ཆོས་ལུཊ་དོ་དམ་ཇེ་ནན་དུ་གཏོང་དགོས།

པཎ་ཆེན་རྒྱལ་མཚན་ནོར་བུ་ལགས་ཀྱིས་བོད་ཁུལ་གྱི་དགོན་སྡེའི་དོ་དམ་དང་སློབ་གསོའི་ལམ་ལུགས་ཇེ་ནན་དུ་གཏོང་དགོས་སྐོར་བརྗོད་འདུག

ཉེ་སྔོན་པེ་ཅིན་དུ་ཚོགས་པའི་རྒྱ་ནག་རྒྱལ་ཡོངས་སྲིད་གྲོས་ཀྱི་སྐབས་བཅུ་གཉིས་པའི་རྒྱུན་ལས་ལྷན་ཚོགས་ཐེངས་ ༡༡ པའི་ཚང་འཛོམས་གྲོས་ཚོགས་ཐོག རྒྱ་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་ལགས་ཀྱིས་(ཁྲིམས་ལྟར་ཆོས་ལུགས་ལས་དོན་དོ་དམ་བྱས་ཏེ། ཆོས་ལུགས་ཀྱིས་ཀྲུང་ཧྭ་རིག་གནས་དར་སྤེལ་དང་བསམ་པའི་དཔལ་ཡོན་འཛུགས་བསྐྲུན་ལ་ཞབས་འདེགས་ཞུ་དགོས)ཞེས་པའི་བརྗོད་གཞིའི་ཐོག་གཏམ་བཤད་གནང་སྐབས། བོད་ཁུལ་གྱི་དགོན་སྡེའི་དོ་དམ་དང་སློབ་གསོ་གཉིས་ཀྱི་ལམ་ལུགས་ཇེ་ནན་དུ་གཏོང་དགོས་ཤིང་། ལྷག་པར་དུ་ཁྲིམས་ལྟར་ཆོས་ལུགས་དང་འབྲེལ་བ་ཡོད་པའི་སྤྱི་ཚོགས་ཀྱི་སྣང་ཚུལ་རྙོག་འཛིང་ཅན་ཐག་གཅོད་ནན་མོ་བྱ་དགོས་པ་ནི་ཧ་ཅང་གལ་འགངས་ཆེན་པོ་ཡིན་སྐོར་བརྗོད་འདུག

ཡང་ཁོང་གིས། ད་སྔ་ཤོག་ཁ་དང་སྒེར་གང་རུང་གིས་ཆོས་ལུགས་ཁ་རུ་འཁྱེར་ནས་ཁྲིམས་འགལ་གྱི་ཆོས་ལུགས་བྱ་འགུལ་སྤེལ་ཏེ། དད་ལྡན་རྣམས་ལམ་ལོག་ལ་ཁྲིད་པ་དང་ཆོས་ལུགས་ཀྱི་མཚན་སྙན་ལ་གནོད་ཅིང་། ཆོས་གཞུང་ནང་དོན་ལ་འཁྱོག་བརྗོད་བཅས་བྱས་ཡོད་སྟབས། ཆོས་ལུགས་རྨོངས་དད་དང་ཚོང་ལས་ཅན་དུ་གྱུར་ནས་སྤྱི་ཚོགས་བདེ་ཐང་ངང་གོང་འཕེལ་འགྲོ་བར་གནོད་ཚབས་ཆེན་པོ་བསྐྱལ་ཡོད། མི་དེ་དག་གིས་ནང་བསྟན་པར་བརྫུས་ནས་ཁྲིམས་འགལ་གྱི་ཆོས་ལུགས་བྱ་འགུལ་སྤེལ་བཞིན་ཡོད། ཁོ་ཚོས་སྒྲིག་འཁུར་ཁྲིམས་སྲུང་བྱེད་པ་ཧ་ཅང་ཉུང་བ་དང་། ཆོས་ལུགས་ཀྱི་གཞུང་ལུགས་ཤེས་བྱ་ཧ་ཅང་ཞན་ཞིང་། ཐ་ན་མི་ལ་ལས་ཆོས་དཔེ་གཅིག་ཆ་ཚང་བ་ཡང་ཀློག་མྱོང་མེད། ཡང་ཁོ་ཚོའི་ཁྲོད་ཀྱི་མི་ལ་ལ་ནི་ཤེས་རྒྱ་ཆེ་བ་དང་། འབྲེལ་བ་རྒྱ་ཆེ་བས་དད་ལྡན་པ་ཚོང་པ་ཕྱུག་པོ་དང་མི་སྣ་གྲགས་ཆེན་ཡང་ཡོད། མི་དེ་དག་གི་བྱ་འགུལ་ཁྱབ་ཁོངས་ཇེ་ཆེར་འགྱུར་བ་དང་ཤུགས་རྐྱེན་ཇེ་ཆེར་འགྲོ་ཡི་ཡོད་པས། སྤྱི་ཚོགས་ལ་གནོད་པ་ཆེ་རུ་འགྲོ་ཡི་ཡོད། ཡུན་རིང་དེ་ལྟར་གནས་ཚེ་ནང་བསྟན་གྱི་ཆོས་ཁྲིམས་འཛོལ་ཉེན་ཆེ་བ་དང་། ནང་བསྟན་པའི་སྡེ་ཡང་བློ་རྩེ་གཅིག་གིས་དད་མོས་བྱེད་པའི་དམིགས་ཡུལ་ལ་བརྩོན་ལེན་བྱ་ཁག་པོ་རེད་ལ། མགོ་སྐོར་ཐེབས་པའི་དད་ལྡན་མང་ཚོགས་ཀྱི་དད་མོས་ལ་ཡང་ནོར་འཛོལ་འབྱུང་སྲིད། མ་ཟད་སྤྱི་ཚོགས་ཀྱི་ཀུན་སྤྱོད་འཛུགས་བསྐྲུན་ལའང་ངན་ཤན་ཐེབས་ཀྱི་རེད། དེའི་གནོད་སྐྱོན་མང་པོས་ནང་བསྟན་གྱིས་རྒྱལ་ཁབ་དང་སྤྱི་ཚོགས་ལ་ཐོན་པའི་ནུས་པ་ཧུར་ཐག་དེར་ཉམ་ཉེས་བཟོ་གི་ཡོད། ཅེས་བརྗོད་འདུག

