མི་སྒེར་བ་ཞིག་ལ་བློ་ཕམ་དང་བསྟན་པ་སྤྱི་ལ་ཕན་པ་གཉིས་ཡང་ལྗིད་འགྱོག་དགོས།

དེ་རིང་ཉིན་རྒྱབ་ཚོགས་ཐེངས་བཅུ་གཉིས་པ་མཇུག་རྫོགས་པའི་མཛད་སྒོའི་སྟེང་༧གོང་ས་མཆོག་ཕེབས་ཏེ། མི་སྒེར་བ་གཅིག་ལ་བློ་ཕམ་བྱུང་པ་དང་བསྟན་པ་སྤྱི་ལ་ཕན་པ་གཉིས་ཡང་ལྗིད་འགྱོག་དགོས་པ་རེད། མི་གཅིག་ལ་བློ་ཕམ་བྱུང་པ་དེར་སྐྱོན་མི་འདུག བསྟན་པ་སྤྱིའི་མཚན་སྙན་གོང་དུ་བསྒྲིག་ཐུབ་པ་ཞིག་དགོས་ཀྱི་ཡོད་པ་རེད། ང་ཚོས་མི་སྒེར་ཞིག་གི་གདོང་ལ་བལྟས་ནས་ཟོན་བྱས། བསྟན་པ་སྤྱིར་མཚན་ཤས་བཟོས་ན་ཨོ་ཙམ་བྱས་ནས་བསྡད་ན་འགྲིག་གི་མ་རེད་ཅེས་གསུངས།

དེ་རིང་ཉིན་རྒྱབ་ཆུ་ཚོད་ ༡།༠༠ སྟེང་། དྷ་སའི་རྒྱ་གར་སུ་རི་ཡའི་གསོལ་མགྲོན་ཁང་དུ། བཟའ་ཕུར་བའི་ཉིན་ནས་ཚོགས་བཞིན་པའི་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་ཆོས་ཚོགས་ཐེངས་ ༡༢ པ་དེ་མཇུག་བསྒྲིལ་བའི་མཛད་སྒོ་ཞིག་ཚོགས་ཡོད་པ་དང་། ཚོགས་མགོན་དུ་༧གོང་ས་མཆོག་ཆིབས་བསྒྱུར་གྱིས་བཀའ་སློབ་གནང་སོང་།

ཐེངས་འདིའི་ཚོགས་ཆེན་ཐོག་རྒྱལ་བའི་བསྟན་པ་འཛིན་སྐྱོང་སྤེལ་གསུམ་དང་འབྲེལ་བའི་ཐད་གྲོས་ཆོད་ཁག་ ༨ གཏན་འབེབས་གནང་ཡོད་པ་དང་། བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱིས་དོལ་རྒྱལ་རྗེས་འབྲང་པས་༧གོང་ས་མཆོག་ལ་མངོན་སུམ་འཛེམ་མེད་ཀྱིས་མཚན་སྨད་ངོ་རྒོལ་ཞུ་བཞིན་པར་ངོས་ལེན་མེད་པའི་ཡོངས་ཁྱབ་གསལ་བསྒྲགས་ཤིག་ཀྱང་སྤེལ་སོང་།

མཇུག་བསྡོམས་མཛད་སྒོའི་སྟེང་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ཚོགས་འདུ་དང་འབྲེལ་བའི་གསུང་བཤད་གནང་སྐབས། ཐེངས་འདིའི་ཆོས་ཚོགས་ཐོག་ཆོས་བརྒྱུད་ཆེན་མོ་བཞི་ནས་སྐུ་ཚབ་ ༡༠ དང་བོན་ནས་ ༡༠། ཇོ་ནང་ནས་ ༢ བཅས་གདན་འདྲེན་ཞུས་ཡོད་པ་མ་ཟད། བླ་ཆེན་གཉིས་ཀྱི་སྐུ་ཚབ་མ་གཏོགས་བླ་ཆེན་གཞན་རྣམ་པ་སྐུ་ངོ་མ་འདིར་ཕེབས་ཡོད་སྟབས། ད་ཐེངས་ཀྱི་ཚོགས་འདུ་འདི་ཞེ་དྲགས་གཟི་བརྗིད་ཆེན་པོ་དང་རྩ་ཆེན་པོ་བྱུང་སོང་། སྤྱིར་བཏང་བཀའ་མོལ་དེ་ཚོའང་འཚེར་སྣང་མེད་པའི་ཐོག་ནས་དགའ་དགའ་སྤྲོ་སྤྲོའི་ངང་ནས་བཀའ་བསྡུར་གནང་སོང་། ཐོག་མར་ང་ཚོས་ཉི་མ་གསུམ་ཏོག་ཙམ་རིང་དྲགས་སོང་བ་ཞིག་བསམ་བློའི་འཁོར་སོང་ཡང་། དངོས་གཞིའི་སྐབས་ལ་ཉི་མ་གསུམ་དེ་ཏོག་ཙམ་ཐུང་དྲགས་སོང་བསམ་པའི་བཀའ་སྡུར་ལྷུག་པོ་དང་ཚང་མས་ཆ་ཤས་ཡག་པོ་བླངས་སོང་ཞེས་༧གོང་ས་མཆོག་ལ་སྙན་སེང་ཞུ་རྒྱུ་ཡིན། བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱིས་ཚོགས་འདུ་འདི་ཞེ་དྲགས་རྩ་ཆེན་པོ་དང་གལ་ཆེན་པོ་ཞིག་ལ་རྩི་བཞིན་ཡོད། འདིའི་ནང་བཀའ་སྡུར་གནང་བ་དང་གཏན་འབེབས་གནང་བའི་གྲོས་ཆོད་རྣམས་ཆོས་རིག་ལས་ཁུངས་ངོས་ནས་མུ་མཐུད་ལག་ལེན་བསྟར་རྒྱུ་དང་། དེ་བཞིན་ཆོས་བརྒྱུད་ཁག་ཚང་མས་ད་རེབ་ཀྱི་ཚོགས་ཆེན་འདི་རྩ་ཆེན་པོ་དང་གལ་ཆེན་པོར་འཛིན་གྱི་རེད་བསམ་གྱི་འདུག གང་ཡིན་ཟེར་ན། འདིའི་ནང་བླ་ཆེན་དང་སྐུ་ཚབ་ཚང་མ་ཕེབས་ནས་གོ་བསྡུར་ལྷུག་པོ་གནང་སྟེ་ཐུགས་མཐུན་ཁྲིམས་གཙང་བྱུང་བ་དེར། ཆོས་བརྒྱུད་ཚང་མས་རྩ་ཆེན་པོ་དང་གལ་ཆེན་པོ་ཞིག་བརྩི་གི་རེད་བསམ་གྱི་འདུག སྤྱིར་བཏང་དྷ་རམ་ས་ལར་ཚོགས་འདུ་རབ་དང་རིམ་པ་མང་པོ་ཞིག་ཚོགས་ཀྱི་ཡོད་པ་རེད། ཡིན་ཡང་ད་ཐེངས་ཀྱི་ཚོགས་ཆེན་འདི་རྩ་ཆེ་ཤོས་དང་གལ་ཆེ་ཤོས་ཤིག་ཡིན་པར་ང་ཚོ་ཆོས་རིག་ལས་ཁུངས་ངོས་ནས་རྩི་བཞིན་ཡོད། གང་ཡིན་ཟེར་ན། ༧གོང་ས་མཆོག་དབུར་བཞུགས་པའི་ཐོག་ཆོས་བརྒྱུད་ཁག་གི་དབུ་བླ་རྣམ་པ་དང་གདན་ས་ཁག་གི་མཁན་པོ་གཙོས་བསྟན་འཛིན་གྱི་སྐྱེས་ཆེན་དམ་པ་མང་པོ་ཞིག་འདིར་ཕེབས་ཏེ། བཀའ་བསྡུར་གནང་རྒྱུ་དེ་བོད་བསྟན་སྲིད་མི་རིགས་ཀྱི་ཆེད་དུ་རྩ་ཆེན་པོ་དང་གལ་ཆེན་པོ་ཞིག་ཏུ་རྩི་བཞིན་ཡོད་སྟབས། ད་རེབ་ཞེ་དྲགས་ཡག་པོ་བྱུང་སོང་། སྔོན་ཆད་སྐབས་བཅུ་གཅིག་གི་ཆོས་ཚོགས་སྐབས་གྲོས་ཆོད་ ༨ བཞག་ཡོད་པ་ལྟར། ཆོས་རིག་ལས་ཁུངས་ཀྱིས་བརྒྱ་ཆ་བརྒྱ་ལག་ལེན་བསྟར་བ་ཡིན། དེ་དེ་བཞིན་ད་ཐེངས་གྲོས་ཆོད་བཞག་པ་དག་ཀྱང་མ་འོངས་པར་ཆོས་རིག་ལས་ཁུངས་ངོས་ནས་ཆ་ཚང་ལག་ལེན་བསྟར་རྒྱུ་རེད་བསམ་གྱི་འདུག་ལ་བསྟར་དགོས་པ་ཞིག་ཀྱང་ཆགས་ཡོད། ཅེས་གསུངས་སོང་།

