བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱིས་འདས་པའི་ཟླ་ཤས་རིང་ཚོང་ལས་གཉེར་འདོད་ཡོད་པའི་གཞོན་སྐྱེས་ཁག་ཅིག་ལ་ལྡི་ལིའི་རྒྱ་གར་མཐོ་སློབ་ཏུ་ཟབ་སྦྱོང་སྤྲད་མཐར་མ་དངུལ་གྱི་གཟེངས་རྟགས་སྤྲད་སོང་།
དེ་རིང་སྔ་དྲོའི་ཆུ་ཚོད་ ༡༠།༣༠ ཐོག་གངས་སྐྱིད་གཉའ་ཁྲི་ཚོགས་ཁང་དུ། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཚོང་ལས་རམ་འདེགས་ལས་གཞི་ཚན་པའི་གོ་སྒྲིག་འོག སྲིད་སྐྱོང་བློ་བཟང་སེང་གེ་མཆོག་དབུ་བཞུགས་ཐོག་དཔལ་འབྱོར་ལས་ཁུངས་ཀྱི་ཚོང་ལས་རམ་འདེགས་ལས་གཞི་ཚན་པས་ཚོང་ལས་གསར་དུ་གཉེར་མཁན་ཚོར་དམིགས་པའི་འདི་ལོའི་༼ ཆེད་མཁས་ཚོང་པ་གསར་བའི་མ་དངུལ་རོགས་སྐྱོར་གཟེངས་རྟགས། ༽ཨང་དང་པོ་ཐོབ་མཁན་དེ་གྲོང་ཁྱེར་གྱི་མོག་མོག་ (City Momo )ཞེས་པ་འཛུགས་གནང་མཁན་བསྟན་འཛིན་རིག་ལྡན་ལགས་དང་། ཨང་གཉིས་པ་དྲ་ཐོག་བུ་མོའི་གྱོན་ཆས་ཚོང་ས་ (Girls Closet) ཞེས་པ་འཛུགས་མཁན་བསྟན་འཛིན་ཆོས་འཛིན་ལགས། ཨང་གསུམ་པ་བོད་ཀྱི་གློག་བཟོ་ཁང་ ( Tibet Electricals) འཛུགས་མཁན་ངག་དབང་ཆོས་འབྱོར་ལགས་བཅས་ལ་ཐོབ་ཡོད་པ་གསལ་བསྒྲགས་དང་འབྲེལ། ཨང་དང་པོར་ཧིན་སྒོར་ ༡༥༠༠༠ དང་གཉིས་པར་ཧིན་སྒོར་ ༡༠༠༠༠། ཨང་གསུམ་པར་ཧིན་སྒོར་ ༥༠༠༠ བཅས་ཀྱི་བྱ་དགའ་གནང་བ་མ་ཟད། ཁོ་ཚོ་ཚུད་པའི་ཆེད་མཁས་ཚོང་པ་གསར་པ་བདུན་ལ་ཧིན་སྒོར་འབུམ་རེ་རེ་དང་སྐྱེད་མེད་བུ་ལོན་འབུམ་རེ་རེ་གནང་རྒྱུ་ཡིན་པ་གསལ་བསྒྲགས་བསྐྱངས་སོང་།
མཛད་སྒོའི་ཐོག་མར་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་གིས་ངོ་སྤྲོད་གནང་དོན། ཁོ་རང་ཚོ་ཚོང་པ་བདུན་ཡིན་ན། ད་རེས་འདི་ཚོང་པའི་མི་ཚེའི་མདུན་ལམ་ནང་གི་གོམ་པ་དང་པོ་དེ་རེད། སྤྱིར་བཏང་ཁོ་རང་ཚོ་ཚོང་སྐྱོན་མཁན་ཚོ་སོ་སོའི་མི་ཚེའི་མདུན་ལམ་གང་ལ་གང་འཚམ་ཚོད་ཟིན་པ་རེད། ཁོ་རང་ཚོས་ཚོང་ལས་གཉེར་རྒྱུའི་ཚོང་གི་ལས་དོན་དེ། དེ་རིང་ནས་བཟུང་གོམ་པ་གསར་པ་རྒྱག་གི་ཡོད་སྟབས། དེ་འདྲའི་གནས་སྟངས་ཐོག་ནས་ཚོང་པ་གཞན་དང་མ་འདྲ་བའི་རིག་གསར་དང་ཡར་ཐོན་ཅན་གྱི་ཚོང་པ་ཟེར་སྐབས། རང་བཞིན་གྱིས་ཚོང་གི་ལས་དོན་གང་ཡོད་པ་ཡིན་ཡང་སོ་སོས་འཆར་གཞི་གང་བསྒྲིགས་པ་དེའི་སྒང་ལ་ཆོད་སེམས་དང་སྙིང་སྟོབས་དགོས་ཀྱི་ཡོད་པ་རེད། དེ་གཉིས་མེད་ན་མི་འགྲིག་པ་ཞིག་ཡིན་སྟབས། རྣམ་པ་ཚོ་ཚང་མ་གཞོན་སྐྱེས་ཡིན་སྟབས་དེ་ཚོ་ཏན་ཏན་ཡོད་པ་རེད། མ་འོངས་པར་སྐུ་ངལ་ཕྲན་བུ་འཕྲད་སྲིད་པ་ཞིག་ཡིན་ཡང་སྙིང་སྟོབས་དང་ཆོད་སེམས་ཀྱི་ཞུམ་པ་མེད་པ་གནང་རྒྱུ་དེ་དཔེ་མི་སྲིད་པའི་གལ་ཆེན་པོ་རེད། དཔལ་འབྱོར་ལས་ཁུངས་འོག་ཡོད་པའི་ཚོང་ལས་རམ་འདེགས་པའི་ངོ་གདོང་དང་མཚོན་རྟགས་ཁྱེད་རང་ཚོ་རེད། རྣམ་པ་ཚོ་ཡག་པོ་བྱུང་བ་ཡིན་ན་ང་ཚོའི་ལས་གཞི་ཡག་པོ་ཡོང་གི་རེད། རྣམ་པ་ཚོ་ཡག་པོ་མ་བྱུང་ན་ང་ཚོའི་ལས་གཞི་ལའང་རང་བཞིན་གྱིས་དོ་ཕོག་ཡོང་གི་རེད། དེར་བརྟེན། འདི་གཉིས་མོས་ཁེ་ཕན་ཡོད་པའི་ལས་གཞི་ཞིག་ཆགས་ཡོད་སྟབས། ང་ཚོའི་ངོས་ནས་ཡིན་ཡང་རྣམ་པ་ཚོར་སྐུ་ངལ་ག་རེ་འཕྲད་པ་ཡིན་ཡང་མུ་མཐུད་ཞབས་ཕྱི་ཞུ་རྒྱུའི་འདུན་པ་ཡོད། ཚང་མས་ཧུར་ཐག་འབད་ཐག་གནང་རོགས་གནང་ཞུ་རྒྱུ་ཡིན། ཞེས་སོགས་གསུངས་སོང་།
དེའི་རྗེས་སྐུ་མགྲོན་གཙོ་བོ་སྲིད་སྐྱོང་མཆོག་གིས་ལས་གཞི་འདིར་སྔ་ཕྱི་བར་གསུམ་དུ་སློབ་སྟོན་གནང་མཁན་བསྟན་འཛིན་སྐྱིད་འཛོམས་ལགས་སུ་ཐུགས་རྗེ་ཆེ་ཞུའི་ཐང་ག་ཞིག་གསོལ་རས་གནང་རྗེས། ཁོང་གིས་ལས་གཞི་འདིའི་གལ་འགངས་སྐོར་གསུངས་དོན། དཔལ་འབྱོར་ལས་ཁུངས་ཀྱི་ཚོང་ལས་རམ་འདེགས་ཚན་པས་ལོ་གཅིག་རིང་ཉམས་ཞིབ་བྱས་ཏེ་སྙན་ཐོ་བཏོན་པ་ཞིག་གི་ནང་། ང་ཚོའི་སྤྱི་ཚོགས་ནང་ལ་དཔལ་འབྱོར་ཡར་རྒྱས་གཏོང་རྒྱུ་དམིགས་བསལ་རང་ཁ་རང་གསོ་བྱས་ཏེ། སོ་སོའི་རྐང་པའི་ཐོག་ལངས་ཐུབ་པར་གང་འདྲ་བྱེད་དགོས་མིན་ཐོག་ཉམས་ཞིབ་བྱས་པ་བརྒྱུད། ང་ཚོའི་སྤྱི་ཚོགས་ནང་ལ་ཞིང་ལས་བྱས་ནས་དམིགས་བསལ་འཚོ་བ་སྐྱེལ་མཁན་བརྒྱ་ཆ་ ༢༣ དང་ཚེག་ ༧ ཡིན་པར་བརྟེན་དེ་ཚོའི་སྤྱིའི་ཡོང་འབབ་བརྒྱ་ཆ་ ༨ དང་ཚེག་ ༥ ཆགས་ཡོད། ཚོང་རྒྱག་མཁན་བརྒྱ་ཆ་ ༢༧ དང་ཚེག་ ༥ ཡོད་པར་བརྟེན་དེ་གཉིས་བར་ལ་བར་ཁྱད་བརྒྱ་ཆ་གཅིག་ཙམ་ལས་མེད་པ་རེད། ཡིན་ཡང་སྤྱི་ཚོགས་ནང་ལ་དཔལ་འབྱོར་གྱི་ཡོང་འབབ་དེ་བརྒྱ་ཆ་ ༤༠ ལྷག་ཡིན་སྟབས། ང་ཚོས་ཚོང་ཐོག་འབད་བརྩོན་བྱས་པ་ཡིན་ན་ཡོང་འབབ་ལྡབ་འགྱུར་གྱིས་མང་བ་ཆགས་ཏེ་བརྒྱ་ཆ་ ༤༠ དེ་ ༨༠ ཡོང་རྒྱུ་ཡིན་སྟབས། སྤྱི་ཚོགས་སྤྱི་ཡོངས་ཀྱི་དཔལ་འབྱོར་ཡར་རྒྱས་ཡོང་རྒྱུའི་རེ་བ་ཆེན་པོ་འདུག ང་ཚོའི་བོད་པའི་རང་ཆས་ཀྱི་རང་གཤིས་ནང་ཚོང་རྒྱག་རྒྱུ་དེ་ཡོད་སྟབས། ང་ཚོས་དེར་མ་རྩ་བཞག་ནས་འབད་བརྩོན་བྱས་པ་ཡིན་ན། སྤྱི་ཚོགས་སྤྱི་ཡོངས་དཔལ་འབྱོར་ཐོག་ནས་རང་ཁ་རང་གསོ་ཆགས་རྒྱུའི་ཆོད་སེམས་བཅངས་ཏེ། ད་ཐེངས་དཔལ་འབྱོར་ལས་ཁུངས་ངོས་ནས་ཚོང་པ་གསར་པ་བདུན་ལ་ཟླ་གསུམ་རིང་ཟབ་སྦྱོང་སྤྲད་ནས་གསོ་སྤྱོང་གནང་ཡོད་སྟབས། མ་འོངས་པར་ང་ཚོའི་སྤྱི་ཚོགས་འདི་དཔལ་འབྱོར་གྱི་རང་ཁ་རང་གསོ་ཞིག་ཆགས་རྒྱུའི་རེ་བ་བཅང་གི་ཡོད་པ་མ་ཟད། ཚོང་པ་གསར་པ་རྣམ་པ་བདུན་གྱིས་ལོ་རེའི་སོ་སོའི་ཁེ་འབབ་ནས་བརྒྱ་ཆ་ ༤ ནས་ ༥། ༥ ནས་ ༦། ༦ ནས་༧ བར་ཟེར་ནས་དཔལ་འབྱོར་ལས་ཁུངས་ལ་འབུལ་དགོས་པ་ཞིག་ཀྱང་ཆགས་ཡོད་པ་རེད། ཅེས་སོགས་གསུངས་སོང་།
མཇུག་ཏུ་གསར་འགོད་པས་ཨང་དང་པོ་ཐོབ་མཁན་བསྟན་འཛིན་རིག་ལྡན་ལགས་སུ་ད་ཐེངས་བྱ་དགའ་ཐོབ་པར་ཚོར་སྣང་གང་འདྲ་བྱུང་དྲིས་པར་ཁོང་གིས། ངས་ཚོང་གཉེར་བྱ་རྒྱུའི་འཆར་གཞི་སྒྲིག་བཞིན་ཡོད་སྟབས་ད་ཐེངས་གོམ་པ་དང་པོ་དེ་བསྒྲུབས་སོང་བསམ་པ་ཞིག་བྱུང་། མ་འོངས་པ་ཡིན་ལའང་ད་ལྟ་ནང་བཞིན་ཡག་པོ་ཡོང་བའི་རེ་བ་ཡོད། ཅེས་བརྗོད་བྱུང་།
ཡང་ཨང་གཉིས་པ་ཐོབ་མཁན་བསྟན་འཛིན་ཆོས་འཛིན་ལགས་སུ་མ་འོངས་པར་ལས་འཆར་གང་འདྲ་མགོ་འཛུགས་བྱ་རྒྱུ་ཡིན་དྲིས་པར་ཁོ་མོས། རྒྱ་གར་གྱི་ཁྱིམ་མཚེས་རྒྱལ་ཁབ་ཁག་ཏུ་ཕྱིན་ནས་གཞོན་སྐྱེས་ཚོར་དམིགས་ནས་རྒྱ་གར་ནང་གྱོན་གོས་ནང་འདྲེན་བྱས་ཏེ། ན་གཞོན་ཚོར་དཔེ་གསར