བོད་ཀྱི་མཛངས་མ་ཚེ་རིང་སྐྱིད་ལགས་ཀྱིས་ཤེས་རབ་དགའ་ཚལ་སློབ་གླིང་གི་རང་མོས་གླེང་སྟེགས་སྟེང་། རང་ལས་གཞན་གཅེས་ལག་ལེན་དཀའ་སྟབས། གཞན་ལ་གནོད་པ་མེད་པའི་ཐོག་ནས་རང་དོན་ལ་གཙིགས་ཆེན་གྱིས་དཀའ་ངལ་ཡོད་ཚད་སྙིང་སྟོབས་ལ་བསྒྱུར་ཏེ་འབད་བརྩོན་བྱེད་དགོས་ཟེར།
རེས་གཟའ་ཕུར་བུའི་ཉིན། བཞུགས་སྒར་དྷ་རམ་ས་ལའི་ཉེ་འཁྲིས་ཤེས་རབ་དགའ་ཚུལ་སློབ་གླིང་དུ། ༼ ཤེས་རབ་དགའ་ཚུལ་སློབ་གླིང་གི་རང་མོས་གླེང་སྟེགས།༽ ཞེས་པའི་སྟེང་། བོད་ཀྱི་མཛངས་དང་སྙན་ངག་པ་ཚེ་རིང་སྐྱིད་ལགས་གདན་འདྲེན་ཞུས་ཏེ། ཁོ་མོའི་མི་ཚེའི་ལོ་རྒྱུས་དང་འབྲེལ་ཏེ་སློབ་མ་ཚོ་དང་དྲི་བ་དྲིས་ལན་གནང་སོང་། གླེང་སྟེགས་དེའི་སྟེང་སློབ་གྲྭའི་དགེ་ལས་སློབ་ཕྲུག་ཡོངས་མཉམ་ཞུགས་གནང་འདུག
ཚེ་རིང་སྐྱིད་ལགས་ཀྱིས་ཐོག་མར་མོ་རང་བཙན་བྱོལ་དུ་གྱར་བའི་བརྒྱུད་རིམ་གླེང་དོན། སྤྱིར་བཏང་མི་ཚེ་ཉམས་མྱོང་ཟེར་དུས་མི་ཆེན་པོ་ཞིག་དང་སློབ་སྦྱོང་ཡོད་མཁན་ཞིག ལོ་ཡང་ཅུང་རྒན་པ་བྱས་རྗེས་དང་ཉམས་མྱོང་མང་པོ་ཡོད་མཁན་ཞིག་གིས་བཤད་ན་ཕལ་ཆེར་ལན་པོ་ཡོད་རྒྱུ་རེད། ཡིན་ནའང་མི་ཆེ་ཆུང་ལ་མ་ལྟོས་པར་ང་ཚོ་ཚང་མར་ཉམས་མྱོང་དང་ཤེས་ཡོན། ཀྱག་ཀྱོག་གི་མི་ཚེའི་ལམ་ཁ་བརྒྱུད་སྟངས་མ་འདྲ་བ་རེ་ཡོད་སྟབས། ང་རང་གིས་སོ་སོ་བཙན་བྱོལ་དུ་གྱར་བའི་བརྒྱུད་རིམ་དང་འབྲེལ་ཏེ་སྐད་ཆ་ཁ་ཤས་བཤད་ན་བསམ་སོང་། ང་ཐོག་མ་ ༡༩༩༩ ལོར་རྒྱ་གར་ལ་ཡོང་སྟེ་སུ་ཇ་སློབ་གྲྭར་ལོ་ ༥ ཙམ་རིང་སློབ་སྦྱོང་བྱས་པ་ཡིན། ང་རང་ལ་ཆུང་ཆུང་སྐབས་གླུ་དང་ལ་གཞས། ཞབས་བྲོ། སྒྲུང་སོགས་དམངས་ཁྲོད་རིག་གནས་ཀྱི་བག་ཆགས་ཤུགས་ཆེན་པོ་བཞག་ཡོད་སྟབས། རྩོམ་རིག་གི་སེམས་ཁམས་ཟེར་ན་འདྲ་ལ་སྒྱུ་རྩལ་གྱི་སེམས་ཁམས་ཟེར་ནའང་འདྲ། ཆུང་ཆུང་སྐབས་ནས་རྩོམ་རིག་ལ་དགའ་བོ་ཞེ་དྲགས་ཡོད། སུ་ཇ་སློབ་གྲྭ་ནས་ཀྱང་དབྱིན་ཡིག་སོགས་ཀྱི་སློབ་ཚན་ཁག་ཡག་པོ་སྦྱངས་ཐུབ་མེད་ཀྱང་རྩོམ་འབྲི་བ་དང་དེབ་ཀློག་རྒྱུར་དགའ་བོ་ཞེ་དྲགས་ཡོད། ངས་སུ་ཇ་སློབ་གྲྭར་སློབ་སྦྱོང་བྱེད་བཞིན་པའི་སྐབས་ཤིག ཕ་ཡུལ་ནས་ངའི་པཱ་ལགས་ན་གི་འདུག ང་མགྱོགས་པོ་ཕྱིར་ཕ་ཡུལ་དུ་ཤོག་ཅེས་ཡི་གེ་འབྱོར་སྟབས། ངས་སློབ་གྲྭ་ནས་དགོངས་པ་ཞུས་ཏེ་ཕ་ཡུལ་དུ་འགྲོ་རྩིས་བྱས་པ་ཡིན། འོན་ཀྱང་རྗེས་སུ་པཱ་ལགས་གྲོངས་ཚར་བའི་གནས་ཚུལ་ཐོས་ཏེ་ང་ཕ་ཡུལ་དུ་འགྲོ་ཐུབ་ཡོད་པ་མ་རེད། དེ་ལྟར་སློབ་གྲྭ་ནས་ཕྱི་ལོགས་སུ་ཐོན་ཚར་ཡིན་སྟབས། སྤྱི་ཚོགས་ནང་ཆ་རྒྱུས་གང་ཡང་ཡོད་པ་མ་རེད། ཐོག་མ་སོ་སོས་ལྷད་མེད་པའི་སེམས་པ་ཞིག་འཁྱེར་ནས་ཡོང་བ་ཡིན་དུས། སྤྱི་ཚོགས་ནང་གི་རྙོག་གྲ་དང་གནས་ཚུལ་མང་དག་ཅིག་ལ་གདོང་གཏོད་དགོས་བྱུང་སོང་། ཅེས་སོགས་བརྗོད་སོང་།
ཚེ་རིང་སྐྱིད་ལགས་ཀྱིས་ཁོང་མོ་བོད་ཀྱི་མཛངས་མར་བདམས་པའི་བརྒྱུད་རིམ་སྐོར་བརྗོད་དོན། ༢༠༠༣ ལོར་ང་རང་བོད་ཀྱི་མཛངས་མ་འགྲན་བསྡུར་ནང་ཞུགས་པ་ཡིན། སྐབས་དེར་བོད་ཀྱི་མཛངས་མ་འགྲན་བསྡུར་མགོ་བཙུགས་ནས་ལོ་གཅིག་ལས་ཕྱིན་མི་འདུག ང་ཞུགས་སྐབས་བོད་ཀྱི་མཛངས་མ་འགྲན་བསྡུར་ཐེངས་གཉིས་པ་དེ་རེད། སྐབས་དེའི་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་བོད་ཀྱི་མཛངས་མ་འགྲན་བསྡུར་ཟེར་བ་དེ་བོད་པའི་རིག་གཞུང་དང་ཆོས་ལུགས་སོགས་དང་མཐུན་གྱི་མེད་པའི་བཀའ་སློབ་ཅིག་གནང་བར་བརྟེན་ཏེ། བློ་བཟང་དབང་རྒྱལ་གྱི་བོད་གྱི་མཛངས་མ་འགྲན་བསྡུར་ལས་གཞི་དེར་དཀའ་ངལ་ཆེན་པོ་འཕྲད་པ་རེད། ང་ཞུགས་པའི་ལོ་དེར་ཐོག་མ་ཁེ་ན་ཌ་ནས་བུ་མོ་ ༢ དང་སུད་སི་ནས་ ༡ བཅས་ཁྱོན་བུ་མོ་ ༡༣ ཙམ་གྱིས་ཐོ་འགོད་བྱས་ཡོད་པ་རེད། སྐབས་དེར་བོད་པའི་སྤྱི་ཚོགས་ཙམ་མ་ཟད་རྒྱལ་སྤྱིའི་ཐོག་ཏུའང་དོ་སྣང་གང་འཚམ་ཡོང་གི་ཡོད་པ་རེད། གསར་འགོད་གསལ་བསྒྲགས་སྐབས་བྷེ་བྷེ་སི་གསར་ཁང་སོགས་ཀྱང་བསླེབས་འདུག འོན་ཀྱང་དངོས་གཞིའི་གསར་འགོད་གསལ་བསྒྲགས་ཉིན་བུ་མོ་ ༡༣ གྱི་རྐུབ་སྟེགས་བསྒྲིགས་ཡོད་ཀྱང་། ང་གཅིག་པུ་ལས་སྡིངས་ཆའི་ཐོག་བསླེབས་ཡོད་པ་མ་རེད། སྐབས་དེར་ང་ལོ་ ༡༩ རེད། དགའ་སྐྱོའི་ཚོར་བ་ཤུགས་ཆེན་པོ་ཞིག་བྱུང་ཡོད་ཀྱང་། ཕྱོགས་གཞན་ཞིག་ནས་རྒྱབ་རྩ་སོགས་གང་ཡང་མེད་པའི་བུ་མོ་ཆུང་ཆུང་ཞིག་གིས་བོད་ཀྱི་མཛངས་མའི་གར་སྟེགས་རྒྱུན་སྐྱོང་ཐུབ་ཡོད་པ་དེར་སྤོབས་པ་བྱེད་དགོས་པ་ཞིག་ཆགས་ཡོད། སྤྱི་ཚོགས་ནང་འགྲན་ཡ་མེད་པའི་མཛངས་མ་ཟེར་མཁན་ཡོད་ཀྱང་། ང་རང་ཉིད་ཡིན་ན་བོད་པའི་སྤྱི་ཚོགས་ནང་གི་བུད་མེད་ཚང་མ་ངའི་འགྲན་ཡ་རེད་བསམ་གྱི་ཡོད། སྤྱི་ཚོགས་ཀྱི་གནོད་ཤུགས་ཀྱང་ཡིན་སྲིད་མོད་གཙོ་བོ་སོ་སོར་ཡིད་ཆེས་དང་གདེང་ཚོད་མེད་སོང་བ་རེད།
ཐོག་མ་བོད་ཀྱི་མཛངས་མའི་མིང་དེ་ཐོབ་མ་ཐག་སོ་སོ་བོད་ནས་ཡོང་བའི་གསར་འབྱོར་བ་ཞིག་ཡིན་སྟབས། ཡིག་ཆ་སོགས་ཀྱི་དཀའ་ངལ་འོག་ཕྱི་རྒྱལ་དུ་སྐོར་སྐྱོད་བྱེད་མ་ཐུབ་པར་ངའི་ཚབ་ཏུ་མི་གཞན་པ་གཏོང་དགོས་བྱུང་ཡོད་ཀྱང་། རྗེས་སུ་ང་རང་དངོས་སུ་བསྐྱོད་དེ་ཕྱི་རྒྱལ་གྱི་ཚོགས་འདུ་དེ་འདྲའི་སྟེང་དམིགས་བསལ་ཆེན་པོ་བཤད་ཐུབ་མེད་ཀྱང་། བཙན་བྱོལ་བོད་མིའི་སློབ་གྲྭའི་དཀའ་ངལ་རིགས་དང་བོད་ནང་གི་གནས་སྟངས་སོགས་གང་ཐུབ་ཐུབ་ཅིག་བཤད་པ་ཡིན། དེའི་རྗེས་ལ་ང་རང་འཇར་མན་ནས་སློབ་སྦྱོང་བྱས་ཏེ་བསྡད་ཡོད་སྐབས། ༢༠༠༨ ལོར་ཕ་ཡུལ་ནས་ཨ་མ་ལགས་དང་སྤུན་ཉེ་འགའ་རྒྱ་གར་ལ་གནས་མཇལ་དུ་ཡོང་རྒྱུར་གྲ་སྒྲིག་བྱེད་ཀྱིན་འདུག་སྟབས་ང་རང་འཇར་མན་ནས་རྒྱ་གར་ལ་ཡོང་བ་ཡིན། རྗེས་སུ་ལྷ་སར་ཞི་རྒོལ་བྱུང་སྟེ་ཁོ་རང་ཚོ་རྒྱ་གར་ལ་བསླེབས་ཐུབ་ཡོད་པ་མ་རེད། ང་རང་སྐབས་དེ་ནས་བཟུང་རྒྱ་གར་ནང་བསྡད་དེ་ཐོག་མ་བོད་ཀྱི་དུས་བབ་ཀྱི་གསར་འགོད་པ་དང་། དེ་ནས་བུད་མེད་ཚོགས་པའི་རྒྱུན་ལས་བྱས་པ་ཡིན། རྗེས་སུ་ཨ་རིར་ཡོང་སྟེ་ཨ་རིའི་བོད་སྐད་རླུང་འཕྲིན་ཁང་གི་གསར་འགོད་པའི་ལས་ཀ་བྱེད་བཞིན་ཡོད། ངས་དེ་རིང་སྐད་ཆ་ཤོད་བཞིན་པ་འདི་རྒྱབ་ཀྱི་ཚོགས་སྡེ་སོགས་ལ་འབྲེལ་བ་མེད་པར་ང་རང་སྒེར་གྱི་བསམ་ཚུལ་ཙམ་ཞུ་བཞིན་ཡོད། ཅེས་བརྗོད་སོང་།
མཇུག་ཏུ་མོ་རང་གི་ལྟ་སྟངས་སྐོར་ཞིག་བརྗོད་དོན། ཤེས་རབ་དགའ་ཚུལ་སློབ་གླིང་གི་སློབ་མ་ཁྱེད་རང་ཚོར་མཚོན་ན། བོད་ནས་ཕ་མ་བཞག་ནས་ཚུར་ཡོང་པ་རེད། ད་ལྟ་གཅིག་བྱས་ན་ང་དང་འདྲ་བའི་གནས་ཚུལ་དེ་འདྲ་བྱུང་མྱོང་མཁན་ཡོད་རྒྱུ་རེད། ཡིན་ན་ཡང་། གནས་ཚུལ་དེ་ཚོར་སྡུག་ཕྱོགས་རྐྱང་རྐྱང་ལ་བསམ་བློ་མ་བཏང་བར། དགའ་སྤྲོ་དང་སྙིང་སྟོབས་ལ་བསྒྱུར་དགོས་པ་གལ་ཆེན་པོ་རེད། སྔོན་མ་ང་སུ་ཇ་རུ་སྡོད་སྐབས་བོད་ཁྱིམ་སློབ་གྲྭའི་ལྟ་གྲུབ་རང་ལས་གཞན་གཅེས་ཟེར་པ་དེ་རེད། ཡིན་ནའང་ང་ཚོ་མི་ཞིག་ཡིན་པ་དང་། མིའི་སྤྱི་ཚོགས་ནང་སྡོད་དགོས་སྟབས། རང་ལས་གཞན་གཅེས་ཟེར་བ་དེ་ཁག་པོར་མཐོང་གི་ཡོད། འོན་ཀྱང་གཞན་ལ་གནོད་པ་མ་བྱས་པའི་ཐོག་ནས་སྒེར་གྱི་འདོད་འདུན་དེ་གཙིགས་སུ་བཟུང་སྟེ། དེའི་ཐོག་དཀའ་ལས་རྒྱག་རྒྱུ་དང་། བློས་གཏོང་ག་རེ་བྱེད་དགོས་ཀྱང་སྙིང་སྟོབས་ཀྱི་ངོ་བོར་བསྒྱུར་ཏེ་རྒྱུན་འཁྱོང་བྱ་རྒྱུ་གལ་ཆེན་པོ་ཞེ་དྲགས་རེད། དེ་སློབ་སྦྱོང་རྐྱང་པའི་ཐོག་ནས་བསྒྲུབ་དགོས་པ་ཞིག་ཀྱང་མ་རེད་བསམ་གྱི་འདུག ཅེས་སོགས་བརྗོད་སོང་།
