དེ་རིང་ཞོགས་པའི་བོད་ནང་གི་ཆུ་ཚོད་ ༧ སྟེང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྐུ་ཕུང་རྒྱའི་བཙོན་ཁང་ནས་ཞུགས་འབུལ་ཞུ་དགོས་བྱུང་འདུག
དེ་རིང་ཞོགས་པར་འདི་གའི་གསར་འགོད་པས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་བོ་དགེ་བཤེས་ཉི་མ་ལགས་སུ་བཅར་འདྲི་ཞུས་པར་ཁོང་གིས། མདང་དགོང་རྒྱ་ནག་གི་ཆུ་ཚོད་ ༡༡།༠༠ ཙམ་ལ། རིན་པོ་ཆེའི་སྐུ་གདུང་ལེན་དུ་འགྲོ་མཁན་ཁོང་གི་སྐུ་མཆེད་དང་བླ་མ་གྲྭ་བ་སུམ་ཅུ་ལྷག་ཡོད་པ་དེ་ཚོར་སྐུ་གདུང་ལ་མཇལ་དུ་བཅུག་འདུག སྐབས་དེར་ཁོང་ཚོས་སྐུ་ཕུང་སྟེང་གི་ན་བཟའ་བརྗེ་བོ་བརྒྱབ་པ་དང་སྐུ་གདུང་གཙང་མ་བཟོས་རྗེས། ད་ནིང་ཞོགས་པ་ནམ་གསལ་རག་བར་བསྔོ་སྨོན་གསུངས་འདུག
སྐུ་ཕུང་རྩིས་ལེན་དུ་འགྲོ་མཁན་ཚོས་རེ་བ་ཇི་ལྟར་ཞུས་ཀྱང་། སྐུ་ཕུང་ཕྱིར་ཕ་ཡུལ་དུ་གདན་འདྲེན་ཞུ་བཅུག་མེད་སྟབས། ད་ནངས་ཞོགས་པའི་ཆུ་ཚོད་ ༧།༠༠ ཙམ་ལ་བཙོན་ཁང་དེ་རང་དུ་སྐུ་གདུང་ཞུགས་འབུལ་ཞུས་འདུག ད་ཆར་སྐུ་ཐལ་ཨོ་ཐོག་དགོན་དུ་གདན་འདྲེན་བྱེད་བཞིན་ཡོད་ཀྱང་། རིན་པོ་ཆེ་བཙོན་འཇུག་བྱེད་ས་དེ་ནི་ཁྲིན་ཏུའུ་ཤར་ཕྱོགས་ཀྱི་སྤྱི་ལེ་ ༣༩༠ ལྷག་གི་གསར་ཡོད་སྟབས་ཁྲིན་ཏུའུ་བརྒྱུད་ནས་ལི་ཐང་དུ་འགྲོ་བར་ལམ་ཐག་རིང་པོ་ཡོད་སྟབས། རིན་པོ་ཆེ་མཆོག་གི་སྐུ་ཐལ་དེ་རིང་ལི་ཐང་དུ་བསླེབ་ཐུབ་པ་ཁག་པོ་རེད། གཅིག་བྱས་ན་དོ་ནུབ་མཚན་གུང་ཞིག་ལ་འབྱོར་ཡང་སྲིད་པ་རེད། ཅེས་གསུངས་སོང་།
