དེ་རིང་བོད་མིའི་སྒྲིག་འཛུགས་སྲིད་སྐྱོང་བློ་བཟང་སེང་གེ་མཆོག་ནས་༧གོང་ས་མཆོག་དགུང་གྲངས་ ༨༠ ཕེབས་པའི་སྐུའི་གྱ་སྟོན་རྟེན་འབྲེལ་ཉིན་མོར་འཚམས་འདྲི་ཞུ་བའི་གློག་བརྙན་ཞིག་འགྲེམས་སྤེལ་ཞུས་སོང་།
དེ་རིང་ཞོགས་པའི་ཆུ་ཚོད་ ༡༡ སྟེང་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་རྣམ་གཉིས་ཀྱིས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ། ཕྱི་ལོ་ ༢༠༡༥ ལོའི་ཟླ་ ༧ ཚེས་ ༦ ཉིན་ལ་༧གོང་ས་མཆོག་དགུང་གྲངས་ ༨༠ ཕེབས་པའི་སྐུའི་གྱ་སྟོན་རྟེན་འབྲེལ་ཉིན་མོར་འཚམས་འདྲི་ཞུ་བའི་དམིགས་བསལ་གློག་བརྙན་ཞིག་འགྲེམས་སྤེལ་དང་གྱ་སྟོན་གྱི་ལས་རིམ་སྐོར་ལ་གསར་འགོད་གསལ་བསྒྲགས་ཤིག་སྤེལ་སོང་།
སྲིད་སྐྱོང་བློ་བཟང་སེང་གེ་མཆོག་གིས་གློག་བརྙན་སྐོར་ལ་གསུངས་བཤད་ནང་དོན། ད་ལོ་དྲིལ་བསྒྲགས་ལས་ཁུངས་ནས་༧གོང་ས་མཆོག་དགུང་ལོ་ ༨༠ ཕེབས་པའི་གློག་བརྙན་ཞིག་གྲ་སྒྲིག་གནང་ཡོད་པ་དང་། སྐར་མ་གསུམ་རིང་གི་གློག་བརྙན་སྙིང་བསྡུས་ཞིག་བཟོས་ཏེ་སྤྱི་ཚོགས་དྲ་རྒྱ་བརྒྱུད་འཛམ་གླིང་སྤྱི་ཡོངས་ལ་ཁྱབ་ཐུབ་པ་དང་། དམིགས་བསལ་བོད་ནང་དང་རྒྱ་ནག་ནང་༧གོང་ས་མཆོག་ལ་དད་པ་བྱེད་མཁན་ཁྲི་ཕྲག་མང་པོར་ཁྱབ་རྒྱུའི་ཆེད་དང་། འཛམ་གླིང་ས་ཆ་ཨ་རིའི་ནེའུ་ཡོག་དང་ཡུ་རབ་སོགས་སུ་༧གོང་ས་མཆོག་གི་འཁྲུངས་སྐར་སྲུང་གཙི་བྱེད་བཞིན་ཡོད་ཀྱང་། ༧གོང་ས་མཆོག་ལ་དད་པ་དང་བརྩི་གུར་བྱེད་མཁན་ས་ཡ་མང་པོ་ཡོད་པ་རྣམས་གཞུགས་སྒར་དྷ་རམ་སའི་འཁྲུངས་སྐར་ཐོག་དངོས་སུ་ཕེབས་ཐུབ་ཀྱི་མེད་སྟབས། གློག་བརྙན་འདི་བརྒྱུད་ནས་འཛམ་གླིང་བོད་རིགས་གཙོས་པའི་ནང་པ་དང་༧་གོང་ས་མཆོག་ལ་དད་གུས་ཡོད་མཁན་རྣམས་འཁྲུངས་སྐར་མཉམ་ཞུགས་ཡོང་རྒྱུའི་རེ་བ་ཡོད་སྟབས། གློག་བརྙན་འདི་བཏོན་པ་རེད་ཅེས་སོགས་གསུངས་སོང་།
དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་གློག་བརྙན་གྱི་ནང་དོན་སྐོར་ཡིག་ཐོག་ཏུ་གསལ་བསྒྲགས་གནང་དོན། གློག་བརྙན་འདིའི་ནང་དོན་གཙོ་བོ་དེ་ཆོས་དཔོན་ཊུ་ཊུ་མཆོག་གིས་༧་གོང་ས་མཆོག་ལ་བཀའ་དྲིན་རྗེས་དྲན་དང་འཚམས་འདྲི་ཞུ་བ། ལྷག་པར་གོང་ས་མཆོག་གིས་འགྲོ་བ་མིའི་རིགས་སྤྱིར་བདེ་སྐྱིད་བསྐྲུན་པ་དང་འཛམ་གླིང་ཡོངས་ལ་ཆོས་ལུགས་མཐུན་སྒྲིལ། བོད་ཀྱི་ཆོས་དང་རིགས་གཞུང་སོགས་ལ་མཛད་འགན་བཞེས་ཡོད་པ་རྣམས་གསལ་འདོན་ཞུས་ཡོད། ཅེས་དང་། ཁོང་གིས་མུ་མཐུད་དུ། བོད་མིའི་སྲོལ་རྒྱུན་ལྟར་མི་ལོ་བརྒྱད་ཅུར་སོན་སྐབས་གྱ་སྟོན་ཞེས་ཧ་ཅང་གལ་གནད