ཧོང་ཀོང་གྲོས་ཚོགས་ནང་རྒྱ་ནག་དབུས་གཞུང་གིས་མ་འོངས་པར་ཧོང་གི་སྲིད་འཛིན་འདེམས་སྟངས་ཐོག་ཐེ་ཇུས་བྱེད་རྒྱུའི་སྲིད་བྱུས་དེའི་ཐད་རྩོད་གླེང་མང་པོ་བྱས་མཐར་རྒྱ་ནག་ཕྱོགས་གཏོགས་ཀྱི་འཐུས་མི་རྣམས་ལ་ཕམ་ཉེས་བྱུང་སྟེ་སྲིད་ཇུས་བཅོས་བསྒྱུར་གྱི་ཁྲིམས་གཞི་དེ་གཏན་འབེབས་ཐུབ་མི་འདུག
ཟླ་འདིའི་ཚེས་ ༡༧ ཉིན་གྱི་ཕྱི་དྲོར་ཧོང་ཀོང་གྲོས་ཚོགས་ནང་ཡུལ་དེའི་གཞུང་གི་ ༢༠༡༧ ལོའི་སྤྱི་ཁྱབ་སྲིད་འཛིན་འོས་བསྡུའི་ལས་རིམ་ཞིག་གི་ཐོག་ཆུ་ཚོད་ ༩ རིང་རྩོད་གླེང་བྱས་མཐར། འོས་བསྡུ་གནང་སྐབས་འཐུས་མི་ ༨ ཀྱིས་རྒྱབ་སྐྱོར་དང་། ཐུས་མི་ ༢༨ གྱིས་ངོ་རྒོལ་བྱས་ཏེ་གྲོས་གཞི་དེར་བཅོས་བསྒྱུར་བྱེད་ཐུབ་མི་འདུག
ཐེངས་འདིའི་གྲོས་གཞི་དེ་ནི། སྔར་ལོའི་ཕྱི་ཟླ་ ༨ པའི་ནང་རྒྱ་ནག་མི་དམངས་འཐུས་མིའི་ཚོགས་ཆེན་སྟེང་གྲོས་ཆོད་བཞག་སྟེ། མ་འོངས་པའི་ ༢༠༡༧ ལོའི་ཧོང་གི་སྲིད་འཛིན་འོས་བསྡུའི་སྐབས། རྒྱ་ནག་གཞུང་གིས་མིང་འདོན་བྱས་པའི་འོས་མི་ལས་གཞན་ལ་འོས་འཕེན་མི་ཆོག་ཆེས་བསྒྲགས་ཡོད་པའི་ཐད། ཐེངས་འདིར་ཧོང་ཀོང་གྲོས་ཚོགས་ནང་རྩོད་གླེང་མང་པོ་བྱས་མཐར། རྒྱ་ནག་མི་དམངས་འཐུས་མིའི་ཚོགས་ཆེན་གྱི་གཏན་འབེབས་གཞིར་བཟུང་འོས་བསྡུའི་རྩ་འཛིན་བཅོས་བསྒྱུར་གཏོང་རྒྱུ་དེར་ཕམ་ཉེས་ཐེབས་ཡོད་པ་རེད།
ཧོང་ཀོང་གྲོས་ཚོགས་ནང་པེ་ཅིན་ཕྱོགས་གཏོགས་(Por-Beijing camp)ཞེས་པའི་ཆབ་སྲིད་ཚོགས་པ་དེར་འཐུས་མི་ ༤༣ དང་། ཧོང་ཀོང་དམངས་གཙོ་ཡར་འཐོན་ཚོགས་པ་(Pen Democracy camp)ཞེས་པར་འཐུས་མི་ ༢༧ བཅས་ཁྱོན་གྲོས་ཚོགས་འཐུས་མི་ ༧༠ ཡོད་པ་ལས། ཁྲིམས་གཞི་བཅོས་བསྒྱུར་དེའི་ཐད་རྩོད་གླེང་སྐབས་འཐུས་མི་ ༣༢ ཙམ་གྲོས་ཚོགས་ར་བ་ནས་ཕྱིར་འཐོན་ཡོད་ཀྱང་། མཐའ་མའི་གཏན་འབེབས་སྐབས་འཐུས་མིའི་གྲུབ་ཆ་ཚང་ཡོད་སྟབས་ཁྲིམས་གཞི་བཅོས་བསྒྱུར་དེར་འོས་བསྡུ་བྱེད་ཐུབ་ཡོད་འདུག
