གཞུང་དམངས་ཡོངས་ཀྱིས་༧གོང་ས་མཆོག་དགུང་གྲངས་ ༨༠ བཞེས་པའི་གྱ་སྟོན་སྲུང་གཙི་ཞུས།

དེ་རིང་དྷ་ས་གཙུག་ལག་ཁང་དུ། བོད་མིའི་སྒྲིག་འཛུགས་དང་དགེ་ལུགས། མདོ་སྨད་ཆོལ་ཁ་བཅས་ཐུན་མོང་གིས་༧གོང་ས་མཆོག་ལ་བརྟེན་བཞུགས་ཕུལ་བ་དང་། དེའི་རྗེས་གཙུག་ལག་ཁང་གི་ཆོས་རྭའི་ནང་༧གོང་ས་མཆོག་གི་སྐུའི་གྱ་སྟོན་གཞུང་འབྲེལ་ཐོག་སྲུང་གཙི་གནང་སྟེ། སྲིད་སྐྱོང་གཙོས་པའི་རྒྱ་གར་དབུས་གཞུང་གི་སྐུ་ཚབ་དང་ཧི་མ་ཅལ་དང་ཨ་རུ་ན་ཅལ་བཅས་ཀྱི་སྐུ་ཚབ་རྣམ་པས་གསུང་བཤད་གནང་ཡོད།

དེ་རིང་སྔ་དྲོའི་ཆུ་ཚོད་ ༨ ཐོག་དྷ་ས་ཐེག་ཆེན་གཙུག་ལག་ཁང་གི་རྟེན་མཆོག་སྤྱན་སྔའི་དྲུང་དུ། བོད་མིའི་སྒྲིག་འཛུགས་དང་རི་བོ་དགེ་ལུགས་པ། མདོ་སྨད་ཆོལ་ཁ་བཅས་ཐུན་མོང་ཐོག་༧གོང་ས་མཆོག་ལ་བརྟན་བཞུགས་རྒྱས་པ་ཞིག་བསྟར་འབུལ་ཞུས་རྗེས། སྔ་དྲོའི་ཆུ་ཚོད་ ༡༠།༣༠ ཐོག་གཙུག་ལག་ཁང་གི་ཆོས་རའི་ནང་། ༧གོང་ས་མཆོག་དགུང་གྲངས་ ༨༠ བཞེས་པའི་གྱ་སྟོན་དང་འབྲེལ་བོད་མིའི་སྒྲིག་འཛུགས་ཀྱི་གཞུང་འབྲེལ་ཐོག་བོད་ལུགས་ལྟར་༧གོང་ས་མཆོག་གི་སྐུའི་འཁྲུངས་སྐར་དུས་སྟོན་སྲུང་གཙི་གནང་སོང་།

མཛད་སྒོའི་ཐོག་༧གོང་ས་མཆོག་དབུ་བཞུགས་ཐོག ས་སྐྱ་གོང་མ་རིན་པོ་ཆེ་མཆོག་དང་དགའ་ལྡན་ཁྲི་རིན་པོ་ཆེ་མཆོག དཔལ་རྒྱལ་ཀརྨ་པ་རིན་པོ་ཆེ། གཡུང་དྲུང་བོན་གྱི་དབུ་བླ་སྨན་རིའི་ཁྲི་འཛིན་རིན་པོ་ཆེ་མཆོག་བཅས་བོད་ཀྱི་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང་མཁན་སྤྲུལ་རྣམ་པ། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་དམངས་གཙོའི་ཀ་བ་གསུམ་གྱི་མཛད་གཙོ་ལས་ཟུར་རྣམ་པ་དང་། བོད་མི་མང་སྤྱི་འཐུས་ཚོགས་གཙོ་གཞོན་གྱིས་དབུས་སྤྱི་འཐུས་རྣམ་པ། གཞན་ཡང་། ཆེ་བསྟོད་སྐུ་མགྲོན་རྒྱ་གར་དབུས་ནང་སྲིད་ལས་ཁུངས་ཀྱི་བློན་ཆེན་གཞོན་པ་སྐུ་ཞབས་ཀི་རིན་རི་ཇི་ཇུ་(Kiren