གཏམ་བཤད་དངོས་གཞི་གྲུབ་སྟེ་དྲི་བ་དྲིས་ལན་སྐབས། སློབ་ཕྲུག་ཅིག་གིས་དེང་སྐབས་བོད་ཕྱི་ནང་གཉིས་སུ་བོད་པའི་བུད་མེད་ཀྱི་ཐོབ་ཐང་དང་། ཕོ་མོ་འདྲ་མཉམ་སྐོར་ཤུགས་ཆེན་པོ་གླེང་མཁན་འདུག མ་འོངས་པར་ཁྱེད་ཀྱིས་བོད་པའི་བུད་མེད་སྐོར་ལ་ཕྱག་ལས་གང་འདྲ་གནང་འཆར་ཡོད་མེད་དྲིས་པར། ཚེ་རིང་སྐྱིད་ལགས་ཀྱིས་འདི་ལྟར་བརྗོད་བྱུང་། ངས་བོད་ཀྱི་བུད་མེད་སྐོར་ལ་དམིགས་བསལ་ལས་ཀ་གང་ཡང་བྱ་འདུན་མེད། བོད་པའི་བུད་མེད་ཚོར་རང་དབང་མི་འདུག་ཀྱང་བསམ་གྱི་མེད། ཐོག་མ་ང་བོད་ནས་ཡོང་སྐབས་ཕ་ཡུལ་བོད་ནང་གི་བུད་མེད་དེ་ཚོ་རྗེས་ལུས་རེད། སློབ་སྦྱོང་གི་གོ་སྐབས་རག་གི་མེད་པ་མ་ཟད། སྤྱི་ཚོགས་ནང་ཐོབ་ཐང་སོགས་གང་ཡང་མི་འདུག་བསམ་སོང་ལ། དེའི་སྐོར་ལ་རྩོམ་ཡིག་ཀྱང་རེ་ཟུང་བྲིས་མྱོང་ཡོད། འོན་ཀྱང་རྗེས་སུ་མིའི་སྤྱི་ཚོགས་འདྲ་མིན་མཐོང་ཡོང་སྐབས། ཕ་ཡུལ་གྱི་བུད་མེད་དེ་ཚོ་མི་རིགས་དང་ཡུལ་ལུང་གཞན་གྱི་བུད་མེད་ལས་ལྷག་གི་རྩ་ཆེན་པོ་དང་། ཁོ་རང་ཚོའི་མི་ཚེ་ལའང་གཞན་ལས་ལྷག་པའི་བདེ་སྐྱིད་དང་རིན་ཐང་ལྡན་པ་ཞིག་ལ་མཐོང་གི་འདུག དཔེར་ན། ང་རང་གི་ཨ་མ་དང་གཅེན་མོ་ལྟ་བུར་མཚོན་ན། ཁོ་རང་ཚོའི་མི་ཚེ་ཧྲིལ་བོ་སོ་སོའི་ཁྱིམ་ཚང་དང་བུ་ཕྲུག ཁྱོ་ག་སོགས་ཀྱི་ཆེད་དུ་བློས་བཏང་ཚར་བ་རེད། དེ་ལ་ཁོ་རང་ཚོས་དུས་ནམ་ཡང་ཁེངས་ར་བྱས་མྱོང་ཡོད་པ་མ་རེད་ལ། དེ་ལ་འདོད་པ་མེད་པ་དང་དེ་ནི་དཀའ་སྡུག་ཅིག་ཡིན་པའི་ཚོར་བ་ཙམ་ཡང་ཡོད་པ་མ་རེད། ལྷག་བསམ་འདི་ཇི་ལྟར་བྱུང་བ་རེད་ཟེར་ན། ང་ཚོ་བོད་པའི་ཆོས་ལུགས་རིག་གཞུང་གིས་བཞག་པའི་བག་ཆགས་ཤིག་གི་ནུས་སྟོབས་ལ་བརྟེན་ནས་བྱུང་བ་རེད། མི་དང་ཅ་དངོས་གང་ལ་ཡང་རིན་ཐང་གི་ལྟ་སྟངས་མ་འདྲ་བ་ཡོད་པ་རེད། འདི་རྩ་ཆེན་པོ་རེད་བསམ་གྱི་འདུག