ཀན་ལྷོ་ཁུལ་གྱི་དཔོན་རིགས་ཁག་ཅིག་ལ་ལྐོག་ཟ་རུལ་སུངས་དང་འབྲེལ་བའི་ཉེས་ཆད་ཕོག་ཡོད་པ་ཕྱིར་བསྒྲགས་བྱས་འདུག
ཟླ་འདིའི་ ༦ ཚེས་ ༢༥ ཉིན་རྒྱ་ནག་གཞུང་གིས་ཀན་ལྷོ་ཁུལ་གྱི་ནང་བྱུང་བའི་ལྐོག་ཟ་རུལ་སུངས་ཀྱི་ཉེས་དོན་ལྔ་ཕྱིར་བསྒྲགས་བྱས་པ་ལྟར་ན། ཀན་ལྷོ་ཅོ་ནེ་རྫོང་མ་རུ་གྲོང་རྡལ་རྡོ་པ་སྡེ་བའི་ཏང་ཨུའི་མགོ་ཁྲིད་ཟུར་པ་མུན་ཅུན་ཡུས་ཀྱིས། ཞིང་སྡེའི་གསང་སྤྱོད་ཁང་གསར་རྒྱག་ལས་གཞིའི་རོགས་དངུལ་སྒེར་སྤྱོད་བྱས་པར་བརྟེན། ཏང་ནང་ནས་ཕུད་པ་དང་གོ་གནས་བླངས་ཏེ་ཁྲིམས་འཛིན་ལས་ཁུངས་ལ་ནག་ཉེས་རྩིས་སྤྲད་ཡོད་འདུག
ཡང་འབྲུག་ཆུ་རྫོང་དགོ་ཡེ་ཞང་མདུན་རི་སྲིད་འཛིན་སྡེ་བའི་སྡེ་དཔོན་ཟུར་པ་ཁུང་སི་ཏེ་དང་། ལས་བྱེད་ཧྥིན་ཙུན་ཕིན་དང་ཁུང་པེ་མ་ལུ་ཟེར་བ་བཅས་ཀྱིས། སྡེ་བ་ཡར་རྒྱས་གཏོང་བྱེད་ཀྱི་གཞུང་དངུལ་བཀག་ཡོད་སྟབས། ཁོ་ཚོ་ཏང་ནང་ནས་ཕུད་དེ་ཁྲིམས་འཛིན་ལས་ཁུངས་ལ་ནག་ཉེས་རྩིས་སྤྲད།
ཐེ་བོ་རྫོང་སྐྱིད་པོ་ཁོག་སྡེ་བའི་ཏང་གི་མགོ་ཁྲིད་གཡང་བཟང་སྐྱིད་འཛོམས་གྱིས་ཞིང་སའི་རོགས་དངུལ་སྒེར་སྤྱོད་བྱས་པ་དང་། དེ་བཞིན་སྡེ་བའི་ཨུ་ཡོན་ལྷན་ཁང་གི་འགན་འཛིན་ཤེས་རབ་ཚེ་རིང་གིས་སྡེ་བའི་ཞིང་སའི་རོགས་དངུལ་བསྐྱིས་ནས་དུས་ལྟར་ཕྱིར་སྤྲད་མེད་སྟབས། འདི་ལོའི་ཕྱི་ཟླ་ ༥ ཚེས་ ༢༥ ཉིན་གཡང་བཟང་སྐྱིད་འཛོམས་ཏང་གི་ལས་གནས་ནས་ཕུད་པ་དང་། ཤེས་རབ་ཚེ་རིང་ལ་ཏང་ནང་གི་ཐ་ཚིག་ནན་པོ་བསྒྲགས་ཡོད་འདུག
གཞན་ཡང་། རྨ་ཆུ་རྫོང་མུར་བྱེ་གྲོང་ཚོའི་འཕྲོད་བསྟེན་ཁང་གི་མགོ་ཁྲིད་ཆོས་འཛོམས་ཚེ་རིང་ཟེར་བས། གཞུང་དངུལ་གྱིས་སྒེར་གྱི་རླངས་འཁོར་ལ་སྣུམ་བླུགས་པར་བརྟེན། ཏང་ནང་གི་ཐ་ཚིག་དྲག་པོ་བསྒྲགས་པ་མ་ཟད། དངུལ་གྱི་སྐྱིན་ཚབ་སྤྲོད་དུ་བཅུག་ཡོད་པ་དང་། ཡང་རྨ་ཆུ་རྫོང་རྨ་ཁུགས་རྟ་རའི་འཕྲོད་བརྟེན་ཁང་གི་མགོ་ཁྲིད་ཝེ་ཧེ་ཅིན་གྱིས། མི་སྒེར་གྱི་ཕྱོགས་སྐྱོད་ལ་གཞུང་དངུལ་བཏང་ཡོད་སྟབས། འདས་ལོའི་ཕྱི་ཟླ་ ༡༢ ཚེས་ ༡༡ ཉིན་ཏང་གི་ཐ་ཚིག་བསྒྲགས་ཡོད་འདུག
གསར་འགོད་པ། པདྨ་མཚོ།
