རྩྭ་ས་ལྐོག་ཚོང་ལ་ངོ་རྒོལ།

རྔ་བ་རྫོང་ཁོངས་ཀྱི་མཱ་སྐོར་སྡེ་བའི་འབྲོག་མི་ ༢༠ ཡས་མས་ཤིག་གིས་ཡུལ་སྡེའི་མགོ་ཁྲིད་ཚོས་རྩྭ་ས་ལྐོག་ཚོང་བྱས་པར་ངོ་རྒོལ་བྱས་ཏེ་ཉིན་གྲངས་ ༧ ཙམ་འགྲོ་བཞིན་འདུག

དེ་རིང་སྔ་དྲོར་ས་གནས་ནས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། རྔ་བ་རྫོང་རྨེའུ་རུ་མ་ཡུལ་ཚོའི་མགོ་ཁྲིད་ཨུ་རྒྱན་དང་མཱ་སྐོར་སྡེ་བའི་སྡེ་དཔོན་གང་སྣང་། དྲུང་ཡིག་ཏོང་པེ་ཟེར་བ་སོགས་ངན་འབྲེལ་བྱས་ཏེ། མཱ་སྐོར་སྡེ་བའི་དགུན་ས་སྐྱིད་ཤོས་དེ་ལྐོག་ཚོང་བྱས་ཡོད་པ་མ་ཟད། ད་ལྟའི་ཆར་འཛུགས་སྐྲུན་ལས་གཞི་འགོ་འཛུགས་བྱས་ཏེ་ཁོར་ཡུག་ལ་གནོད་སྐྱོན་ཆེན་པོ་བཟོ་བཞིན་ཡོད་སྟབས། ས་གནས་འབྲོག་མི་ ༢༠ ཡས་མས་ཤིག་གིས་འགོག་སྲུང་ངོ་རྒོལ་བྱས་ཏེ་ཉིན་གྲངས་ ༧ ཙམ་འགྲོ་ཡོད་ཀྱང་། ཡུལ་སྡེའི་མགོ་ཁྲིད་ཚོས་གསལ་བཤད་གང་ཡང་བྱས་མེད་པ་མ་ཟད། མུ་མཐུད་ངོ་རྒོལ་བྱས་ན་འཛིན་བཟུང་བྱ་རྒྱུ་ཡིན་པའི་འཇིགས་སྐུལ་བྱེད་བཞིན་ཡོད་འདུག

གནས་ཚུལ་མཁོ་སྤྲོད་པས། ཉིན་གྲངས་ ༢༠ ཙམ་གྱི་སྔོན་དུ་ཡུལ་སྡེའི་མགོ་ཁྲིད་ཚོས་སྡེ་མི་རྣམས་ལ་སྐད་བཏང་སྟེ། ས་རིན་ཡིན་ཞེས་ཁྱིམ་ཚང་རེའི་མི་གཅིག་ལ་རྒྱ་སྒོར་ ༦༠༠ རེ་སྤྲད་ཡོད་པ་དང་། སྐབས་དེར་སྡེ་མི་ཚོས་ས་ཆ་གང་ནས་བཙོང་བ་ཡིན་སྐད་ཆ་འདྲི་སྐབས། མཱ་སྐོར་སྡེ་བར་ས་ཆ་སྐྱིད་ཤོས་ཤིག་ཡོད་དེ་བཙོང་བ་ཡིན་སྐོར་བརྗོད་ཡོད་པ་དང་། དེང་སང་འབྲོག་པ་ཚང་མ་དབྱར་སར་སྤོས་ཏེ་དགུན་སའི་ནང་དུ་སྡོད་མཁན་མེད་པས། དེ་མ་ཐག་ས་ཆ་དེར་བལྟ་རུ་ཕྱིན་སྐབས། ལས་གཞི་འགོ་འཛུཊ་བྱས་ཟིན་ཏེ་རྒྱ་མི་མང་པོས་ས་ཆ་གང་སར་སྔོག་བཞིན་ཡོད་པ་མཐོང་ཡོད་སྟབས། དབྱར་སར་པིས་མོ་བརྐོ་བར་ཕྱིན་པའི་ས་ཆའི་བདག་པོ་འབྲོག་མི་ ༢༠ ཡས་མས་ཤིག་ས་གནས་དེར་འདུ་འཛོམས་ཀྱིས། ང་ཚོའི་ས་ཆ་བརྐོ་མི་ཆོག་ཅེས་ངོ་རྒོལ་བྱེད་བཞིན་ཡོད་པ་མ་ཟད། ཡུལ་སྡེའི་མགོ་ཁྲིད་ཚོར་ས་ཆ་སྔོག་དགོས་པའི་རྒྱུ་མཚན་སོགས་འགྲེལ་བཤད་རྒྱག་དགོས་པའི་རེ་བ་འདོན་སྐབས། ས་ཆ་དེ་ཁྱེད་ཚོར་དབང་གི་མ་རེད། འདི་རྒྱལ་ཁབ་ལ་དབང་བ་རེད་ཅེས་བརྗོད་དེ། འབྲོག་པ་མང་ཚོཊ་ཀྱི་ལག་ནས་ས་ཆ་སྐྱིད་ཤོས་དེ་བཙན་འཕྲོག་བྱེད་ཀྱི་ཡོད་སྐོར་བརྗོད་བྱུང་།