མཇུག་ཏུ་༧གོང་ས་མཆོག་གིས་བོད་ཀྱི་ཐུན་མོང་མ་ཡིན་པའི་སེམས་ཁམས་རིག་པའི་སྐོར་གྱི་རིག་གནས་ཁྱད་དུ་འཕགས་པ་དེ་ཕྱི་ལ་སྟོན་པའི་དུས་སུ་བསླེབས་ཡོད་སྐོར་བཀའ་གནང་དོན། ཆོས་ལུགས་མཐུན་སྒྲིལ་ཟེར་དུས་ཕན་ཚུན་གཅིག་གིས་གཅིག་ལ་ངོ་ཤེས་པ་དང་། ཆོས་བརྒྱུད་གཅིག་གིས་གཅིག་ལ་དཔེར་ན་གསར་མས་རྙིང་མ་མཐོང་ན་རྙིང་དྲི་ཁ་ཡི་འདུག་མདོག་མདོག་བྱས་ནས་ཕར་བཞག རྙིང་མས་གསར་མ་དང་དེའི་ནང་ནས་དགེ་ལུགས་པ་མཐོང་ན། དེ་རྟོག་གེ་མགོ་མཁྲེགས་ཞེ་དྲགས་ཡིན་མདོག་མདོག་བྱེད་པ་དེ་མི་དགོས་པར་ང་རང་ཚོ་ཚང་མས་ཕན་ཚུན་གཅིག་གིས་གཅིག་ལ་དངོས་གནས་བཅོམ་ལྡན་འདས་ཀྱི་རྗེས་འབྲང་གཅིག་གྱུར་དང་། བྱམས་པ་མགོན་པོའི་རྗེས་འབྲང་གཅིག་གྱུར། ཀླུ་སྒྲུབ་ཡབ་སྲས་ཀྱི་རྗེས་འབྲང་གཅིག་གྱུར་ཆགས་བསྡད་ཡོད་པ་རེད། དེ་སྔ་བོད་ལ་ཡོད་སྐབས་དང་བཙན་བྱོལ་ལ་ཡོད་སྐབས་གཉིས་བསྡུར་ན་ཕལ་ཆེར་ང་ཚོ་ད་ལྟ་ཐུགས་མཐུན་ཁྲིམས་གཙང་ཉེ་བོ་ཆགས་བསྡད་ཡོད་པས་ཞེ་དྲགས་ཡག་པོ་རེད། གཙོ་བོ་ཆེ་ཤོས་ཁྱེད་རང་ཚོ་ཚང་མས་ཐུགས་འཁུར་དང་དགོངས་པ་ཡངས་པོ་བཞེས་ཏེ་ཞེ་དྲགས་ཡག་པོ་ཡིན། དངོས་གནས་དྲང་གནས་ཀྱི་ཆོས་གྲོགས་དང་བློ་གཅིག་སེམས་གཅིག་གིས་གཅིག་གྱུར་གྱི་བསྟན་པའི་དོན་དུ་ཐུགས་འཁུར་བཞེས་པར་ཐུགས་རྗེ་ཆེ་ཞུས་པ་ཡིན། ད་ཕྱོགས་བསྡོམས་ཀྱིས་ཞུས་ན། ཕྱི་དངོས་པོ་ཡར་རྒྱས་ཀྱི་ཐོག་ནས་ང་ཚོ་སྐྱོ་ཐག་ཆོད་རེད། ཁབ་ཅིག་ཀྱང་ཡག་པོ་བཟོ་ཤེས་ཀྱི་ཡོད་པ་མ་རེད། ཡིན་ནའང་། ནང་སེམས་ཁམས་རིག་པའི་སྐོར་ལ་ཆ་བཞག་ན་ཧ་ལས་པ་ཞིག་ཡོད་པ་རེད། དེ་ད་ལྟ་ཁྲོམ་འདྲ་བོ་སྟོན་པའི་དུས་ཚོད་ལ་བསླེབས་འདུག་པས་ཁྱེད་རང་ཚོའི་ཐུགས་ལ་བཅང་རོགས། ཞེས་གསུངས་སོང་།

ཡང་ཁོང་གིས་དེང་སང་བོད་ཕྱི་ནང་གཉིས་སུ་ཆོས་ཀྱི་རྒྱལ་པོ་ཡིན་ཟེར་མཁན་དེ་འདྲ་ཡོང་བཞིན་ཡོད་པར་བོད་ཀྱི་ཆོས་བརྒྱུད་ཁག་གི་དབུ་ཁྲིད་ཚོས་ཐུགས་འགན་བཞེས་ཏེ་གསལ་བཤད་གནང་དགོས་སྐོར་གསུངས་དོན། བར་སྐབས་ཤིག་ནས་ཆོས་ཀྱི་རྒྱལ་པོ་ཡིན་ཟེར་མཁན་གྱི་དངུལ་དང་སྐྱེས་དམན་ལ་དགའ་མཁན་ཏོག་ཙམ་ཡོང་གི་འདུག རྒྱ་ནག་ནང་ལ་ཡོང་གི་འདུག ཕྱི་རྒྱལ་ལའང་ཡོང་གི་འདུག སོག་པོ་ལ་ཡང་ཡོང་གི་འདུག དེ་འདྲའི་རིགས་ལ་སྐད་རྒྱག་མཁན་དེ་ང་གཅིག་པུ་མིན་པར་རྣམ་པ་ཚོས་ཡིན་གཅིག་མིན་གཅིག་གིས་ཐུགས་ཁུར་བཞེས་ནས་ཅིག་གསུང་དགོས་ཀྱི་འདུག བསྟན་པའི་ཐུགས་ཁུར་བཞེས་མཁན་ཚོས་སྐྱོན་དེ་མ་གསུང་པར་མུར་འདྲ་བོ་འཇམ་ཕྱིན་པ་ཡིན་ན་ཡག་པོ་མི་འདུག ང་ཚོས་བཤད་པ་ཡིན་ན་ཞབས་འདྲེན་ཞུ་མཁན་ཁོ་རང་ཚོ་ཕོ་རོག་དཀར་པོ་ཆགས་འགྲོ་ཡི་འདུག དེ་འདྲ་ཡིན་དུས་དེ་རིགས་ཡིན་གཅིག་མིན་གཅིག་གསུང་དགོས་ཀྱི་འདུག ཁ་སང་སྔོན་མ་ངས་རྒྱ་གར་ལྷོ་ཕྱོགས་ཀྱི་གདན་སའི་མཁན་པོ་ཚོར་ཡང་འགན་འཁུར་ནས་༧རྒྱལ་བ་རིན་པོ་ཆེས་སུན་པོ་བཟོ་ཡི་འདུག་ཅེས་ངའི་སྟེང་ལ་ལག་པ་ཕྱིས་ཤོག་ཅེས་ནས་ལབ་པ་ཡིན། རིས་སུ་མ་ཆད་པའི་མཁན་པོ་ཁྱེད་རང་ཚོས་ཐུགས་ཁུར་བཞེས་ནས་དངོས་གནས་ང་ཚོའི་མི་རབས་འདི་རྫོགས་ཚར་སོང་ན། མི་རབས་རྗེས་མ་ཚོ་སྤུས་དག་པོ་ཞིག་མུ་མཐུད་ནས་ཡོང་བར་ཚང་མས་དགོངས་པ་བཞེས་དགོས་རེད། ང་རང་ཚོའི་མི་ཚེ་འདི་ལེགས་འགྲིག་འགྲིག་ཅིག་ཕྱིན་བཞག་པ་མིན་པར། ང་ཚོ་རྫོགས་ཚར་བའི་རྗེས་ལ་མི་རབས་རྗེས་མ་དེ་ཚོ་སྤུས་དག་པོ་ཞིག་ཡོང་ཐུབ་རྒྱུར་ད་ལྟ་ནས་གྲ་སྒྲིག་གནང་རྒྱུ་གལ་ཆེན་པོ་རེད། བསླབ་པ་སློབ་གཉེར་དང་སྤྱོད་པ་སྤུས་དག་པོ་ཡོད་པའི་རིགས་འཐུས་ཤོར་ཕྱིན་ན། སླར་གསོ་བྱེད་རྒྱུ་ཁག་པོ་ཡིན་པ་དང་ལས་སླ་བོ་མིན་པར་ཞེ་དྲགས་འགོར་གྱི་རེད། དང་པོ་ནས་སྔོན་འགོག་བྱེད་པ་དེ་ཚང་མས་རིག་པ་སྒྲིམ་དགོས་པ་དང་། སྐྱོན་ལྷག་པ་དེ་ཚོའི་རིགས་ལ་བཟོད་མེད་ཐོག་ནས་གསལ་བོ་བྱ་དགོས། མི་སྒེར་བ་གཅིག་ལ་བློ་ཕམ་བྱུང་པ་དང་བསྟན་པ་སྤྱི་ལ་ཕན་པ་གཉིས་ཡང་ལྗིད་འགྱོག་དགོས་པ་རེད། མི་གཅིག་ལ་བློ་ཕམ་བྱུང་པ་དེར་སྐྱོན་མི་འདུག བསྟན་པ་སྤྱིའི་མཚན་སྙན་གོང་དུ་བསྒྲིག་ཐུབ་པ་ཞིག་དགོས་ཀྱི་ཡོད་པ་རེད། ང་ཚོས་མི་སྒེར་ཞིག་གི་གདོང་ལ་བལྟས་ནས་ཟོན་བྱས། བསྟན་པ་སྤྱིར་མཚན་ཤས་བཟོས་ན་ཨོ་ཙམ་བྱས་ནས་བསྡད་ན་འགྲིག་གི་མ་རེད། དེ་ཤེས་སོང་ངམ། རིན་པོ་ཆེ་ཚོས་དགོངས་པ་བཞེས་ཤོག་ཨང་། ཞེས་གསུངས་སོང་།

  ཆོས་ཚོགས་ཐེངས་ ༡༢ པའི་སྟེང་གི་གྲོས་ཆོད་ཁག་གཤམ་དུ་བཀོད་ཡོད།

གྲོས་གཞི་དང་པོ། ཕྱི་ལོ་ ༢༠༡༡ ཟླ་ ༩ ཚེས་ ༢༢ ནས་ ༢༤ བར་དྷ་ས་སུརྱ་མགྲོན་ཁང་དུ་བསྐྱངས་པའི་ཆོས་ཚོགས་ཐེངས་བཅུ་གཅིག་པའི་གྲོས་ཆོད་ ཁག་ལ་བསྐྱར་ཞིབ་གནང་རྒྱུ།
གྲོས་ཆོད། ༡༽ དཔལ་ལྡན་ཆོས་རིག་བཀའ་བློན་མཆོག་གིས་གཙོ་སྐྱོང་ཐོག་ཆོས་རིག་དྲུང་ཡིག་ཆེན་མོ་ ནས་ཆོས་ཚོགས་ཐེངས་བཅུ་གཅིག་པའི་གྲོས་ཆོད་ཁག་གི་བསྐྱར་ཞིབ་ལས་བསྡོམས་སྙན་ སྒྲོན་ཞུས་ཤིང་འཕྲོས་དོན་དོགས་དྲི་ཁག་ལ་གསལ་བཤད་དང་བཀའ་བསྡུར་གནང་བས་ཚང་མས་ བློ་ངེས་བྱུང་།
༢༽ ཆོས་ཚོགས་སྔ་མའི་གྲོས་ཆོད་ཨང་བདུན་པའི་ནང་ << སྡེ་པ་གཞན་གྱི་དགེ་སློང་མའི་སྡོམ་རྒྱུན་ཡང་ཁུངས་དག་ཐེ་ཚོམ་ཡོངས་སུ་བྲལ་བ་ ཞིག་མེད་པའི་གནས་ཚུལ་འཁོད་པར་བརྟེན་>>ཞེས་འཁོད་འདུག་པ་དེ་ཉིད་ཅུང་ཟད་ ཐལ་ཆར་གྱུར་ཡོད་པའི་དགོངས་ཚུལ་བྱུང་།
༣༽ གཡུང་དྲུང་བོན་ཀྱི་ལུགས་ལ་དྲང་སོང་ངམ་དགེ་སློང་མའི་སྡོམ་རྒྱུན་ཡོད་པ་སྙན་སེང་བྱུང་བས་བློ་མོས་བྱུང་།

གྲོས་གཞི་གཉིས་པ། ཚོས་ཚོགས་ཐེངས་བཅུ་གཅིག་པའི་གྲོས་ཆོད་དགོངས་དོན་ ༢༠༡༢ ལོར་བཙུགས་པའི་དགེ་སློང་མའི་ཉམས་ཞིབ་ཚོགས་ཆུང་ནས་བཏོན་པའི་<<བོད་དུ་ དར་བའི་གཞི་ཐམས་ཅད་ཡོད་པར་སྨྲ་བའི་ལུགས་ལ་དགེ་སློང་མ་སླར་གསོ་ཡོད་མེད་དཔྱད་ གཞི་ལུང་གི་བང་མཛོད་>>ཅེས་པའི་སྙན་ཐོར་གནང་ཕྱོགས་ཇི་དགེ་བཀའ་བསྡུར་གནང་རྒྱུ།
གྲོས་ཆོད། ༡༽ ད་བར་ཆོས་ཚོགས་རྣམས་སུ་བཀའ་བསྡུར་དང་དེ་བཞིན་འབྲེལ་ཡོད་ཁག་ནས་ཉམས་ཞིབ་གནང་བ་སོགས་བྱུང་ཡོད་ཀྱང་། བོད་དུ་དར་བའི་གཞི་ཐམས་ཅད་ཡོད་པར་སྨྲ་བའི་དམ་ཆོས་འདུལ་བའི་ལུགས་ལ་དགེ་སློང་མ་སྒྲུབ་ཐབས་ཡོད་མེད་ཁ་ཚོན་ཆོད་པའི་ཐག་གཅོད་ཅིག་གནང་ཐབས་བཀའ་བར་བརྟེན། དགེ་སློང་མ་སྒྲུབ་ཐབས་ཀྱི་གནད་དོན་འདི་ཉིད་ད་ལྟའང་ནར་འགྱངས་སུ་མ་གཏོང་བར་བསྙེན་པར་རྫོགས་པར་འདོད་པའི་བཙུན་མ་སོ་སོའི་ཐུགས་འདོད་བཞིན་ཡུལ་གྲུ་གཞན་དུ་ད་ཡོད་སྡེ་པ་གཞན་གྱི་དགེ་སློང་མའི་སྡོམ་པ་བླངས་ན་འགྲིག་པའི་མང་མོས་དགོངས་ཚུལ་བྱུང་།
༢༽ དེ་ལྟར་བྱུང་ཚེ་སྡེ་པ་གང་ཡིན་དེའི་ལས་ཆོག་སོགས་འདུལ་བའི་གཞུང་རྣམས་བོད་སྐད་དུ་ཕབ་བསྒྱུར་དང་། གསོ་སྦྱོང་ཚུགས་སྟངས་སོགས་གཞི་གསུམ་གྱི་ལས་རྣམས་ཀྱང་ལུགས་དེ་དང་མཐུན་པར་ཚད་ལྡན་ཡོང་བ། དགེ་བསྙེན་མ་ནས་དགེ་སློང་མའི་བར་གྱི་བསླབ་ཚིགས་རྣམས་ཀྱང་སྡེ་པ་དེའི་ལུགས་ལྟར་བླང་རྒྱུ་ཡོད་པ་གནང་རྒྱུ།

གྲོས་གཞི་གསུམ་པ། ཤྲིལང་ཀ་དང་། བྷརམཱ། ཐེལེནྜ་སོགས་ཀྱི་ནང་པའི་དགེ་འདུན་པ་རྣམས་ལ་རང་རེའི་དགོན་སྡེ་ཁག་གི་བཤད་གྲྭ དང་སྒྲུབ་གྲྭའི་བསླབ་པ་སློབ་གཉེར་གནང་སྟངས་སོགས་ལ་གོ་རྟོགས་སྤེལ་རྒྱུའི་ཐབས་ལམ་ཇི་དགེ་བཀའ་བསྡུར་གནང་རྒྱུ།