རིན་པོ་ཆེ་མཆོག་གི་སྐུ་ཕུང་ལེན་དུ་འགྲོ་མཁན་ཚོས་རིན་པོ་ཆེའི་སྐུ་ཕུང་མཇལ་སྐབས་གཟིགས་ཚོར་གང་འདྲ་བྱུང་ཡོད་མེད་དྲིས་པར། རིན་པོ་ཆེའི་སྐུ་གཟུགས་ཧ་ཅང་སྐྱོ་བོ་ཡིན་པ་ཡོངས་གྲགས་རེད། སྐུ་ཕུང་ཐོག་ལ་རྨ་ཁ་དང་སྔོ་ཐུག་དེ་མཐོང་བའི་སྐད་ཆ་མི་འདུག ཡིན་ནའང་ཁོང་གི་ཞལ་མཆུ་དང་སེན་མོ་སོགས་ནག་པོ་ཆགས་ཡོད་སྟབས། བརྒྱ་ཆའི་བརྒྱ་ཁོང་ལ་དུག་དྲངས་ཏེ་སྐུ་སྲོག་བཀྲོངས་པ་ཡིན་པར་ངོས་འཛིན་བྱེད་ཀྱིན་འདུག ཅེས་གསུངས་སོང་།
གཞན་ཡང་། རིན་པོ་ཆེ་མཆོག་གི་རྗེས་འཇུག་སློབ་རྒྱུན་དང་སྤུན་མཆེད་སྒྲོལ་དཀར་ལྷ་མོ་སོགས་ཀྱིས་རྒྱ་ནག་གཞུང་ལ་དོན་ཚན་ ༥ ཅན་གྱི་རེ་འདུན་ཞིག་བཏོན་ཡོད་པའི་ནང་། རིན་པོ་ཆེ་མཆོག་སྐུ་གྲོངས་པའི་དུས་ཚོད་ཁ་གསལ་མེད་པ་དང་སྐུ་ཕུང་ནང་མིར་རྩིས་སྤྲོད་མི་བྱེད་པ་དེར་དོགས་པ་ཆེན་པ་ཡོད་པ་དང་། སྐུ་ཕུང་བཙོན་ཁང་ནས་མེར་བསྲེགས་གཏོང་རྒྱུ་ཡིན་སྐོར་བཤད་པ་དེ་ཁོང་གི་གྲོངས་རྐྱེན་འགེབ་སྲུང་ཆེད་ཡིན་པ། དེ་བཞིན། སྐུ་ཕུང་ནང་མིར་མི་སྤྲོད་པའི་བྱེད་སྟངས་འདི་རིགས་རྒྱ་ནག་གི་ཁྲིམས་དང་སྒྲིག་གང་དུ་ཡོད་པ་གསལ་བཤད་དགོས་པ་སོགས་བཀོད་ཡོད་འདུག
དགེ་བཤེས་ཉི་མ་ལགས་སུ་ད་ལྟ་ལི་ཐང་དགོན་གྲོང་གཉིས་ཀྱི་གནས་སྟངས་ག་འདྲ་ཡིན་མིན་དྲིས་སྐབས་ཁོང་གིས། རྒྱ་ནག་གཞུང་གིས་རིན་པོ་ཆེ་བཀྲོངས་པའི་གནས་ཚུལ་དེ་ཐོས་རྗེས་ཕྱི་ཚེས་ ༡༣ ཉིན་ལི་ཐང་དང་ཉག་ཆུ་ས་ཁུལ་གྱི་མང་ཚོགས་སྟོང་ཕྲག་ཁ་ཤས་རྒྱ་ནག་གཞུང་གི་ལས་ཁུངས་སྒོར་སྐད་འབོད་བྱས་སྐབས། ཉེན་རྟོག་པ་དང་དམག་མིས་མེ་མདའ་དང་འབོམ་སོགས་བེད་སྤྱོད་བྱས་ཏེ་དྲག་གནོན་བྱས་ཡོད་སྟབས་མི་ ༡༥ ལ་རྨས་སྐྱོན་ཕོག་སྟེ། ད་ལྟ་ཁྲིན་ཏུའུ་སྨན་ཁང་ཞིག་ཏུ་སྨན་བཅོས་བྱེད་བཞིན་ཡོད་ས་རེད། འོན་ཀྱང་ད་ཆར་ལི་ཐང་ཕྱོགས་ཀྱི་བརྒྱུད་ལམ་ཁག་ཡོངས་རྫོགས་དམ་དྲག་བྱས་ཡོད་སྟབས། དེའི་རྗེས་ཀྱི་གནས་ཚུལ་གང་ཡང་ད་ལྟ་ཤེས་རྟོགས་ཐུབ་ཀྱི་མི་འདུག ཅེས་བརྗོད་སོང་།