་ཅན་གྱི་གྱོན་གོས་དེ་འདྲ་རིན་གོང་ཆུང་ཆུང་ཐོག་ནས་བཙོང་ཐུབ་པ་བྱ་རྒྱུ་ཡིན་སྟབས། ད་ཐེངས་བོད་མིའི་སྒྲིག་འཛུགས་ངོས་ནས་ཧིན་སྒོར་འབུམ་གཅིག་གསོལ་རས་གནང་བ་དེས་ཅ་དངོས་འཐེན་པར་འགྲོ་སྐབས་སོགས་ལ་ཕན་ཐོགས་ཆེན་པོ་ཡོང་ས་རེད། ཅེས་བརྗོད་བྱུང་།
གསར་འགོད་པས་ཨང་གསུམ་པ་ཐོབ་མཁན་ངག་དབང་ཆོས་འབྱོར་ལགས་སུ་ཁྱེད་ཀྱིས་བོད་མིའི་སྤྱི་ཚོགས་ནང་ཞབས་འདེགས་གང་འདྲ་བསྒྲུབས་ཐུབ་ཀྱི་རེད་དམ་དྲིས་པར་ཁོང་གིས། ང་ཚོ་བོད་པ་མང་ཆེ་བས་གློག་བཟོ་རྒྱུ་སོགས་ཀྱི་རིགས་རྒྱ་གར་བར་རེ་བ་རྒྱག་གི་ཡོད་སྟབས། ང་བོད་པ་ཞིག་ཡིན་པའི་ཆ་ནས་ངའི་རེ་བ་ལས་ཀ་དེ་ངས་བྱེད་ཐུབ་པ་ཙམ་མ་ཟད། ཚོང་ཙམ་མིན་པར་བོད་པ་ཚོས་འདོད་པ་ཁེངས་ཐུབ་པའི་ཞབས་ཞུ་གྲུབ་ཐབས་བྱ་རྒྱུ་ཡིན་པ་མ་ཟད། མ་འོངས་པར་ཟླ་གཅིག་ནང་ཚུད་དུ་ལྡེ་ར་ཌུན་ཁུལ་དུ་ལས་ཁུངས་ཚུགས་རྒྱུ་ཡིན་ཡང་། ངའི་ལས་ཀའི་ངོ་བོ་དེ་བཟོ་གྲྭ་དང་ཁང་པ་ཆེན་མོ་དེ་ཚོར་ཞབས་ཞུ་བསྒྲུབ་རྒྱུ་ཡིན་སྟབས། ལྡི་ལི་དང་བྷོམ་བྷེ། སིམ་ལ་དང་ལྷོ་ཕྱོགས་ཀྱི་གྲོང་ཁྱེར་ཁག་ཏུ་འགྲོ་དགོས་པ་ཆགས་སྲིད་པར་བརྟེན་གང་ཐུབ་ཅི་ཐུབ་ཀྱི་མང་ཚོགས་ཚོར་འདོད་བློ་ཁེངས་པའི་ཞབས་ཞུ་གྲུབ་ཐབས་བྱ་རྒྱུ་ཡིན། ཞེས་བརྗོད་བྱུང་།
དཔལ་འབྱོར་ལས་ཁུངས་ཀྱིས་༼ ཆེད་མཁས་ཚོང་པ་གསར་བའི་མ་དངུལ་རོགས་སྐྱོར་གཟེངས་རྟགས། ༽སྤྲོད་རྒྱུ་ཡིན་པ་གསལ་བསྒྲགས་བསྐྱངས་རྗེས། ལས་གཞི་འདིའི་ནང་འཚང་སྙན་འབུལ་མཁན་ ༢༥ བྱུང་ཁོངས་ནས་མི་གསུམ་ལ་ཆ་རྐྱེན་ལོན་མེད་སྟབས་རང་བཞིན་གྱིས་འཕུད་རྗེས། དེ་བྱིངས་རྣམས་ལ་ཆེད་ལས་མཁས་པས་ཞིབ་འཇུག་གནང་མཐར། མི་ ༧ འདེམས་སྒྲུག་གིས་དཔལ་འབྱོར་ལས་ཁུངས་ཀྱིས་ཟླ་གསུམ་རིང་མི་ ༣ ལྡི་ལིའི་ཎོ་ཌ་ (Noida) ནང་སློབ་སྦྱོང་དང་ཉམས་གསོག་བྱེད་བར་བཏང་ཡོད་པ་དང་། གཞན་མི་ ༤ ལ་ཧ་རེ་ཡ་ན་མངའ་སྡེའི་ཇན་ཌལ་གཙུག་ལག་སློབ་གཉེར་ཁང་(O. P. Jindal Global University) དུ་ཆེད་ལས་སློབ་སྦྱོང་བྱེད་པར་བཏང་ཡོད་འདུག
