ཡོད་ཅིང་། ཁོ་ཚོར་པེ་ཅིན་གཞུང་ལ་ཡིད་ཆེས་དང་བློ་གཏད་གང་ཡང་མེད་ལ། ཐ་ན་ཁོ་ཚོར་ཡིད་རྟོན་འཕེར་བའི་བྱ་བ་ཞིག་བསྒྲུབས་ཟིན་ནའང་། དེ་ག་རང་རེད། ཡིད་ཆེས་ཡོད་པ་མ་རེད།
ཡིད་ཆེས་དང་བློ་གཏད་མེད་པ་དེས། དཀའ་རྙོག་ཟློག་མེད་ཅིག་བཟོ་བཞིན་ཡོད་པ་རེད། ལྷག་དོན་སྲིད་དོན་ཁྲོད་དུ། གལ་ཏེ་ཁྱོད་ལ་མི་གཞན་གྱི་ཡིད་རྟོན་ཐོབ་པ་ཡིན་ན། དོན་དམ་ཁྱོད་ལ་རང་ཉིད་ཀྱི་འཚོ་གནས་ཡར་སྐུལ་གཏོང་བའི་སྲིད་ཇུས་ཀྱང་མང་པོ་ཞིག་ཞར་ལ་འཐོབ་ཀྱི་ཡོད།
རྒྱུ་མཚན་གནས་ལུགས་མང་པོ་ཞིག་གི་དབང་གིས། དེང་སྐབས་མི་མང་པོ་ཞིག་པེ་ཅིན་གཞུང་ལ་ཡིད་རྟོན་བརླགས་པ་རེད། ཆ་བཞག་ན། རྒྱལ་ཡོངས་དམངས་གཙོ་ཚོགས་པའི་ངོས་ནས། དེང་གི་རྒྱ་ནག་གཞུང་ང་ཚོའི་དགའ་མོས་བྱེད་ས་ཞིག་མིན་པ་དང་། ང་ཚོ་ཡང་དེང་གི་ཆབ་སྲིད་ལམ་ལུགས་འདི་ལ་དགའ་མོས་མེད་པ། ང་ཚོ་སྲིད་དོན་ཚོགས་པ་གཅིག་ཁོ་ནའི་ཆབ་སྲིད་ལམ་ལུགས་ལ་དེ་བས་ཀྱང་འདོད་པ་ཡོད་པ་མ་རེད།
གནད་དོན་འདི་ཁོ་རང་ཚོའི་རྩོད་གཞི་ཞིག་ཀྱང་ཆགས་ཡོད། འོན་ཀྱང་ངས་རྩོད་གཞི་ནི་ཆེས་སྤྱིར་བཏང་གི་དོན་དག་ཅིག་ཏུ་མཐོང་གི་ཡོད། འདི་དོན་དངོས་རེད། རྒྱ་ནག་ཁོ་རང་གི་ལམ་ཕྱོགས་སུ་འགྲོ་དགོས་པ་རེད། དེར་མ་ཟད། གལ་ཏེ་སང་ཉིན། རྒྱ་ནག་གིས་བློ་བུར་དུ་དམངས་གཙོའི་འོས་བསྡུའི་བྱ་འགུལ་སྤེལ་བ་ཡིན་ན། དེ་ཡང་གསར་དུ་བཞག་པའི་མཛད་རྗེས་ཤིག་ཡིན་པ་ང་ལ་ཡིད་ཆེས་ཡོད། འདི་ནི་དངོས་འབྲེལ་ཞིག་ཡིན་ཞིང་། ང་ནི་དངོས་ཡོད་གནས་བབ་ལ་གཞིག་ཅིང་དཔྱོད་མཁན་ཞིག་ཡིན། ཁྱོད་ལ་འདི་འདྲའི་ལྟ་ཚུལ་ཡང་དག་ཅིག་ཡོད་ན་ནི་ལེགས་པར་འཁུམས་མོད་ཀྱང་། ཁྱོད་ཀྱིས་ད་དུང་དངོས་དོན་གྱི་ལྕི་ཡང་གཞལ་དགོས་པ་རེད།
དྲི་བ། དེས་ན། པེ་ཅིན་ལྷན་ཚོགས་ཁག་ནི་དངོས་དོན་ཞིག་དང་། རྒྱལ་ཡོངས་དམངས་གཙོ་ཚོགས་པའི་ཕྱོགས་གཏོགས་མི་མང་ནི་ཡང་དག་ཅིག་ཡིན་ནམ།
