ཕ་ཡུལ་ཁམས་ཡུལ་ཤུལ་ནས་ཡིན་པའི་དྷ་སར་གནས་སྡོད་བློ་བཟང་ཚེ་རིང་ལགས་ཀྱིས་འདི་གའི་གསར་འགོད་པར་བརྗོད་པ་ལྟར་ན། གྲྭ་བསོད་ནམས་སྟོབས་རྒྱལ་ལགས་ཀྱིས་རང་ལུས་མེར་བསྲེགས་གནང་རྗེས་ཁོང་ཚང་གི་ནང་མི་ ༤ རྒྱ་གཞུང་གིས་འཛིན་བཟུང་བྱས་ཡོད་འདུག་ལ། མི་དེ་དག་སུ་ཡིན་གྱི་མིང་སོགས་ཤེས་རྟོགས་ཐུབ་མེད་ཀྱང་ཚེས་ ༡༣ ཉིན་ཁོང་ཅག་ཕྱིར་ཀློད་གྲོལ་བཏང་ཡོད་འདུག དེ་ནས་བསོད་ནམས་སྟོབས་རྒྱལ་གྱི་ནང་མི་ཚོས་གྲྭ་ཤག་གཙང་མ་བཟོ་སྐབས། ཁོང་གི་ཞལ་འདོན་དཔེ་ཆའི་སྟེང་དུ་ཞལ་ཆེམས་ཡི་གེ་དེ་བཞག་ཡོད་པ་རྙེད་སོན་བྱུང་འདུག
ཞལ་ཆེམས་ནང་འདི་ལྟར་བཀོད་འདུག རྒྱ་ནག་སྲིད་གཞུག་གི་མགོ་ཁྲིད་རྣམས་དང་ལྷག་པར་གྲངས་ཉུང་མི་རིགས་ཀྱི་ས་གནས་མགོ་ཁྲིད་དག་ལ་ཆེད་ཞུ། གུས་པ་ནི་ཕ་ཡུལ་མཚོ་སྔོན་ཡུལ་ཤུལ་ནང་ཆེན་ནས་ཡིན། རང་ལོ་ ༢༧ དང་ནང་ཆེན་བཀྲ་ཞིས་ཚང་གི་བུ་འབྲིང་བ་ཡིན། ད་སྐབས་རྫོང་སར་བཤད་གྲྭ་ནས་སློབ་སྦྱོང་བྱེད་བཞིན་ཡོད། རྒྱལ་ཕྱི་ནང་གི་མང་ཚོགས་ཡོངས་ཀྱིས་ཤེས་གསལ་ལྟར། རྒྱ་ནག་སྲིད་གཞུང་གིས་གྲངས་ཉུང་མི་རིགས་ལ་གནས་ལུགས་དང་བདེན་དྲང་ལ་མི་བསྟན་ པར། དྲག་གནོན་དང་སྡུག་རྩུབ་ཀྱི་ཁྲིམས་ལུགས་ཁོ་ན་བྱས་ཏེ་མི་རིགས་ཀྱི་ཆོས་ལུགས་ དང་སྲོལ་རྒྱུན། རིག་གཞུང་རྩ་མེད་དང་ཁོར་ཡུག་གཏོར་བརླག་གི་བྱ་སྤྱོད་སྤེལ་དང་སྤེལ་བཞིན་པའི་སྐབས། མང་ཚོགས་ལ་སྨྲ་བརྗོད་རང་དབང་མེད་པ་དང་། གནས་ལུགས་དང་བདེ་སྡུག་གི་སྐད་ཆ་ཡར་ཞུ་བྱེད་ས་རྩ་བ་ནས་མེད། ད་དུང་། མང་ཚོགས་ཁ་ཤས་ཀྱིས་བདེན་དོན་དང་སྐྱིད་སྡུག་སྐད་ཆ་ཡར་ཞུ་བྱེད་དུས་དྲག་གནོན་དང་འཛིན་བཟུང་ཁོ་ན་བྱེད་པ་ལས་མང་ཚོགས་ཀྱི་རེ་འདུན་དང་སྐྱིད་སྡུག་ལ་བསམ་ནས་ ཐག་གཅོད་གང་ཡང་མེད་པ་མ་ཟད། དགོན་སྡེ་དང་གྲྭ་བཙུན་ལ་གཡོ་སྒྱུ་སྣ་ཚོགས་བྱས་ཏེ་བཀག་སྡོམ་བྱེད་པ་སོགས། མདོར་ན། གྲངས་ཉུང་མི་རིགས་རྩ་མེད་དུ་གཏོང་བའི་ཇུས་འགོད་ངན་པའི་བྱ་བ་གང་ཐུབ་བྱེད་བཞིན་ཡོད། ང་ཚོ་མང་ཚོགས་ཚང་མའི་རེ་བ་གཙོ་བོ་ནི་རྒྱལ་བ་བསྟན་འཛིན་རྒྱ་མཚོ་ཕོ་བྲང་པོ་ཏ་ལའི་ནང་དུ་ཞབས་སོར་འགོད་དགོས་པ་དེ་ཡིན། ང་ཚོ་ལ་བདེན་དོན་དང་གནས་ལུགས་སོགས་གང་ཡང་བཤད་དབང་མེད་པའི་ཕྱིར། ངའི་ཚེ་སྲོག་གིས་སྤྱིར་འཛམ་བུ་གླིང་དང་ནང་དགོས་སུ་རྒྱ་ནག་སྲིད་གཞུང་དང་མི་དམངས་ལ་བདེན་དཔང་བྱེད་དགོས་བྱུང་། ཤ་རུས་གཅིག་ལས་ཆེད་པའི་སྤུན་ཟླ་རྣམས་ཀྱིས་གོ་མེད་ཚོར་མེད་མ་གནང་ནས་མཐུན་སྒྲིལ་གྱི་སྟོབས་ཤུགས་གཅིག་ཏུ་སྒྲིལ་ཏེ་མ་འོངས་བར་མི་རིགས་འདིའི་བདེན་མཐའ་གསལ་ཆེད་དུ་ཚང་མས་འབད་བརྩོན་ཅི་ནས་གནང་རོགས་ཞུ། གྲྭ་བསོད་ནམས་སྟོབས་རྒྱལ་ནས་སྤྱི་ལོ་ ༢༠༡༥ ལོའི་ཟླ་ ༧ པའི་ཚེས་ ༡ ཉིན་ཤར་མར་བྲིས། ཞེས་བྲིས་འདུག
རང་ལུས་མེར་བསྲེགས་ཀྱི་གནས་ཚུལ་འདི་ཐོག་མར་འབྱོར་སྐབས། གྲྭ་བསོད་ནམས་སྟོབས་རྒྱལ་ལགས་ཀྱིས་རང་ལུས་མེར་བསྲེགས་གནང་རྗེས་རྒྱ་གཞུང་ཉེན་རྟོག་པའི་ལག་ཏུ་ཤོར་མེད་པར། མཐའ་འཁོར་གྱི་བོད་མི་ཚོས་སྨན་ཁང་དུ་འཁྲིད་ཡོད་པ་དང་། སྐབས་དེར་སྐུ་གྲོངས་མེད་ཚུལ་ཐོན་ཡོད་ཀྱང་། ཚེས་ ༡༣ ཉིན་བརྙན་ཐུང་ཞིག་འབྱོར་བའི་ནང་། ཁོང་གིས་རང་ལུས་མེར་བསྲེགས་གནང་དེ་ཅུང་མ་འགོར་བར་རྒྱ་ནག་གི་ཉེན་རྟོག་པ་འབྱོར་ཏེ་མེ་གསོད་ཐབས་བྱས་ཡོད་པ་དང་། ཁ་སང་ཚེས་ ༡༥ ཕྱི་དྲོར་བོད་མིའི་སྒྲིག་འཛུགས་ཆོས་རིགས་ལས་ཁུངས་ཀྱིས་དྷ་ས་གཙུག་ལག་ཁང་དུ་བསྔོ་སྨོན་མཆོད་འབུལ་གནང་སྐབས་བསོད་ནམས་སྟོབས་རྒྱལ་ཁོང་འདས་གྲོངས་སུ་ཕྱིན་ཡོད་པའི་གསལ་བསྒྲགས་གནང་སོང་།
བློ་བཟང་ཚེ་རིང་ལགས་ཀྱིས་བརྗོད་དོན། གྲྭ་བསོད་ནམས་སྟོབས་རྒྱལ་ལགས་ཀྱིས་རང་ལུས་མེར་བསྲེགས་གནང་མ་ཐག་སྐྱེ་དགུ་མདོ་ཡོངས་རྫོགས་ཀྱི་དྲ་བའི་བརྒྱུད་ལམ་ཁག་བཀག་སྡོམ་བྱས་ཏེ་གནས་ཚུལ་གང་ཡང་རག་ཐབས་མི་འདུག ཕྱི་ཚེས་ ༡༣ ཉིན་སྐུ་ལུས་མེར་བསྲེགས་གནང་བའི་བརྙན་ཐུང་ཞིག་རག་སོང་། མདང་ནུབ་མཚན་ཆུ་ཚོད་ ༡།༠༠ ཙམ་ལ་ངའི་གྲོགས་པོ་ཞིག་ལ་བོད་ནས་ཞལ་ཆེམས་ཡི་གེ་དེ་འབྱོར་འདུག ཅེས་བརྗོད་སོང་།
དཔའ་བོར་གུས་འདུད་ཡོད། འོན་ཀྱང་། ཞལ་ཆེམས་ཡི་གེ་ཟེར་བའི་ནང་དུ་༼གུས་པ༽བཀོད་འདུག་པ་ནི་བསམ་བློ་གཏོང་ས་གཞན་ཞིག་རེད།
ཤ་ཉེ་ཚོ་དབུས་མ་དང་། རང་བཙན་རྩོད་ནས་མ་འདུག །ཁོང་གི་ཞལ་ཆེམས་ལ་བསམ་བློ་ཞིག་བཏང་ནས་མཐུན་སྦྲེལ་དམ་གཙང་ཐོག་གུང་ཁྲན་ཏང་གི་སྲིད་གཞུང་ངན་པ་དེ་ལ་ལན་འདེབས་ཤིག་སློབ་ཨེ་ཐུབ་ལྟོས། བོད་པ་ཚང་ཐུགས་རྗེ་གཟིགས།