Rijiju)མཆོག་དང་། དབུས་ཡུལ་སྐོར་སྤྲོ་འཆམ་དང་རིག་གཞུང་བློན་ཆེན་སྐུ་ཞབས་མཱ་ཧེ་ཤར་མཱ་མཆོག དེ་བཞིན་ཨ་རུ་ཎཱ་ཅལ་མངའ་སྡེའི་བློན་ཆེན་སྐུ་ཞབས་ནཱ་ཌམ་ཊུ་ཀེ་(Nabam Tuki)མཆོག་དང་། མངའ་སྡེའི་ཡུལ་སྐོར་སྤྲོ་འཆམ་དང་རིག་གཞུང་བློན་ཆེན་པདྨ་མཁའ་འགྲོ་ལགས། ཧི་མ་ཅལ་མངའ་སྡེའི་གྲོས་ཚོགས་འཐུས་མི། ཨི་ཊ་ལིའི་ (Italian radical party)ཚོགས་པའི་ཚོགས་གཙོ་སྐུ་ཞབས་མཱ་ཁུར་བྷ་ནེ་མི་(Marco Pannella)ལགས་སོགས་བོད་དོན་རྒྱབ་སྐྱོར་བ་དང་། དེ་བཞིན། དྷ་ས་ཉེ་ཁུལ་གྱི་དགོན་སྡེ་དང་སློབ་གྲྭ་ཁག་གི་དགེ་སློབ་དང་། དྷ་ས་ཁུལ་གྱིས་གཙོས་རྒྱ་བལ་འབྲུག་གསུམ་སོགས་ཡུལ་ལུང་གང་ས་ནས་ཡོང་བའི་སེར་སྐྱ་མི་མང་བཅས་ཁྱོན་མི་གྲངས་ ༨༠༠༠ ཡས་མས་འཛོམས་འདུག

དུས་ཆེན་གྱི་མཛད་སྒོའི་ཐོག་ཨ་རུ་ཎཱ་ཅལ་མངའ་སྡེ་གཞུང་གིས་༧གོང་ས་མཆོག་གི་རླབས་ཆེན་གྱི་མཛད་པ་འཕྲིན་ལས་ལ་ཆེད་བསྟོད་དུ་ཇོ་བོ་ཤཀྱ་མུ་ནེའི་སྐུ་ཆེན་པོ་ཞིག་དང་ཕྱག་རྟགས་འབུལ་བཞེས་དང་། འབྲས་ལྗོངས་མངའ་སྡེའི་བློན་ཆེན་མཆོག་གི་གསུང་འཕྲིན་སྒྲོག་སྦྱངས། གཞན་བོད་ཆོལ་ཁ་གསུམ་གྱི་གཞས་སྣ་འཁྲབ་བཅས་གནང་སོང་བ་མ་ཟད། ༧གོང་ས་མཆོག་གིས་དབུས་བླ་ཆེན་རྣམ་པ་ལྷན་བཞུགས་ཀྱིས་གཙུག་ལག་ཁང་གི་ཆོས་རའི་ནང་ཉིན་གུང་གི་གསོལ་ཚིགས་ལྷན་བཞེས་གནང་སོང་།

གཞུང་འབྲེལ་གྱ་སྟོན་མཛད་སྒོའི་སྟེང་མཛད་སྒོའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་༧གོང་ས་མཆོག་སྐུ་ཚེ་ཡུན་རིང་བརྟན་པའི་གསོལ་འདེབས་ཞུ་དོན། ༧མགོན་པོ་གང་ཉིད་ཀྱིས་ཐུགས་བརྩེ་བ་ཆེན་པོས་བཀའ་སློབ་ལམ་སྟོན་བསྩལ་བ་རྣམས་བཀའ་བཞིན་སྒྲུབ་ནི་བདག་ཅག་དབུ་མང་ཡོངས་ནས་འབད་བརྩོན་སྔར་ལྷག་ཞུ་རྒྱུར་དམ་བཅའ་འཇོག་རྒྱུ་དང་། ༧མགོན་པོ་གང་ཉིད་བདག་ཅག་ཡོངས་ཀྱི་མགོན་དཔུང་དམ་པར་སྐུ་ཚེ་ཞབས་པད་སྐལ་བརྒྱར་བརྟན་པའི་གསོལ་འདེབས་དང་། ལྷག་པར་ལོ་ཤས་གོང་སྐྱབས་མགོན་ཆེན་པོ་གང་ཉིད་ནས་དགུང་གྲངས་ ༡༡༣ ལ་བཞུགས་རྒྱུའི་བཀའ་བཞེས་བཟང་པོ་གནང་ཡོད་པ་དེར་འགྱུར་བ་གཏན་ནས་མེད་པའི་གསོལ་འདེབས་ནན་པོ་ཞུ་ཡི་ཡོད། གུས་སྐྱབས་འོག་པ་ཡང་༧གོང་ས་ཆེན་པོ་གང་ཉིད་ཀྱི་དབུ་ཁྲིད་འོག་བོད་བསྟན་སྲིད་མི་རིགས་ལ་ཞབས་ཞུ་སྒྲུབ་པའི་གོ་སྐབས་དེ་ཤིན་ཏུ་སྐལ་བ་བཟང་པོ་ཡིན་ཞེས་བཀའ་དྲིན་བསམ་ཤེས་ཡོད་ལགས་པ་བཅས། མཐའ་དོན་༧གོང་ས་མཆོག་གི་བཞེད་དགོངས་མཐའ་དག་ལྷུན་གྱིས་འགྲུབ་པའི་སྨོན་འདུན་ཤུགས་དྲགས་ཞུ་རྒྱུ་ཡིན། ཞེས་ཡིག་ཐོག་གི་གསུང་བཤད་མདོ་བསྡུས་ཤིག་གནང་སོང་།

ཨི་ཊ་ལིའི་ར་ཌི་ཀལ་ཚོགས་པ་(Italian Radical Party)ཚོགས་པའི་ཚོགས་གཙོ་ལགས་ཀྱིས་སྐད་སྒྱུར་བརྒྱུད། བོད་མིའི་འདི་ཕྱིའི་སྐྱབས་མགོན་ཏཱ་ལའི་བླ་མ་མཆོག་གིས་བོད་མི་ཙམ་མིན་པར་ཧན་མི་རིགས་ཚུད་པའི་མི་ཚང་མའི་ཆེད་དུ་ཐོབ་ཐང་དང་རང་དབང་བརྩོན་ལེན་གནང་བ་དེ་ཧ་ཅང་གལ་ཆེན་པོ་ཡིན་ལ། ཁོང་གིས་མི་རྣམས་ལ་རང་ཉིད་ལ་ཇི་ལྟར་བརྩེ་བ་ལྟར་གཞན་ལའང་དེ་བཞིན་བྱམས་སེམས་བཅང་དགོས་ལ། དེ་ཡང་རང་ཉིད་ཀྱི་གཉེན་ཙམ་མ་ཟད་དགྲ་བོ་ལའང་བྱམས་སེམས་བཅང་དགོས་པའི་སློབ་སྟོན་གནང་ཡོད། དེ་རིང་ཚང་མ་མཉམ་དུ་འཛོམས་པ་དེ་དགའ་སྐྱིད་ལ་ལོངས་སུ་སྤྱོད་པ་དང་། དགྲ་བོ་ལ་ངོ་རྒོལ་བྱེད་ཀྱི་ཡོད་པའི་རྣམ་འགྱུར་བསྟན་པ་མིན་པར་ང་ཚོ་ཚང་མས་མཉམ་དུ་རེ་སྒུག་བྱེད་བཞིན་པ་མཐོང་དུ་འཇུག་པའི་ཆེད་དུ་ཡིན་སྐོར་སོགས་གསུངས་སོང་།

དེ་རྗེས་སྐུ་མགྲོན་གཙོ་བོ་རྒྱ་གར་དབུས་གཞུང་ཡུལ་སྐོར་སྤྲོ་འཆམ་དང་རིག་གཞུང་བློན་ཆེན་སྐུ་ཞབས་མཱ་ཧེ་ཤར་མཱ་མཆོག་གིས། ངས་༧སྐྱབས་མགོན་ཏཱ་ལའི་བླ་མར་རྒྱ་གར་བ་ཁྲི་སྟོང་མང་པོས་བསྐུར་བའི་སྐུ་གཟུགས་བདེ་ཐང་དང་མཛད་འཕྲིན་རྒྱས་བའི་སྨོན་ཚིག་འཁྱེར་ནས་ཡོང་ཡོད། འཛམ་གླིང་དང་འགྲོ་བ་མིའི་རིགས། བོད་མི་སྤྱི་བཅས་ཀྱིས་༧གོང་ས་མཆོག་གི་བྱིན་རླབས་ཞུ་བཞིན་ཡོད། ང་ཚོས་དཀོན་མཆོག་ལ་གསོལ་བ་སྨོན་ལམ་བཏབ་སྟེ། ཁྱེད་སྐུ་གཟུགས་གསལ་ཐང་དང་ཐུགས་སྤོབས་འཕེལ་ཏེ། འགྲོ་བ་མི་རིགས་ལ་མི་ཚེའི་བགྲོད་ལམ་དང་བློ་གྲོས་ཀྱི་ལམ་སྟོན་མུ་མཐུད་མཛད་པའི་སྐྱབས་འཇུག་ཞུ་བཞིན་ཡོད། འཛམ་བུ་གླིང་འདིས་ང་དང་ཁྱེད་ཟེར་བ་གཅིག་པུའི་བདེ་སྡུག་ཆེད་ཕྱག་ལས་གནང་མཁན་ཚོ་མིན་པར་འཛམ་གླིང་སྤྱི་དང་འགྲོ་བ་མིའི་རིགས་ལ་སེམས་ཁུར་གནང་མཁན་ཚོར་ཆེ་བསྟོད་ཞུས་ཏེ། ངོས་འཛིན་དང་གུས་བརྩི་ཞུ་བཞིན་ཡོད། རྒྱ་གར་དམངས་གཙོའི་རྒྱལ་ཁབ་འདིའི་ནང་ལ་༧གོང་ས་མཆོག་ཆིབས་སྒྱུར་བསྐྱངས་ཏེ་འགྲོ་བ་སྤྱིར་ཆོས་ཀྱི་བསླབ་ཚིག་བཟང་པོ་དག་སྦྱིན་གནང་མཛད་དེ་ནི་རླབས་ཆེན་གྱི་གཟི་བརྗིད་ཅིག་ཆགས་ཡོད། ཁོང་གིས་མ་ཧཱ་གྷན་དྷི་མཆོག་གིས་ལམ་སྟོན་མཛད་པའི་འཚེ་མེད་ཞི་བའི་ལྟ་གྲུབ་རྒྱུན་འཁྱོངས་གནང་སྟེ། འཛམ་གླིང་ཞི་བདེར་སྨན་པའི་ཕྱག་ལས་གནང་དང་གནང་བཞིན་ཡོད་སྟབས། ཁྱེད་ནི་ང་ཚོའི་སྡུག་བསྔལ་སེལ་མཁན་གྱི་སྐྱེས་མཆོག་དམ་པ་ཞིག་ཡིན། ཞེས་གསུངས་སོང་།

དེ་བཞིན་ཆེ་བསྟོད་སྐུ་མགྲོན་རྒྱ་གར་དབུས་གཞུང་ནང་སྲིད་བློན་ཆེན་གཞོན་པ་སྐུ་ཞབས་ཀི་རན་ཀི་ཇི་ཇུ་མཆོག་གིས། ང་ཚོ་ཆོས་ཕྱོགས་ཐོག་ནས་ཞེ་དྲགས་བསོད་ནམས་བཟང་པོ་རེད། གང་ཡིན་ཞེ་ན། ང་ཚོར་༧སྐྱབས་མགོན་ཏཱ་ལའི་བླ་མའི་བྱིན་རླབས་ཐོབ་ཡོད་པ་རེད། ང་ཚོས་མཐོང་འདོད་པ་ནི་འོད་མདངས་བཀྲ་བའི་སྐར་མ་འདི་དུས་རྟག་ཏུ་འཚེར་ཏེ། ང་ཚོར་ལམ་སྟོན་དང་བྱིན་རླབས་བསྩལ་རྒྱུ་ཁྱེད་ཀྱིས་ང་ཚོར་དྲན་སྐུལ་བྱས་ཡོད། ཁྱེད་ཀྱི་བརྩེ་བ་དང་སྙིང་རྗེའི་གསུང་ཚིག་གིས་འཇིག་རྟེན་ཡོངས་ཀྱི་འགྲོ་བ་མིའི་རིགས་ལ་ལམ་སྟོན་མཛད་ཡོད་པ་དང་། རྒྱ་གར་དང་རྒྱལ་སྤྱིའི་རྒྱལ་ཁབ་གང་དུ་ཡོད་ཀྱང་། ཁྱེད་ཀྱི་གསུང་འཕྲིན་གྱིས