གལ་སྲིད་ནུབ་ཕྱོགས་སྤྱི་ཚོགས་ནང་གི་ཕོ་མོ་འདྲ་མཉམ་གྱི་ལྟ་བ་ཤུགས་ཆེན་པོ་ཡོད་མཁན་བུད་མེད་ཅིག་ང་ཚོ་བོད་པའི་སྤྱི་ཚོགས་ནང་བསྡད་དེ་བོད་པའི་ཆོས་ལུགས་རིག་གཞུང་ལ་བག་ཆགས་གཏིང་ཟབ་མོ་ཞིག་འཇོག་ཐུབ་པ་ཡིན་ན། གཞི་ནས་ཁྱོད་ལ་བུད་མེད་ཀྱི་ཐོབ་ཐང་ཟེར་བ་དང་ཕོ་མོ་འདྲ་མཉམ་ཟེར་བ་དེ་དག་ལ་ལྟ་ལྟངས་གཞན་ཞིག་ཡོང་གི་རེད།
ད་ལྟ་ང་རང་གིས་བོད་ནང་གི་བུད་མེད་དེ་ཚོར་ཐོབ་ཐང་མེད་པ་དང་རྗེས་ལུས་ཡིན་པ་ཞིག་ལ་མཐོང་གི་མེད་པ་མ་ཟད། ངའི་ཐོག་མའི་བསམ་བློ་དེ་ཡང་ནོར་འཁྲུལ་ཡིན་པ་ཞིག་ལ་ངོས་འཛིན་བྱེད་ཀྱིན་ཡོད། ཕྱི་རྒྱལ་གྱི་སྤྱི་ཚོགས་མང་པོ་ཞིག་མཐོང་ཡོང་བའི་སྐབས་ལ། སྤྱི་ཚོགས་ཤིག་དང་མི་རིགས་ཤིག་གི་ཆེས་གལ་ཆེ་བ་དེ་ཁྱིམ་ཚང་རེད་བསམ་གྱི་འདུག དེར་བརྟེན། མ་འོངས་པ་བོད་ཀྱི་སྤྱི་ཚོགས་དེ་ག་འདྲ་ཞིག་ལ་འགྱུར་མིན་དེ་བོད་ཀྱི་བུད་མེད་ཚོས་སོ་སོའི་ཁྱིམ་ཚང་སྐྱོང་སྟངས་དང་བུ་ཕྲུག་ལ་བརྩེ་དུང་སྤྲོད་སྟངས། ཁྱོ་ག་ལ་བརྩི་བཀུར་བྱེད་སྟངས་སོགས་ལ་རག་ལས་ཡོད་པ་རེད་བསམ་གྱི་འདུག
གལ་སྲིད་བུད་མེད་ཀྱི་ཐོབ་ཐང་དང་ཕོ་མོ་འདྲ་མཉམ་ཟེར་བ་ཞིག་དགོས་ཀྱི་ཡོད་ན། རང་རང་གི་ནུས་པའི་སྟེང་ནས་མངོན་དགོས་པ་ཞིག་རེད་མ་གཏོགས་འཐབ་རྩོད་བྱས་ནས་འཐོབ་དགོས་པ་ཞིག་མ་རེད། ངས་བཙན་བྱོལ་ནང་གི་བུད་མེད་མང་པོ་ཞིག་གིས་སོ་སོ་སྒེར་གྱི་དགོས་མཁོ་ཞིག་དང་། གཞན་པའི་དོ་སྣང་འདྲེན་ཆེད་དུ་བུད་མེད་སྐོར་ལ་སྐད་ཆ་ཤོད་ཀྱི་ཡོད་པ་ཞིག་ལ་མཐོང་གི་འདུག