རྡ་ཤོད་ནས་མེག་གྷན་བར་ཐག་ལམ་བཟོ་འཆར།

འདི་ལོའི་ཕྱི་ཟླ་༧ ཚེས་ ༨ ཉིན་རྡ་ཤོད་ནས་མེག་གྷན་བར་ཐག་ལམ་བཟོ་རྒྱུ་མགོ་འཛུགས་བྱས་ཏེ་མ་འོངས་ལོ་གཉིས་ནང་ཚུད་དུ་འགྲུབ་པ་བྱ་རྒྱུ་ཡིན་འདུག

དེ་རིང་རྒྱ་གར་ཧིན་རྡུ་སི་ཐན་ཐོག་གནས་ཚུལ་སྤེལ་བ་ལྟར་ན། བྷོམ་བྷེ་ནང་རྟེན་གཞི་བྱས་ཡོད་པའི་ཀྲ་ཀྲ་འཛུགས་སྐྲུན་ཁེ་ལས་ཁང་གིས། ཧི་མ་ཅལ་མངའ་སྡེ་གཞུང་གི་ཆོག་མཆན་འོག ཟླ་ ༧ ཚེས་ ༨ ཉིན་ནས་མགོ་བཙུགས་ཏེ་རྡ་ཤོད་ནས་མེག་གྷན་བར་ཐག་ལམ་(Ropeway)བཟོ་རྒྱུ་ཡིན་པ་དང་། ལས་གཞི་དེ་ལོ་གཉིས་ནང་ཚུད་དུ་འགྲུབ་ཐབས་བྱ་རྒྱུ་ཡིན་འདུག

རྒྱ་གར་གྱི་དཔལ་འབྱོར་དུས་བབ་ཐོག་ཧི་མ་ཅལ་གྲོང་སྡེ་འཕེལ་རྒྱས་ལྷན་ཁང་གི་བློན་ཆེན་སུ་ཌེར་ཤར་མ་ (Sudhir Sharma) ཡིས། ཐག་ལམ་འདིས་ལོ་རེར་༧ཏཱ་ལའི་བླ་མ་མཆོག་གི་བཞུགས་གནས་གྲོང་རྡལ་མེག་གྷན་ལ། ཕྱི་རྒྱལ་དང་རྒྱ་གར་ཡུལ་སྐོར་སྤྲོ་འཆམ་པ་འབུམ་ ༢ དང་ཕྱེད་ལྷག་ཡོང་བཞིན་པ་དག་གི་འགྲོ་སྐྱོད་ཀྱི་དཀའ་ངལ་སེལ་རྒྱུའི་རེ་བ་ཡོད། ཐག་ལམ་འདི་བརྒྱུད་ཡུལ་སྐོར་སྤྲོ་འཆམ་པ་མེག་གྷན་དུ་སྐྱེལ་འདྲེན་བྱ་ཆེད། ད་ལྟ་མངའ་སྡེ་གཞུང་གིས་རྡ་ཤོད་ཀོ་ཌི་ཝ་ལི་ཁྲོམ་རྭའི་ (Kotwali Bazar) འཁྲིས་སུ་རླངས་འཁོར་ས་ཚིགས་ཤིག་ཀྱང་བཟོ་རྒྱུའི་འཆར་གཞི་སྒྲིག་གི་ཡོད། ཅེས་བརྗོད་འདུག