་འགྲོ་བ་མིའི་རིགས་ཀྱི་རང་གཤིས་སེམས་གཏིང་དུ་བཞད་ཡོད་པ་དང་། ཁྱེད་ནི་འཛམ་གླིང་གི་ཚབ་མཚོན་ཞིག་ཡིན་པ་ལས། ཆོས་ལུགས་ག་གེ་མོ་ཞིག་དང་སྤྱི་ཚོགས་ག་གེ་གོ་ཞིག་གི་ཚབ་མཚོན་གྱི་མེད་པ་མ་ཟད། ང་ཚོར་དུས་རྟག་ཏུ་བྱིན་རླབས་སྩོལ་བཞིན་ཡོད་སྟབས། ང་ཚོའི་ཕྲག་པར་འཁུར་བའི་འགན་འཁྲི་ནི་ཁྱེད་ཀྱི་སྐུ་ཚེ་སྐལ་རྒྱལ་བརྟན་རྒྱུའི་སྨོན་ལམ་ཞུ་རྒྱུ་དང་། ང་ཚོས་ཁྱེད་ཀྱིས་གསུངས་པའི་བྱམས་དང་སྙིང་རྗེ། བསླབ་བྱ་བཟང་པོ་དག་བློ་ཚིག་གཉིས་ཐོག་ནས་མུ་མཐུད་བདག་སྐྱོང་བྱ་རྒྱུ་ཡིན་ལ། དེ་རིང་འཛམ་བུ་གླིང་གི་འགྲོ་བ་མིའི་རིགས་ཡོད་དོ་ཅོག་གིས་ཁྱེད་སྐུ་ཚེ་ཡུན་རིང་བརྟན་པའི་སྨོན་ལམ་ཞུ་རྒྱུ་ཡིན། ཞེས་གསུངས་སོང་།

བརྟན་བཞུགས་བསྟར་འབུལ་ཞུས་རྗེས་༧གོང་ས་མཆོག་གིས་བཀའ་སློབ་གསུང་བཤད་གནང་དོན། བོད་རིགས་སྤྱི་བོ་གནམ་བསྟན་ཡོངས་སུ་རྫོགས་པས་ཧ་ལམ་ང་ལ་ཡིད་ཆེས་དང་བློས་འགེལ་གྱི་ཡོད་པ་རེད། ཚེ་རབས་མང་པོའི་ལས་དང་སྨོན་ལམ་གྱི་འབྲེལ་བ་ཟེར་བ་དེ་མར་བཞག ཚེ་འདི་ག་མཐོང་ཆོས་ཆ་ནས་བཞག་པ་ཡིན་ནའང་གང་ལྟར་ཧ་ལམ་ཡོངས་རྫོགས་ཀྱིས་ང་ལ་ཡིད་ཆེད་བྱས་ནས་བློས་འགེལ་གྱི་ཡོད་པ་རེད། དེ་འདྲ་ཡིན་དུས་ཙ་ནས་ད་ལྟ་བར་དུ་ང་ལོ་བརྒྱད་བཅུ་ལ་བསླེབས་བསྡད་ཡོད་པ་རེད། ད་ལྟ་ཡིན་ནའང་གཟུགས་པོ་བདེ་ཐག་ཆོད་ཡིན། ངས་ཨེམ་ཆི་དེ་འདྲ་བསྟན་མྱོང་། ཨེམ་ཆི་དེ་ཚོས་ད་དུང་ལོ་ ༢༠ ཏག་ཏག་བསྡད་ཡག་ལ་ཐེ་ཚོམ་མི་འདུག་ཟེར་ནས་དེ་འདྲ་བཤད་བསྡད་ཀྱི་འདུག དེར་བརྟེན། ཧ་ལམ་ལོ་བརྒྱད་བཅུ་ནས་ད་དུང་ལོ་བཅུ་ཕྱིན་ན་ལོ་དགུ་བཅུ་རེད། ད་ལྟ་འདིར་ལོ་བརྒྱད་བཅུ་ལོན་པའི་གྱ་སྟོན་ཟེར་ནས་ཁྱེད་རང་ཚོས་ཞེ་པོ་ཞིག་བཤད་ཀྱི་འདུག་གཱ རྗེས་མ་ལོ་དགུ་བཅུ་ལ་སླེབ་སྐབས་དགུ་སྟོན་ཟེར་བ་དེ་བྱེད་དགོས་རེད་དཱ། ཁྱེད་རང་ཚོ་སྤོ་བོ་སྤོ་མོ་ཚོས་རིག་པ་སྒྲིམ་ནས་འཆི་བདག་གཤིན་རྗེ་ཡོང་གི་འདུག་ཀྱང་ཨམ་ཚིགས་བསྡམས་ཏེ། ༧རྒྱལ་བ་རིན་པོ་ཆེའི་དགུ་སྟོན་བར་དུ་བསྡད་ཐུབ་པ་བྱ་རྒྱུ་ཡིན་བསམ་ནས་སེམས་ཤུགས་སྐྱེད་ཤོག་ཨཱ། ད་ལྟ་བོད་གངས་ཅན་ལྗོངས་ལ་རང་དབང་ཡོད་མ་རེད། དེ་འདྲ་ཡིན་དུས་ས་ཁུག་ལུང་ཁུག་དེ་འདྲ་ལ་དེ་རིང་ངའི་སྐྱེས་སྐར་གྱི་དུས་དྲན་ལ་ཚང་མས་སྨོན་ལམ་བརྒྱབ་པ་དང་དགའ་དགའ་སྐྱིད་སྐྱིད་བྱེད་ཀྱི་ཡོད་པ་རེད། ས་ཁུལ་མང་པོ་ཞིག་ལ་རང་དབང་མེད་སྟབས་འདི་བྱེད་ཆོག་གི་ཡོད་པ་མ་རེད། དེ་འདྲ་ཡིན་དུས་གང་ལྟར་སེམས་གྱི་ནང་ནས་དད་པ་དང་འདུན་པ་རྩེ་གཅིག་བྱས་ནས་ཡོད་པ་ཡིན་དུས། ཁྱེད་རང་ཚོ་གཞིས་ལུས་རྒྱ་ཆེའི་མི་མང་ཚོར་ཡིན་ནའང་ཚང་མར་ཐུགས་རྗེ་ཆེ་ཞུ་གི་ཡིན། ད་ལྟ་བར་དུ་ང་ཚོ་བོད་གངས་ཅན་པ་ཧ་ལམ་སྤྱི་བོ་གནམ་བསྟན་ཡོངས་སུ་རྫོགས་པས་ཆོས་ལ་དད་པ་ཡོད་ཀྱང་རུང་མེད་ཀྱང་། རུང་གང་ལྟར་མི་རིགས་ཀྱི་ཞེན་ཁོག་དང་མི་རིགས་ཀྱི་ཐོབ་ཐང་ཐོག་ལ་ཚང་མས་སེམས་ཤུགས་དང་འདུན་པ་གཅིག་མཐུན་རེད་འདུག ཅེས་གསུངས་སོང་།

རྟེན་བཞུགས་རྗེས་ཀྱི་གྱ་སྟོན་མཛད་སྒོའི་སྟེང་། ༧གོང་ས་མཆོག་གིས་ཁོང་སྐུ་ན་ཆུང་བའི་དུས་ནས་བཟུང་བོད་བསྟན་སྲིད་ཆེད་སྐུ་ལས་བསྐྱོན་པ་ཡིན་ལ་མུ་མཐུད་སྐྱོན་བཞིན་ཡོད་སྐོར་གསུངས་དོན། ཁྱེད་རང་ཚོས་ངར་བསྟོད་ར་འདྲ་པོ་བཏང་སྟེ་ངས་ཞེ་པོ་ཞིག་བྱེད་ཐུབ་ཀྱི་ཡོད་རེད་ཟེར་གྱི་འདུག དེ་འདྲ་གང་ཡང་མ་རེད་དཱ། དངོས་ཡོད་གནས་ཚུལ་ག་རེ་རེད་ལབ་ན། ང་མི་གཅིག་ཡིན་པའི་ཆ་ནས་མིའི་རྣམ་དཔྱོད་དེར་གང་འཚམ་ཞིག་བསམ་བློ་བཏང་། ཚན་རིག་པ་དང་གོ་བསྡུར་བྱས། དེ་བཞིན་ཉམས་མྱོང་བརྗེ་རེས་བྱས་ནས་བསམ་བློ་གང་འཚམ་ཞིག་བཏང་། དེའི་བསམ་བློ་གཏོང་ཡག་གི་ལྡེ་མིག་འདྲ་པོ་དེ་ནཱ་ལེནྜའི་རྒྱ་གར་གྱི་མཁས་པ་ཚོས་གསུངས་བཞག་པའི་ལྟ་གྲུབ་དེ་ཚོའི་ཐོག་ནས་བསམ་བློ་གཏོང་སྟངས་ཀྱི་སྒོ་འདྲ་པོ་ཞིག་ཕྱེ་ཡོང་གི་འདུག