དེ་རིང་བྷེ་བྷེ་སི་གསར་ཁང་གིས་གནས་ཚུལ་སྤེལ་བ་ལྟར་ན། ཕྱི་ཚེ་ ༡༨ ཉིན་རྒྱལ་ས་ཝ་ཞིན་ཊོན་དུ་ཨ་རི་དང་རྒྱ་ནག་རྒྱལ་ཁབ་གཉིས་ཀྱི་དཔོན་རིགས་ཁག་ཅིག་ཐུག་འཕྲད་བྱས་ཏེ། རྒྱལ་ཁབ་གཉིས་བར་དུ་འཕེལ་བཞིན་པའི་རེ་དོགས་དང་རྩོད་གླེང་འདུམ་འགྲིག རྒྱལ་ཁབ་གཉིས་ཀྱི་འབྲེལ་ལམ་བསྐྱར་གསོ་བཅས་ཀྱི་སྐོར་ལ་གྲོས་མོལ་བྱས་ཡོད་འདུག
ཨ་རི་དང་རྒྱ་ནག་གཉིས་ཀྱིས་ཞི་བདེ་རྒྱ་མཚོའི་མཐའ་ཁུལ་རྩོད་གླེང་བྱས་ཏེ། ད་ལྟའི་བར་རྒྱལ་ཁབ་གཉིས་ཀྱི་འབྲེལ་ལམ་ཐད་དངངས་འཚབ་ཆེན་པོ་ཆགས་ཡོད་པ་དང་། རྒྱ་ནག་གིས་ལྷོ་རྒྱུད་མཚོ་ཁུལ་གྱི་བྱེ་གླེང་དང་མཚོ་གླེང་ཁག་ཅིག་ནང་འཛུགས་སྐྲུན་བྱས་རྗེས། པེ་ཅིན་གཞུང་གིས་དེང་སྐབས་ཁོ་ཚོས་ཨར་ལས་འཛུགས་སྐྲུན་མཚམས་འཇོག་བྱས་ཡོད་སྐོར་བརྗོད་འདུག་ལ། ཟླ་འདིའི་ཚེས་ ༡༦ ཉིན་རྒྱ་ནག་གི་ཕྱི་སྲིད་མགྲིན་ཚབ་པ་ལུ་ཁང་ཟེར་བས། མི་འགྱངས་པར་རྒྱ་ནག་གི་ལྷོ་རྒྱུད་གླིང་ཕྲན་དུ་འཛུགས་སྐྲུན་ལས་གཞི་ལེགས་འགྲུབ་འབྱུང་རྒྱུ་ཡིན་ཚུལ་བརྗོད་ཡོད་སྟབས། ཨ་རིའི་དཔོན་རིགས་ཚོར་བློ་ཕམ་ཆེན་པོ་བྱུང་ཡོད་ལུགས་བརྗོད་འདུག
གཟའ་འཁོར་རྗེས་མར། རྒྱ་ནག་གི་དཔོན་རིགས་ཁག་ཅིག་ཨ་རིའི་རྒྱལ་ས་ཝ་ཞིན་ཊོན་དུ་སྐྱོད་དེ། རྒྱལ་ཁབ་གཉིས་བར་གྱི་དམག་དོན་དང་དཔལ་འབྱོར་འདུ་འགོད་ཐད་གྲོས་མོལ་བྱ་རྒྱུ་ཡིན་པ་མ་ཟད། སྐབས་དེར་རྒྱ་ནག་གི་ལྷོ་རྒྱུད་མཚོ་ཁུལ་རྩོད་གླེང་སྐོར་ལའང་གྲོས་མོལ་བྱེད་འཆར་ཡོད་པ་དང་། ཕྱི་ཟླ་ ༩ པའི་ནང་རྒྱ་ནག་གི་སྲིད་འཛིན་ཞི་ཅེན་ཕེན་ཨ་རིའི་རྒྱལ་ས་ཝ་ཞིན་ཊོན་དུ་བསྐྱོད་དེ། ཕྱོགས་གཉིས་ཀྱི་ཚོང་དོན་དང་དམིགས་བསལ་ཞི་བདེ་རྒྱ་མཚོའི་མཐའ་ཁུལ་རྩོད་གླེང་སྐོར་ལ་གྲོས་མོལ་བྱེད་རྒྱུ་ཡིན་འདུག
ཨ་རི་གཞུང་གིས་བརྗོད་དོན་ལྟར་ན། ཉེ་ལམ་ནས་རྒྱ་ནག་གིས་རང་གི་མངའ་ཁོངས་སུ་གླེང་གིན་པའི་ལྷོ་རྒྱུད་མཚོ་ཁུལ་ གྱི་གླིང་ཕྲན་ ༢༠༠༠ ལས་བྱེ་གླིང་དང་མཚོ་གླིང་ཁག་ཅིག་ཏུ་ཨར་ལས་འཛུགས་སྐྲུན་བྱས་ཡོད་ཚུལ་བརྗོད་ཀྱང་། རྒྱ་ནག་གཞུང་གིས་དེའི་ཐད། ཁོ་ཚོས་གླིང་ཕྲན་དེ་དག་ལ་འཛུགས་སྐྲུན་བྱེད་དོན། མཚོ་ཐོག་སྐྱེལ་འདྲེན་དང་མཚོ་ཐོག་འགྲུལ་བཞུད་སོགས། འགྲོ་བ་མིའི་རིགས་ཀྱི་བདེ་སྡུག་འགན་སྲུང་བྱ་ཆེད་ཡིན་ལུགས་ཐབས་མཁས་པོས་རྗོད་ཀྱི་ཡོད་ཀྱང་དོན་དམ་ཐོག་རྒྱ་ནག་གིས་གླིང་ཕྲན་དེ་དག་འཛུགས་སྐྲུན་བྱས་ཏེ། དམག་དཔུང་འབོར་ཆེན་འགྲེམ་འཇོག་བྱེད་འཆར་ཡོད་པ་གསལ་བཤད་བྱས་མེད་པ་མ་ཟད། རྒྱ་ནག་གིས་རང་གི་ལྷོ་རྒྱུད་མཚོ་ཁུལ་འཛུགས་སྐྲུན་བྱས་པ་དེས། ཧྥེ་ལེ་ཕེན་དང་ཝེ་ཋི་ནམ་གཙོས། ཨ་རི་དང་ལྷོ་ཤར་ཨེ་ཤ་ཡའི་རྒྱལ་ཁབ་ཁག་ལ་སེམས་ཁྲལ་ཆེན་པོ་བསླངས་ཡོད་སྟབས། ཨ་རི་གཞུང་གིས་གནད་དོན་དེའི་ཐད་འགོག་རྒོལ་བྱེད་ཀྱི་ཡོད་པ་དང་། ཨ་རིའི་བདེ་སྲུང་དྲུང་ཆེ་ཨ་ཞེ་ཊོན་ཁར་ཌར་ལགས་ཀྱིས་ངོ་སྤྲོད་གནང་དོན་ལྟར་ན། རྒྱ་ནག་གཞུང་གིས་ཅི་བཤད་ལ་མ་ལྟོས་པར། ཨ་རིའི་མཚོ་དམག་དང་མཁའ་དམག་གིས་མུ་མཐུད་དུ་རྒྱ་ནག་གི་ལྷོ་རྒྱུད་མཚོ་ཁུལ་ལ་རྟོག་ཞིབ་ནན་མོ་བྱེད་ཀྱི་ཡོད་སྐོར་བརྗོད་འདུག