གྲོས་ཆོད། ནང་པའི་སྡེ་པ་གཞན་དང་འབྲེལ་ལམ་འཛུགས་ཕྱོགས་ཐད་ལམ་སེང་བཤད་གྲྭ་དང་སྒྲུབ་གྲྭ་ཁག་ཏུ་གནད་འདྲེན་ཞུ་རྒྱུའི་རིགས་མི་དགོས་པར། ཐོག་མར་མཐུན་ཤས་ཆེ་བའི་འདུལ་བ་དང་མངོན་པའི་སྐོར་གྱི་བགྲོ་གླེང་རིགས་ཡང་ཡང་བསྐོང་ཐུབ་པ་གནང་རྒྱུ།
གྲོས་གཞི་བཞི་པ། ཆོས་སྡེ་ཁག་ཏུ་དགེ་འདུན་པའི་གྲངས་འབོར་ཉུང་དུ་འགྲོ་བཞིན་པའི་བཀའ་ངལ་དང་། བཤད་གྲྭ་སྒྲུབ་གྲྭ་ཁག་ཏུ་བསླབ་པ་སློབ་གཉེར་རྒྱུན་འཛིན་ཡར་རྒྱས་གཏོང་ཕྱོགས་སོགས་ལ་བཀའ་བསྡུར་གནང་རྒྱུ།
གྲོས་ཆད། ཀ༽ ཆོས་སྡེ་ཁག་ཏུ་དགེ་འདུན་པའི་གྲངས་འབོར་ཉུང་དུ་འགྲོ་བཞིན་པའི་དཀའ་ངལ་ཐད། ༡། ད་ལྟ་ཡོད་བཞིན་པའི་གྲྭ་རྒྱུན་རྣམས་ཀྱི་སྤུས་ཚད་བཟང་དུ་བཏང་སྟེ་དགོན་པ་རང་དུ་མུ་མཐུད་གནས་ཐུབ་པའི་ཐབས་ཤེས་གནང་རྒྱུ་དང་། ༢། བཙན་བྱོལ་ནང་དུ་ཡོད་པའི་ཆོས་སྡེ་རྣམས་རྒྱུན་འཛིན་གོང་འཕེལ་ཐད་ནང་པའི་ཆོས་བརྒྱུད་འཛིན་པ་ཐུན་མོང་ནས་ཧི་མ་ལ་ཡའི་རི་བརྒྱུད་པ་རྣམས་ཀྱིས་འཕྱར་གྲུ་མཉམ་འདེགས་དགོས་ངེས་ལ་བརྟེན་དགེ་འདུན་པའི་གྲངས་འབོར་ཉུང་དུ་འགྲོ་བཞིན་པའི་དཀའ་ངལ་སྐོར་ཐུགས་འགན་བཞེས་དགོས་པའི་བསྐུལ་མ་ཞུ་རྒྱུ། ༣། གྲྭ་ཚང་བཤད་གྲྭ་ཁག་གི་སློབ་ཚན་ནང་དུ་གཞུང་ཆེན་གྱི་སློབ་ཚན་ཡོད་བཞིན་པའི་ ཐོག་སྐད་ཡིག་སོགས་དེང་དུས་སློབ་ཚན་ཡང་ཡོད་ཐབས་གནང་རྒྱུ། ༤། བླ་སྤྲུལ་དགེ་བའི་བཤེས་གཉེན་རྣམས་ཀྱིས་གཞན་མི་མང་ཁྲོད་དུ་བཀའ་དབང་གསུང་ཆོས་དང་ནང་ཆོས་ངོ་སྤྲོད་རིགས་གནང་སྐབས་སློབ་གསོ་གོ་བསྐོན་གང་གནང་རྒྱུ།
ཁ༽ བཤད་གྲྭ་སྒྲུབ་གྲྭ་ཁག་ཏུ་བསླབ་པ་སློབ་གཉེར་རྒྱུན་འཛིན་ཡར་རྒྱས་གཏོང་ཕྱོགས་ཐད། ༡། མཁན་ལས་སྣེ་དང་འབྲེལ་ཡོད་དཔེ་ཁྲིད་དགེ་རྒན་རྣམས་ནས་ཐུགས་འགན་ཆེ་བཞེས་ཐོག་སློབ་ཁྲིད་གནང་ཕྱོགས་སོགས་ལ་བཅོས་བསྒྱུར་གསར་གཏོད་དགོས་རིགས་གནང་རྒྱུ། ༢། སློབ་གཉེ་བ་རྣམས་ལ་དམིགས་བསལ་མཐུན་རྐྱེན་སྦྱོར་སྤྲོད་དང་འགལ་རྐྱེན་སྐད་འཕྲིན་སོགས་དེང་དུས་འཕྲུལ་འཁོར་རིགས་ལ་སྟངས་འཛིན་གང་ཐུབ་གནང་རྒྱུ། ༣། སློབ་གཉེར་བ་རྣམས་ཀྱི་དོ་དབྱིངས་སྐྲུན་ཐབས་སོགས་ལ་དགོངས་ནས་ཆོས་སྡེ་གཞན་དུ་གྲྭ་སྐོར་ལྟ་བུ་གཏོང་ཐབས་གནང་རྒྱུ།

