ཡུ་གུར་གྱི་གནད་དོན་ཟེར་བ་ཞིག་གཏན་ནས་མེད།

ཊོར་ཀེ་མི་མང་བརྒྱ་ཕྲག་མང་པོས་རྒྱ་གཞུང་གིས་ཡུ་གུར་བའི་ཆོས་དད་རང་དབང་ལ་བཙན་གནོན་བྱེད་བཞིན་པར་ངོ་རྒོལ་ཁྲོམ་སྐོར་བྱས་ཡོད་འདུག

འདས་པའི་བདུན་ཕྲག་གཅིག་ཙམ་གྱི་རིང་ཨེ་ཤ་ཡའི་ནུབ་ཁུལ་གྱི་རྒྱལ་ཁབ་ཊོར་ཀེ་(Turkey)ཡི་གྲོང་ཁྱེར་ཆེ་ཤོས་ཨེ་སི་ཐན་བྷལ་(Istanbul)དུ། མི་མང་བརྒྱ་ཕྲག་མང་པོ་འདུ་འཛོམས་བྱས་ཏེ། རྒྱ་ནག་གཞུང་གིས་ཡུ་གུར་མི་རིགས་ཀྱི་ཆོས་དད་རང་དབང་སོགས་འགྲོ་བ་མིའི་ཐོབ་ཐང་ལ་དྲག་གནོན་བྱེད་བཞིན་པར་ངོ་རྒོལ་ཁྲོམ་སྐོར་ཤུགས་ཆེན་བྱས་ཡོད་པ་མ་ཟད། རྒྱ་ནག་ནས་ཡོང་བའི་ཡུལ་སྐོར་བ་མང་པོར་གཅར་རྡུང་བཏང་ཡོད་པ་དང་། ཁ་སང་ཕྱི་ཚེས་ ༦ ཉིན་གྱི་གསར་འགོད་ལྷན་ཚོགས་ཤིག་གི་ཐོག རྒྱ་ནག་ཕྱི་འབྲེལ་ལས་ཁུངས་ཀྱི་མགྲིན་ཚབ་མ་ཧྭ་ཁྲིན་ཡེན་གྱིས། ཤིན་ཅང་ཡུ་གུར་མི་རིགས་ཀྱི་གནད་དོན་ཟེར་བ་ཞིག་གཏན་ནས་མེད་སྐོར་བརྗོད་ཡོད་སྟབས། རྒྱལ་སྤྱིའི་འགྲོ་བ་མིའི་ཐོབ་ཐང་དོན་གཉེར་བ་མང་པོས་རྒྱ་གཞུང་གི་བྱ་སྤྱོད་དེ་ལ་སྐྱོན་བརྗོད་ཤུགས་ཆེན་བྱེད་ཀྱིན་འདུག

ཟླ་འདིའི་ཕྱི་ཚེས་ ༡ ཉིན་ཨེ་སི་ཐན་བྷལ་གྲོང་ཁྱེར་ནང་ཡོད་པའི་རྒྱ་ཟས་ཟ་ཁང་ཞིག་ལ་མི་མང་གིས་ངོ་རྒོལ་གཏོར་བཅོམ་བཏང་ཡོད་པ་དང་། ཕྱི་ཚེས་ ༤ ཉིན་སླར་ཡང་ངོ་རྒོལ་བ་བརྒྱ་ཕྲག་མང་པོས་ཁྲོམ་སྐོར་བྱས་ཏེ། རྒྱ་ནག་ནས་ཡོང་བའི་ཡུལ་སྐོར་བ་ཚོར་གཅར་རྡུང་བཏང་ཡོད་པ་མ་ཟད། ལྷོ་ཀོ་རི་ཡའི་ཡུལ་སྐོར་བ་རེ་འགའ་ཡང་རྒྱ་ནག་ནས་ཡོང་བར་ནོར་ཏེ་གཅར་རྡུང་ཕོག་ཡོད་སྟབས། ཊོར་ཀེ་ནང་ཡོད་པའི་རྒྱ་ནག་གཞུང་ཚབ་ཁང་གིས་རྒྱ་ནག་ནས་ཡོང་བའི་ཡུལ་སྐོར་བ་ཚོས། ངོ་རྒོལ་ལས་འགུལ་ལ་པར་རྒྱག་པ་སོགས་མི་བྱེད་པར་རྒྱང་ཐག་འཛིན་དགོས་ལ། ཁེར་རྐྱང་གིས་བྱ་འགུལ་རིགས་ནང་ཞུགས་རྒྱུ་ཉུང་དུ་གཏོང་དགོས་ཚུལ་གྱི་ཉེན་བརྡ་བཏང་ཡོད་པ་དང་། ངོ་རྒོལ་ལས་འགུལ་བ་ཚོས་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་སྐད་འབོད་བྱས་ཡོད་པ་མ་ཟད། རྒྱ་ནག་གི་རྒྱལ་དར་མེར་སྲེག་བཏང་ཡོད་སྟབས། ཊོར་ཀེ་ཉེན་རྟོག་ཕྱོགས་ནས་ཉིན་མཚན་མེད་པར་རྒྱ་ནག་གཞུང་ཚབ་ཀྱི་མཐའ་སྐོར་ཏེ་ཉེན་སྲུང་ནན་པོ་བྱེད་བཞིན་ཡོད་འདུག