ཧོང་ཀོང་གཞུང་གི་ཁ་གཏད་ལས་འགུལ་ཚོགས་པའི་མགྲིན་ཚབ་པ་ཁྲིན་ཆན་ཡེན་ (Chen Qianying) གྱིས། དེ་རིང་གནས་ཚུལ་འདིས་སྲིད་གཞུང་ལ་ར་སྤྲོད་བྱས་ཡོད་པ་ཞིག་ནི། གལ་སྲིད་ཁྱོད་ཀྱིས་ཁས་ལེན་༼རྒྱ་ནག་དང་དབྱིན་གཞུང་གི་མཉམ་འབྲེལ་ཆང་ཡིག་༽ལ་རྒྱབ་འགལ་བཏང་པ་དང་། ཁས་ལེན་ནང་གཏན་ཁེལ་བྱས་པའི་འོས་བསྡུའི་གནང་ཕྱོགས་ལག་བསྟར་མ་བྱས་པ་ཡིན་ན། ཧོང་ཀོང་བས་རྒྱ་ནག་དབུས་ལ་དེ་ལྟར་བྱ་ཆོག་ཅེས་བཤད་ཕོད་པ་ཞིག་མཚོན་པ་མ་ཟད། ཧོང་ཀོང་བས་མུ་མཐུད་དུ་དབང་ཆའི་འཐབ་རྩོད་བྱ་རྒྱུ་ཡིན་པ་དང་། དུས་ནམ་ཡང་དཔའ་ཞུམ་རྒྱུ་མིན་པ་སོགས་བརྗོད་འདུག
སློབ་ཕྲུག་ལས་འགུལ་ཚོགས་པའི་ཚོགས་འདུ་སྡུད་མཁན་ཧོང་ཀྲེ་ཧྥིན་ (Huang Zhifeng) གྱིས་ད་རེབ་གྲོས་ཚོགས་ནང་ཁྲིམས་གཞི་དེར་བཅོས་བསྒྱུར་ཐུབ་མེད་པ་དེར་རྒྱལ་ཁ་དང་ཕམ་ཁ་གང་ཡང་ཡོད་པ་མ་རེད། “ངས་བལྟས་ན་དེ་རིང་ཆབ་སྲིད་བསྒྱུར་བཅོས་གཏན་འབེབས་མ་བྱུང་པ་དེར་ང་ཚོར་མཚོན་ན་རྒྱལ་ཁ་མེད་ལ་ཕམ་ཁ་ཡང་མེད་པ་ཞིག་རེད། ང་ཚོས་འདོད་པ་ཆུང་ཆུང་ཞིག་འགྲུབ་པར་དགའ་ཚོར་ཆེན་པོ་བྱེད་མི་རུང་། གང་ཡིན་ཞེ་ན་དམངས་གཙོ་ཚོགས་པས་རྩོད་ལེན་བྱེད་བཞིན་པ་ནི་ཆབ་སྲིད་བསྒྱུར་བཅས་ཀྱི་གྲོས་གཞི་ལག་བསྟར་གཏན་འབེབས་མ་བྱུང་བ་གཅིག་པུ་མ་ཡིན་པར། མ་འོངས་པར་ད་དུང་ལས་དོན་མང་པོ་ཞིག་མུ་མཐུད་རྩོད་ལེན་བྱེད་རྒྱུ་ལྷག་ཡོད་པ་དང་། དེར་བརྟེན། ང་ཚོས་དགའ་སྟོན་རྟེན་འབྲེལ་ཞུ་རྒྱུའི་དུས་ཚོད་སྔ་དྲགས་པ་རེད། ང་ཚོའི་དམིགས་ཡུལ་ལ་ད་དུང་རྒྱང་ཐག་ཧ་ཅང་རིང་པོ་འདུག” ཅེས་སོགས་བརྗོད་འདུག