་ཅིག་ལ་ངོས་འཛིན་ཞུས་ཏེ་དུས་སྟོན་སྲུང་གཙི་ཞུ་སྲོལ་ཡོད་པར་བརྟེན། ཐེངས་འདིར་༧གོང་ས་མཆོག་གི་གྱ་སྟོན་ལ་འཛམ་གླིང་ས་ཕྱོགས་ཡོངས་ཀྱི་དད་ལྡན་མི་དམངས་དང་རྒྱབ་སྐྱོར་བ་རྣམས་ཀྱིས། མགོན་པོ་གང་ཉིད་ཀྱིས་འཛམ་གླིང་ཞི་བདེ་དང་བཟང་སྤྱོད་གོང་སྤེལ་གྱི་མཛད་རྗེས་ལ་བཀའ་དྲིན་རྗེས་དྲན་ཆེད་གློག་བརྙན་འདི་རྒྱ་ཆེ་རུ་ཁྱབ་སྤེལ་བྱེད་རྒྱུའི་རེ་བ་ཞུ་བཞིན་ཡོད། འཛམ་གླིང་ཡོངས་ཀྱི་མི་མང་ས་ཡ་མང་པོ་གཙོས་པའི་བོད་མི་རྣམས་དང་། བོད་ནང་གི་བོད་མི་རྣམས་ཀྱིས་རྒྱ་གཞུང་གི་དམ་དྲག་བྱེད་མུས་ལ་མ་ལྟོས་པར་འདི་ལོར་སྐུའི་གྱ་སྟོན་སྲུང་གཙི་ཞུ་འཆར་ཡོད་འདུག
ཕྱི་ལོ་ ༢༠༡༡ ལོར་༧གོང་ས་སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་དམངས་གཙོའི་ལམ་ནས་མི་མང་གིས་འོས་འདེམས་བྱས་པའི་མགོ་ཁྲིད་ཚོར་རྩིས་སྤྲོད་མཛད་ཡོད། གཞིས་བྱེས་གཉིས་སུ་གནས་པའི་བོད་མི་རྣམས་ཀྱིས་༧གོང་ས་མཆོག་ལ་དུས་དང་རྣམ་པ་ཀུན་ཏུ་དད་གུས་ཧ་ཅང་ཆེན་པོ་ཞུ་བཞིན་ཡོད།
ཕྱི་ཟླ་ ༦ ཚེས་ ༢༡ དང་བོད་ཟླ་ ༥ ཚེས་ ༥ ཏེ་བོད་ལུགས་ཀྱི་འཁྲུངས་སྐར་ཉིན་བཞུགས་སྒར་དུ་ ༧ གོང་ས་མཆོག་ལ་དམིགས་བསལ་བརྟན་བཞུགས་བསྟར་འབུལ་ཞུ་རྒྱུ་ཡིན་པ་དང་། སྐབས་དེར་འཛམ་གླིང་ས་ཕྱོགས་འདྲ་མིན་ནས་གནད་ཡོད་མི་སྣ་དང་སྐུ་མགྲོན་ཕེབས་རྒྱུ་ཡིན། ཞེས་དང་། དེ་རིང་གི་གློག་བརྙན་དེ་བོད་སྐད་དང་དབྱིན་སྐད། རྒྱ་སྐད་བཅས་ཀྱི་ནང་ནས་གཟིགས་རྒྱུ་ཡོད་ཅེས་བསྒྲགས་སོང་།
ཟླ་འདིའི་ཚེས་ ༢༡ ཉིན་བོད་མིའི་སྒྲིག་འཛུགས་ཀྱིས་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་གཞུང་འབྲེལ་ཐོག་༧གོང་ས་མཆོག་དགུང་གྲངས་ ༨༠ ཕེབས་པའི་སྐུའི་འཁྲུངས་སྐར་སྲུང་གཙི་ཞུ་ཕྱོགས་སྐོར་གྱི་ལས་རིམ་གསལ་བསྒྲགས་གནང་པའི་ནང་། ཞོགས་པའི་ཆུ་ཚོད་ ༨།༠༠ ཐོགཙུག་ལག་ཁང་དུ་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་དང་། ཆུ་ཚོད་ ༡༠།༣༠ ༧གོང་ས་མཆོག་དང་སྐུ་མགྲོན་གཙོ་བོ། ཆེ་བསྟོད་སྐུ་མགྲོན། དམིགས་བསལ་སྐུ་མགྲོན་བཅས་མཛད་སྒོར་ཆིབས་བསྒྱུར་གནང་རྒྱུ། ཆུ་ཚོད་ ༡༠།༤༠ ཐོག་བོད་མིའི་སྒྲིག་འཛུགས་སྲིད་སྐྱོང་བློ་བཟང་སེང་གེ་མཆོག་གིས་གསུང་བཤད་གནང་རྒྱུ་དང་དེའི་རྗེས་ཆེ་བསྟོད་སྐུ་མགྲོན་ཁག་ནས་གསུང་བཤད་གནང་རྗེས། ཆོལ་ཁ་རེ་རེ་བཞིན་གཞས་སྣ་གཟིགས་འབུལ་དང་དམིགས་བསལ་སྐུ་མགྲོན་ཚོས་གསུང་བཤད་གནང་རྒྱུ་ཡིན་འདུག ཆུ་ཚོད་ ༡༢།༠༥ ཐོག་༧གོང་ས་མཆོག་གིས་བཀའ་སློབ་གནང་རྒྱུ་ཡིན་འདུག
དེ་