ཁ་སང་ཕྱི་ཚེས་ ༦ ཉིན་རྒྱ་ནག་ཕྱི་འབྲེལ་ལས་ཁུངས་ཀྱི་མགྲིན་ཚབ་མ་ཧྭ་ཁྲིན་ཡེན་གྱིས་གསར་འགོད་ལྷན་ཚོགས་ཤིག་གི་ཐོག ཊོར་ཀེ་ནང་ཉིན་བསྟུད་མར་རྒྱ་ནག་ལ་ངོ་རྒོལ་ལས་འགུལ་སྤེལ་བཞིན་པར་དོ་སྣང་ཆེན་པོ་བྱེད་བཞིན་ཡོད་ལ། ཊོར་ཀེ་གཞུང་གིས་རྒྱ་ནག་མི་མང་དང་ལས་ཁུངས་ཁག་གི་བདེ་འཇགས་ཐད་སྲུང་སྐྱོབ་བྱེད་པའི་རེ་བ་ཡོད། ཅེས་དང་། ཡང་ཁོ་མོས་རྒྱ་ནག་ནང་གི་ཡུ་གུར་བ་ཚོས་རྩ་ཁྲིམས་ཀྱི་གཏན་འབེབས་ལྟར་ཆོས་དད་རང་དབང་ལོངས་སུ་སྤྱོད་ཀྱི་ཡོད་པ་ལས། བརྒྱུད་ལམ་ཁག་ཏུ་ཐོན་པའི་ཤིན་ཅང་ཡུ་གུར་མི་རིགས་ཀྱི་གནད་དོན་ཟེར་བ་ཞིག་གཏན་ནས་མེད་ཅེས་ནན་བརྗོད་བྱས་ཡོད་པ་དང་། དེ་བཞིན་རྒྱ་ནག་གཞུང་འབྲེལ་ཤིན་ཧྭ་གསར་ཁང་དང་གོ་ལའི་དུས་བབ་ཀྱིས་ཀྱང་ངོ་རྒོལ་ལས་འགུལ་དེ་ནི་གཡས་ཕྱོགས་པའི་ཤུགས་རྐྱེན་ཞིག་དང་། ནུབ་ཕྱོགས་ཀྱི་གསར་འགྱུར་བརྒྱུད་ལམ་ཁག་གི་ཁ་བྲལ་གཏོང་ཐབས་ཀྱི་བྱ་སྤྱོད་ཅིག་ཡིན་པའི་སྐྱོན་བརྗོད་བྱས་ཡོད་འདུག

འཇར་མན་དུ་ཡོད་པའི་འཛམ་གླིང་ཡུ་གུར་མི་རིགས་མཐུན་ཚོགས་ཀྱི་མགྲིན་ཚབ་པ་ཏི་ལི་ཞཱ་ཡིས། ཡུ་གུར་བ་ཚོས་དམྱལ་བ་མི་ཡུལ་དུ་བསླེབས་པ་ལྟ་བུའི་གནས་སྟངས་འོག་འཚོ་བ་སྐྱེལ་བཞིན་ཡོད་པ་དེ་རྩོད་མེད་ཀྱི་དོན་དངོས་ཤིག་ཡིན་ལ། འདི་ལོར་འཛམ་གླིང་ཡུལ་གྲུ་གང་ས་ནས་རྒྱ་གཞུང་གིས་ཡུ་གུར་བ་ཚོར་དྲག་གནོན་ཚད་མེད་བྱེད་བཞིན་པར་ངོ་རྒོལ་བྱེད་བཞིན་ཡོད་པས། རྒྱ་གཞུང་གིས་ཕྱི་ནས་ནང་སྲིད་ལ་ཇུས་གཏོགས་བྱས་པའི་སྐྱོན་བརྗོད་མ་བྱས་གོང་རང་ཉིད་ཀྱི་སྲིད་བྱུས་ལ་བསམ་བློ་ངེས་པར་དུ་གཏོང་དགོས། ཚད་ལས་བརྒལ་བའི་དྲག་གནོན་གྱིས་ཡུ་གུར་བ་ཚོས་རྒྱུན་ལྡན་གྱི་འཚོ་བ་སྐྱེལ་ཐབས་མེད་པའི་རྐྱེན་གྱིས། རྒྱལ་སྤྱིའི་ཐོག་ནས་ཡུ་གུར་བའི་གནད་དོན་ཐོག་དོ་སྣང་བསླེབས་པ་ཞིག་ཡིན་སྐོར་བརྗོད་ཡོད་པ་རེད།

