དེ་རིང་ཚེས་ ༢༠ ཉིན་རོའུ་ཊར་གསར་ལམ་དུ་སྤེལ་བའི་གནས་ཚུལ་ནང་། རྒྱ་ནག་གི་སྲིད་འཛིན་ཞི་ཅིན་ཕེན་གྱིས་རྒྱ་ནག་གི་དཔོན་རིགས་ཚོར། འདས་པའི་ལོ་ངོ་བཅུ་ཕྲག་རིང་རྒྱ་ནག་མི་དམངས་བཅིངས་འགྲོལ་དམག་ཁུལ་གཙོས་རྒྱལ་ནང་གི་ཚབས་ཆེ་བའི་ལྐོག་ཟ་རུལ་སུངས་རྩ་སློག་བཏང་སྟེ། དམག་མི་ཚོས་རང་གི་མེས་པོ་གསར་བརྗེ་བ་ཚོའི་འོད་སྟོང་འབར་བའི་གཟི་བརྗིད་དང་། ཁོང་ཚོ་ལྐོག་ཟ་རུལ་སུངས་ཀྱི་ལས་སུ་གཞོལ་མ་མྱོང་བའི་མིག་དཔེ་ལ་སློབ་སྦྱོང་ཡག་པོ་བྱེད་དགོས་ལུགས་བསྒྲགས་འདུག
གནས་ཚུལ་དེའི་ནང་མུ་མཐུད་བཀོད་དོན། རྒྱ་ནག་དམར་ཤོག་ཚོགས་པའི་སྲིད་དབང་གི་བདག་པོར་གྱུར་བའི་སྲིད་འཛིན་ཞི་ཅིན་ཕེན་གྱིས། རྒྱ་ནག་མི་དམངས་བཅིངས་འགྲོལ་དམག་ཁུལ་གྱི་ལྐོག་ཟ་རུལ་སུངས་དམིགས་འབེན་གཙོ་བོར་བཟུང་སྟེ། ཉེ་བའི་ཆར་ཆེས་མཐོའི་དཔོན་རིགས་ཁག་ཅིག་ལྐོག་ཟ་རུལ་སུངས་ཀྱི་ཉེས་འགེལ་འོག་ཚར་བཅད་པ་དང་། དེའི་ཁྲོད་དུ་ན་ནིང་ཕྱི་ཟླ་ ༣ ནང་འབྲས་སྐྲན་གྱིས་འདས་པའི་མི་དམངས་བཅིངས་འགྲོལ་དམག་གི་ཆེས་མཐོའི་དམག་དཔོན་ཟུར་བ་ཞོ་ཚེ་ཧྭོའུ་ (Xu Caihou) ཡང་ཚུད་ཡོད། (ཞོ་ཚེ་ཧྭོའུ་ཟེར་བ་དེ་རྒྱ་ནག་དབུས་དམག་དོན་ལྷན་ཁང་གི་གཙོ་འཛིན་གཞོན་པ་ཡིན་ཞིང་། དེང་སྐབས་རྒྱ་ནག་དབུས་དམག་དོན་ལྷན་ཁང་གི་གོ་དབང་ཡོད་ཚད་སྲིད་འཛིན་ཞི་ཅིན་ཕིན་གྱིས་བཟུང་ཡོད)
རྒྱ་ནག་གཞུང་གིས་ན་ནིང་ཕྱི་ཟླ་ ༡༠ ནང་སྐུ་ཞབས་ཞོ་ཚེ་ཧྭོའུ་ཡིས་དམག་ཁུལ་གྱི་དཔོན་རིགས་ཚོའི་གོ་གནས་སྤོར་འཐེན་བར་ནས་ལྐོག་ཟ་རུལ་སུངས་བྱས་ཡོད་ལུགས་བསྒྲགས་པ་དང་། ཉེ་ལམ་རྒྱ་ནག་བྱང་ཤར་གྲོང་ཁྱེར་ཁྲང་ཁྲུན་ (Changchun) ནང་དམག་དོན་ཚོགས་ཆེན་བསྡུས་པའི་སྟེང་། སྲིད་འཛིན་ཞི་ཅིན་ཕིན་གྱིས་རྒྱལ་ནང་གི་ལྐོག་ཟ་རུལ་སུངས་ཀྱི་འཐབ་རྩོད་ལ་བྱེད་ནུས་ཆེན་པོ་ཐོན་ཐུབ་ཀྱི་མེད། ཅེས་དང་། ཁ་སང་ཉིན་རྒྱབ་རྒྱལ་སྲུང་ལྷན་ཁང་ནས་སྤེལ་བའི་བསྒྲགས་གཏམ་ཞིག་གི་ནང་། ཁོས་རྒྱལ་ནང་གི་ལྐོག་ཟ་རུལ་སུངས་གཙང་བཤེར་ཐུབ་ཀྱི་མེད་པའི་གནད་དོན་གཙོ་བོ་དེ་ཞོ་ཚེ་ཧྭོའུ་ཡི་སྒྲིག་སྲོལ་གྱི་རྩ་བ་བརྟན་ཞིང་རྒྱལ་ཁྲིམས་བཤིག་མཁན་ཚོའི་འགོག་སྲུང་བཙན་པའི་རྐྱེན་གྱིས་ཡིན་ཞེས་བརྗོད་འདུག