ཁོང་གིས་མུ་མཐུད་དེ། ད་ལྟ་ཚུར་ཕྱོགས་སུ་སྡེ་མི་ཚོས་གུར་ཕུབ་ནས་རྩྭ་ས་སྲུང་བཞིན་ཡོད་ལ། ཕར་ཕྱོགས་སུ་ཉེན་རྟོག་པ་ ༡༥ ཙམ་བསླེབས་ཡོད་པ་མ་ཟད། མགོ་ཁྲིད་ཚོའི་ཁ་ལ་མ་ཉན་ན་འཛིན་བཟུང་བྱ་རྒྱུ་ཡིན་ཟེར་གྱི་འདུག ཡིན་ནའང་། ད་ལྟ་བར་དུ་རྣམ་འགྱུར་ཅུང་ཡག་པོ་འདྲ་སྟོན་གྱི་འདུག གནད་དོན་ཆེ་ཤོས་ནི་ས་ཆ་བཙོང་ཚར་བ་དང་། ས་རིན་དུ་རྒྱ་སྒོར་ ༦༠༠ རེ་སྤྲད་ཡོད་པ་དེ་མ་གཏོགས་མང་ཚོགས་ཀྱིས་གནས་ཚུལ་གཞན་གང་ཡང་ཤེས་རྟོགས་མི་ཐུབ་པ་དེ་རེད། ཡུལ་སྡེའི་མགོ་ཁྲིད་ཚོ་འཚོལ་དུ་ཕྱིན་ཡང་ཁྱིམ་དུ་བསྡད་མེད་པ་དང་། ཁ་པར་བཏང་ཡང་ཉན་རོགས་མི་བྱེད་པ་སོགས་ཀྱི་དཀའ་ངལ་མང་པོ་འཕྲད་ཀྱི་འདུག ཅེས་དང་།

དེ་རིང་སྔ་དྲོར་ཡུལ་སྡེའི་མགོ་ཁྲིད་ཚོས་ངོ་རྒོལ་བྱེད་མཁན་སྡེ་མི་གསུམ་ཁྲིད་ཕྱིན་པ་མ་ཟད། ཉིན་རྒྱབ་ཆུ་ཚོད་ ༣།༣༠ ཙམ་ལ་འབྲེལ་ཡོད་ལས་བྱེད་ཡོང་སྟེ། ཉིན་གྲངས་ ༢༠ ཡི་ནང་ཚུན་དུ་གནད་དོན་ཐག་གཅོད་བྱ་རྒྱུ་ཡིན་ལ། གལ་སྲིད་མུ་མཐུད་དུ་ངོ་རྒོལ་བྱས་པ་ཡིན་ན་འཛིན་བཟུང་བྱ་རྒྱུ་ཡིན་ཞེས་འཇིགས་སྐུལ་བྱས་པ་མ་ཟད། རྒྱ་རིགས་ལས་མི་ཚོར་མུ་མཐུད་རྩྭ་ས་སྔོག་འདོན་བྱེད་དུ་འཇུག་བཞིན་ཡོད་སྟབས། འབྲོག་མི་ཚོས་རང་ནུས་གང་ཡོད་ཀྱིས་རྩྭ་ས་སྲུང་སྐྱོབ་བྱས་ཏེ་ངོ་རྒོལ་མུ་མཐུད་དུ་བྱེད་བཞིན་ཡོད། ཅེས་བརྗོད་བྱུང་།

