རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པར་རྒྱ་ནག་གཞུང་གིས་ནང་སོག་རང་སྐྱོང་ལྗོངས་ཀྱི་གནམ་ཐང་ཞིག་ཏུ་ཕྱི་རྒྱལ་ཡུལ་སྐོར་སྤྲོ་འཆམ་པ་ ༢༠ ཙམ་འཛིན་བཟུང་བཀག་ཉར་བྱས་ཡོད་པའི་གནས་ཚུལ་ཐོན་འདུག
དེ་རིང་རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་ནང་སོག་རང་སྐྱོང་ལྗོངས་སུ་འབོད་པའི་ཨོར་ཌོ་སི་གྲོང་ཁྱེར་གྱི་གནམ་ཐང་ (Ordos airport) དུ། ཕྱི་གླིང་གི་ཡུལ་སྐོར་སྤྲོ་འཆམ་པ་ ༢༠ ཙམ་འཛིན་བཟུང་བཀག་བསྐྱིལ་བྱས་ཡོད་པ་འདུག
རྒྱ་ནག་གི་ཕྱི་མི་དོ་དམ་ལས་ཁུངས་ཀྱིས་གནས་ཚུལ་བསྒྲགས་པ་ལྟར་ན། བཀག་བསྐྱིལ་ཐེབས་པའི་ཕྱི་གླིང་བ་དེ་ཚོ་དབྱིན་ཡུལ་དང་ལྷོ་ཨ་ཧྥི་རི་ཁ། རྒྱ་གར་བཅས་ཀྱི་ཡུལ་སྐོར་སྤྲོ་འཆམ་པ་ཡིན་པ་ཙམ་མ་གཏོགས། རྒྱ་ནག་གཞུང་གིས་ཁོ་ཚོ་བཀག་བསྐྱིལ་བྱེད་དོན་ཐད་ལ་གསལ་ཁ་གང་ཡང་བཏོན་མི་འདུག
ལྷོ་ཨ་ཧྥི་རི་ཁའི་རང་དབང་ཐེབས་རྩ་ཁང་གི་ངོ་དེབ་སྟེང་། ཐེངས་འདིར་རྒྱ་ནག་གིས་དབྱིན་ཡུལ་གྱི་མི་ ༩ དང་། ལྷོ་ཨ་ཧྥི་རི་ཁའི་མི་ ༡༠ ། རྒྱ་གར་གྱི་མི་ ༡ བཅས་བསྡོམས་པའི་ཡུལ་སྐོར་སྤྲོ་འཆམ་པ་ ༢༠ བཀག་ཉར་བྱས་འདུག ཅེས་དང་། ཡང་གནམ་ཐང་གི་ཞིབ་བཤེར་ཉེན་རྟོག་པས། ཡུལ་སྐོར་སྤྲོ་འཆམ་པ་དེ་དག་གི་ལག་འཁྱེར་ཁ་པར་བཙན་འཕྲོག་བྱས་རྗེས། ཁོ་ཚོས་རྒྱ་ནག་ནང་རྟེན་གཞི་བྱས་པའི་སོ་སོའི་གཞུང་ཚབ་ཁང་དང་། ཁྱིམ་མི་བཅས་ལ་འབྲེལ་འདྲིས་བྱེད་པའམ། ཡང་ན་གསང་བའི་གནས་ཚུལ་བརྒྱུད་བསྒྲགས་བྱེད་པ་སོགས་ཁྲིམས་འགལ་གྱི་བྱ་བ་གང་ཡང་བྱེད་ཐུབ་པ་མ་རེད། ཅེས་སོགས་བཀོད་འདུག
བྷེ་བྷེ་སི་དང་ཧོང་ཀོང་རང་དབང་གསར་ལམ་སོགས་སུ། རྒྱ་ནག་གཞུང་གིས་ཡུལ་སྐོར་སྤྲོ་འཆམ་པ་དེ་ཚོའི་ཁྲོད་ཀྱི་རེ་འགའ་ཁ་ཆེ་འཇིགས་སྐུལ་དྲག་སྤྱོད་པར་འབྲེལ་བ་ཡོད་པ་དང་། ཁོ་ཚོས་མགྲོན་ཁང་ནང་དཀྲོག་གཏམ་རིགས་ཀྱི་བརྙན་འཕྲིན་ལ་བལྟས་པའི་ཉེས་འཛུགས་བྱས་ཡོད་སྐོར་བརྗོད་འདུག
