ཚེ་རིང་རྡོ་རྗེས།
སྐྱེས་ཆེན་དམ་པ་ཁྱེད་ཉིད་བཟང་སྤྱོད་དང་ཞི་བདེ་ཁོ་ནའི་དོན་དུ་འཚོས་ཏེ། རང་གི་ཡོད་ཚད་གཞན་དོན་དུ་བློས་གཏོང་བའི་ཚེ་ན། ཀླ་ཀློ་དམར་པོས་དོན་མེད་ཉེས་འགེལ་བྱས་ཏེ་ཚེ་བཙོན་ལ་བཅུག བོད་གཞིས་བྱེས་གཉིས་དང་འཛམ་གླིང་གི་ཡུལ་གྲུ་ཁག་ཏུ་བདེན་སྐྱོབ་སྐད་འབོད་མ་བྱས་བསམ་པ་མེད་ཀྱང་། ང་ཚོ་སྟོབས་ཤུགས་ཞན་དྲགས་པས་ཁྱེད་ཉིད་བསྐྱབས་མ་ནུས།
ཀྱེ་མ། བོད་མི་རླབས་ཆེན་རྣམས་ནི་གཅིག་འཕྲོར་གཅིག་བལྟས་བལྟས་རིག་རིག་ལ་རྩ་མེད་གཏོང་གིན་འདུག ཀླ་ཀློ་དམར་པོས་གདུག་རྩུབ་ཚད་མེད་འདི་འདྲ་བྱེད་ཕོད་པ་རྒྱུ་མཚན་ཅི་ལ་ཐུག འཇིག་རྟེན་འདིའི་རྒྱུ་འབྲས་ཀྱི་བློ་མིག་ཞར་བ་འདྲ། ཞིབ་ཏུ་བསམས་ན། སྟོབས་འབྱོར་ཅན་ཕལ་ཆེ་བས་རང་རེ་ལྟ་བུའི་ཉམ་ཆུང་དྲང་བདེན་བསྐྱབས་མ་མྱོང་ལ། སྐྱོབ་ཀྱང་མི་སྲིད། ད་ཆར་ཁོ་ཚོ་ནི་ཚོང་འབྲེལ་གྱི་ཁེ་ཕན་ཉི་ཚེ་བ་ཞིག་གི་ཆེད་དུ། ཀླ་ཀློ་དམར་པོ་ཚང་གི་ལྟག་སྒོ་ན་འཚང་ཁ་ཤིག་ཤིག་བྱེད་ཀྱིན་འདུག
གནས་བབ་དེ་འདྲའི་འོག་ནས་ཁྱེད་ཉིད་གང་འདོད་དུ་མུན་བཙོན་ལ་བཅུག་སྟེ་མངོན་སུམ་འཛེམ་མེད་ཀྱིས་བཀྲོངས། ཐ་ན་སྐུ་ཕུང་ཡང་བཙོན་རའི་ནང་དུ་བཙན་གྱིས་སྦྱིན་སྲེག་བྱས་པས་མི་ཚད། མྱ་ངན་གྱི་མིག་ཆུ་འདོན་བཞིན་ཁྱེད་ཀྱི་སྐུ་བདག་ལ་འོངས་པ་རྣམས་ལ་མེ་མདའ་ཡིས་བསུ་བ་བྱས།
སའི་གོ་ལ་འདིའི་སྟེང་ན་གཉའ་གནོན་མྱོང་འདོད་མི་སུ་ཡང་མ་མཆིས། འོན་ཀྱང་། བདེན་པ་དང་རང་དབང་། དམངས་གཙོ་སོགས་ཀྱི་གཤེད་མ་ཀླ་ཀློ་དམར་པོ་རྒྱ་ཡན་དུ་བཏང་ན། འགྲོ་བ་མི་ཐུན་མོང་གི་བདེ་སྐྱིད་ལ་ཆག་ཆེན་ཉམ་ང་འབྱུང་བར་མཐུན་རྐྱེན་སྤྲད་པ་མིན་ནམ།
དུས་རབས་སྔོན་མར་རང་གི་རྒྱལ་ཁབ་ཁོ་ན་བསྲུངས་ཏེ་གཞན་གྱི་བདེ་སྡུག་སྣང་མེད་དུ་བཞག་པར་བརྟེན། སྲིན་པོ་མི་གཟན་མའོ་ཙེ་ཏུང་དང་། ཧི་ཐི་ལི། སི་ཏ་ལེན་སོགས་ཀྱིས་གླགས་རྙེད་ནས། འགྲོ་བ་མིའི་རིགས་སྤྱི་ལ་གནམ་ས་ཆ་ལང་བརྡབ་པ་ལྟ་བུའི་སྡུག་བསྔལ་བཟོས་པ་དེ་ཁྱེད་ཚོས་བརྗེད་སོང་བ་འདྲ། ད་ནི་ངའི་སེམས་ལ་ཞེད་སྣང་ལངས་པ་དང་། སའི་གོ་ལའི་ཁྱིམ་ཚང་ཆེན་པོ་འདི་བདེ་འཇགས་མིན་པའི་ཚོར་སྣང་ཇེ་ཆེར་གྱུར་སོང་།