ཁོང་གིས་གོང་གི་གནད་དོན་ཐད་བསམ་འཆར་བཞི་བཏོན་པའི་ནང་། གཅིག ཆོས་ལུགས་ལས་དོན་ཚན་པས་ཆོས་ལུགས་སྐྱེས་ཆེན་རྫུས་མིས། ཁྲིམས་འགལ་གྱི་ཆོས་ལུགས་བྱ་འགུལ་སྤེལ་བའི་སྣང་ཚུལ་བརྟག་དཔྱད་ཞིབ་བཤེར་བྱ་དགོས་པ་དང་། དེ་ལ་བཀག་འགོག་གི་བྱ་ཐབས་བཟོས་ནས་ཐེར་འདོན་གྱི་ཐབས་ལམ་ཤར་གཏོང་ཐུབ་པ་དང་ཡུན་རིང་ནུས་ལྡན་གྱི་ཚན་པ་དང་ལམ་ལུགས་འཛུགས་དགོས། གཉིས། ཆོས་ལུགས་སྐྱེས་ཆེན་རྫུས་མས་ཁྲིམས་འགལ་གྱི་བྱ་འགུལ་སྤེལ་ནས་ཉེས་པ་བསགས་པར་སྤྱི་བདེ་ཚན་པས་ཁྲིམས་ལྟར་ཐག་གཅོད་ཀྱིས། སྣང་ཚུལ་དེ་རིགས་འཐོན་རྒྱུར་བཀག་འགོག་བྱེད་དགོས། གསུམ། ཆོས་ལུགས་ཚོགས་པས་རང་ནུས་འདོན་སྤེལ་གྱིས། ཆོས་ལུགས་ཁྱབ་ཁོངས་ཀྱི་སྐྱེས་ཆེན་གྱིས་དོན་དངོས་ལ་མི་འཇུག་པ་དང་དཀོར་རྔན་ལེན་པའི་བྱ་སྤྱོད་གཏན་འགོག་དང་། ཆོས་ལུགས་སྐྱེས་ཆེན་རྫུས་མས་མི་མང་གི་རྒྱུ་ནོར་ལ་མགོ་སྐོར་གཏོང་བ་གཏན་འགོག་བྱེད་དགོས། བཞི། འབྲེལ་ཡོད་ཚན་པས “ཁྲིམས་མཐུན་ལ་སྲུང་སྐྱོང་། ཁྲིམས་འགལ་ལ་ཚོད་འཛིན། ཐལ་དྲགས་པའི་བྱ་སྤྱོད་གཏན་འགོག ཉེས་གསོག་ལ་འགོག་རྒོལ།”བཅས་ཀྱི་རྩ་དོན་ལྟར། ཁྲིམས་བཞིན་ཆོས་ལུགས་ཚོགས་པ་དང་ཆོས་ལུགས་བྱ་འགུལ་སྤེལ་ཡུལ་གྱི་ཁྲིམས་མཐུན་ཁེ་དབང་དང་། ཆོས་ལུགས་ཀྱི་སྡེ་དང་ཆོས་དད་མང་ཚོགས་ཀྱི་ཆོས་དོན་དང་ཆོས་ལུགས་བྱ་འགུལ་བཅས་ལ་སྲུང་སྐྱོང་བྱེད་དགོས། ཆོས་སྟོན་པ་དང་ཆོས་དད་མང་ཚོགས་ཀྱི་ཁྲིམས་ལུགས་འདུ་ཤེས་ཇེ་མཐོར་གཏོང་དགོས། རྩ་ཁྲིམས་དང་ཁྲིམས་ལུགས་ཁྲིམས་སྲོལ་ལ་རང་འགུལ་གྱིས་སྲུང་གཙི་བྱེད་པ་གོང་མཐོར་གཏང་ནས། ཆོས་ལུགས་ཀྱི་སྡེས་རང་སོའི་ལུགས་མཐུན་གྱི་རེ་འདུན་འདོན་པའི་ཁྲིམས་མཐུན་གྱི་ལམ་བུ་བདེ་བླག་ངང་བསྐྲུན་ཏེ། ཆོས་ལུགས་ཉིད་ཀྲུང་ཧྭ་ཡི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དང་དར་སྤེལ་གཏོང་བ། སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་འཛུགས་བསྐྲུན་དང་ཁྱོན་ཡོངས་ནས་འབྱོར་འབྲིང་སྤྱི་ཚོགས་འཛུགས་པར་སྐུལ་འདེད་གཏོང་བའི་སྟོབས་ཤུགས་ཤིག་ཏུ་ཆགས་པ་བྱེད་དགོས། ཞེས་བཀོད་འདུག

གསར་འགོད་པ། པདྨ་མཚོ།