རྒྱ་གཞུང་གིས་འགྲོ་བ་མིའི་ཐོབ་ཐང་ཁྲིམས་རྩོད་པ་དང་དེ་ལ་འབྲེལ་བ་ཡོད་པར་དོགས་གཞི་ཅན་གྱི་མི་སྣ་མང་དག་ཅིག་འཛིན་བཟུང་བྱེད་ཀྱིན་ཡོད་པར་ཨ་རིའི་རྒྱལ་སྲིད་ལྷན་ཁང་གིས་སྐྱོན་བརྗོད་བྱས་འདུག
རེས་གཟའ་ཕུར་བུའི་ཉིན་ནས་དེ་རིང་བར་རྒྱ་གཞུང་གིས་འགྲོ་བ་མིའི་ཐོབ་ཐང་གི་ཁྲིམས་རྩོད་པ་དང་། དམངས་གཙོ་དོན་གཉེར་བ་མང་པོ་ཞིག་སྔ་རྗེས་སུ་འཛིན་བཟུང་བཀག་བསྐྱིལ་བྱེད་བཞིན་ཡོད་པ་དང་། ཁ་སང་ཨ་རིའི་རྒྱལ་སྲིད་ལྷན་ཁང་གི་མགྲིན་ཚབ་པ་ཇོན་ཁིར་བྷེ་(John Kirby)ལགས་ཀྱིས་རྒྱ་ནག་གཞུང་གིས་བདེ་འཇགས་ལ་ཁ་གཡར་ཏེ། ཞི་བདེ་དང་རང་དབང་ལ་སྲུང་སྐྱོབ་བྱེད་མཁན་རྣམས་བཙོན་འཇུག་བྱེད་པ་དང་། དམིགས་བསལ་ཁྲིམས་མཐུན་ཐོག་སྲིད་གཞུང་ལ་སྐྱོན་བྱེད་མཁན་རྣམས་འཛིན་བཟུང་བྱས་ཏེ། འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པར་བློ་ཚབས་ཆེན་པོ་ཡོད། ཅེས་བརྗོད་འདུག
དེ་རིང་བྷེ་བྷེ་སི་རྒྱ་ཡིག་སྡེ་ཚན་ཐོག་གནས་ཚུལ་བཀོད་པར། ཧོང་ཀོང་དམངས་གཙོའི་ལས་འགུལ་ལ་རྒྱབ་སྐྱོར་བྱེད་མཁན་མཐུན་ཚོགས་ཀྱིས། རྒྱ་གཞུང་གིས་རེས་གཟའ་ཕུར་བུའི་ཉིན་ནས་དེ་རིང་ཞོགས་པའི་བར་འགྲོ་བ་མིའི་ཐོབ་ཐང་ཁྲིམས་རྩོད་པ་དང་འབྲེལ་ཡོད་མི་སྣ་ ༡༠༧ ཙམ་འཛིན་བཟུང་བྱས་པའི་མིང་ཐོ་ཞིག་བསྡུ་རུབ་བྱས་ཡོད་ཅིང་། མིང་ཐོ་དེའི་ནང་མི་ ༦ བཙོན་འཇུག་བྱས་པ་དང་། མི་ ༡ རང་ཁྱིམ་དུ་བཟང་བཙོན་ལྟ་རྟོག་འོག་བཞག་ཡོད་པ། མི་ ༡༥ གར་ཁྲིད་གསལ་ཁ་མེད་པ། མི་ ༨༥ ལ་བཀག་བསྐྱིལ་འདྲི་གཅོད་བྱས་རྗེས་ཀློད་གྲོལ་བཏང་ཡོད་སྐོར་སོགས་བཀོད་འདུག
ཁ་སང་རྒྱ་ནག་མི་དམངས་དྲ་བ་དང་ཞིན་ཧྭ་དྲ་བ་སོགས་ཀྱིས་གནས་ཚུལ་སྤེལ་བའི་ནང་། ཁྲིམས་རྩོད་པ་འདི་དག་གིས་ཁོ་རང་ཚོ་སྐད་གྲགས་ཆགས་རྒྱུའི་ཁེ་ཕན་ལ་དམིགས་ཡོད་པ་མ་ཟད། སྤྱི་ཚོགས་ནང་ཟིང་ཆ་སློང་རྒྱུར་འབད་བརྩོན་བྱས་ཡོད་སྐོར་དང་། སྐྱུག་བྲོ་བའི་ཁྲིམས་རྩོད་པ་འདི་ཚོས་ཁྲིམས་ཁང་དང་དྲ་རྒྱའི་ཐོག་ནས་ཁྲིམས་ཀྱི་ར་བར་ངོ་རྒོལ་བྱས་ཡོད་པ་མ་ཟད། ཁོ་ཚོས་སྐྱོན་བརྗོད་བྱེད་པའི་ལས་འགུལ་གྱི་རྒྱབ་ལོགས་སུ་ཆར་གདུགས་གསར་བརྗེ་ཚོགས་པ་ཡོད་སྐོར་སོགས་བརྗོད་འདུག གནས་ཚུལ་དེའི་ནང་དུ་ཉེན་རྟོག་པ་ཞིག་གི་སྐད་ཆ་ལུང་འདྲེན་བྱས་པར། ཀྲུའུ་ཧྲི་ཧྥིན་ (Zhou Shifeng) སོགས་དོགས་ཡོད་ཉེས་ཅན་དེ་དག་གིས་ཁྲིམས་འགལ་ཚབས་ཆེན་བྱས་ཡོད་པ་དང་། གྱོད་དོན་དེ་ད་དུང་མུ་མཐུད་དུ་ཞིབ་བཤེར་བྱ་རྒྱུ་ཡིན། ཞེས་སོགས་བརྗོད་འདུག
དེ་རིང་ནེའུ་ཡོག་དུས་བབ་ཀྱིས་གནས་ཚུལ་སྤེལ་བའི་ནང་། འགྲོ་བ་མིའི་ཐོབ་ཐང་ལྟ་སྐྱོང་ཚོགས་པའི་རྒྱ་ནག་སྡེ་ཚན་གྱི་འགན་འཛིན་སོ་ཧྥེ་རེའུ་ཆཊ་སོན་ (Sophie Richardson) ལགས་ཀྱིས་གློག་འཕྲིན་བརྒྱུད་བརྗོད་རྒྱུར། རྒྱ་ནག་གཞུང་གིས་འཛིན་བཟུང་བྱས་པའི་ཁྲིམས་རྩོད་པ་དེ་དག་ནག་ཉེས་ཚབས་ཆེན་བཟོ་མཁན་གྱི་ཚོགས་པ་ལྟ་བུ་ཞིག་ཡིན་པ་རྗོད་བཞིན་ཡོད་ཀྱང་། དེ་ནི་ཉེན་རྟོག་པས་ཆུ་ཚོད་ཉེར་བཞིའི་རིང་ཁྲིམས་འགལ་གྱི་བྱ་སྤྱོད་སྤེལ་པ་དེར་འཕྱ་སྨོད་བྱས་པ་དང་གཅིག་མཚུངས་རེད། གལ་སྲིད་མི་ཞིག་ལ་ཞིབ་བཤེར་ཞིག་བྱེད་དགོས་ན་ཞིབ་བཤེར་བྱེད་ས་དེ་ནི་ཉེན་རྟོག་པ་རེད་མ་གཏོགས་ཁྲིམས་རྩོད་པ་དེ་ཚོ་རྩ་བ་ནས་མ་རེད། ཅེས་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