ཕྱི་ལོ་ ༢༠༡༥ ཟླ་ ༢ ཚེས་ ༡༣ ཉིན་ཧི་མ་ཅལ་མངའ་སྡེ་གཞུང་གིས་ཧིན་སྒོར་དུང་ཕྱུར་ ༡༢༠ (crore) ཡི་ལས་གཞི་དེ་ཀྲ་ཀྲ་འཛུགས་སྐྲུན་ཁེ་ལས་ཁང་ལ་སྤྲོད་རྒྱུ་ཐག་གཅོད་བྱས་ཡོད་པ་དང་། ཐོག་མར་ཁེ་ལས་ཁང་དེས་མངའ་སྡེའི་བློན་ཆེན་རྣམས་དང་ཐུག་སྐབས། ཁོང་ཚོས་ལས་གཞི་དེའི་འགྲོ་གྲོན་ཐད་ལོ་རེར་ཧིན་སྒོར་འབུམ་ ༧༥ ཡི་ཆག་ཡང་གཏོང་རྒྱུ་ཁས་ལེན་བྱས་པ་དེར། མངའ་སྡེའི་གྲོས་ཚོགས་འཐུས་མི་ཚོས་སྐྱོན་བརྗོད་བྱས་ཡོད་སྟབས། མངའ་སྡེའི་སྤྱི་ཁྱབ་བློན་ཆེན་ཝུར་བྷ་དྷུར་སིང་ (Virbhadra Singh) མཆོག་གིས། ཡུལ་སྐོར་སྤྲོ་འཆམ་བློན་ཆེན་མོ་ཧན་ཅོ་ཧན་ (Mohan Chauhan) ལགས་ཀྱིས་སྣེ་ཁྲིད་པའི་མཐོ་རིམ་རྟོག་ཞིབ་ཚོགས་ཆུང་ཞིག་ཆེད་འཛུགས་ཀྱིས་ཀྲ་ཀྲ་ཁེ་ལས་ཀྱི་རྐང་འཛིན་མི་སྣར་ཐུག་འཕྲད་བྱས་ཏེ། མངའ་སྡེ་གཞུང་གིས་ལོ་རེར་ཧིན་སྒོར་དུང་ཕྱུར་ ༡ ཆག་ཡང་གཏོང་རྒྱུ་ཐག་གཅོད་གནང་ཡོད་འདུག རྡ་ཤོད་ནས་མེག་གྷན་བར་གྱི་ཐག་ལམ་དེར་ཀེ་ལོ་མི་ཌར་ ༢ དང་མི་ཌར་ ༢༠༠ ཙམ་ཡོད་པ་མ་ཟད། སྐྱེལ་འདྲེན་འཁོར་སྒམ་ ༣༤ བཟོས་ནས་སྐར་མ་ ༧ ནང་མེག་གྷན་དུ་སྐྱེལ་ཐུབ་པ་བྱ་རྒྱུ་ཡིན་འདུག

དེ་བཞིན་ཧི་མ་ཅལ་མངའ་སྡེ་གཞུང་དང་རྒྱ་གར་གྱི་ཨུ་ཤ་བྷེར་ཁཱོ་ (Usha Breco) ཁེ་ལས་ཁང་གིས། ཀང་ར་རྫོང་ཁོངས་ཀྱི་ཧེ་མཱ་ཎེ་ (Himani) ནས་ཅ་མུན་ཌ་( Chamunda )བར་ཀེ་ལོ་མི་ཌར་ ༤།༡ གི་ཐག་ལམ་བཟོ་རྒྱུ་དང་། དེ་བཞིན། སིམ་ལའི་ཡུལ་སྐོར་སྤྲོ་འཆམ་ལས་ཁུངས་ནས་ཧྥར་ཧེལ་མགྲོན་ཁང་ (Firhill Hotel) བར་དང་། ཧྥར་ཧེལ་མགྲོན་ཁང་ནས་སྤྱི་སྤྱོད་རླངས་འཁོར་ས་ཚིགས་བར། ཡང་སིམ་ལའི་ཤིང་རྟ་འཁོར་ལོའི་ལམ་ནས་ཇན་སེ་རྒྱལ་མོའི་སྐྱེད་མོས་ཚལ་ (Rani Jhansi Park) བཅས་ཀྱི་བར་དུ་ཀེ་ལི་མི་ཌར་ ༢།༤ ཡི་ཐག་ལམ་བཟོ་རྒྱུའི་གན་རྒྱ་བཞག་ཡོད་འདུག

གཞན་ཡང་། ཕྱི་ལོ་ ༡༩༩༡ ལོར་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཤན་ཌ་ཀུ་མར་ (Shanta Kumar)མཆོག་གིས་རྡ་རམ་ཀཱོ་ཌི་ (Dharamkot) ནས་རྡོ་ལ་ཌར་རི་རྩེ་ (Triund )བར་ཐག་ལམ་བཟོ་བའི་ལས་འཆར་ཞིག་བཏིངས་ཡོད་པ་ལྟར། དེ་རིང་ཧི་མ་ཅལ་ཡུལ་སྐོར་སྤྲོ་འཆམ་བློན་ཆེན་ལས་ཁུངས་ཀྱིས་མི་རིང་བར་ལས་གཞི་དེ་མགོ་འཛུགས་བྱ་རྒྱུ་ཡིན་སྐོར་བརྗོད་འདུག

གསར་འགོད་པ། དོན་གྲུབ།