མི་དེའི་རིགས་ཀྱིས་བོད་པའི་བུད་མེད་ཟེར་བ་དང་བོད་མི་རིགས་ཟེར་བ། བོད་མི་རིགས་ཀྱི་རིག་གནས་དང་ཆོས་ལུགས་ཀྱིས་གྲུབ་པའི་བོད་མིའི་སེམས་ཁམས་ཀྱིས་བྱ་དངོས་ལ་ལྟ་བའི་རིན་ཐང་ལྟ་ཚུལ་དེ་རྩ་བ་ཉིད་ནས་རྒྱུས་ལོན་བྱས་མེད་པར། ནུབ་གླིང་གི་བཤད་སྤྱོད་རིགས་ལ་ལད་ཟློས་དང་འུར་སྒྲོག་བྱས་ཏེ་སོ་སོའི་སྒེར་དོན་སྒྲུབ་ཀྱི་ཡོད་པ་རེད་དྲན་གྱི་འདུག དེའི་རྐྱེན་གྱིས་ངས་བོད་པའི་བུད་མེད་ཀྱི་ཐོབ་ཐང་འཐབ་རྩོད་བྱེད་ཀྱི་མེད་ལ། འདྲ་མཉམ་ཟེར་བ་དེ་གལ་ཆེན་པོ་ཞིག་ལ་མཐོང་གི་ཡང་མེད། ཅེས་བརྗོད་བྱུང་།
ཡང་སློབ་ཕྲུག་ཅིག་གིས། ཁྱེད་ཀྱིས་གོང་དུ་གཏམ་བཤད་གནང་སྟངས་ལ་གཞིགས་ན་ཁྱེད་རང་ལོ་སུམ་ཅུ་བརྒལ་ཡོད་པ་ཞིག་མཐོང་སོང་ཡང་ཁྱེད་རང་ད་བར་ཆང་ས་མ་བརྒྱབ་པའི་རྒྱུ་མཚན་ག་རེ་ཡིན། ཞེས་དྲིས་པའི་ལན་དུ་ཁོང་མོས། བཟའ་ཚང་རག་གི་མི་འདུག་(གད་མོ་དང་བཅས།) རྩེད་མོ་རྩེ་ཡིན། ང་ལ་མཚོན་ན། ཐོག་མ་ཕ་ཡུལ་དང་ཁ་བྲལ་ནས་དཀའ་ལས་མང་པོ་ཞིག་བརྒྱབ་པ་རེད། རྗེས་སུ་ངའི་ཕ་མ་གཉིས་ལའང་ངོ་ཐུག་ཐུབ་ཡོད་པ་མ་རེད། དེ་དག་ལ་བསམ་བློ་ཞིག་བཏང་ན། སོ་སོར་རང་བཞིན་གྱིས་དྲི་བ་ཞིག་ཡོང་གི་འདུག ངས་ཅིའི་ཕྱིར་དཀའ་ངལ་འདི་འདྲ་ཞིག་མྱངས་པ་རེད། ང་ཅི་ཞིག་གི་ཆེད་དུ་ཕ་མ་འདས་ཁར་ངོ་ཙམ་ཡང་ཐུག་ཐུབ་ཡོད་པ་མ་རེད། དྲི་བ་འདི་དག་ལ་དྲིས་ལན་ལྟ་བུའི་གྲུབ་འབྲས་རྡོག་རྡོག་ཅིག་བརྩོན་ལེན་བྱེད་པའི་ཆེད་དང་། ཕྱོགས་གཞན་ཞིག་ནས་ང་ཚོ་ཚང་མ་གཅིག་པ་རེད། ག་བར་ཕྱིན་ཡང་མགྲོན་པོ་ལྟ་བུ་ཞིག་དང་། གང་དུ་བསྡད་ཀྱང་གནས་ཚང་འདྲ་བོ་ཞིག་གི་ཚོར་བ་ཡོང་གི་ཡོད་སྟབས། ཁྱིམ་ཚང་དང་བརྩེ་དུང་གི་ཕྱོགས་ནས་ཀྱང་མང་པོ་མང་པོ་ཞིག་བློས་གཏོང་བྱ་དགོས་ཐུག་ཡོང་གི་ཡོད་འདུག