བདུན་ཕྲག་རྗེས་མའི་ནང་ཧྥི་ལེ་ཕིན་གཞུང་གིས་རྒྱལ་སྤྱིའི་ཁྲིམས་ཁང་ལ་རྒྱ་ནག་གཞུང་ གིས་ལྷོ་རྒྱ་ནག་རྒྱ་མཚོའི་བདག་དབང་རྩོད་ལེན་བྱེད་བཞིན་ཡོད་པའི་གྱོད་དོན་ཞུ་གཏུག་བྱ་རྒྱུ་ཡིན་འདུག
དེ་རིང་རྒྱལ་སྤྱིའི་བརྒྱུད་ལམ་ཁག་ཏུ་ཧྥི་ལེ་ཕིན་སྲིད་འཛིན་གྱི་མགྲིན་ཚབ་གཞོན་པ་ལྕམ་ཨཱ་བྷི་གྷལ་ཝལ་ཌེ་ (Abigail Valte) ལགས་ཀྱིས། ཟླ་རྗེས་མའི་ཚེས་ ༧ ནས་ ༡༣ ཉིན་བར་ཧྥི་ལེ་ཕིན་གཞུང་གིས་ཧོ་ལན་ཌིའི་གྲོང་ཁྱེར་ཧེག་ (Hague) ནང་རྟེན་གཞི་བྱས་པའི་རྒྱལ་སྤྱིའི་ཁྲིམས་ཁང་ལ་རྒྱ་ནག་གཞུང་གིས་རྒྱལ་ཁབ་གཉིས་བར་རྩོད་གཞི་ཡོད་པའི་ལྷོ་རྒྱ་ནག་རྒྱ་མཚོའི་བདག་དབང་རྩོད་ལེན་བྱེད་བཞིན་ཡོད་པར་ཞུ་གཏུག་བྱ་རྒྱུ་ཡིན་པ་མ་ཟད། ཞུ་གཏུག་དེར་རྒྱལ་ཁ་འཐོབ་རྒྱུའི་རེ་བ་ཡོད་སྐོར་བརྗོད་འདུག
རྒྱ་གར་དུས་བབ་དང་ཡཱ་ཧོ་གསར་ལམ་ཐོག་ཧྥི་ལེ་ཕིན་སྲིད་འཛིན་གྱི་མགྲིན་ཚབ་གཞོན་པ་ལྕམ་ཨཱ་བྷི་གྷལ་ཝལ་ཌེ་ལགས་ཀྱིས། ང་ཚོས་ཁ་མཆུ་ཆེན་པོ་ཞིག་ལ་ལག་པ་འཆང་ནས་གྲ་སྒྲིག་བྱས་ཡོད་སྟབས། ང་ཚོ་འགྱེལ་ས་ནས་ལངས་ཐུབ་པ་དང་། རྒྱལ་སྤྱིའི་ཁྲིམས་ཁང་ངོས་ནས་ཁ་མཆུ་འདིར་གཟིགས་སྐྱོང་གནང་བའི་ཡིད་ཆེས་བྱེད་ བཞིན་ཡོད་པ་མ་ཟད། ང་ཚོར་རྒྱལ་ཁ་འཐོབ་པའི་གདེང་ཚོད་ཆེན་པོ་ཡོད། ཅེས་བརྗོད་འདུག
དབྱིན་ཡུལ་གྱི་གྷར་ཌིན་དང་རོའུ་ཌར་གསར་ལམ་སོགས་སུ་གནས་ཚུལ་ཐོན་པ་ལྟར་ན། ༢༠༡༢ ལོར་རྒྱ་ནག་གི་དམག་གྲུས་ཧྥི་ལེ་ཕིན་དང་རྒྱ་ནག་བར་རྩོད་ཉོག་ཡོད་པའི་སེ་ཁར་བྷོ་རོག་ཤོལ་ (Scarborough Shoal) དང་། དེ་རྗེས་ཋོ་མཱ་སེ་ཤོལ་ (Thomas Shoal) མཚོ་ཁུག་གཉིས་སུ་བཙན་འཛུལ་བྱས་ཡོད་པ་མ་ཟད། ༢༠༡༣ ལོའི་ཟླ་ ༡༡ པའི་ཚེས་ ༧ ཉིན་ཞི་བདེ་རྒྱ་མཚོའི་ཐོག་མཁའ་དབྱིངས་ཐིག་ཚད་བཟོས་ཤིང་། ༢༠༡༤ ལོའི་ཟླ་ ༢ པའི་ཚེས་ ༢༣ ཉིན་ཉི་ཧོང་དང་རྒྱ་ནག་གིས་བདག་དབང་རྩོད་ལེན་བྱེད་བཞིན་པའི་ཞི་བདེ་རྒྱ་མཚོའི་མངའ་ཁུལ་སཱིན་ཁཱ་ཁའོ་གླིང་ཕྲན་གྱི་ (Minamikojima) ཞེས་པའི་སྤྱི་གཡར་མཚོ་ཁུལ་དུ་རྒྱ་ནག་གི་མཚོ་དམག་གྲུ་གཟིངས་གསུམ་བཏང་སྟེ་བཙན་འཛུལ་བྱས་ཡོད། བདུན་ཕྲག་ཁ་ཤས་སྔོན་རྒྱ་ནག་གཞུང་གིས་ཧྥི་ལི་ཕིན་དང་རྒྱ་ནག་གི་རྩོད་གཞི་ཅན་གྱི་མཚོ་གླིང་སེ་ཧྥར་ལེའི (Spratlys) ཐོག་འཛུགས་སྐྲུན་ལས་གཞི་ཁག་གཅིག་སྤེལ་བཞིན་ཡོད་པ་དང་། ལོ་འདིའི་ཟླ་ ༥ ཚེས་ ༢༨ ཉིན་ལྷོ་རྒྱ་ནག་རྒྱ་མཚོའི་མཚོ་གླིང་ཐོག་སྒྱོགས་མདེལ་རླངས་འཁོར་ཆེན་པོ་གཉིས་བཞག་ཡོད་པ་བཅས་ཀྱི་བརྙན་པར་ཐོན་ཡོད་པ་དང་། ཉེ་ལམ་རྒྱ་ནག་གཞུང་གིས་ལྷོ་རྒྱ་ནག་རྒྱ་མཚོའི་མཚོ་ཁུགས་དང་མཚོ་ཁུལ་དུ་རྡོ་སྣུམ་སྔོག་འདོན་དང་མི་བཟོས་གླིང་ཕྲན་གསར་རྒྱག་སོགས་བྱས་ཏེ། ཁྱིམ་མཚེས་རྒྱལ་ཁབ་ཁག་ལ་དགྲ་བསགས་ཡོད་སྟབས། ཨ་རི་གཙོས་སྟོབས་ཆེན་རྒྱལ་ཁབ་ཁག་གིས་རྒྱ་ནག་གཞུང་ལ་གནོན་ཤུགས་ག་ཚོད་ཅིག་སྤྲད་ཀྱང་ཁ་ཡ་བྱེད་ཀྱི་མེད་པར་བརྟེན། ཧྥི་ལེ་ཕིན་གཞུང་གིས་ཕྱི་སྲིད་དྲུང་ཆེ་ཨལ་བྷར་ཌི་ (Albert del Rosario) ལགས་ཀྱིས་སྣེ་ཁྲིད་པའི་ཨ་རིའི་ཁྲིམས་རྩོད་པ་ཞིག་ཐེ་པའི་སྐུ་ཚབ་ཚོགས་ཆུང་ཞིག་ཧོ་ལན་ཌིའི་གྲོང་ཁྱེར་ཧེག་བསྐྱོད་དེ། རྒྱལ་སྤྱིའི་ཁྲིམས་ཁང་ལ་རྒྱ་ནག་གཞུང་གིས་ལྷོ་རྒྱ་ནག་རྒྱ་མཚོའི་བདག་དབང་ རྩོད་ལེན་བྱེད་བཞིན་ཡོད་པའི་ཁ་མཆུ་རྒྱག་རྒྱུ་ཡིན་ཡང་། རྒྱ་ནག་གཞུང་གིས་ཆ་ཤས་ལེན་རྒྱུ་མིན་སྐོར་བརྗོད་འདུག་ཅེས་སོགས་བཀོད་འདུག
ཧྥི་ལེ་ཕིན་ཕྱི་སྲིད་ལྷན་ཁང་གི་མགྲིན་ཚབ་པ་ཅར་སེ་ཇཱོ་སེ་ (Charles Jose) ལགས་ཀྱིས། ཧེག་ནང་རྟེན་གཞི་བྱས་པའི་རྒྱལ་སྤྱིའི་ཁྲིམས་ཁང་གིས་དོན་དངོས་གནས་ཚུལ་ལ་གཞིགས་ནས་ཁ་མཆུ་འདིར་ཐག་གཅོད་བྱ་རྒྱུ་མ་ཟད། མ་འོངས་པར་གྱོད་དོན་འདིར་ཁ་མཆུ་གཉིས་པ་རྒྱག་ཆོག་པའི་ཆོག་མཆན་སྤྲོད་རྒྱུའི་རེ་བ་ཞུ་བཞིན་ཡོད། ཅེས་དང་། རྒྱལ་སྤྱིའི་གནད་དོན་ཆེད་མཁས་པ་ཨན་རན་སུང་ལགས་ཀྱིས། འདས་པའི་ལོ་ཤས་ནས་བཟུང་རྒྱ་ནག་གཞུང་གིས་རྒྱ་ནག་དང་ཧྥི་ལི་ཕིན། མཱ་ལེ་ཞི་ཡ་དང་བྷུར་ཎེ། ཝེ་ཋི་ནམ་བཅས་ཀྱི་བར་རྩོད་རྙོག་ཡོད་པའི་ལྷོ་རྒྱ་ནག་རྒྱ་མཚོའི་ལྷོ་ངོས་བྱེ་ གླིང་ཧྥེ་རའེ་ཁཱོར་སེ་རེབ་ (Fiery Cross Reef) མཚོ་གླིང་ཐོག་གནམ་ཐང་གཙོས་འཛུགས་སྐྲུན་ལས་གཞི་ཁག་གཅིག་གསར་རྒྱག་བྱས་ཏེ། ཁྱིམ་མཚེས་རྒྱལ་ཁབ་ཁག་ལ་དགྲ་བསགས་ཡོད་སྟབས། མ་འོངས་པར་རྒྱ་ནག་ཨུ་རུ་སུ་ལྟར་གྲོགས་མེད་ཁེར་རྐྱང་གི་རྒྱལ་ཁབ་ཅིག་ཏུ་ འགྱུར་ཏེ། ད་ལྟ་ལས་ལྷག་པ་དཔལ་འབྱོར་ཉམས་གུད་འགྲོ་རྒྱུ་ཡིན་སྐོར་བརྗོད་འདུག
