ཨ་རིའི་རྒྱལ་ཡོངས་རྩ་ཁྲིམས་བསྟི་གནས་ཁང་གིས་ ༢༠༡༥ ལོའི་རང་དབང་གི་གཟེངས་རྟགས་དེ་བོད་མིའི་འདུ་ཕྱིའི་སྐྱབས་མགོན་༧གོང་ས་མཆོག་ལ་འབུལ་གཏན་འཁེལ་ཡོད་འདུག
ཁ་སང་ཨ་རིའི་ཧྥེ་ལཱ་ཌལ་ཧྥེ་ཡཱ་གྲོང་ཁྱེར་ (Philadelphia) ནང་རྟེན་གཞི་བྱས་པའི་རྒྱལ་ཡོངས་རྩ་ཁྲིམས་བསྟི་གནས་ཁང་ (National Constitution Center) ཞེས་པས་གསལ་བསྒྲགས་ཤིག་སྤེལ་ཏེ། བསྟི་གནས་ཁང་གི་ ༢༠༡༥ ལོའི་རང་དབང་གི་གཟེངས་རྟགས་དེ་བོད་མིའི་འདི་ཕྱིའི་སྐྱབས་མགོན་ཏཱ་ལའི་བླ་མ་མཆོག་ལ་འབུལ་ལམ་ཞུ་རྒྱུ་ཡིན་པ་གསལ་བསྒྲགས་བསྐྱངས་ཡོད་པ་མ་ཟད། འདི་ལོའི་ཕྱི་ཟླ་ ༡༠ ཚེས་ ༢༦ ཉིན་གྱི་ཉིན་རྒྱབ་ཆུ་ཚོད་ ༥ པའི་ཐོག་༧གོང་ས་མཆོག་ལྟེ་གནས་ཁང་དུ་རང་དབང་གི་གཟེངས་རྟགས་ཐེངས་ ༢༧ པའི་མཛད་སྒོར་མགྲོན་འབོད་ཞུས་ཏེ། གཟེངས་རྟགས་དང་བྱ་དགའི་མ་དངུལ་ཨ་སྒོར་ ༡༠༠༠༠༠ ཡི་འབུལ་སྐྱེས་གནང་རྒྱུ་ཡིན་སྐོར་བརྗོད་འདུག
རྒྱལ་ཡོངས་རྩ་ཁྲིམས་བསྟི་གནས་ཁང་གི་དྲ་ཚིགས་(Constitution Daily)ཞེས་པའི་ཐོག་བསྟི་གནས་ཁང་གི་འགན་འཛིན་ཇཱ་ཕེར་རོ་སན་ (Jeffrey Rosen) གྱིས། སྐྱབས་མགོན་ཏཱ་ལའི་བླ་མ་མཆོག་གིས་བོད་མི་དང་རྒྱལ་སྤྱི་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་རྩོད་ལེན་གནང་ཡོད་པ་མ་ཟད། ལྷག་པར་རང་དབང་དང་གྲོས་མོལ། བཟོད་སྲན་བཅས་ཀྱི་ལྟ་གྲུབ་རྒྱུན་འཁྱོངས་གནང་སྟེ་མང་ཚོགས་བདེ་འགོད་ཀྱི་མཛད་རྗེས་བསྐྱངས་དང་སྐྱོང་བཞིན་ཡོད་པ་ལྟར། གཟེངས་རྟགས་འདི་ནི་རྒྱལ་སྤྱིའི་ཐོག་རང་དབང་དང་ཞི་བདེའི་ཐོག་མཛད་རྗེས་འཇོག་གནང་མཁན་དག་ལ་ཆེ་བསྟོད་ཞུ་ཆེད་དུ་འབུལ་བཞིན་ཡོད་པར་བརྟེན། ཏཱ་ལའི་བླ་མ་མཆོག་ནི་རང་དབང་དང་ཞི་བདེ་གོང་འཕེལ་མཛད་མཁན་གྱི་སྐྱེས་མཆོག་དམ་པ་ཞིག་ཡིན་སྟབས། འདི་ལོའི་གཟེངས་རྟགས་འདི་ཁོང་ལ་འབུལ་ལམ་ཞུ་རྒྱུ་ཡིན། ཞེས་བརྗོད་འདུག
༧གོང་ས་མཆོག་གིས། ངོས་ཀྱིས་ལོ་རྒྱུས་ལྡན་པའི་ཧྥེ་ལཱ་ཌལ་ཧྥེ་ཡཱ་གྲོང་ཁྱེར་ནང་རྟེན་གཞི་བྱས་པའི་རྒྱལ་ཡོངས་རྩ་ཁྲིམས་བསྟི་གནས་ཁང་གི་རང་དབང་གཟེངས་རྟགས་དེ་ལེན་རྒྱུའི་གོ་བསྐལ་ཐོབ་པར་དགའ་སྤྲོ་དཔག་མེད་བྱུང་། ད་ཐེངས་ངོས་ཀྱིས་མིག་དཔེར་འོས་པའི་དབུ་ཁྲིད་ཁག་དང་མཚུངས་པ་གཟེངས་རྟགས་འདི་ལེན་པ་པོའི་ཁོངས་སུ་ཚུད་པར་དགའ་ཚོར་ཆེན་པོ་སྐྱེས་བྱུང་། ངོས་ཀྱི་མི་ཚེ་བྱམས་དང་སྙིང་རྗེའི་བསླབ་བྱ་བཟང་པོ་དག་ཁྱབ་སྤེལ་གཏོང་རྒྱུའི་ཆོད་སེམས་བཅངས་ནས་འཛམ་གླིང་སྤྱི་ལ་ཕན་པའི་བྱ་གཞག་གང་ཐུབ་བསྒྲུབས་དང་སྒྲུབ་བཞིན་ཡོད་སྟབས། ངོས་ཀྱིས་དེར་ཆེ་བསྟོད་ཞུ་ས་ཧྥེ་ལཱ་ཌལ་ཧྥེ་ཡཱ་ལས་ལྷག་པའི་ས་ཆ་ཞིག་ཡོད་པ་བློ་ཡུལ་འཆར་གྱི་མི་འདུག ཅེས་གསུངས་འདུག
༡༩༨༨ ལོར་ཨ་རིའི་རྒྱལ་ཡོངས་རྩ་ཁྲིམས་བསྟི་གནས་ཁང་གིས་རང་དབང་གི་གཟེངས་རྟགས་འདི། འཛམ་གླིང་ཐོག་རང་དབང་དང་ཐོབ་ཐང་། ཞི་བདེ་བཅས་ཀྱི་ཆེད་རྨད་བྱུང་མཛད་རྗེས་འཇོག་མཁན་གྱི་སྐྱེས་བུ་ཚོར་ཆེ་བསྟོད་ཞུ་ཆེད་སྤྲོད་རྒྱུ་ཐག་གཅོད་གནང་སྟེ། ༡༩༨༩ ལོར་པོ་ལན་ཌིའི་ནོ་བྷེལ་ཞི་བདེ་གཟེངས་རྟགས་བཞེས་མྱོང་མཁན་སྐུ་ཞབས་ལེ་ཅཱ་ (Lech Wałęsa) མཆོག་ལ་ཕུལ་ཡོད་པ་དང་། དེའི་རྗེས་ཨ་རིའི་སྲིད་འཛིན་ཇེམ་མེ་ཀར་ཌར་ (Jimmy Carter) མཆོག་དང་། ལྷོ་ཨ་ཧྥི་རི་ཀའི་ནོ་བྷེལ་ཞི་བདེ་གཟེངས་རྟགས་བཞེས་མྱོང་མཁན་སྐུ་ཞབས་ཎན་སལ་མན་ཌ་ལཱ་མཆོག་དང་བྷེལ་ཁེ་ལིང་ཌོན་སོགས་ལ་ཕུལ་ཡོད་པ་མ་ཟད། ༢༠༡༣ ལོའི་གཟེངས་རྟགས་དེ་ཨ་རིའི་ཕྱི་སྲིད་དྲུང་ཆེ་ཟུར་པ་ལྕམ་ཧི་ལཱ་རེ་ (Hillary Clinton) མཆོག་དང་། ༢༠༡༤ ལོའི་གཟེངས་རྟགས་དེ་པ་ཀི་སི་ཐན་གྱི་ནོ་བྷེལ་ཞི་བདེ་གཟེངས་རྟགས་བཞེས་མྱོང་མཁན་མཱ་ལཱ་ལཱ་ (Malala Yousafzai) ལ་ཕུལ་ཡོད་པ་བཅས་ད་བར་ཁྱོན་མི་ ༢༦ ལ་སྤྲད་ཡོད་པ་དང་། འདི་ལོའི་གཟེངས་རྟགས་དེ་༧གོང་ས་མཆོག་ལ་འབུལ་རྒྱུ་ཡིན་འདུག
དེ་རིང་ཧྥེ་ལཱ་ཌལ་ཧྥེ་ཡཱ་གྲོང་ཁྱེར་གྱི་སྤྱི་ཁྱབ་པ་མེ་ཤལ་ཎུ་ཌར་ (Michael Nutter) ལགས་ཀྱིས། ང་ཚོས་ཧྥེ་ལ་ཌལ་ཧྥེ་ཡཱ་གྲོང་ཁྱེར་དུ་སྐྱབས་མགོན་ཏྰ་ལའི་བླ་མ་མཆོག་ལ་སྣེ་ལེན་ཞུ་རྒྱུའི་བསྐལ་བཟང་ཐོབ་པ་མ་ཟད། ཁོང་ལ་སྙན་གྲགས་ཅན་གྱི་རང་དབང་གི་གཟེངས་རྟགས་འབུལ་རྒྱུ་བྱུང་བར་དགའ་སྤྲོ་ཆེན་པོ་བྱུང་། ཁོང་གིས་བྱམས་དང་བཟོད་སྲན་གྱི་བསླབ་བྱ་གོང་འཕེལ་གཏོང་རྒྱུའི་ཐུགས་འགན་གཙོ་བཞེས་གནང་སྟེ། འཛམ་གླིང་ནང་ཕན་བདེ་དང་ཞི་བདེ་བསྐྲུན་རྒྱུར་མཛད་རྗེས་བཞག་གནང་ཡོད་སྟབས། གཟེངས་རྟགས་འདིའི་དགོས་དམིགས་དང་ཡོངས་སུ་མཐུན་པ་ཞིག་ཡིན་པ་མ་ཟད་ཁོང་ལས་ལྷག་པ་སུས་ཀྱང་གཟེངས་རྟགས་འདིའི་ཚབ་མཚོན་བྱེད་ཐུབ་ཀྱི་མ་རེད། ཅེས་བརྗོད་འདུག
གསར་འགོད་པ། དོན་གྲུབ།