ཅེས་སྐྱོ་སྣང་དང་བསྡོངས་ནས་བརྗོད་སོང་། མ་འོངས་པར་བཟའ་ཚང་མི་རིགས་ག་འདྲ་ཞིག་ལ་བསྒྲིག་འདུན་ཡོད་པ་དང་། སྐྱེས་པ་གང་འདྲའི་རིགས་ལ་དགའ་བོ་ཡོད་སྐོར་དྲིས་པའི་ལན་དུ། མ་འོངས་པའི་མི་ཚེ་སྐྱེལ་རོགས་དེ་ངེས་པར་དུ་བོད་པ་ཞིག་ལ་རེ་བ་རྒྱག་གི་ཡོད་པ་དང་། མོ་རང་གི་སྐྱོན་དང་བཟང་གཉིས་ཀར་ངོས་ལེན་དང་བརྩི་བཀུར་བྱེད་ཐུབ་མཁན་གྱི་སྐྱེས་པ་བློ་སྟོབས་ཅན་ཞིག་ལ་བཟའ་ཚང་བྱ་འདོད་ཡོད་སྐོར་བརྗོད་སོང་།
གསར་འགོད་པ། འཇིགས་མེད་རྒྱ་མཚོ།
བོད་ཀྱི་བུད་མེད་ཅིག་གི་ནང་ནས་་་་་་་་་་་་་་་་་་་་་་་་་་་་་་་་་་་
ཁྱོད་ཀྱིས་གསུངས་སྟངས་དེ་དངོས་གནས་དོན་སྙིང་ལྡན་པ་ཞིག་རེད།
དགོངས་ཚུལ་རྣམས་སྤྱི་ཚོགས་ཐོག་ཁྱབ་ཐུབ་པའི་རེ་བ་ཞུ་གི་ཡོད་ལ་སྨོན་ལམ་ཡང་འདེབས་ཀྱི་ཡོད།
དྲིས་ལེན་ཡག་པོ་གནང་འདུག་དགའ་བོ་བྱུང་།།
ཐུགས་རྗེ་ཆེ།།
ང་རང་ཆེས་དགའ་བའི་བོད་ཀྱི་མཛངས་མ་ཚེ་རིང་སྐྱིད་ལགས། ཧ་ལས་པའི་བཀའ་སློབ་དང་དྲི་བ་དྲི་ལན་ཡག་པོ་གསུངས་འདུག ཤེས་ཡོན་འཇོན་ཐང་དང་བསམ་བློ་སོགས་ཕྱོགས་གང་ཐད་ནས་ཧ་ཅང་ཚད་མཐོན་པོར་སླེབས་ཡོད་པ་ཞིག་ལ་མཐོང་སོང་ལ། མཐོང་བ་ཇི་བཞིན་ནམ་རྒྱུན་ཁྱོད་རང་གི་གསར་འགྱུར་དང་རྩོམ་ཡིག་བཀའ་སློབ་གསུང་བཤད་སོགས་ལ་ཉན་ཡོང་མ་ཁྱད་ཆོས་མ་འདྲ་བ་ཞིག་མངོན་ཡོང་གི་འདུག ཁྱོད་དང་ཁྱོད་ལྟ་བུའི་བུད་མེད་མང་པོ་ཞིག་བོད་པ་ཚང་ལ་ཡོད་ན་བུད་མེད་ཀྱི་ཐོབ་ཐང་ཟེར་བའི་སྡུག་སྐད་དེ་རྒྱག་མི་དགོས་པར་སྐྱེས་པ་ལས་ལྷག་གི་ནུས་པ་ཞིག་བོད་པའི་བུད་མེད་ཚོའི་སྟེང་ནས་མངོན་ཡོང་གི་རེད་ལ། དེས་བོད་པའི་སྤྱི་ཚོགས་དང་འགྲོ་བ་མིའི་རིགས་ཀྱི་ལྷིང་འཇགས་བདེ་སྐྱིད་ཡང་སྐྲུན་ཡོང་གི་ཡོད་པ་རེད། བཀྲ་ཤིས་བདེ་ལེགས་ཞུ།