ཉེ་བའི་ལོ་ཤས་ནང་ཊོར་ཀོ་མི་མང་གིས་རྒྱ་གཞུང་ལ་ངོ་རྒོལ་བསྟུད་མར་བྱས་ཡོད་པ་དང་། འདས་ལོའི་ཕྱི་ཟླ་ ༡༡ ནང་། རྒྱ་ནག་སྲིད་ཁྲིམས་ལྷན་ཁང་གི་མགོ་ཁྲིད་མིན་ཅན་ཀྲུའུ་ཡིས་སྲིད་འཛིན་ཞི་ཅིན་ཕིན་གྱི་ངོ་ཚབ་བྱས་ཏེ། ཊོར་ཀེ་ནང་གཞུང་འབྲེལ་ཕྱོགས་སྐྱོད་ཀྱིས་དར་གོས་དཔལ་འབྱོར་ཚོང་ལམ་ལ་སྐུལ་འདེད་བཏང་བ་དང་ཆབས་ཅིག ཊོར་ཀེ་དང་རྒྱ་ནག་བར་གྱི་མཉམ་ལས་འབྲེལ་བ་ཡར་རྒྱས་གཏོང་དགོས་པའི་སྐུལ་མ་བྱས་ཡོད་པ་དང་། ཊོར་ཀེ་གཞུང་གིས་ཀྱང་ཚོགས་པ་དང་མི་སྒེར་སུ་ལའང་རྒྱལ་ཁོངས་ནས་རྒྱ་ནག་གི་ཁེ་ཕན་ལ་གནོད་པའི་བྱ་འགུལ་རིགས་གཅིག་ཀྱང་སྤེལ་དུ་འཇུག་རྒྱུ་མིན་པའི་ཁས་ལེན་བྱས་ཡོད་པ་མ་ཟད། མཉམ་གཅིག་ཏུ་ངོ་རྒོལ་ལས་འགུལ་རིགས་ལ་རྡུང་རྡེག་གཏོང་བའི་ཆོད་སེམས་བཅངས་ཡོད་སྐོར་བརྗོད་ཡོད་ཀྱང་། ཉེ་སྔོན་རྒྱ་ནག་ནང་ཡོད་པའི་ཡུ་གུར་བ་ ༡༧༣ ཐའེ་ལན་ཌི་བརྒྱུད་ཊོར་ཀེ་ནང་སྐྱབས་བཅོལ་དུ་བསླེབས་ཡོད་པ་དང་། ཊོར་ཀེ་གཞུང་གིས་ཀྱང་ཁོང་ཚོར་སྐྱབས་བཅོལ་གྱི་ཐོབ་ཐང་སྤྲད་པར་བརྟེན། པེ་ཅིན་གཞུང་གིས་སྐྱོན་བརྗོད་བྱས་ཏེ་མ་དགའ་བའི་རྣམ་འགྱུར་བསྟན་ཡོད་པ་དང་། དེ་བཞིན་ཊོར་ཀེ་ཡི་གསར་འགྱུར་བརྒྱུད་ལམ་ཁག་གིས། ཁ་ཆེ་ཆོས་ལུགས་ཀྱི་དུས་ཆེན་ལ་རྒྱ་གཞུང་གིས་བཀག་སྡོམ་ནན་པོ་བྱས་པའི་གནས་ཚུལ་མང་པོ་སྤེལ་ཏེ། ཊོར་ཀེ་ནང་གི་ཁ་ཆེའི་རྗེས་འཇུག་པ་ཚོས་རྒྱ་གཞུང་ལ་འཁོན་སེམས་ཆེན་པོ་འཛིན་གྱི་ཡོད་འདུག

གསར་འགོད་པ། པདྨ་མཚོ།