ཟླ་འདིའི་ཚེས་ ༡༥ ཉིན། ཧོང་ཀོང་རང་དབང་གསར་ལམ་དང་རོའུ་ཊར་གསར་ལམ་སོགས་རྒྱལ་སྤྱིའི་བརྒྱུད་ལམ་ཆེ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་ཕྱི་རྒྱལ་གྱི་གསང་བའི་ལས་ཁུངས་ (FIA) ཁག་ཏུ་རྒྱལ་ནང་གི་དམག་དོན་གསང་བ་མཁོ་སྤྲོད་བྱས་པའི་ཉེས་འཛུགས་འོག རྒྱ་ནག་རྒྱལ་སྲུང་ལས་ཁུངས་ཀྱི་ལས་བྱེད་ ༤ འཛིན་བཟུང་བཀག་བསྐྱིལ་བྱས་ཡོད་འདུག
རྒྱ་ནག་རྒྱལ་ཡོངས་མི་དམངས་རླུང་འཕྲིན་ཁང་ (CRI)ཟེར་བས་སི་ཁྲོན་ཞིང་ཆེན་གྱི་ལྷོ་ནུབ་ཁུལ་དུ་རྟེན་གཞི་བྱས་པའི་རྒྱ་ནག་རྒྱལ་སྲུང་ལས་ཁུངས་ཀྱི་གནས་ཚུལ་རྒྱང་བསྒྲགས་བྱས་དོན་ལྟར་ན། འཛིན་བཟུང་བྱས་པའི་ལས་བྱེད་དེ་དག་གིས་རྒྱ་ནག་གཞུང་གི་མཚོན་ཆ་གསར་བཟོ་དང་བཀོལ་སྤྱོད། ཚོད་ལྟ་བཅས་བྱེད་ཀྱི་ཡོད་པའི་གསང་བའི་གནས་ཚུལ་ཕྱི་གྱར་བྱས་ཡོད་པ་མ་ཟད། ཁོ་ཚོས་ད་དུང་ཕྱི་གླིང་གི་གསང་ཉུལ་བ་ཚོར་རྒྱ་ནག་གི་རྒྱལ་སྲུང་དྲག་ཆས་སྐོར་གྱི་གནས་ཚུལ་མང་པོ་ངོ་སྤྲོད་བྱས་པའི་དོགས་གཞིའི་འོག་འཛིན་བཟུང་བྱས་ཡོད་ཚུལ་བརྗོད་འདུག
གནས་ཚུལ་ནང་བཀོད་པར་རྒྱ་གཞུང་གིས་འཛིན་བཟུང་བྱས་པའི་མི་དེ་དག་གིས་ཕན་ཚུན་ངོ་མི་ཤེས་པ་མ་ཟད། ཕྱི་གླིང་གི་གསང་བའི་ལས་ཁུངས་གང་དག་ལ་གསང་བའི་གནས་ཚུལ་མཁོ་སྤྲོད་བྱས་ཡོད་པའང་གསལ་བཤད་ཅི་ཡང་བྱས་མི་འདུག རྒྱ་ནག་གི་སྤྱི་ཚོགས་དྲ་ལམ་ཁག་ཏུ་མི་དེ་ཚོས་ཤར་ནུབ་ཀྱི་སྤྱི་ཚོགས་བརྒྱུད་ལམ་ཁག་ནས་རྒྱལ་ནང་གི་གསང་བའི་གནས་ཚུལ་བརྒྱུད་བསྒྲགས་བྱས་ཡོད་ལུགས་བཀོད་འདུག
ལོ་སྔོན་མའི་ཕྱི་ཟླ་ ༡༡ ནང་རྒྱ་ནག་ཧྲན་ཏུང་ཞིང་ཆེན་གྱི་ཤར་རྒྱུད་ཆིན་ཏའོ་གླིང་ཕྲན་ (Qingdao) གྲོང་ཁྱེར་དུ་རྒྱ་མི་ཞིག་གིས་རྒྱ་ནག་གི་མཁའ་དམག་རྟེན་གཞི་ཁག་ཅིག་བརྙན་པར་དུ་བླངས་ནས་ནུབ་གླིང་བ་ཚོར་བཙོང་བའི་ཉེས་འཛུགས་འོག་འཛིན་བཟུང་ཁྲིམས་ཆད་བཅད་ཡོད་པ་དང་། དུས་ཀུན་རྒྱ་ནག་གཞུང་གི་གསང་བའི་བཅའ་ཁྲིམས་ཁག་ཕྱི་ལ་ཤོར་གྱི་ཡོད་པ་མ་ཟད། ཐ་ན་རྒྱ་ནག་གཞུང་གི་དཔོན་རིགས་ཚོའི་སྐྱེས་ལོ་སྐྱེས་ཚེས་ནས་རྒྱལ་ནང་གི་གསང་བའི་གནས་ཚུལ་བར་ཕྱི་ལ་ཁྱབ་ཀྱི་ཡོད་སྟབས། རྒྱ་ནག་གཞུང་གིས་རྒྱལ་ཁབ་ཀྱི་གསང་བ་ཕྱིར་སྒྲོག་མཁན་ཚོར་སྲོག་ཆད་དང་ཚེ་བཙོན་སོགས་ཀྱི་ཉེས་ཆད་ལག་བསྟར་བྱེད་ཀྱི་ཡོད་འདུག