ལན། ཁྱོད་ཀྱིས་བཤད་པ་དེ་ག་རང་རེད། དངོས་དོན་ནམ། དངོས་ཚུལ། ཡང་དག་སོགས་གང་ཡིན་རུང་། དེས་ཁོ་རང་ཚོའི་བར་གྱི་ལྕི་ཡང་འཇལ་གྱི་ཡོད། ཁྱོད་ལ་ཁྱོད་རང་ཉིད་ཀྱི་ཡང་དག་གི་ལྟ་ཚུལ་ཞིག་ཡོད་ནའང་། གཞུང་ཕྱོགས་ཀྱིས་མོས་མཐུན་བྱེད་མིན་གྱི་དབང་གིས་ཁྱོད་ཀྱི་ཡང་དག་གི་ལྟ་ཚུལ་དེ་དངོས་དོན་ཆགས་ཐུབ་ཀྱི་མེད་པས། དོན་གོ་ཆོད་པ་མ་རེད། འདི་ནི་རྒྱལ་ཡོངས་དམངས་གཙོ་ཚོགས་པ་དང་ང་ཚོའི་བར་གྱི་ཁྱད་པར་རེད།
དྲི་བ། འོ་ན། རྒྱལ་ཡོངས་དམངས་གཙོ་ཚོགས་པས་ཅི་ཞིག་བྱས་ན་ལེགས་སམ།
ལན། རེད། ངས་ནི་རྒྱལ་ཡོངས་དམངས་གཙོ་ཚོགས་པར་བཤད་རྒྱུར། ཁྱོད་ལ་ཉམས་མྱོང་ཕུན་སུམ་ཚོགས་པོ་ཡོད་རེད། ཉེ་ཆར་ཉི་མ་ ༧༩ རིང་ལ་གསར་བརྗེ་ལས་འགུལ་བསླངས་པ་རེད། ཁྱོད་ལ་པེ་ཅིན་གཞུང་གི་ཁེ་དབང་ཐོབ་སོང་ངམ། ཐོབ་ཡོད་པ་མ་རེད། ངས་ཁྱོད་ལ་བཤད་རྒྱུར། དེས་རྔོ་ཐོག་གི་མ་རེད། ངས་བལྟས་ན། ཁྱོད་ཀྱིས་པེ་ཅིན་གཞུང་ལ་རྒོལ་ཞིང་འཐབ་པའི་བསམ་སྦྱོར་མཚམས་འཇོག་པ་དང་། ཁྱོད་རང་གི་བསམ་ཕྱོགས་བསྒྱུར་བ། དབུས་སྲིད་གཞུང་དང་ཞི་འགྲིག་བྱེད་པ་བཅས་ཀྱིས་འཐུས་ཤིང་། ཁྱོད་ཀྱིས་དབུས་སྲིད་གཞུང་དང་མཐུན་འབྲེལ་ལེགས་པོ་བྱས་པས་ཀྱང་། བྱ་བཞག་ལ་སླར་ཡང་འཕོ་འགྱུར་འཐེབས་ཀྱི་རེད།
ཁ་སང་དེ་རིང་བདག་གིས་རང་རྒྱལ་གྱི་ཆབ་སྲིད་ལ་འཕོ་འགྱུར་འགྲོ་བར་ཡིད་ཆེས་ཀྱིས་ཁེངས་ཡོད། ཡིན་ནའང་། འཕོ་འགྱུར་འདི་ལ་འགོག་རྒོལ་བྱ་ངེས་རེད། ང་ཚོའི་སེམས་ཁུར་ནི་ཧོང་ཀོང་གི་འབྱུང་འགྱུར་ཡིན་པ་དང་། ང་ཚོའི་དཔལ་འབྱོར་ཡང་སྐམ་ས་ཆེན་མོ་དང་མཉམ་འབྲེལ་བྱས་ཡོད་པས། ཁྱོད་ཀྱིས་དབུས་སྲིད་གཞུང་དང་འབྲེལ་ལམ་བརྟན་བརླིང་ཇི་ལྟར་བཟོ་རྩིས་ཡིན་ནམ། ཧོང་ཀོང་གྲོང་ཁྱེར་གྱི་ངོས་ནས་ཉིན་བཞིན་རྟོག་ཞིབ་དང་སྟངས་འཛིན་བྱེད་དགོས་འདུག་སྟེ། ང་ཚོས་ད་དུང་འདི་གའི་འཚོ་གནས་ཀྱི་རྩོད་རྙོག་མང་པོ་ཐག་གཅོད་དགོས་ན། ང་ཚོས་ལས་དོན་འདི་དག་ཇི་ལྟར་སྒྲུབ་རྒྱུ་ཡིན་ནམ།
མ་ཡིག་གི་འབྲེལ་ཐག http://sinosphere.blogs.nytimes.com/2015/06/15/q-and-a-holden-chow-on-china-elections-and-hong-kongs-attitude/?_r=0