ལོ་བརྒྱད་བཅུ་ལ་བསླེབས་སོང་ལ་ད་ལྟ་བར་དུ་གང་ཡོང་ཅི་ཡོང་བྱས་པ་ཡིན། ད་དུང་ལུས་པོ་འདིས་ག་ཚོད་འཚོ་འཚོ་བར་དུ་ཧུར་ཐག་བྱེད་ཀྱི་ཡིན། རྣམ་རྒྱུན་ནས་ངས་སྨོན་ལམ་རྒྱག་ཡག་ལ། བདག་གི་ལུས་དང་དེ་བཞིན་ལོངས་སྤྱོད་དང་།། དུས་གསུམ་དགེ་ཚོགས་ཕུང་པོ་ཅི་བྱེད་པ།། མ་གྱུར་སེམས་ཅན་ཀུན་གྱི་དོན་གྱི་ཕྱིར། དེ་ནི་འཕངས་པ་མེད་པར་བཏང་བར་བྱ།། ཞེས་ཉིན་ལྟར་བསམ་བློ་དེ་བཏང་བསྡད་ཀྱི་ཡོད། དེ་གང་དྲན་བྱེད་ཀྱི་ཡིན། དེ་རིང་རྒྱ་གར་གྱི་སྐུ་མགྲོན་མི་སྣ་གལ་ཆེ་བ་དེ་འདྲ་བསླེབས་ཡོད་པ་རེད། ད་གིན་ཁྱེད་རང་གིས་གསུངས་སོང་། ངས་དེ་འདྲས་བཤད་བསྡད་ཡག་རྒྱ་གར་མཁས་པའི་གཞུང་ནས་རྙེད་པ་རེད། དེ་འདྲ་ཡིན་དུས་ང་ཚོའི་བསམ་བློ་གཏོང་ཡག་གི་རྒྱུ་ཆ་འདྲ་པོ་མང་པོ་ཞིག་ཕྱུག་པོ་ཡོད་བསྡད་པ་དེ་རྒྱ་གར་གྱི་རིག་གཞུང་ཆགས་བསྡད་ཡོད་པ་རེད། འཚམས་རེར་ངས་རྩེད་མོ་དང་སྦྲགས་བཤད་བསྡད་ཀྱི་ཡོད། ལོ་རྒྱུས་ཐོག་ནས་བརྩིས་ན་ཁྱེད་རང་ཚོ་འཕགས་པའི་ཡུལ་གྱི་མི་ཚོ་ཁྱེད་རང་ཚོ་ང་ཚོའི་དགེ་རྒན་རེད་ང་ཚོ་དགེ་ཕྲུག་རེད། དེ་རིང་ཁ་སང་ཤེས་ཚད་ཐོག་ནས་བཤད་པ་ཡིན་ན་དགེ་ཕྲུག་ཚོ་སྐྱོ་པོ་རང་ཡོད་མ་རེད་དཱ་ཟེར་ནས་བཤད་བསྡད་ཀྱི་ཡོད། གང་ལྟར་འཕགས་པའི་ཡུལ་གྱི་གནའ་རབས་ཀྱི་ཤེས་ཡོན་ཡོད་བསྡད་པ་དེར་རྒྱ་གར་བ་ཚོས་དོ་སྣང་བྱ་རྒྱུ་དེ་གལ་ཆེན་པོ་རེད། ཕྱི་དངོས་པོའི་ཁྲ་ཁྲ་ཟིང་ཟིང་ཁོ་ནར་མགོ་འཁོར་ནས་དེ་དང་མཉམ་དུ་ལྐོག་ཟ་རུལ་སུངས་གང་འཚམ་ཡོད་པ་ཞིག་གི་ཐོག་ནས་ཕྱིན་པ་ཡིན་ན་དེ་རྒྱ་གར་གྱི་ཞབས་འདྲེན་རེད། དངོས་གནས་དྲང་གནས་རྒྱ་གར་གྱིས་དེང་དུས་ཀྱི་དངོས་པོ་ཡར་རྒྱས་དང་དེ་དང་འབྲེལ་བའི་ཤེས་ཡོན་དགོས་རྒྱུ་དེ་མེད་ཐབས་མེད་པ་ཞིག་ཆགས་ཡོད་པ་མ་ཟད། དེ་དང་ཆབས་གཅིག་ལོ་སྟོང་ཕྲག་མང་པོའི་གོང་ནས་ཡོད་བསྡད་པའི་ནང་བསམ་བློའི་ཤེས་ཡོན་དེ་ཚོ་ཡིན་པ་ཡིན་ཡང་བསྐྱར་དུ་ཞིབ་འཇུག་བྱས་ནས་བསྐྱར་གསོ་བྱ་ཡག་དེ་གལ་ཆེན་པོ་རེད། ཅེས་དང་།