ཁྲིམས་གཞི་དེ་གཏན་འབེབས་མ་ཐུབ་པའི་ཐད་རྒྱ་ནག་གི་ཀོང་ཨོ་ལས་དོན་གཞུང་སྒྲུབ་ཁང་གི་མགྲིན་ཚབ་པས། ཧོང་ཀོང་གྲོས་ཚོགས་ནང་གི་མཇུག་འབྲས་འདིས་ཧོང་ཀོང་མི་མང་གི་ལྟ་བར་རྒྱབ་འགལ་བྱས་ཡོད་པ་མ་ཟད། རྒྱ་ནག་དབུས་གཞུང་གི་རེའང་སྟོང་ཟད་དུ་བཏང་ཡོད་པ་དང་། ཧོང་ཀོང་གི་དམངས་གཙོའི་འཕེལ་རིམ་ལའང་གནོད་སྐྱོན་ཚབས་ཆེན་བཟོས་ཡོད་སྐོར་སོགས་བཀོད་འདུག
དེ་བཞིན། རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་རྒྱུན་ལས་གཞུང་སྒྲུབ་ཁང་གི་མགྲིན་ཚབ་པས་ཀྱང་། ཧོང་ཀོང་གྲོས་ཚོགས་ཀྱི་ཐག་གཅོད་དེས་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་ཐག་གཅོད་རྩ་མེད་བཏང་ཡོད་པ་དང་། ཁོ་ཚོས་ཁེ་ཕན་ཕྲན་བུར་བལྟས་ཏེ་ཧོང་ཀོང་གི་དམངས་གཙོ་འཕེལ་རིམ་དང་འཚོ་བ་དར་རྒྱས་སོགས་ལ་གནོད་སྐྱོན་ཆེན་པོ་བཟོས་ཚུལ་བརྗོད་འདུག
པེ་ཅིན་བརྒྱུད་ལམ་ལྟ་ཞིབ་པ་ཐེན་ཆི་ཀྲོང་ (Tian Qizhuang) གིས་དབྱེ་ཞིབ་བྱས་པར། ད་རེབ་ཧོང་ཀོང་གྲོས་ཚོགས་ནང་ཁྲིམས་གཞི་བཅོས་བསྒྱུར་བྱེད་ཐུབ་མེད་པ་དེས། རྒྱ་ནག་གཞུང་ལ་ཉེན་བརྡ་བཏང་བ་ཞིག་ཆགས་ཡོད་པ་མ་ཟད། ཧོང་ཀོང་གྲོས་ཚོགས་ཀྱིས་ཐེངས་འདིར། རྒྱ་ནག་དབུས་གཞུང་གི་ཐག་གཅོད་ལྟར་གཏན་འབེབས་མ་གནང་དེ་དགའ་འོས་པའི་དོན་དག་ཅིག་ཡིན་པ་དང་། མ་འོངས་པར་རྒྱ་ནག་དམངས་གཙོའི་ཕྱོགས་སུ་སྐྱོད་པའི་ལས་དོན་བཟང་བོ་ཞིག་ཀྱང་ཆགས་ཡོད་པ་རེད། རྒྱ་ནག་གི་མགོ་ཁྲིད་ཚོས་དུས་རྒྱུན་པར་ཧོང་ཀོང་བདག་བཟུང་བྱེད་འདོད་བྱེད་ཀྱིན་ཡོད་ཀྱང་། ཐེངས་འདིའི་ཧོང་ཀོང་གྲོས་ཚོགས་ནང་གི་གནས་ཚུལ་དེས་མགོ་ཁྲིད་ཚོར་ཉེན་བརྡ་ཡག་པོ་ཞིག་བཏང་ཡོད་པ་རེད། ཁོ་ཚོས་གནས་སྟེང་འདིའི་འོག་ནས་རྒྱ་གཞུང་གིས་རྒྱལ་སྤྱིའི་སྟེང་གི་འཛམ་གླིང་རིན་ཐང་ལ་འབྲེལ་མཐུད་བྱ་རྒྱུ་དང་། དངོས་གནས་དམངས་གཙོའི་འཕེལ་ཕྱོགས་ལ་འབྲེལ་བ་བྱ་རྒྱུའི་རིན་ཐང་ཧ་གོ་དགོས་པའི་རེ་བ་ཡོད། ཅེས་སོགས་བརྗོད་འདུག