གྲོས་གཞི་ལྔ་པ། ༸གོང་ས་༸སྐྱབས་མགོན་ཆེན་པོའི་བཀའ་དགོངས་བཞིན་མགོ་ནག་སྐྱ་བོའི་ཚོས་གཞུང་ཆེན་ བཀའ་པོད་ཁག་ལ་སློབ་གཉེར་གནང་རྒྱུའི་གོ་སྐབས་བསྐྲུན་ཐབས་དང་། ད་ཡོད་ཆོས་རིག་ལས་ཁུངས་ནས་ས་གནས་སོ་སོར་ཆེད་བཙུགས་ནང་ཆོས་ངོ་སྤྲོད་ཚོགས་ཆུང་རྣམས་ཉེ་ཁུལ་དགོན་པ་སོ་སོས་བདག་སྤྲོད་རོགས་མགོན་གནང་ཐབས་བཅས་ལ་བཀའ་བསྡུར་གནང་རྒྱུ།
གྲོས་ཆོད། མི་སྐྱ་ཕོ་མོ་ཚོས་སློབ་གཉེར་གནང་དགོས་པའི་གཞུང་ཆེན་སློབ་ཚན་གང་ཡིན་གཏན་འབེབས་ཐོག་ལོ་ནའི་བབས་དང་མཐུན་པར་སློབ་གཉེར་གནང་རྒྱུའི་གོ་སྐབས་བསྐྲུན་རྒྱུ་དང་། ཆོས་རིག་ལས་ཁུངས་ནས་ས་གནས་སོ་སོར་ཆེད་བཙུགས་ད་ཡོད་ནང་ཆོས་ངོ་སྤྲོད་ཚོགས་ཆུང་རྣམས་འབྲེལ་ཡོད་ས་གནས་མགོ་འཛིན་ལས་ཁང་རང་ནས་ཐུགས་འགན་གཙང་བཞེས་ཐོག་ཉེ་ཁུལ་རིས་མེད་དགོན་སྡེ་ཁག་ནས་མཐུན་འགྱུར་གང་ཡོང་གནང་རྒྱུ། དེ་བཞིན་ནང་ཆོས་ངོ་སྤྲོད་གནང་མཁན་བསྐོ་གཏོང་སྐབས་དོ་གལ་ཆེན་པོས་སྐད་བརྡ་འཕྲོད་ངེས་ཡིན་པ་ཞིག་དང་མི་མང་གི་གོ་རྟོགས་གནས་ཚད་དང་འཚམས་པར་གསུང་ཐུབ་མཁན་ཞིག་བསྐོ་གཏོང་གནང་རྒྱུ།

གྲོས་གཞི་དྲུག་པ། ཆོས་བརྒྱུད་སོ་སོའི་ཁྱབ་ཁོངས་ཕྱི་རྒྱལ་ཆོས་ཚོགས་རྣམས་སུ་བླ་མ་དགེ་རྒན་སོགས་ཚད་ལྡན་ཚགས་ཚུད་གཏོང་ཐབས་ཇི་དགེ་བཀའ་བསྡུར་གནང་རྒྱུ།
གྲོས་ཆོད། ཆོས་བརྒྱུད་ཆོས་སྡེ་སོ་སོའི་ཁྱབ་ཁོངས་ཕྱི་རྒྱལ་ཆོས་ཚོགས་རྣམས་ལ་འབྲེལ་ཡོད་ཆོས་སྡེ་སོ་སོས་སྟངས་འཛིན་གྱིས་བླ་མ་དགེ་རྒན་ཚད་ལྡན་གཏོང་རྒྱུ་དང་འཛིན་སྐྱོང་ཚགས་ཚུད་ཡོང་རྒྱུར་ཐུགས་སྣང་དམ་དོན་གནང་རྒྱུ།

གྲོས་བཞི་བདུན་པ། དགོན་པའི་འཁོར་ཡུག་གཙང་བཟོ་དང་དགེ་འདུན་པའི་འཕྲོད་བསྟེན་བཅས་ལ་དམིགས་ཏེ་ རྩི་ཤིང་འདེབས་འཛུགས་སོགས་གཙང་སྤྲ་འཕྲོད་བསྟེན་ཡར་རྒྱས་གཏོང་ཕྱོགས་དང་འབྲེལ་བར་དཀའ་བསྡུར་གནང་རྒྱུ།
གྲོས་ཆོད། དགོན་སྡེ་ཁག་ཏུ་ཁོར་ཡུག་གཙང་བཟོ་དང་རྩི་ཤིང་འདེབས་འཛུགས་སོགས་ཁོར་ཡུག་བདག་སྤྲོད་ཀྱི་ལས་དོན་ཡོད་བཞིན་པར་རྒྱུན་འཁྱོངས་ཡར་རྒྱས་གཏོང་ཐབས་གནང་རྒྱུ་དང་། དགེ་འདུན་པའི་འཕྲོད་བསྟེན་ཐད་ཆོས་རིག་ལས་ཁུངས་ནས་འཕྲོད་བསྟེན་ལས་ཁུངས་དང་ཟུང་འབྲེལ་གྱིས་འཕྲོད་བསྟེན་གོ་རྟོགས་ལས་འགུལ་སྤེལ་རྒྱུ། དེ་བཞིན་ཆོས་སྡེ་སོ་སོའི་ཚབས་ཆེན་ནད་མནར་གྲྭ་བཙུན་རྣམས་ལ་ཁུངས་སོ་སོ་ནས་གཟིགས་རྟོག་གང་ཐུབ་གནང་རྒྱུ།

གྲོས་གཞི་བརྒྱད་པ། ཕྱི་རྒྱལ་དུ་ཡོད་པའི་དོལ་རྒྱལ་རྗེས་འབྲང་པ་རྣམས་ནས་༸གོང་ས་སྐྱབས་མགོན་ཆེན་པོ་མཆོག་ལ་མཚན་སྨད་ངོ་རྒོལ་ཞུས་དང་ཞུ་བཞིན་པར་འཚེ་མེད་ཞི་བའི་ཐབས་ཀྱི་སྒོ་ནས་གདོང་ལེན་བྱ་ཐབས་ཇི་དགེ་བཀའ་བསྡུར་གནང་རྒྱུ།
གྲོས་ཆོད། ཀ༽ དོལ་རྒྱལ་རྗེས་འབྲང་པ་ཚོས་ཁམས་གསུམ་ཆོས་ཀྱི་རྒྱལ་པོ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་<<ཞལ་རྫུན་གསུངས་ཚུལ་དང་ཆོས་དད་རང་དབང་བཀག་འགོག་གནང་ཚུལ་>>སོགས་གཞི་མེད་སྐྱོན་འཛུགས་ཀྱི་སྒོ་ནས་མཚན་སྨད་རྔོ་རྒོལ་ཞུས་དང་ཞུ་བཞིན་པར་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ནས་ཆོས་ཚོགས་ཐེངས་བཅུ་གཉིས་པ་འདིའི་བརྒྱུད་ངོ་རྒོལ་མཐའ་གཅིག་ཏུ་བྱ་རྒྱུ།
ཁ༽ མགོན་པོ་གང་ཉིད་ནས་སྤྱིར་དམ་པའི་ཆོས་དང་ཡང་སྒོས་བོད་ཀྱི་བསྟན་པ་ཆབ་སྲིད། དེ་ཡང་རྗེས་འཇུག་གདུལ་བྱ་རྣམས་ཀྱི་འདི་ཕྱི་གཏན་དོན་རང་ལ་ཐུགས་རྗེ་ཆེ་གཟིགས་ཀྱིས་དམ་སྲི་དོལ་རྒྱལ་བསྟེན་གསོལ་གྱི་སྤང་བླང་ལམ་སྟོན་མཛད་དང་མཛད་བཞིན་པར་བཀྲིན་རྗེས་སུ་དྲན་ཅིང་ཡི་རངས་མངོན་པར་བསྟོད་དེ་ཁ་ཞེ་གཉིས་མེད་ཐོག་ནས་མུ་མཐུད་བརྩི་སྲུང་དང་ལེན་ཚུལ་བཞིན་ཞུ་རྒྱུ།
ག༽ དོལ་རྒྱལ་རྗེས་འབྲང་པའི་ཕྱོགས་ནས་༸རྒྱལ་བའི་སྐུ་ཕྱྭར་གནོད་གཞི་ཡོད་ཚུལ་གནས་ཡུལ་རྒྱ་གར་དང་ཨ་རིའི་གསང་བའི་ལས་ཁུངས་ཁག་ནས་གསལ་པོ་གསུངས་པ་ལྟར་དོན་ལ་གནས་སྟབས་ཆོས་ཚོགས་འདི་ནས་བོད་མིའི་སྒྲིག་འཛུགས་ཀྱི་དཔལ་ལྡན་བཀའ་ཤག་དང་དཔལ་ལྡན་བདེ་སྲུང་ལས་ཁུངས་བཅས་ལ་༸གོང་ས་༸སྐྱབས་མགོན་ཆེན་པོའི་སྐུའི་ཉེན་སྲུང་ཐོག་ཐུགས་སྣང་འགན་ཁུར་སྔར་བས་ཆེ་བ་བཞེས་ཏེ་ལྷོད་གཡེང་ནམ་ཡང་མི་ཡོང་བའི་ནན་ཏན་འབོད་བསྐུལ་ཞུ་རྒྱུ།
ང་།༽ འདོད་རྒྱལ་རྗེས་འབྲང་པས་བོད་ཀྱི་བླ་ན་མེད་པའི་དབུ་ཁྲིད་༧སྤྱི་ནོར་༧གོང་ས་ སྐྱབས་མགོན་ཆེན་པོ་མཆོག་ལ་མངོན་སུམ་འཛེམས་མེད་ངོ་རྒོལ་ཚད་མེད་ཞུས་པར་ཆོས་ཚོགས་འདིའི་ཐོག་ནས་ངོས་ལེན་མེད་པའི་ལངས་ཕྱོགས་གསལ་བསྒྲགས་གསལ་བཏོན་གྱིས་གསལ་བསྒྲགས་སྤེལ་རྒྱུ་བཅས་བཀོད་འདུག