ཡང་ཁོང་གིས། ང་རང་ཚོ་བོད་པ་ཡིན་ཡང་དེ་དེ་བཞིན་བྱས་ནས་གནའ་རབས་ནས་ང་རང་ཚོར་ང་ཚོའི་མེས་པོ་ཚོས་དངོས་གནས་དྲང་གནས་བོད་པ་ཚོར་བསམ་བློ་གཏོང་ཡག་གི་རྒྱུ་ཆ་མང་པོ་ཞིག་བཞག་ཡོད་པ་རེད། ང་ཚོ་བོད་ཡིག་ལ་ཆ་བཞག་པ་ཡིན་ཡང་མི་འདྲ་བ་ཞིག་འདུག་གཱ དཔལ་ན་ལན་ཌའི་མཁས་པའི་ལྟ་སྒོམ་སྤྱོད་གསུམ་སྐོར་གྱི་འགྲེལ་བཤད་ཡོད་པ་དེ་འགས་བོད་ཡིག་དང་བོད་སྐད་ནང་ལ་འགྲེལ་བཤད་ཆ་ཚང་བརྒྱབ་ཐུག་ཡག་ཅིག་ཡོད་པ་རེད། སྐད་ཡིག་གཞན་དག་ནང་ལ་བརྒྱབ་ཐུག་ཡག་ཁག་པོ་ཞེ་དྲགས་རེད་བཞག འདི་བསམ་བློ་བཏང་བ་ཡིན་ན་ང་རང་ཚོ་བོད་པའི་སྐད་ཡིག་ལ་གཞི་ནས་ངོ་མཚར་སྐྱེ་ཡག་དང་གུས་པ་དང་སྤོབས་པ་སྐྱེ་ཡག་ཅིག་འདུག བོད་ཡིག་དང་བོད་སྐད་ཟ་མཁས་འཐུང་མཁས་ཤིག་གི་སྒང་ལ་ཕྱིན་པ་ཡིན་ན། དེང་དུས་ཀྱི་ཤེས་ཡོན་སྡེ་ཚན་ནང་ལོགས་ལ་བོད་སྐད་ཀྱི་འདང་གི་མ་རེད། ཁོ་བེད་སྤྱོད་བྱས་ཡོད་མ་རེད། ཡར་རྒྱས་ཕྱིན་ཡོད་མ་རེད། དེ་རྒྱུ་མཚན་དུ་བྱས་ནས་བོད་ཡིག་བསླབ་ནས་ཆོ་མི་འདུག མི་ཚེ་བསྐྱལ་ཡག་ལ་ཕན་ཐོགས་མི་འདུག་ལབ་ན་ནོར་འཁྲུལ་རེད། དེ་རིང་ཁ་སང་འཛམ་བུ་གླིང་འདིའི་སྒང་ལ་དངོས་པོ་ཡར་རྒྱས་ཚད་མཐོ་པོ་བསླེབས་པ་ཚོས་མ་འདང་ས་དེ་སེམས་ཀྱི་རྣམ་བཞག་ཆགས་ཡོད་སྟབས། འཛམ་བུ་གླིང་ཡོངས་རྫོགས་ལ་མ་འདང་སའི་གནས་ཚུལ་གཅིག་ཡོད་བསྡད་པ་དེ། ང་ཚོ་བོད་པའི་ཤེས་ཡོན་ཐོག་ནས་ཕར་སྣོན་ཕན་རྒྱག་ཐུག་པའི་ཆ་རྐྱེན་དང་ནུས་པ་ཡོད་པའི་བཟོ་འདྲ་པོ་ཞིག་འདུག ཁྱེད་རང་ཚོ་ཕྲུག་གུ་ཚོ་ཡིན་པ་ཡིན་ཡང་ཕྱི་ལོགས་ཀྱི་ཁྲ་ཁྲ་ཟིང་ཟིང་དེ་ཚོ་རྐྱང་རྐྱང་ལ་བསམ་བློ་མི་གཏོང་བར། ང་རང་ཚོའི་མེས་པོ་ཚོས་བཞག་པའི་ནང་སེམས་ཁམས་རིག་པའི་ཐོག་ལ་བཤད་བཞག་པ་དེ་ཚོའི་ཐོག་ལ་དོ་སྣང་མང་ཙམ་བྱེད་དགོས་པ་རེད་ཤེས་སོང་ངམ། ཅེས་གསུངས་སོང་།