ཡང་ཁོས་ཞོ་ཚེ་ཧྭོའུ་ཡི་བསམ་བློ་དང་ཆབ་སྲིད། སྒྲིག་འཛུགས་དང་བྱ་འགུལ་ལག་བསྟར་བྱེད་ཕྱོགས་ཀྱི་བྱ་ངན་ཡོངས་རྫོགས་གཙང་འཕྱག་བྱས་ཏེ། ༡༩༤༩ ལོར་རྒྱལ་ནང་གི་ཟིང་འཁྲུག་ལས་རྣམ་པར་རྒྱལ་བའི་དམར་ཤོག་རིང་ལུགས་ཀྱི་དམག་དོན་ལམ་ལུགས་སུ་ཕྱིར་བསྐྱོད་ཏེ། སྐབས་དེའི་འོད་སྟོང་ལྡན་པའི་སྲིད་ཇུས་ལམ་ལུགས་ལག་བསྟར་དགོས་སྐོར་བརྗོད་འདུག
གནས་ཚུལ་བཀོད་གསལ་ལྟར་ན། སྲིད་འཛིན་ཞི་ཅིན་ཕེན་གྱི་གཏམ་བཤད་འདི་དག ‘གོ་ལའི་དུས་བབ’དང‘དམར་ཤོག་ཚོགས་པའི་དཔོན་རིགས་ཚོའི་ཉིན་རེའི་གསར་འཕྲིན’སོགས་རྒྱ་ནག་ནང་རྒྱུག་ཆེ་བའི་གཞུང་འབྲེལ་གསར་ཤོག་ཁག་གི་སྟེང་སྤེལ་ཏེ། འདི་ནི་སྲིད་འཛིན་ཞི་ཅིན་ཕེན་དམར་ཤོག་ཚོགས་པའི་སྲིད་སྟེགས་སྟེང་བསྡད་ནས་མི་དམངས་བཅིངས་འགྲོལ་དམག་གི་དམག་དཔོན་ཟུར་བ་ཞོ་ཚེ་ཧྭའུ་ཡི་ཉེས་མིག་བགྲངས་པ་ཐོག་མ་ཡིན་རབས་གླེང་གི་འདུག མ་ཟད་དེང་སྐབས་མི་དམངས་བཅིངས་འགྲོལ་དམག་ཁུལ་ནས་དགོངས་པ་ཞུས་ཟིན་པའམ། ད་དུང་ལས་གནས་སུ་འཇུག་བཞིན་པའི་དཔོན་རིགས་ཚོར། མི་དམངས་བཅིངས་འགྲོལ་དམག་ནང་ལྐོག་ཟ་རུལ་སུངས་ཀྱི་གནད་དོན་ཚབས་ཆེ་བར་བརྟེན། དམག་རྒྱག་གི་སྟོབས་ཤུགས་ལ་ཤན་ཤུགས་ཚབས་ཆེན་ཐེབས་ཀྱི་ཡོད་པའི་ཉེན་བརྡ་བཏང་འདུག
རྒྱ་ནག་གི་དམག་དོན་དབྱེ་ཞིབ་པ་ཚོས་བརྗོད་དོན་ལྟར་ན། ༡༩༩༠ ལོ་ནས་བཟུང་རྒྱ་ནག་གཞུང་གིས། དམག་ཁུལ་གྱི་ལྐོག་ཟ་རུལ་སུངས་ལ་དྲག་གནོན་ཤུགས་ཆེན་བྱས་ཏེ། མི་དམངས་བཅིངས་འགྲོལ་དམག་གི་དམག་ཆས་ཉོ་འཚོང་ལས་རིགས་ལ་བཀག་སྡོམ་བྱེད་ཀྱི་ཡོད་ནའང་། རྒྱལ་ནང་གི་དམག་དོན་ཞིབ་བཤེར་དང་སྙོམས་སྒྲིག་ལས་གཞི་འཐུས་ཤོར་བྱུང་བའི་རྐྱེན་པས། ཉེ་བའི་ལོ་ངོ་འདི་དག་རིང་རྒྱ་ནག་མི་དམངས་བཅིངས་འགྲོལ་དམག་རྒྱལ་ཁབ་ཀྱི་དཔལ་འབྱོར་འདུ་འགོད་ནང་ཚུད་ཡོད་འདུག