ཡུལ་སྡེའི་མགོ་ཁྲིད་ཚོས་ས་ཆ་ལྐོག་ཚོང་བྱས་པའི་ཐད་སྐད་ཆ་ག་རེ་བཤད་ཡོད་དྲིས་པར། ས་ཆ་ལ་ཁྱོན་རྒྱ་སྒོར་ཁྲི་ ༡༠༠ ལྷག་བྱས་ཏེ་བཙོང་ཡོད་པ་དང་། མ་འོངས་པར་ས་དེར་རྒྱལ་ཁབ་ཀྱི་ཉི་གློག་ས་ཚིགས་ཤིག་རྒྱག་འཆར་ཡོད་སྐོར་བརྗོད་པ་ཙམ་ལས། ག་དུས་བཙོང་བ་ཡིན་དང་། དངོས་གནས་སུ་ཞིག་ལ་བཙོང་ཡོད་མེད་ཀྱང་གསལ་བོ་ཤེས་ཀྱི་མི་འདུག གང་ལྟར་ཡུལ་སྡེའི་མགོ་ཁྲིད་ཚོ་ངན་འབྲེལ་བྱས་ཏེ། འབྲོག་པའི་ས་ཆ་སྐྱིད་ཤོས་དེ་ལྐོག་ཚོང་བྱས་པ་མ་ཟད། འབྲོག་ཁྱིམ་ ༢༠ ཙམ་ལ་དབང་བའི་ས་ཆའི་རིན་པ་སྡེ་བ་ཡོངས་ལ་བགོ་བཤའ་བརྒྱབ་པ་དེས། སྡེ་མི་ནང་ཁུལ་དུ་འཁྲུག་རྩོད་འབྱུང་བའི་རྒྱུ་རྐྱེན་ཆེན་པོ་ཞིག་ཏུ་གྱུར་འདུག སྡེ་བའི་མགོ་ཁྲིད་ཀྱིས་རང་ཉིད་ཀྱི་གོ་གནས་བརྟན་པའི་ཆེད་དུ་ལྐོག་ནས་ངན་ཇུས་ཧ་ཅང་བཙོག་པ་ཞིག་ལག་བསྟར་བྱེད་ཀྱི་འདུག་ཅེས་ཟེར།

ཡང་ཁོང་གིས་མཱ་སྐོར་སྡེ་བའི་གནས་བབ་དང་འབྲེལ་ནས་བརྗོད་དོན། ང་ཚོ་མཱ་སྐོར་སྡེ་བ་ནི་མི་གྲངས་ ༢༠༠ ཙམ་ལས་མེད་པའི་སྡེ་བ་ཆུང་ཆུང་ཞིག་ཡིན་ལ། དཔལ་འབྱོར་གྱི་ཆ་རྐྱེན་ཞན་ཞིང་ཡི་གེ་ཤེས་མཁན་ཡང་ཧ་ཅང་ཉུང་ཉུང་ཡིན་སྟབས། ཡུལ་སྡེའི་མགོ་ཁྲིད་ཚོར་ཕོག་ཐུག་བཏང་ན་དཀའ་ངལ་འཕྲད་རྒྱུ་ཡིན་པར་འཛེམས་ཏེ། ད་ལྟའི་བར་དུ་ཁོ་ཚོས་ག་རེ་བྱས་ཀྱང་ངོ་ཡ་བྱེད་མཁན་གཅིག་ཀྱང་བྱུང་མེད། ཡིན་ནའང་། ད་ཐེངས་ཚད་ལས་བརྒལ་ཏེ་རང་གི་རིགས་ལ་ཐུབ་ཚོད་འདི་འདྲ་བྱས་དུས་བཟོད་མ་ཐུབ་པར་ངོ་རྒོལ་བྱེད་བཞིན་ཡོད་ལ། གནས་ཚུལ་འདི་འདྲ་བྱུང་གི་ཡོད་པ་ངེས་པར་དུ་ཁྱབ་བསྒྲགས་བྱེད་དགོས་པར་འདོད་དེ་གང་སར་གཏོང་བཞིན་ཡོད་ཅེས་བརྗོད་བྱུང་།